Рециклирање

Минатиот петок, ЈП Комуналец – Кичево потпиша договор со непрофитната организација “Пакомак” со цел откупување на пластика и хартија.

“Пакомак” е првата компанија во Македонија која поседува дозвола за селекција и преработка на отпад од амбалажи и 34-тата национална непрофитна организација која се приклучува кон интернационалната мрежа за управување со амбалажен отпад “ProEurope”. Од страна на оваа организација се очекува донирање на дваесетина контејнери за селекција на отпад.

ЈП Комуналец веќе постави пластични контејнери за селекција на отпад на неколку локации во градот.

– Најпрво започнавме со поставување на контејнери на одредени локации, во втората фаза ќе бидат опфатени институциите, додека во последната фаза ќе бидат поставени и пред станбените згради. Во план е и на самата депонија да се прави секундарна селекција – изјави г-нот Васко Станкоски, директор на ЈП Комуналец.

Минатата година беа наместени решетки за пластика, меѓутоа во нив се фрлаше се освен пластика. Затоа од јавното претпријатие сметаат дека најмногу треба да се работи на зголемување на еколошката свест кај граѓаните. Работејќи во таа насока, во план е подготовката на флаери, кои би се испраќале заедно со сметката за вода до сите домаќинства во Кичево.

КИЧЕВСКО ОГЛЕДАЛО

Биљана Крстеска