СО НОВИТЕ 330 АВТОБУСКИ СТОЈАЛИШТА

Постојките конечно ќе заличат на европски?!

ЈСП во најскоро време ќе распише јавен повик за уредување на 330 постојки на целата територија на градот. Новите постојки ќе бидат снабдени со столчиња, информативна табла со возниот ред и времето на пристигнување на автобусите, а на самите постојки ќе има простор за рекламирање

Голем број на постојките во градот на патниците не им пружаат основни услови за заштита од ветер и дожд додека чекаат автобус. Нема клупи за седење, недостасуваат табли за информирање, па дури и стреите се искршени или воопшто ги нема. Единствен знак кој укажува на тоа дека тука застанува автобус е метална шипка на која некогаш бил закачен возниот ред?! Додека од ЈСП најавуваат уредување на 330 постојки, скопјани реагираат.

- Единствено постојките во централното градско подрачје се колку-толку уредени, иако и тука нема столчиња, информативна табла, или корпа за отпадоци. Останатите постојки распоредени во скопските населби, буквално не личат на ништо, а да не зборуваме за населени места каде автобус се чека и по еден час. А токму таму е неопходна стреа и клупи каде постарите лица би можеле да седнат и да го почекаат автобусот. Ретките информативни табли, пак, или се застарени или воопшто ги нема, така што доколку не се јавите за информации во ЈСП, не можете да знаете кога ќе ви пристигне автобусот, велат револтираните граѓани.

Од ЈСП "Скопје" потврдуваат дека во најскоро време ќе се распише јавен повик за уредување на 330 постојки на целата територија на градот. Понудувачот што ќе се избере ќе мора да ги уреди постојките според Одлуката за јавен градски, приградски и меѓуопштински патнички превоз и согласно европските стандарди, но и да се грижи за нивно одржување.

- Веќе се подготвува техничка документација за распишување на тендерот, а се чека и општините да достават информација за локациите на кои треба да бидат поставени постојки. Новите постојки ќе бидат снабдени со столчиња, информативна табла со возниот ред и времето на пристигнување на автобусите, а на самите постојки ќе има простор за рекламирање. И воведување на системот за автоматска локација на автобусите на кој се работи во Градот, исто така ќе биде во функција на граѓаните и нивно информирање, велат во ЈСП и Секторот за сообраќај на Град Скопје.

Даниела ТРАЈКОВСКА

Подновувањето на автобуските постојки чека одобрениe

Повеќето општини имаат позитивен став, но во ЈСП пристигнал само одговор од Ѓорче Петров

Сања Наумовска

Опремувањето на автобуските постојки во урбаниот дел на Скопје доцни поради проблеми со доставата на потребните документи. Јавното сообраќајно претпријатие „Скопје“ пред еден месец побара одобрение од скопските општини за поставување урбана опрема на 330 автобуски постојки во урбаниот дел на градот. Иако поголемиот дел од општините велат дека позитивно одговориле и веќе ги испратиле одобренијата, во ЈСП пристигнал само одговор од Општина Ѓорче Петров.

Одобренијата се важни затоа што без нив не може да почне вториот дел од проектот- распишување тендер за приватен партнер со кој ќе се уредат постојките, велат во ЈСП. Оттаму се задоволни од позитивниот став на општинските власти и се надеваат дека проблемите од административна природа и доцнењето на доставата нема уште долго да ја пролонгираат реализацијата на проектот. Во една боја и со иста опрема ќе се уредат автобуските постојки од Сарај до Драчево и од Шуто Оризари и Радишани до Пржино.

