Претседателот на управниот одбор и извршниот директор на нафтоводот АМБО, Тед Фергусон, за специјализираното издание за енергетика „Платс“ изјави оти овој планиран транс-балкански нафотовод со капацитет од 750 илјади барели дневно има многу предности  во однос на проектот Бургас-Александрополис, чиј капацитет беше 700 илјади барели дневно, но кој завчера беше откажан од страна на бугарските власти од економски и еколошки загрижености.

Фергусон додаде и дека не е јасно зошто Бугарија се откажа од нафтоводот Бургас-Александрополис, но додаде и дека двата проекти се различни поради бројни причини без да елаборира.

АМБО, нафтовод чие име ги содржи почетните земји низ кои тој треба да поминува: Албанија, Македонија и Бугарија, беше конкурент на Бургас-Александрополис, за кој, пак, се планираше да биде многу покус и да поминува само низ Бугарија и Грција и со тоа се се прескокнат пренаселените Дарданели од чии две страни се наоѓа Истанбул и низ кои поминуваат многу танкери и други бродови со што се создава ризик од еколошка катастрофа.

Поддршката за АМБО е ратификувана од страна на трите земји низ кои треба да поминува, а Фергусон за истото издание минатиот месец изјави дека целосна еколошка и социјална студија ќе биде направена кога ќе се соберат доволно финансиски средства, како и дека таа треба да трае цела година. Тој, исто така, додаде и дека е сигурен оти финансискиот интерес на потенцијалните инвеститори ќе се материјализира кога предвидливи количества на нафта ќе потечат од наоѓалиштата на Црното Море во поголеми количества.

Член на управниот одбор на АМБО е и поранешниот македонски министер за инвестиции, Глигор Ташковиќ.

Инаку, во однос на откажувањето на Бугарија од гасоводот Бургас-Александрополис, во меѓународните аналитички кругови се смета дека тој е жртва на битката меѓу Бугарија и Русија во областа на енергетиката.

Двете земји имаат различни ставови и во однос на изградбата на нуклеарката „Белене“ заради која се судат пред Арбитражниот суд во Париз, а годинава имаше и недоразбирања во однос на единствената рафинерија во Бугарија „Нефтохим,“ која е во сопственост на рускиот „Лукоил,“ а која бугарските власти накратко ја затворија заради недостиг на мерачи на производството со објаснување дека на тој начин постои можност за прикривање на даноците и акцизите.

Легенда: мапи на планираните траси на АМБО (горе) и на сега откажаниот Бургас-Александрополис (долу)

http://www.plusinfo.mk/vest/25790/AMBO-e-razlichen-od-Burgas-Aleksandropolis-veli-direktorot-Ferguson