Единствен услов за да се прави поголемата верзија на плоштадот е општината Чаир да се договори со приватните сопственици на парцелата до објектот на Македонска филхармонија да го откупи земјиштето

На плоштадот не е предвидено да се градат нови споменици

Општините Центар и Чаир одлучија да се направи проширената верзија на плоштадот „Скендер-бег“, со која тој, наместо 12 илјади, ќе зафаќа површина од 28 илјади квадратни метри и ќе се прошири до објектот на Македонската филхармонија. Од Чаир потврдија дека општината Центар се согласила со нивното барање да се направи проширената верзија на плоштадот, под услов да постигнат договор со приватните сопственици на земјиштето, каде што, според деталниот урбанистички план „Мал ринг“, се наоѓа станбена зграда.

- До крајот на идната недела би требало да биде готов основниот проект, а за еден месец и изведбениот проект за плоштадот. Во тек се и преговорите со приватните сопственици на земјиштето зад објектот на филхармонијата. Сметаме дека наскоро би требало да почне и изградбата на плоштадот - ни објаснија од општината Чаир.

Од Центар не одговорија дали ја одобриле поголемата верзија на плоштадот, иако, според најновата верзија на деталниот урбанистички план, за централното градско подрачје, во кој навлегува и плоштадот, сé уште стои маркичка за изградба на друг објект. Тоа значи дека откако официјално ќе се прифати предлогот за проширената верзија на плоштадот, ќе треба да се направи уште една измена на малиот ринг, со која ќе се избрише маркичката за станбената зграда.

Плоштадот ќе се гради по идејно решение на фирмата „Архигруп“ од Тетово, со кое е предвидено да се направат паркиралиште во подземните делови, градска тераса над веќе постојните дуќанчиња, хортикултурно да се уреди целиот простор, да се изградат и фонтана и амфитеатар во рамките на Даутпашиниот амам. Исто така предвидено е и улицата до стоковната куќа „Илинден“, која сега служи како паркинг, да се претвори во пешачка зона. Изградбата на плоштадот од страната на Македонската опера и балет и филхармонијата ќе се прави со премостување преку булеварот Гоце Делчев.
На плоштадот не е предвидено да се градат нови споменици.

Според надлежните од општината Чаир, има три причини за изградба на плоштадот „Скендер-бег“. Првиот е дека на градот му требало уште еден централен плоштад, потоа отворање на уште еден влез кон чаршијата, а со тоа и нејзино заживување и, трето, ако се пробие сообраќајница зад стоковната „Илинден“, ќе се забрани влегувањето со автомобили во тој дел од градот.