Во Општина Карпош велат дека се задоволни од иницијативата на Градот и на ЈСП за унифицирање на автобуските постојки. Во општината има 40 постојки за кои Карпош позитивно се изјаснил и одобрението веќе е пратено до ЈСП. Истото го тврдат и во Општина Бутел, каде што велат дека веќе се уредени сите улици и тротоари каде што ќе се поставува урбаната опрема. Позитивен став имаат и општинарите од Гази Баба, додека во Аеродром барањето се' уште се разгледува. Во Општина Центар комуналната инспекција е на терен и ја утврдува состојбата на автобуските станици, бидејќи, како што велат во барањето, не е содржан елаборат за идниот изглед и водот на опремата која ќе се поставува на постојките. Заради тоа, општинарите бараат состанок со надлежните во Градот или во ЈСП. Во Чаир, пак, велат дека од ЈСП воопшто не добиле барање за издавање одобрение.

„Предвидена е димензијата и видот на опремата која ќе биде поставена на секоја автобуска постојка и која ќе биде унифицирана за целиот град. Тоа секако ќе бидат настрешниците, информативните табли со карта на градот и сите други информации за превозот, клупа, кошница за отпадоци, а на одредени станици каде што ќе има место и телефонска говорница и некои други урбани елементи“, вели Јован Христовски, раководител на Секторот за сообраќај. Тој нагласува дека важен дел од секоја постојка ќе биде и просторот за рекламирање, кој всушност ќе му се даде на приватниот партнер на користење, а дел од профитот ќе добива и ЈСП.

Според надлежните во Градот во непосредна близина на постојките се планира подигање на типизирани киосци во кои би се продавале весници и кафе. Сепак, во Градот признаваат дека реализацијата на овој проект, кој беше одобрен и од градските советници, запна во административната преписка на релација Град - општините

Скопјани наскоро ќе имаат можност автобусите да ги чекаат на постојки кои конечно ќе бидат опремени според европските стандарди. Според надлежните во Градот, патниците кои ќе чекаат на постојките ќе имаат дури и можност да купат весник и кафе, со оглед дека во непосредна близина се планира подигање на типизирани киосци во кои би се продавале весници и кафе. Сепак, во Градот признаваат дека реализацијата на овој проект кој беше одобрен и од градските советници запна во административната преписка на релација Град - општините, поради што и проектот за јавно приватно партнерство во опремувањето на постојките, кое треба да го реализира Јавното сообраќајно претпријатие "Скопје", доцни.

- Во план е да се заменат стреи на 330 постојки. Тие истовремено ќе бидат целосно снабдени со урбана опрема, односно клупи, корпи за отпадоци, а ќе има и информативни табли со мапа на градот и информации за линии и времето на пристигнување и заминување на автобусите. Постојките ќе бидат типизирани, односно во иста боја и со исти димензии, а во нивна околина се планира да бидат поставени и телефонски говорници, трафики кои исто така ќе бидат унифицирани и во кои ќе се продаваат весници. Дури се планира за потребите на патниците да се изградат и продавнички за самопослужување и кафетерија по принцип на бензински пумпи, вели градоначалникот на Скопје, Трифун Костовски.

Додека според градонажалникот, локациите се веќе одредени и се чека на дозвола од општините, оттаму посочуваат дека тие веќе неколку месеци, согласно процедурата која важи за поставување на времени објекти, чекаат мислење од Градот?! Во ЈСП, пак, велат дека веднаш по добивањето на сите согласности, ќе биде распишан и јавен повик за избор на фирма партнер која ќе ги уредува постојките.

- За обновување на автобуските постојки, според нашите проценки, потребни се околу 1,5 милиони евра, средства што претпријатието ги нема. Приватниот партнер, пак, кој би ги презел постојките, би добил 1,3 милиони евра годишно од издавање на рекламен простор, кој исто така би бил составен дел од постојките. Притоа, 15 отсто би биле наменети за ЈСП, во чија сопственост по истекување на договорот кој би се потпишал на неколку години, постојките и целата опрема би останувале во сопственост на ЈСП и Градот.

http://vecer.com.mk/?ItemID=528EAC01BA352B4B8DF0911FF9F78431

Јавното сообраќајно препријатие деновиве отпочна со редовната активност за бојадисување на постојните автобуски постојки низ градското подрачје. Од претпријатието ни појаснија дека фарбањето на избледените столбови, стреи и трафики се редовна активност на претпријатието, кој во овој дел од годината со нивно префарбување се заштитуваат од претстојните временски непогоди. Прва на удар беше автобуската Тифани, која се наоѓа во центарот на градот на улицата Даме Груев.

