Изградбата на „Илинденска“ го натрупа Дебар Маало со возила

Потегот од фонтаната до „Рузвелтова“ ќе биде затворен уште најмалку две недели

Сања Наумовска

„Илинденска“ од фонтаната „Лотос“ до „Рузвелтова“ ќе биде затворена најмалку уште две недели. Сообраќајот дотогаш ќе се одвива по околните улици во Дебар Маало, каде што деновиве владее вистински сообраќаен хаос. Метежот се пренесува и на „Партизанска“ и на проодниот дел на „Илинденска“. Сепак, поради кусиот временски период, градските власти не размислуваат за нови сообраќајни решенија низ уличките во Дебар Маало.

„Нема да се воведува евентуално еднонасочно одвивање на сообраќајот заради олеснување на движењето на возилата, бидејќи, во зависност од временските услови, од 1 јуни очекуваме да се врати стариот режим на сообраќај на затворениот дел од ’Илинденска’“, информираат од Градот.

Нов сообраќаен режим има и на второто градско градилиште, булеварот „Србија“. На потегот кај бензинската пумпа на „Макпетрол“, возилата се пренасочуваат поради завршување на средишниот појас од зеленилото на новиот булевар. Деновиве се работи и на уредување на сервисната улица што води покрај пругата, заради полесно вклучување и исклучување на возилата што доаѓаат од населбата Лисиче.

На „Илинденска“ во тек е трасирањето на новите коловозни ленти, информираат градските власти. Истовремено, се обезбедува подземната инсталација, се поставуваат сливниците за атмосферските води, а подлогата се тампонира. Во текот на изминатата недела по должината на новите коловозни ленти се поставуваа и рабници. Се очекува до крајот на месецов да завршат градежните работи што го оневозможуваат одвивањето на сообраќајот, велат во Градот.

На булеварот „Србија“, пак, се работи на раскрсницата меѓу булеварите „Србија“, „Трета македонска бригада“ и „Дванаестта македонска бригада“. Започнато е асфалтирањето и поставувањето рабници, а истовремено ќе се асфалтираат уште 300 метри од проширувањето на „Србија“, во насока кон улицата „Првомајска“. На овој дел претходно беше направена заштита на подземната инсталација, а дел од инсталацијата беше дислоциран. Исто така, комплетно се асфалтирани првите 700 метри од проширувањето од раскрсницата со „Видое Смилевски - Бато“ до „Трета македонска бригада“. Моментно, информираат од Градот Скопје, на потегот се редат рабници, а на тротоарите и велосипедската патека се поставуваат бехатон-плочки. Вкупната должина на проширувањето на булеварот Србија изнесува 1.700 метри, за што Градот Скопје ќе потроши околу 2 милиона евра.

Одземени дворови во замена за улица

Сеад Ризвановиќ	Коментари (0)

Низ овој двор треба да поминува новата улица

Вака не било ни во турско, со овие зборови десетици семејства од општината Ченто реагираат на одлуката на општина Гази Баба да направи улица што ќе поминува низ нивните дворови.

Новата улица ќе никне за потребите на нова зграда, ќе поминува низ улиците Антон Панов и Палмиро Тољати.

„Дали некој ќе му помине низ двор, не работат со согласност, од општина работат сами како сакаат. Улицата треба да помине низ двор и да го дели на половина“, изјави Богослав Тодоровски.

Со одлуката на општината жителите губат голем дел од веќе откупените дворови за кои имаат имотни листови.

Доколку се исполни планот на општина Гази Баба проектираната улица треба да помине директно низ дворовите и ќе биде залепена до куќите на луѓето од оваа населба.

Луѓето велат нема да дозволат домовите во кои живеат со генерации да им бидат уништени.

„Гасовите од возилата денес што ќе поминат, треба се да оди во собата да го дишеме тоа. Подобро да не убијат да не постоиме како фамилија, на земјава не давам да поминува улица“, вели Блаже Јакимовски.

Од општина Гази Баба велат улицата се гради согласно деталниот урбанистички план од 2002 година, луѓето знаеле за тоа, а ќе бидат обесштетени според законот за експропријација на земјиште, бидејќи новата улица е прогласена за јавен интерес.

Сепак некои од жителите веќе добиле решенија од министерството за финансии во кои дел од приватното земјиште им е веќе одземено без никаков надомест.

„По мене е државна плачка, нека дојде било кој министер или премиерот и нека ми објасни дека ова е законски“, изјави Иван Андреевски.

Интересно е што на објектот што се гради нема табла каква што налага законот на која треба да пишува кој е инвеститор.

Од општината велат инспекциите излегле на терен, табла наскоро ќе се постави, меѓутоа ни тие веднаш не знаеја да кажат кој е мистериозниот инвеститор за кого се прави новата улица.

При секој дожд и при секое невреме жителите на Стајковци се соочуваат со огромни проблеми. Но, тоа не важи само за помалите улички, туку и за главната улица која ги поврзува Стајковци и селото Сингелиќ, каде што поради неизградената главна канализациска мрежа шахтите почнуваат да се отвораат

Предизборните ветувања останаа само на хартија. Жителите на Стајковци, како и оние од другите населени места во Општина Гази Баба, се соочуваат со најголемите проблеми, а тоа се асфалтирањето на патиштата и канализациската мрежа. При секој дожд или при невреме тие се соочуваат со огромни проблеми. Но, тоа не важи само за помалите улички, туку и за главната улица која ги поврзува Стајковци и селото Сингелиќ, каде што поради неизградената главна канализациска мрежа шахтите почнуваат да се отвораат, при што се прават огромни кратери, а за тоа никој не одговара. Овој проблем го има и улицата број "24" во населеното место Стајковци, во должина од 270 метри, каде што секоја година патот и дупките се крпат со песок, а не се асфалтира, и при секое невреме се полнат септичките јами и се прават дупки на самата улица. До кога вака, се прашуваат жителите од оваа улица.
- Навистина имаме проблем, кога врне не можеме дома да влеземе што од огромните дупки кои се полни со вода што од преполните јами. Мораме со чизми да влегуваме дома како да живееме покрај река, а не на улица. Од општината ни ветуваа дека ќе ни ја асфалтираат улицата и ќе ни го решат проблемот, но се уште чекаме. Се надеваме дека наскоро ќе се движиме по асфалтирана улица, нема повеќе само да ни ја тампонираат - вели Снежана, која живее на оваа раскопана улица.

Таа додава дека, исто така, проблем што ги мачи жителите на населеното место Стајковци и Сингелиќ е локалниот пат кој веќе е претесен за возилата и бараат општината да најде алтернатива. Тоа е локалниот пат Стајковци - Камник, со што би се растоварил и скратил патот до центарот на градот во должина од 3 км.

Се обративме до одговорните во Општина Гази Баба за да добиеме одговор на прашењето за улицата број 24" во населбата Стајковци зошто се уште не е асфалтирана како што им е ветено. Но, до затворање на весникот од нив не добивме никакво објаснување.

Кружни текови на повеќе градски крстосници

Летово треба да се изгради првиот кружен тек кај гимназијата „Георги Димитров“, каде што се сечат улиците Париска и Варшавска