Цветен пазар

Градот Скопје ја заврши изградбата на новиот Цветен пазар, на локацијата спроти Домот на печатот. Градоначалникот на Град Скопје, Коце Трајановски, заменик-министерот за локална самоуправа, Сашо Лазаровски и директорот на ЈП „Паркови и зеленило“, Душан Авировиќ денеска /25.10.2011 година/ и официјално го отворија новиот Цветен пазар за граѓаните.

- Градот Скопје продолжува да работи за поубаво и пофункционално Скопје. Новиот Цветен пазар е изграден на површина од 242 квадратни метри и располага со 16 куќарки-цвеќарници. Куќарките се поставени на платформа и се наредени во два реда, по осум од секоја страна. Изградбата на куќарките чини околу 3 милиони денари и е целосно финансирана од закупците, а вложените средства ќе им бидат одбиени од закупнината што треба да ја платат за наем на просторот што го користат. Патеката меѓу цвеќарниците е покриена со бекатон-плочки. Цветниот пазар има довод на струја и е поврзан на водоводната и на канализациската мрежа. На изградбата на платформата за Цветниот пазар работеа екипи на ЈП „Улици и патишта“, а монтажните куќарки ги изгради фирмата ДПТТУ „Конструктор“ од Скопје. Екипи на ЈП „Паркови и зеленило“ хортикултурно го уредуваат просторот околу Цветниот пазар. Околу платформата, на површина од 400 квадратни метри е засадена трева, а на потегот кон булеварот Митрополит Теодосиј Гологанов ќе се засадат јавори. Екипи на ЈП „Улици и патишта“ работат и на уредување на делот на просторот наспроти Домот на печатот што е наменет за автобусите, односно постојката на автобусите со број 23, како и на паркингот што ќе го стопанисува ЈП „Градски паркинг“. Градот Скопје за реализација на овој проект, односно за изградба на платформата на којашто се поставени куќичките, за паркингот пред Цветниот пазар, за уредување на постојката на автобусот со број 23 и за паркингот што ќе го стопанисува ЈП „Градски паркинг“ од Буџетот ќе одвои околу 6 (шест) милиони денари - рече денеска градоначалникот Трајановски.

Од ЈП „Паркови и зеленило“ кое што ќе стопанисува со Цветниот пазар нагласија дека реализацијата на овој проект е пример за добрата соработка меѓу јавните градски претпријатија и цвеќарите. Задоволство од локацијата на новиот Цветен пазар и од условите изразија и од Занаетчиската комора на Скопје – секцијата на цвеќари.