http://vecer.com.mk/?ItemID=ED06FCDCF1BCDF49BC2ED6594D431452

Скопјани чекаат нови автобуски постојки

Добро е што има барем натстрешник да не врне, но нема каде да седнат старите лица додека чекаат автобус, вели жител од населбата Ченто, чекајќи на стојалиштето да пристигне автобусот број 65.Ова е само еден од многуте примери за неуредени автобуски постојки во Скопје, без возен ред, па дури и без натстрешници. И центарот не е поштеден иако барем тука се очекува подобра слика за градот. Може да се забележат автобуски постојки со искршени натстрешници и заштитни пластични страни или воопшто без нив, а во ниту една од нив нема клупа каде што би можеле постарите да одморат додека го чекаат автобусот

Јавното сообраќајно претпријатие „Скопје“ покрена иницијатива да се обноват 330 автобуски стојалишта во урбаните делови на градот, пред се', во центарот, но засега таа не е реализирана. Причината за тоа според раководството на ЈСП е тоа што на нивното известување упатено до сите општини за добивање согласност за реконструкцијата и обновата, позитивно одговорила само Општината Гази Баба. Тоа значи дека за одреден период, скопјани и понатаму ќе мора да бидат изложени на дождот, снегот или на жешкото сонце додека чекаат автобус, а старите изнемоштени лица ќе мора да чекаат стоејќи.

- Според Законот за градба, општините треба во својата програма да ги вметнат автобуските стојалишта како привремени објекти и да се согласат да ни ги отстапат на времено користење и стопанисување - објаснува Александар Бошковиќ, директор на ЈСП.
Тој додава дека им е потребен документ, односно извод од детаљниот урбанистички план со дефинирање на локациите на автобуските стојалишта и нивниот број за да може да почнат со реализирање на проектот.Од друга страна, скопските општини се со спротивно тврдење и велат дека позитивно одговориле на барањето на ЈСП, но дека Градот треба да даде повратен одговор, бидејќи дел од постојките што треба да се уредуваат се на улиците што се во надлежност на Градот.

- Ние одговоривме на писмото од ЈСП со барање претпријатието да дефинира кои и колку постојки ќе се реконструираат во Општината Кисела Вода, бидејќи на нашата територија има вкупно 100 - вели тамошниот портпарол Тони Чуповски. Тој објасни дека тоа го побарале од ЈСП за да може потоа да му издадат извод од ДУП, каде што треба да се вметнати овие постојки за да може да се изведуваат најавените активности, но дека досега од непознати причини немаат одговор.

- Ние одговоривме дека сме заинтересирани за реконструкцијата на автобуските стојалишта, но улиците каде што треба да се реконструираат се надлежност на Градот, па затоа оттаму треба да дадат позитивен сигнал - вели Момо Николовски, портпарол во Општината Ѓорче Петров.. Сличен одговор дадоа и општините Бутел, Карпош и Чаир. Од Градот велат дека активностите за уредување на постојките треба да ги спроведе ЈСП и дека се очекува годинава да бидат издадени сите потребни дозволи за да почне уредувањето.

- Советот на Град Скопје лани донесе Правилник за уредување на автобуските постојки и со него генерално се утврдуваат стандардите на урбаната опрема и привремените објекти што ќе бидат дел од уредувањето на 330 стојалишта. Овој документ претставуваше појдовна основа ЈСП понатаму да ја преземе севкупната активност за регулирање и уредување. Според информациите од ЈСП, постапката за добивање на одобренија од општините е отворена и се очекуваат дозволите за преуредување- велат од Одделението за односи со јавноста во Градот. Граѓаните се најпогодени од препирки меѓу ЈСП, општините и Градот.Според овој проект, автобуските стојалишта треба да бидат унифицирани, со иста боја и димензии и натстрешници, на нив да има истакнато информативни табли со возниот ред и со карта на градот, како и клупа и канта за отпадоци. На некои од нив ќе има место и за телефонски говорници. Ќе биде обезбеден и простор за рекламирање, кој всушност ќе му се даде на приватниот партнер на користење, а дел од профитот ќе добива и ЈСП. Во градот има вкупно 960 автобуски стојалишта, од кои во централното градско подрачје 330.

