Реконструкција на Нова Македонија

Под еден кров, четири министерства и неколку државни органи

Со донесувањето на одлуката на владата, министерствата за образование и култура веќе почнале да се вселуваат во новите простории. Останатите треба најдоцна до 10 мај да бидат вселени во новите простории за чија реконструкција се издвоени 176 милиони денари

Во 14-катната зграда на поранешната НИП "Нова Македонија", која има простор од 14.000 квадратни метри, наскоро треба да се сместат министерствата за култура, образование, локална самоуправа и информатичко општество.
- Минатата недела со одлука на Владата, овие министерства, како и Секретаријатот за законодавство, Државниот архив на Македонија, ДИК, Архивот на Службата за општи и заеднички работи на владата, како и Комисијата за заштита на конкурентноста и Управата за матична евиденција треба за три недели да се сместат во зградата на поранешна Нова Македонија - велат извори од Владата.

Со донесувањето на одлуката на владата, министерствата за образование и култура веќе почнале да се вселуваат во новите простории. Останатите треба најдоцна до 10 мај да бидат вселени во новите простории за чија реконструкција се издвоени 176 милиони денари.

Со вселувањето на министерствата и државните институции во една од најпознатите висококатници во Скопје, државата конечно ќе ги намали трошоците што ги има по основа на кирии за министерствата, кои со години работат во најмени објекти.

Најмногу, вкупно девет ката од зградата, на располагање ќе има Министерството за образование и наука, кое целосно ќе се пресели во просториите од седмиот до петнаесетиот кат. Во подрумот, Државниот архив на Македонија ќе ја смести архивската граѓа. Приземјето, дел од подрумските простории и галеријата на зградата ќе ги користи Државната изборна комисија, заедно со Министерството за информатичко општество, кое ќе има простор и на вториот кат. Министерството за локална самоуправа, пак, во иднина ќе биде на вториот кат од зградата, а на третиот Министерството за култура. На шестиот кат ќе бидат Секретаријатот за законодавство и Комисијата за заштита на конкуренцијата.