Гостиварски сообраќај (општо)

Ќе се реасфалтира булеварот на влезот на град Гостивар

Гостивар, 7 јули 2014

 Поради големите оштетувања, Општина Гостивар започна со реасфалтирање на булеварот “Браќа Ѓиноски“, на влезот на градот до првиот кружен тек.

 Работите одблизу ги следеше градоначалникот Невзат Бејта заедно со неговите соработници.

“Ќе се рехабилитира и реконструира булеварот Браќа Ѓиноски до раскрсницата кај улица 101. Вкупната должина е околу 370 метри, широчината на двете коловозни ленти е по 6,8 метри. На централниот дел од улицата близу рабниците во широчина од 2 метри ќе се извади комплет асфалтот, ќе се тампонира од почеток, претходно ќе се постави основен слој асфалт од 7 цм и финалниот слој ќе се постави наеднаш“, рече Јетон Салија од Секторот за урбанизам при Општина Гостивар.

Вкупната површина на улицата која ќе се реконструира е околу 2500м2 а вкупната вредност на овој проект е околу 7 милиони денари.

Според динамиката предвидена од изведувачот, се очекува работите да завршат за 15 дена.

Сообраќајниот режим се одвива само на една коловозна лента, а на другата се изведуваат работи.

Центар за информирање

http://www.gostivari.gov.mk/web/index.php/mk/lajme-na-komuna/394-do-riasfaltohet-bulevardi-ne-hyrje-te-qytetit-ne-gostivar

Општина Гостивар почна со уривање на објекти за пробивање пат до населбата Дутло

од НОВА | објавено на: 10-11-2014 16:14:36

новинар: Зоран Димовски

Започна уривањето на куќите на улицата ЈНА во Гостивар, каде локалната самоуправа ќе гради пат кој ќе води до населбата Дутлок. Сопствениците на објектите со градоначалникот на Гостивар Невзат Бејта, постигнале договор за обештетување на нивните домови. Почетокот на уривањето неколку пати беше одложувано со протести и спречување на градежните работи од страна на жителите, поради неможноста да постигнат договор со општината околу сумата која треба да им биде исплатена како компензација за нивните куќи.

- Да точно е денеска дозволивме уривање на нашите куќи, затоа што со гостиварскиот градоначалник Невзат Бејта, постигнавме заеднички договор за обештетувања. Точната сума која треба да ја добиеме се уште не е конечно дефинирана, но се надеваме и за ова ќе најдеме заеднички јазик, вели еден од сопствениците на куќите.

Градоначалникот Невзат Бејта вели дека со пробивањето на овој пат, сообраќајот во Гостивар ќе биде значително растеретен, и гужвите во овој дел на градот ќе бидат минато.

- Ова се прави во интерес на нашето општество. Давам збор дека сопствениците на објектите ќе бидат обештетени. Денеска го отворивме најглавниот пат во Гостивар со кој населбата Дутлок ќе се поврзе со 3 средни училишта, Гимназијата, Средното Медицинско и Средното Економско училиште, новиот пат исто така ќе води и до повеќе институции, изјави гостиварскиот градоначалник Невзат Бејта.

Одлуката за отворање на патот што ќе ги поврзе улицата „ЈНА“ со населбата Дутлок беше изгласана од гостиварскиот Совет во март годинава. Во текот на денешниот ден беа урнати првите две куќи. Според најавите по расчитување на градежниот отпад ќе се продолжи со отстранување на останатите објекти.