Виница

Виница на листата на Патоказ

http://brkajrabota.mk/lifestyle/patuvanja/13748-vinica-niz-objektivot-na-patokaz

Замислете си едно место кое во минатото оставило скапоцени траги, а сегашноста уште повеќе го разубавила и оплеменила. Тука, старата и богата македонска традиција на најубав можен начин се измешала со напредокот и современиот живот, па така сплотени заедно претставуваат една успешна приказна која во себе ги содржи сите врвни услови за живеење и работа.

Во источниот дел на Македонија, на површина од 443 км², Виница со нејзините природни убавини, археолошкиот локалитет Виничко Кале, многубројните манифестации и споменици го привлекува интересот на туристите. Токму затоа се најде на листата на Патоказ.

И има што да се види, дури и повеќе од она што ќе го прочитате во туристичката мапа на овој град. Топографски, градот Виница лежи на просторот каде се спојуваат долината и ридот на некогашната езерска рамнина-езеро кое постоело во Виничко-Кочанската котлина.

Токму оваа местоположба ја обдарила со прекрасни пејсажи кои никој нема да остават рамнодушен.

Иако зафаќа помала географска местоположба, Општина Виница располага со богат и разновиден растителен и животински свет. Богатата плодна почва овозможува одгледување на доходовни култури како ориз и пченица, а повисоките предели се користат како ливади и лојза.

Кога веќе ги споменавме лојзата, добро е да се навратиме и на легендата за настанокот на името на овој град. Името Виница потекнува од зборот вино, бидејќи подрачјето на Виница во минатото било познато по своите лозови насади. Радмило Петрович во трудот Армониа Латина дал свои толкувања за локализирање на градовите Астибо, Келендин, Армониа, Запара и Транупара. Посебно внимание е дадено на локацијата на градот Армониа, за кој смета дека е градот Виница, над кој како фортификација се издига Виничко Кале. Според него името на градот е од тракиско потекло, кое Турците кога дошле на овие простори го измениле бидејќи не го знаеле вистинското значење на името на градот. Тие го поврзале со најсличниот турски збор - Арамија (некој што прави лоши дела). Подоцна, непосредно бил преведен на локалниот јазик со исто значење Виница - Вина.

Според локалната легенда името настанало во период од неколку сушни години кога наместо со вода, куќите биле градени со вино. Сегашниот град, потекнува од Византиска тврдина, која била центар на производство со вино. Лозните насади на виничкиот рид биле напуштени по 1980 кога поактивно започнале археолошките истражувања.

На теракотните икони пронајдени на локацијата Виничко Кале, името на градот е запишано како Винеа или Винце. Има многу легенди и историски приказни за овој град, но има една која е многу интересна и највпечатлива од сите.

Големото македонско и моќно племе Пеонци го населило источниот дел на Македонија, неколку века пред нашата ера. Тоа живеело во пределот на Виница, во близина на реките Струма и Вардар. Ова племе било под власт на македонскиот владетел Филип Втори Македонски, а потоа и од неговиот син, Александар Трети Македонски. Виничко било населено од Македонци - децата на мајката Македонија, земја на Божицата Мајка, а Пеонците едно од шеснаесетте македонски племиња преставени во македонското сонце со шеснаесет зраци. Еден зрак за секое племе било симболка за прв пат во времето на Филип Втори Македонски- владетел кој ги обединува македонските племиња во една држава и за оваа постапка бил назначен и ја добил титулата Македонски - најсветлото за еден македонски владетел.

Токму оваа симболика е пресликана на градскиот плоштад. Дел од македонските ветерани на Александар Македонски се населуваат во виничко и пошироко и го пренесуваат оризот од Индија. Од историјата, а може да се види и денес, голем спомен е Виничкото кале кое лежи на југозападната периферија на Виница. Претставува тешко пристапен брег, а целиот рид е висок 40-70 метри, зарамнет на врвот и опфатен со два одбрамбени појаси. Надворешниот појас е постар, граден од камен и земја, а ја утврдувал раноантичката населба. Внатрешниот ѕид е граден со малтер и влечен во прави потези. Изграден е во времето на Јустинијан I, кој ги обновил повеќето од доцноантичките тврдини.

Местоположбата на Виничко Кале упатува на тоа дека се работи за многу значаен пункт, последен на магистралниот пат во низината и прв на ударот од спротивната страна. Најпознато е по своите уникатни и оригинални теракотни икони. Тие се пронајдени во периодот од 1986 до 1989 година и претставуваат едно од најексклузивните откритија врзани со рано-христијанската уметност во Македонија. Иако долго време не биле познати, денес, овие теракотни икони се и едно од најсензационалните археолошки откритија на Балканот.

Керамичкиот релјеф од Виница е еден од највредните уметнички дела од периодот на раното Христијанство. На локалитетот „Виничко Кале“ можат да се видат остатоци од неколку згради и од една стара христијанска црква. Оваа црква, која го зафаќа југо-западниот дел на овој локалитет, е изградена во првата половина од шестиот век.

Но, запознавањето со археолошкиот локалитет и неговата историја не би биле целосни доколку не се посети Музејот на град Виница - Теракота кој е отворен во мај 2006 година.

Убаво е да се посети Виница, но овој град нуди и убав и комфорен живот и работа за сите. Постојано се работи на модернизирање и уредување на градот, и денес може да се каже дека е еден од најуредените градови во Македонија.

Прошетката низ прекрасниот градски парк е само еден доказ дека Виница прераснува во навистина модерен град. Во поглед на локалниот економски потенцијал и расположливите стопански капацитети, Виница се вбројува во категориите на општини во развој. Во последните неколку години започнат е процесот на инвестирање на странски и домашен капитал, со што општината поинтензивно се вклучува и станува дел од светската економија.

