Скопски сообраќај (општо)

Градот Скопје успешно го заврши проектот за изградба на кружен тек меѓу булеварот Партизански одреди, булеварот Македонска војска, улицата 4.Јули и улицата Лука Геров, во општина Ѓорче Петров. Денеска /12.09.2012 година/ градоначалникот на Град Скопје, Коце Трајановски, градоначалникот на општина Ѓорче Петров, Сокол Митровски, Претседателот на Собранието на Република Македонија, Трајко Велјановски, министерот за труд и социјална политика, Спиро Ристовски и  заменик-министерот за локална самоуправа, Сашо Лазаровски, официјално ја отворија  за сообраќај новата крстосница.

- Градот Скопје го заврши овој капитален проект во предвидениот рок и реши еден од најголемите сообраќајни проблеми во оваа општина. Ова е втор кружен тек во општината Ѓорче Петров, а сакам да ги споменам и другите значајни проекти на Градот Скопје во оваа општина: Ѓорче Петров го поврзавме со обиколницата околу Скопје, ја реконструиравме улицата Волковска, го пробивме булеварот Македонска војска до стадионот, изградивме пешачка патека по кејот на Вардар... Веќе три години интензивно работиме за да го уредиме западниот влез во Скопје и да го измениме ликот на општината Ѓорче Петров на подобро. Морам да нагласам дека проектот за изградба на кружен тек меѓу булеварот Партизански одреди, булеварот Македонска војска, улицата 4.Јули и улицата Лука Геров е меѓу најголемите во Скопје, особено зашто ги решава долгогодишните проблеми на граѓаните – рече градоначалникот Коце Трајановски.

Тој додаде дека кружниот тек кај црквата „Свети Петар и Павле“ е изграден на ниво на постојниот коловоз, а во него се оформени 2 коловозни ленти, со ширина од по 4,5 метри.

Кружниот тек е асфалтиран на површина од 4 900 квадратни метри.

- На новоизградениот кружен тек кај црквата „Свети Петар и Павле“ е поставено и ново улично осветлување. Монтирани се 20 столба за осветлување со 26 светилки. Во полза на новото сообраќајно решение е изведена и нова атмосферска канализација со профил од 300 милиметри, на должина од 180 метри, којашто ќе овозможи одведување на атмосферските води. Изведена е и заштита на постојната водоводна мрежа под коловозот, на должина од 80 метри. На изградба на новиот кружен тек во Ѓорче Петров работеа екипите на АД „Гранит“. Градот Скопје во овој комплексен градежен зафат вложи околу 25 милиони денари – нагласи градоначалникот Трајановски.

За изведба на завршниот слој на коловозот на новиот кружен тек во општината Ѓорче Петров е употребена мешавина на асфалт сплит-мастикс наменет за поголемо сообраќајно оптоварување (поминување на тешки товарни возила), којшто не дозволува да се формираат вдлабнатини на коловозот. Во средишниот простор на кружниот тек е засадена трева.

Пред влезот во кружниот тек, булеварот Партизански одреди е проширен со една коловозна лента од десната страна (гледано во насока кон Новоселски пат). По должината на булеварот Партизански одреди на оваа делница се изградени тротоари со ширина до 2,5 метри коишто се покриени со бекатон-плочки. На местото на средишното зеленило на булеварот Партизански одреди е изградена жардиниера.

По должината на булеварот Македонска војска и на улиците Лука Геров и 4.Јули се оформени тротоари од двете страни, широки до 4,5 метри, коишто се покриени со бекатон-плочки.

Градоначалникот на општината Ѓорче Петров, Сокол Митровски, денеска истакна дека изградбата на овој кружен тек е голем чекор напред во унапредувањето на урбаното живеење во оваа општина.

- Ова најсовремено сообраќајно решение ги поврзува руралниот и урбаниот дел од општината Ѓорче Петров, овозможува добро сообраќајно поврзување со другите населби и придонесува за намалување на сообраќајниот метеж – рече градоначалникот Митровски.

http://skopje.gov.mk/ShowAnnouncements.aspx?ItemID=5313&mid=482&tabId=1&tabindex=0

Градоначалникот на Град Скопје, Коце Трајановски и Претседателот на Советот на Град Скопје, Ирена Мишева денеска /30.10.2012 година, сабота/ извршија увид на градежните работи на проширувањето и реконструкцијата на улица "Борис Трајковски" (поранешна Првомајска).

Градоначалникот Трајановски се осврна на градежните работи кои се одвиваат на повеќе локации во Скопје, наведувајќи дека најголемиот број од нив се во завршна фаза.

Трајановски им се извини на граѓаните за застојот во сообраќајот и побара трпение од нивна страна до завршувањето на градежните работи.

Потоа, Трајановски и Мишева извршија увид на изградбата на втората фаза од реконструкицата на булеварот "Митрополит Теодосиј Голованов", како и на новиот рекреативен парк до него кој што е со вкупна површина од 30.000 квадратни метри.

За време на овој викенд поради градежни активности целосно затворени за сообраќај се улиците "Борис Трајковски" и "Митрополит Теодосиј Гологанов", како и мостот на Реката Вардар помеѓу општините Ѓорче Петров и Сарај.

Покрај на овие локации, во моментов градежни активности се одвиваат и на улицата МАНАПО, третата фаза на булеварот "Илинден", втората фаза од улица “Козле”, како и на кружните текови на улица “Боца Иванова” во Бутел и "Лазо Трповски" во општините Бутел и Чаир.