build.mk » Forum: Масакр на охридскиот кеј

Датум: 22.12.2010, 09:55
Не го штитиме доволно Охрид

На градот и на Езерото му се потребни итни мерки за заштита од натамошно уништување на културните и природните реткости

Итно да се преземат сериозни чекори за да се зачуваат автентичната охридска архитектура, културните знаменитости и ендемичната природа на Охридското Езеро беше истакнато на Форумот, со кој се одбележаа 30 години од впишувањето на Охрид на листата со Светското културно наследство под заштита на УНЕСКО. Повеќе учесници на форумот сметаат дека не се почитуваат пропозициите според кои Охрид е запишан на престижната листа. Според Коста Балабанов, историчар на уметноста, еден од подготвувачите на досието со кое пред 30 години Охрид бил кандидиран за листата на УНЕСКО, им порача на надлежните институции уште еднаш и многу педантно да ги прочитаат пропозициите на УНЕСКО.

- Многу работи од пропозициите што важат за вакво културно и природно наследство веќе не се почитуваат во Охрид. Треба да се формираат стручни комисии што треба да утврдат дали охридската градска архитектура с` уште ги поседува квалитетите поради кои градот влегол на листата на УНЕСКО. Стручна комисија треба да каже до која мера не се почитува и што треба да се преземе - вели Балабанов.

Зоран Павлов, претседател на Македонскиот национален комитет при Меѓународниот совет за споменици и места (ИКОМОС), вели дека се работи за заштитата на културното наследство. Проблеми има со урбанистичката мафија, со прекумерната градба, особено во стариот дел на градот, кое е јадрото на Охридскиот регион.

- Охрид е наш и наше е да одлучиме дали ќе сакаме да имаме богатство од светски рамки или ќе се спуштиме на локално ниво - вели Павлов.

Градоначалникот на Охрид, Александар Петрески, рече дека општината се соочува со сериозни предизвици во заштитата на природното наследство.

- На Охридското Езеро се гледа повеќе како на акумулација за производство на електрична енергија отколку како на светско природно наследство. С` уште Грашница и други реки и притоки го загадуваат езерото. С` уште се загадува и од албанската страна и 30 години не се најде начин како да се пречистува езерото - рече Петрески. (Е.Е.) #

http://dnevnik.mk/?ItemID=5F8986BE5F548B4A84632CA699F8F97F