Стремежот на Виница да ги подобри условите за живот на нејзините граѓани, се гледа во искористувањето на предностите кои ги нуди природното опкружување, но и големиот број на фабрики и производства кои се еколошки и се наоѓаат во индустриската зона на овој град. Една од домашните инвестиции, а најпозната во овој град е МакПрогрес. Тие во 90-ите години започнуваат трговија на големо со прехрамбени производи и стоки за широка потрошувачка, а денес се веќе препознатлив бренд. Со совршениот баланс на традиција, квалитетни рецептури и суровини и најсовремената технологија МакПрогрес е пример на успешност.

Уште едно слатко задоволство ќе Ви овозможи виничкиот мед, кој во овој регион го има во изобилство, благодарејќи на разновидниот растителен свет, богатите пасишта и шуми. Во Виница има многу пчелари, но најголемиот од нив е Илчо Костадиновски кој се грижи за над 200 пчелни семејства. Лоцирани се во селото Црн Камен, а добиениот мед е од мајчина душица, даб и црвена детелина.

Но за да уживате во вистинскиот мед, мора и да го препознаете истиот.

Научната дефиниција за медот е следната: “Медот е слатка храна направена од некои инсекти користејќи го нектарот од цветовите“. Но само медот произведен од медоносните пчели - родот Апис е единствен вид на мед кој се конзумира од страна на луѓето. Затоа кога ќе се спомене мед веднаш се мисли на густа, блага и ароматична материја која може да биде од бледо жолта до темно кафеава боја и има својство да кристализира и поседува караткеристична арома и вкус.

Виничкиот регион како значаен христијански центар во ранохристијанскиот период и средниот век ќе забележи 18 базилики и цркви.

Меѓу најзначајните цркви изградени во 19 и 20 век се вбројува и црквата Св Јоаким Осоговски, лоцирана во селото Јакимово. Претставува една од најубавите на територијата на Општина Виница, земајќи го во предвид тоа дека е градена во поново време. Посветена е на путиножителот Јоаким Осоговски. Црквата е изградена и фрескоживописана со иконостас направен во резба и икони со голем дел донација од граѓаните. Тие се дело на ликовниот уметник Цветков Венко од Штип. Црквата се наоѓа на одлична локација и на доминантна позиција над селото.

Средената, озеленета и чиста околина покрај убавината на црквата привлекуваат се поголем број на верници и посетители од година во година што значи дека ова место веќе претставува голем туристички потенцијал во овој регион.

Традицијата е дел од културата на секој народ,а  Македонија одсекогаш имала со што да се пофали.Фолклорниот Ансамбл Китка од Истибања е еден од амбасадорите кои ја презентираат народната култура од Виница и Македонија, преку обичаите, ората и песните изведувани преку оригинални автентични инструменти.

На планот на културата Виница вложува многу, а тоа се гледа од многубројните културни манифестации кои се организираа секоја година. Еден од најзначајните за Виница е Меѓународниот фолклоран фесивал на традиционални народни ора Истибањско Здравоживо.

Настапите, живоста на танците, нагласената динамичност, темпераментот кој маѓепсува, убавината на хармонијата и ритамот, народните носии и спектакуларноста на кореографиите, резултираат со многу фестивали, а со право може да се каже дека Китка е лауреат на многу од нив. Во организација на Домот на културата - Тошо Арсов секоја година се организира и фестивал на хумор и сатира, а учесници се реномирани сатиричари од регионот и државата.

На наше задоволство, снимањето се одржа токму во неделата кога се случуваше и фестивалот. Целиот град беше присутен на разните настани, кои се случуваа низ цела Виница. Старото кино, кафулињата, рестораните. Сите излезени да прошетаат и да бидат дел од магијата на хуморот и добрата сатира.

Ние одлучивме да ја погледнеме претставата во изведба на младата актерска група од Бугарија, која се одигра во старото кино, а дел од екипата беше младата виничка гордост Игор Дамјанов. По завршувањето на драмската академија во Бугарија, неговиот талент бил многу брзо забележан, па сега неговот име е познато и на соседната културна сцена.

Во духот на културата и традицијата е приказната и на Петрунка Костадинова, која изработува ракотворби со мотиви токму од виничкиот регион. Таа спаѓа во оние луѓе кои помагаат и овозможуваат да се зачува, негува и афирмира културниот идентитет бидејќи македонското творење има вековна традиција и бесценета вредност како богато културно обележје.

Нејзиниот дом е олицетворение на сето богатство кое може да ја презентира една земја. Со кафе и домашна баклава, топло сместени покрај огништето ја слушнавме нејзината животна приказна. Но ниту една посета не е целосна ако не се проба и доживее вкусот на традиционалната храна. Овој пат, виничката пита ни ја престави гастрономската традиција на овој град.

Наше беше задоволството да ви ја преставиме Виница онака, како што ја видовме ние. Ваше е да ја посетите и да ја почуствувате топлината на виничкото добредојде. Има што да видите, каде да прошетате и да се релаксирате. Вкусови, мириси и многу бои. Култура и историја, преку археологија и религија. Нема што нема во Виница.

Продолжува нашето патешествие наречено ја сакам и запознавам Македонија.

Напишано од авторите на патеписната емисија Патоказ
Елена Петковска
Виктор Тасевски

Pred iskupuvanjeto na tvrdinata

Водич низ фотографии за Виница

http://www.vinica-navigator.mk/vinica/#/0





Edited by Џоле - 24-Jul-2014 at 09:57