Плоштад Скендербег

Уште половина милион евра ќе се издвојат од Буџетот за новиот лик на плоштадот „Скендер-бег“, покрај 160.000 евра кои Владата веќе ги предвиде за плоштадот. Но, таа сума е наменета само за стартот на проектот, а колку точно ќе чини изградбата на целиот плоштад се уште не се открива. Изет Меџити, градоначалник на општина Чаир, на вчерашната презентација на проектот во тридимензионална анимација, истакна дека реализацијата треба да почне во мај. - Почнавме со проектна задача. Сега се работи за идејно решение, треба да има главен и изведбен проект, изведбениот проект да биде готов кон крајот на март. Со почнување на градежната сезона во мај треба да почнат и првите активности за реализација - рече Меџити. На анимацијата е прикажана и поранешната стоковната куќа „Илинден“, но на неа пишува дека е Државен универзитет во Тетово. За тоа Меџити вели дека од 28 ноември се почнати дисперзирани студии на Државниот тетовски универзитет. - Целиот плоштад „Скендер-бег“ се протега во контактната зона во Старата скопска чаршија, ни милиметар не е влезен во заштитената зона. Сето тоа што е заштитено има културна и историска вредност и нема да претрпи никакви измени - рече градоначалникот на Чаир. Според проектот, плоштадот ќе се протега до стоковната куќа „Мост“, Даутпашиниот амам, Македонската филхармонија, МОБ и стоковната куќа „Илинден“ и ќе зафаќа површина од околу 20.000 квадратни метри.