Ќе се обноват 330 автобуски постојки со јавно-приватно партнерство

На постојките ќе има електронски информативни табли за возниот ред на автобусите

Затворен влезот на терминалот под Транспортен за приватните автобуси

ЈСП ја спушти рампата, бидејќи приватниците одбивале да плаќаат за терминалот

Снежана Калабакова

Автобусите на приватните превозници од здруженијата „Слобода превоз“ и „Мак-експрес“ вчераутро наидоа на спуштена рампа на терминалот под Железничката станица. Јавното сообраќајно претпријатие им го затворило влезот затоа што претставниците на двете претпријатија одбивале да плаќаат за користење на просторот, за кој ЈСП ги намирува трошоците за одржување на хигиената, за вода, струја... Од ЈСП велат дека Транспортниот центар го добиле на управување од Градот и тие плаќаат за негово одржување, па поради тоа сосем логично е да плаќаат и приватниците кои, исто така, го користат просторот. Но, и покрај двете опомени, приватните здруженија го пропуштиле крајниот рок за потпишување на договорите за користење на терминалот. Тоа, пак, се жалат од ЈСП, јасно кажува дека и натаму сакаат да ја продолжат старата практика да го користат терминалот, а да не плаќаат за тоа ниту денар. Вчера три часа откако „Мак-експрес“ го потпишал договорот, за него рампата беше крената, додека првиот човек на „Слобода превоз“, Ленин Јовановски, категорично одбива да стави потпис за плаќање месечен надомест за користење на терминалот. Неговото образложение е дека тоа е незаконски, без одлука на градските советници и без знаење на градоначалникот, и дека тоа самоиницијативно го прави директорот на ЈСП.

„Ние го одржуваме просторот и логично е дека за тоа имаме одредени трошоци, кои на годишно ниво изнесуваат 4,5-5 милиони денари. Само стотина евра месечно треба да плаќа ’Мак-експрес‘, зашто користи 1,5 бокс и од 200 до 250 евра ’Слобода превоз‘ за користење на 3,5-4 бокса за автобусите. Тие мора да го намират својот дел за одржување на хигиената, за користење на тоалетите, за чуварските служби... Досега не плаќаа ниту денар, а ние уредно им доставивме договори да потпишат. ’Мак-експрес‘ вчера потпиша и за него ја кренавме рампата“, вели Александар Бошковиќ, генерален директор на ЈСП „Скопје“.

Директорот на „Слобода превоз“, Ленин Јовановски, категоричен е дека однесувањето на првиот човек на ЈСП е самоволно и дека без одлука на Советот им се спуштени рампите. Доставените договори за плаќање месечен надоместок за одржување на терминалот што го користи „Слобода превоз“ се без правна основа, па тој ќе бара разрешница на проблемот во Градот.

Но, од Градот, пак, се категорични дека „Слобода превоз“ ќе мора да си ги намири трошоците ако сака и натаму да го користи терминалот.

Тешко до нови автобуски стојалишта

Досега од ветувањата за поставување нови постојки има само букви на хартија, односно подготвени студии и елаборати, кои останаа во фиоките на градската администрација, а на терен е се' полошо

И покрај ветувања на тројца градоначалници дека ќе постават униформирани автобуски постојки, скопјани и понатаму автобусите од јавниот превоз ги чекаат стоејќи, најчесто без заштита од ветер, дожд или сонце и без информативна табла за возниот ред. И Ристо Пенов и Трифун Костовски претходно ветија, но не му донесоа на градот нови постојки, а сега и Коце Трајановски се нафаќа да го реши проблемот. Досега од ветувањата има само букви на хартија, односно се подготвуваа студии и елаборати, кои останаа во фиоките на градската администрација, а на терен е се' полошо.

