Скопски сообраќај (општо)

Се надевам квалитетот ќе биде подобар од тој на Васил Ѓоргов, со оглед дека се работи за истиот изведувач, и дека грдите кабли од кабловска телевизија ги закопале под земја.

Роза Петкова

Дури шест улици во наредните два месеци ќе се раскопаат низ централното градско подрачје за да се реконструираат, за што ќе се потрошат 4,5 милиони евра, најави вчера градоначалникот Коце Трајановски. Градежните работи се уште не се завршени на улицата Мито Хаџивасилев-Јасмин и на „Мостот на револуцијата“, кај МАНУ, кои се две важни сообраќајници во централното подрачје, а градскиот татко веќе најави дека од следната недела ќе се отворат нови градилишта. Со тоа скопјани не само што нема да здивнат од метежот по половина час, што досега ги пречекуваа на овие две локации, туку воопшто пробивањето низ центарот ќе им стане невозможна мисија.
Во вторник почнува реконструкција на Партизанска, на потегот од зградата „Тифани“ до крстосницата со Рузвелтова, потоа на улицата Даме Груев зад Собрание, како и на улицата Васил Аџиларски од Собрание до мостот кај „Холидеј ин“ и оттаму до „Мавровка“. За 15 дена треба да следи реконструкција и на булеварот Крсте Петков-Мисирков од Судска палата до Бит-пазар. Во овие градежни зафати ќе има и два покрупни, а тоа е проширувањето на Митрополит Теодосиј Гологанов, кое Трајановски го најави за први или за 10 мај и реконструкција и проширување на булеварот Св. Климент Охридски во јуни. За Трајановски, ваквото нагло копање улици низ цел центар не е предизборна кампања, туку само редовна работа на локалната власт.
- Не сакам да ме вовлекуваат во предизборна кампања. Ова е работа на локалната власт. Не можеме да го чекаме летото за да почнеме со работа затоа што имаме лошо искуство со асфалтирањето во тој период - рече Трајановски.
Во спротивност на неговите зборови и на вчерашната посета на улицата Мито Хаџивасилев-Јасмин, градоначалникот беше придружуван од премиерот Никола Груевски. На прашањето од новинарите дали сега премиерот ќе се појавува на секоја улица што Градот ќе почне да ја поправа, Трајановски одговори дека тоа што Груевски дошол било само за да види до каде се работите затоа што тоа го интересирало.
Трајановски не даде конкретен одговор ниту како ќе го спречи хаосот во сообраќајот, на кој скопјани веќе се жалат, туку само апелираше граѓаните да имале трпение.
Роза Петкова

Кога работиме, не ги затвораме улиците целосно, туку дел по дел и само таму каде што се работи, што значи изградбата ќе тече под сообраќај. Затоа апелирам до граѓаните да се воздржат за периодот - порача градоначалникот.
Во исто време, наместо да завршат во предвидениот рок, Трајановски рече дека работите на Јасмин малку ќе се одложат, односно ќе траат нешто повеќе од еден месец. Викендов фирмата „Бауер“ ќе почне да го асфалтира потегот од Музејот на град Скопје до крстосницата кај „Нова Македонија“ и овој дел целосно ќе биде затворен.
За оваа улица граѓаните и досега реагираа до градските власти, за тоа што наутро и попладне чекаат по половина час во редица од едниот до другиот крај на улицата, односно од зградата на „Макпетрол“ до поранешната зграда на „Нова Македонија“.
Метеж од почетокот на неделава има и на „Мостот на револуцијата“, каде што во метежот се прави колона од „Црвен крст“ до „Веро“. Тука Градот се уште не почнал да ја поставува новата железна ограда, ниту да ги асфалтира тротоарите, па работите ќе потраат и во наредните месеци.


Свети Климент ќе се шири?


Градоначалникот Трајановски вчера не одговори јасно што подразбира под реконструкција и проширување на булеварот Св. Климент Охридски, иако директно беше прашан дали тоа значи дека улицата ќе се прави со шест ленти. Службите од градот, пак, објаснија дека реконструкција и проширување било исто и дека на улицата ќе се прави тоа што е предвидено. Со ГУП, овој булевар е предвиден со шест ленти, решение кое одамна се зборува, а ниедна градска гарнитура не го реализира. Со тоа решение се предвидува улицата да се прошири со по уште една лента од двете страни на сметка на средишното зеленило, што значи дека ќе мора да се исечат дрвјата. Дали Останува ада се види дали Трајановски ќе го повтори истото од Илинденска, па без најава ќе го соголи и овој булевар.