Започна првата фаза од проектот- Мултикултурен Центар

Централниот простор околу градскиот пазар од денес ќе го менува ликот. Старата градска бања и постоечките градски вециња за неколку месеци ќе треба да се трансформираат во нов објект или т.н. Мултикултурен Центар.
Градежното претпријатие “Дама 2“ стартуваше со градежните активности на проектот кој треба да допринесе во развојот и збогатувањето на мултикултурната соработка и соживот во градот.
Градоначалникот Емил Дончев и претседателот на Источниот плански регион, Драгица Здравева денес заеднички го официјализираа стартот на првите градежни активности:
ЕМИЛ ДОНЧЕВ, градоначалник на општина Виница
- Денес по завршената јавна постапка за избор на изведувач, започнуваме со проектот за реконструкција на старата турска Бања, овде треба да се изгради Мултикултурен Центар. Вредноста на проектот е околу 3 милиони денари, работиме заедно со Источен Плански
регион, а парите се обезбедени преку Бирото за регионален рамномерен развој, јас очекувам проектот да заврши за 75 дена. Планирано е изградба на сала за состаноци, две етно соби, видеопулт за надгледување на Виничко Кале .
ДРАГИЦА ЗДРАВЕВА, директор на Источен Плански регион:
- Ние како Центар и Совет поднесовме 10 приоритетни регионални проекти кои чинат околу 980 000 евра. Меѓутоа сакавме да покажеме дека имаме квалитетни проекти кои можат да се финансираат не само преку националниот буџет, туку и преку европските фондови..Од тие 10, позитивно се оценети 6, но оваа година ќе бидат исфинансирани само два, во Виница и Делчево, рече Здравева.

Отварањето на Мултикултурниот Центар се очекува да биде во месец август.