- Болна сум, а автобус морам да чекам стоејќи сонце или на дожд. Морам редовно да доаѓам на клиника на терапија. Редно е конечно да се уредат постојките и да се стават клупи за седење. Тоа ќе биде од корист и на патниците во автобусите, но и за сите други граѓани, бидејќи ќе заличи градот - вели една постара скопјанка, која чекаше автобус со број 50 на последната автобуска станица кај Клиничкиот центар.

Проектот за уредување и унифицирање на 329 стојалишта во центарот на градот, кој беше најавуван пред три години од поранешниот градоначалник Костовски и поранешниот директор на ЈСП „Скопје“, Орце Георгиевски, пропадна поради немање пари и поради тоа што Јавното сообраќајно претпријатие не ја добиваше потребната согласност од општините. Тоа го потврдува и сегашниот директор на ЈСП, Александар Бошковиќ, кој вели дека проектот се одолжува затоа што општините воопшто не им одговориле на нивното барање за согласност за реконструкцијата. Единствено позитивно се изјаснила Општината Гази Баба.

- Според Законот за градба, општините треба во својата програма за работа да ги вметнат автобуските стојалишта како привремени објекти и да се согласат да ни ги отстапат на времено користење и стопанисување. Потребни ни се документи, односно изводи од детаљните урбанистички планови со дефинирање на локациите на автобуските стојалишта, за да почнеме да го реализираме проектот и да објавиме јавен повик за избор на фирма што ќе ги уредува стојалиштата - вели Бошковиќ.

Според проектот, стојалиштата требаше да бидат со унифициран изглед, бојосани во иста боја, со исти настрешници. На секое стојалиште требаше да се постават информативни табли со часот на пристигнувањето на автобусот, возниот ред и со карта на градот, како и клупа и корпа за отпадоци. На некои стојалиште беа предвидени и телефонски говорници. Исто така, на секое стојалиште требаше да биде обезбеден и простор за рекламирање.

Покрај постоечкиот проект, градските власти велат дека сега е во тек јавен оглас за изработка на Елаборат за утврдување на микролокации на автобуските стојалишта и информативни панели за патници во реално време.

- Во тек е евалуацијата на понудите и за сите останати детали граѓаните ќе бидат информирани по завршувањето на јавната набавка - велат од Градот.

Во јавниот оглас, кој може да се види на сајтот на Градот, стои дека понудите можеле да се доставуваат најдоцна до 7 септември, за кога е определено и нивното отворање.

- Штом ќе биде готов елаборатот, Советот на секоја општина треба да го одобри. Понатамошната постапка ќе се препушти на ЈСП, чиј Управен одбор има донесено одлука за јавно-приватно партернство - велат од Градот.

Од ЈСП објаснуваат дека во елаборатот ќе бидат наведени 329 постојки во центарот на градот и уште 900 постојки на приградските линии. Точно ќе се знае во која општина колку автобуски постројки ќе постојат. Откако општините ќе дадат согласност, тие ќе влезат во програмите за работа на општините.

- На тој начин автоматски добиваме правен субјективитет. Со тоа што дел од автобуските постројки ќе влезат во општинските програми, општините автоматски на ЈСП му го пренесуваат правото на користење и стопанисување. Во таа фаза со Градот ќе одлучиме дали ќе го реализираме проектот сами или пак со јавно-приватно партнерство. Планираме на тие стојалишта да има клупи, настрешници и рекламен простор, преку кој ќе комерцијализира приватниот партнер. На ваков начин се уредени автобуските стојалишта во Виена, Белград, Загреб итн - вели Бошковиќ.

Тој информира дека Координативното тело на градоначалници донело заклучок со кој елаборатот требало да биде изработен уште во мај, но не се надева дека целата процедура би се завршила до крајот на годината.

