Парк-шума Гази Баба

ПРОГРАМА НА ГРАДОТ ЗА УРЕДУВАЊЕ НА КАРАКТЕРИСТИЧНИОТ ПЕЈЗАЖ

Ќе се гради патека за нордиско пешачење во шумата Гази Баба

Пешачката патека што ќе се гради годинава ќе биде долга 720 метри, а повеќенаменската патека - 13 километри

Градските власти и годинава ќе продолжат да ја уредуваат шумата Гази Баба. На наредната седница на Советот треба да се усвои Програма за уредување на карактеристичниот пејзаж Гази Баба, со која ќе се определат финансиските средства и периодот за реализација на проектот.Градските власти објаснуваат дека ќе се уредува локалитетот кај населбата Железара и тоа врз основа на барања на жителите и во соработка со нив. Ќе се направи пешачка и мултидисциплинарна патека, ќе се постават два видиковца, односно рустик-павилјони, маси со клупи, кошници за отпадоци и друга опрема. Исто така, просторот ќе се уреди хортикултурно, а ќе се постави нова информативна табла за поважните содржини на локалитетот.

- Предвидената пешачка патека ќе биде долга 720 метри. Со нејзината изградба ќе се олесни комуникацијата на локалното население, а особено движењето кон медицинскиот објект и куќите на улица 814. Мултидисциплинарната патека ќе биде наменета за планински велосипедизам, а ќе може да се користи и за нордиско пешачење, односно пешачење со штаки. Нејзината должина ќе биде 13 километри -објаснуваат од Градот. Пред изградбата на патеките предвидено е теренот да се расчисти од самоникнатата вегетација. По завршувањето, патеките ќе бидат означени со маркирање на стеблата. Во Програмата се објаснува дека во близина на видиковците ќе бидат поставени три комплети од маси и клупи, а ќе се посадат и 20 зимзелени садници. Сумата што ќе биде потрошена за сите овие активности изнесува околу 600 илјади денари, а ќе биде обезбедена со ребаланс на градскиот буџет. Досега градските власти и јавното претпријатие „Паркови и зеленило“изградија повеќе пешачки патеки,трим-патеки, видиковци и чешми во шумата Гази Баба.

(Ј.И.)

На 102 хектари во тек е уредување на патеки во вкупна должина од 13 километри кои ќе можат да се користат не само за велосипедисти, туку и за пешачење, крос кантри трчање, а во зимски услови и за нордиско скијање. Градот работи и на подобрување на условите за престој на рекреативците

Со државно првенство во планински велосипедизам кое вчера се одржа во парк-шумата Гази Баба, Градот продолжува со промоција на оваа зелена површина и нејзино доближување до граѓаните. Од Секторот за заштита на животната средина вчера најавија старт на уредување на посточките патеки според европските стандарди, како и изградба на дополнителни павилјони и поставување на нова урбана опрема.

-Денеска промовираме три вида патеки и тоа една во должина од 4,5 километри која може да се користи за планински велосипедизам, втора патека долга 2 километри и таа е за понеискусните возачи, додека патеката за рекреативците е долга 800 метри. Целта е да се привлече што поголем број на рекреативци, кои заедно со своите семејства тука би ги поминувале викендите, вели Никола Јовановски од Секторот за заштита на животна средина. Оттаму потенцираат дека парк-шумата е под заштита на Градот од 1998 година, така што во моментот единствен проблем претставува постапка за денационализација, со која на граѓаните им се враќа имот кој всушност е во заштитено подрачје.

-Граѓаните кои го добиваат назад земјиштето треба да разберат дека се работи за заштитено подрачје и затоа или да им се овозможи изградба на спортски терени или пак, треба да се обесштетат на друг начин, велат во овој Сектор. Од Градот потенцираат дека со програмата континуирано се издвојуват средства за парк шумата, но како што велат, проблем се и несовесните граѓани кои ја уништуваат опремата, а од 450 дрвца колку што беа засадени пред две години речиси не останало ниту едно дрвце.