Скопски сообраќај (општо)

 

Изградбата на шест магистрални улици е спас од сообраќајниот хаос

Сообраќајница под плоштадот и продолжувањето на „Климент Охридски“ се дел од решенијата

Сања Наумовска


Решението за хаосот во сообраќајот во Скопје е изградбата на шест магистрални улици кои се зацртани во ГУП, смета сообраќајниот инженер Пламен Гавровски. Станува збор за подземната сообраќајница под плоштадот, продолжение на „Климент Охридски“ кон Кале, „Јужен булевар“, „Илинденска“, „Првомајска“ и „Крушевска Република“. Всушност, се работи за дообликување на примарната сообраќајна мрежа со која мора да се обезбеди подобра комуникација на центарот на градот со населбите и периферијата.

Според Гавровски, во фокусот на интересирање на градските власти, кои работат стихијно и неплански, засега се само две сообраќајници, „Илинденска“ и „Првомајска“. Нивното проширување драстично ќе го олесни сообраќајот источно и западно од центарот, во правец кон Карпош, односно кон Пинтија и Драчево. Сепак, остануваат уште неколку критични точки кои бараат брзо и ефикасно сообраќајно решение.

Моментно, покриеноста на Скопје со примарна мрежа изнесува околу 50 проценти од предвиденото, што е под просекот во однос на вкупната површина на градското градежно земјиште. Така, од магистралните улици за брзини поголеми од 60 километри на час, таканаречени градски автопати, е направен само булеварот „Александар Македонски“ во должина од седум километри и „Никола Карев“, кој до раскрсницата кај Бит-пазар е булевар, а оттаму до Момин Поток е направен само со половина профил од коловозот.

Во Градот Скопје потврдуваат дека моментно се работи на неколку проектни решенија, а до крајот на мандатот на градоначалникот Трајановски се планираат и уште неколку други нови сообраќајници или, пак, проширување на постојните.

„Во тек е изработка на проект за ’Теодосиј Гологанов‘ со изградба на кружен тек кај Католичка црква. За реализација на овој проект се планираат средства во буџетот за 2010 година. Исто така, планска документација се изработува и за проширување на улицата ’Првомајска‘, како и за ’Илинденска‘, која во иднина треба да биде булевар“, информираат од Градот.

Останатите брзи сообраќајници, кои се зацртани во Генералниот план, засега не се на дневен ред пред градските власти. Булеварите „Македонија“, односно „Јужен булевар“ и „Крушевска Република“ со вкупна должина од дваесетина километри се' уште не се изградени.

„Мора да се размислува и за денивелирање на сообраќајот, бидејќи моментално сите решенија што ги презема Градот Скопје, како изградба на нови сообраќајници или, пак, регулирање на сообраќајот со зелен бран се однесуваат на сообраќај на ниво. Сепак, ГУП предвидува и денивелирани сообраќајници на неколку локации, за чија реализација мора поскоро да се размислува“, смета Гавровски.

Едно од тие решенија е и клучката „Детелинка“ на Бит-пазар, која според мислењето на скопјани веднаш даде резултати во растоварувањето на сообраќајот. Слично решение се предлага и за раскрсницата кај Судската палата, која и покрај неколкукратните проширувања, повторно е блокирана од автомобили.

Гавровски ја посочува и подземната сообраќајница под плоштадот „Македонија“, која треба да ги поврзе „Партизанска“ и „Кузман Јосифовски-Питу“, кај Народната банка, со што голем број автомобили ќе имаат можност брзо да го заобиколат централното подрачје. Оваа сообраќајница би требало да биде дополнета со објекти и паркинзи под плоштадот. И продолжувањето на булеварот „Климент Охридски“ предвидува издигнување на сообраќајницата на мостовска конструкција кај Соборниот храм, која поминува над „Илинденска“ и Вардар и се спојува со „Никола Карев“.

„Овие две важни сообраќајни артерии се исклучително скапи, но и неопходни за Скопје, кое за десетина години може целосно сообраќајно да се парализира“, смета Гавровски.

Краткорочно решение за метежот на раскрсницата кај Соборниот храм може да биде и проширување на коловозот со уште една лента на двете страни на булеварот „Партизански одреди“. Повлекувањето и намалувањето на пешачките триаголници ќе овозможи трета лента за поминување на автобусите и другите бавни возила.

Кај магистралните улици за брзини под 60 километри на час, кои се и главните сообраќајни артерии на градот, од планираните 67 километри во Генералниот план, направена е само третина, додека, пак, од вкупно 167 километри собирни улици, изведени се половината.