- Се надевам дека работата ќе се забрза и нема да има повторно кочење, бидејќи на последните две седници на Координативното тело на градоначалниците, на сите им беше укажана потребата од нивната согласност. Колку што сум запознаен, се водат разговори и со градоначалниците на околните општини, како што се Илинден, Петровец итн - вели Бошковиќ.

Во градот Скопје има над 1.200 автобуски стојалишта, од кои 329 се во центарот, а другите се на периферијата на градот или во приградските населби.

Во градот Скопје има над 1.200 автобуски стојалишта, од кои 329 се во центарот, а другите се на периферијата на градот или во приградските населби.

Охрид ќе добие нови автобуски постојки

Во 2010 година Охрид ќе добие 13 современи автобуски постојки, 40 клупи за седење, 300 корпи за отпадоци, 20 жардиниери за цвеќе и нови пепелници. Ова е предвидено со програмата за поставување на урбана опрема која ја усвои Советот на Општина Охрид. Според неа, со цел да се подобрат условите за урбано живеење во градот, локалната самоуправа, ќе издвои околу 37.000 евра.

За автобуските постојки ќе се потрошат околу 11.000 евра, а за новата урбана опрема околу 20.000 евра. Останатите пари кои се предвидени за разубавување на јавните површини, Општината ќе ги вложи за одржување и поправки на веќе постојната урбана опрема. (Е.Е.)

Првите стојалишта најверојатно ќе бидат пуштени во употреба до крајот на годинава

Несредените автобуски постојки во Скопје се стар проблем на Јавното сообраќајно претпријатие Скопје. Дел од постојките се поставени на диво, без евиденција или дозвола, бидејќи според Законот за градба тие треба да бидат вцртани во деталните планови како времени објекти и за нив општините треба да дадат согласност дека ги отстапуваат на времено користење. Од друга страна пак, скопјани додека чекаат автобус, немаат каде да се засолнат од снег, дожд, сонце, ниту пак каде да седнат.
- Нема никакви услови, овде во Центар, а замислете какое во Припор, каде што живеам. Таму на улица чекаш. Сум бил во Љубљана, таму брате, да ти е мерак да чекаш автобус, вели пензионерот Томе Петрев.

Генералниот директор на ЈСП, Мишо Николов, информираше дека уредувањето на станиците е една од приоритетните активности на Јавното претпријатие и на Град Скопје, што ќе се реши со јавно-приватно партнерство.
- Во моментов фирма избрана на тендер изработува студија за микролокации во сите скопски општини која би требало да биде промовирана до крајот на месецов. На тој начин сите постојки ќе се официјализираат и ќе се проектираат во зависност од локацијата каде се наоѓаат и во зависност од фреквентноста на сообраќајот. Така, сите стојалишта ќе добијат унифицирани настрешници, клупи и корпи за отпадоци, информативни табли со возниот ред и карта на градот, а оние каде што сообраќаат поголем број возила, ќе добијат билетарници и киосци, информираше Николов. Студијата за микролокации, појаснува тој, ќе биде основа за спроведување на постапката за јавно-приватно партнерство.
- Тоа значи дека постојките ќе ги градат приватни фирми кои ќе имаат задача да ги постават и информативните панели на кои ќе се покажува за колку време ќе пристигне автобусот. Тие чинат 4000 евра по парче, сума која ЈСП реално не може да ја обезбеди. За возврат концесионерите ќе го добијат атрактивниот простор за рекламирање, вели Николов. Тој не прецизира кога скопјани ќе можат да ги очекуваат новите постојки поради долгата и сложена процедура, но се надева дека првите постојки ќе бидат пуштени во употреба до крајот на годинава.

Од Градот Скопје информираат дека градските советници уште минатата година изгласаа Правилник за уредување на автобуските постојки и со него генерално се утврдуваат стандардите на урбаната опрема и привремените објекти што ќе бидат дел од уредувањето на вкупно 960 автобуски стојалишта од кои 330 во урбаниот дел. Овој документ претставува појдовна основа ЈСП понатаму да ја преземе севкупната активност за регулирање и уредување.

По барање на граѓаните, Град Скопје донесе решение за дислокација на автобуската станица на булеварот Кочо Рацин, кај “Југодрво“, во насока кон крстосницата со комплексот банки.

Од 06. мај станицата ќе се дислоцира на просторот пред Олимпискиот базен.

Градот Скопје го уважи барањето на граѓаните поради зголемувањето на безбедноста на патниците коишто  користат јавен превоз, но и поради економичноста во искористувањето на станицата.

Но има некои работи кои треба

Грците со најповолна понуда за автобуските стојалишта

Грчката фирма „Керавнос“ од Атина дала најповолна понуда на меѓународниот тендер, кој го распиша ЈСП „Скопје“ за поставување 292 нови автобуски стојалишта во централното градско подрачје по пат на јавно-приватно партнерство, дознава „Дневник“. Комисијата за јавни набавки поединечно ги разгледала сите четири понуди, но официјалниот избор Управниот одбор ќе го направи на 29 декември.

„Керавнос“ ќе биде должна да ги изработи и постави стојалиштата. Според понудениот договор, таа ќе стопанисува со нив 18 години и во тој период ќе може да издава рекламен простор на автобуските станици. Избраниот концесионер ќе биде должен на постојките да постави уште 80 дисплеи кои ќе го покажуваат времето на доаѓање на автобусот, како и надворешната температура. Засега има само 10 такви дисплеи.

Според понудата, Грците треба да ги постават автобуските постојки во рок од девет месеци од денот на потпишувањето на договорот, и тоа во три фази.

Во првата фаза ќе бидат поставени 100 стојалишта, и тоа во рок од 2,5 месеца, а во ист рок ќе бидат поставени уште толку. Во третата фаза, во рок од четири месеци ќе бидат поставени дисплеите. Оваа фирма понуди 4.500 евра надомест за јавно-приватно партнерство на годишно ниво и исто толкава банкарска гаранција.

На меѓународниот тендер свои понуди имаа уште три, и тоа македонски фирми: „Виа сигнал“, „Лазов груп“ и „М-6 Светлана и останати ДОО“, сите од Скопје.

Директорот на ЈСП, Мишо Николов, вели дека со обновувањето на автобуските постојки градот ќе добие подобар имиџ.

- Идејата е на партнерот да му го отстапиме рекламниот простор, а тој да ни направи современи автобуски постојки. Со пристигнувањето и на новите автобуси ќе заокружиме еден голем проект во јавниот превоз. Ќе остане најголемиот предизвик - регулирањето на односите со приватните превозници и намалувањето на дивите превозници - нагласи Николов.

Од 292 стојалишта,108 од типот А ќе бидат со натстрешник, клупа, канта за отпадоци, рекламно пано, урбани светилки, информативни табли и табла со број на автобуси што стојат на станицата. Од типот А1 ќе бидат 81, со истата опрема, со тоа што ќе немаат клупа. Ќе има и 93 двојни, кои ќе се добијат со спојување на две стојалишта од типот А.http://www.dnevnik.com.mk/default.asp?ItemID=8AF85CEE7EA87D4F9E423B314F8CFADE

На новото стојалиште ќе застануваат автобусите на линијата со број 3, на својата продолжена траса.

- Со ова на граѓаните на овој дел од Центар им се дава нова автобуска линија за користење на градскиот превоз. Продолжувањето на автобуската линијата број 3 која досега се движеше до основното училиште “Кочо Рацин” е воведена на барање на жителите од овој дел од Скопје, како и на барање на општина Центар. Со ова се надеваме дека ќе се решат повеќегодишните проблеми со јавниот превоз кои ги имаат жителите на населбата Водно.– изјави градоначалникот Трајановски.

Градоначалникот на Општина Центар, Владимир Тодоровиќ, изјави дека со продолжувањето на оваа автобуска линија во пресрет се излегува на 15.000 граѓани кои живеат во овој дел од Скопје. За реконструкцијата на свртувалиштето за автобусите на овој потег и реконструкцијата на платото, Општина Центар има издвоено околу 4 милиони денари.