Клучката кај Бит-пазар ќе почне да се проширува за две недели, најави градоначалникот Трифун Костовски. Со овој проект, краците на оваа клучка треба да се прошират и да се приспособат за сообраќај во двете насоки. На тој начин ќе нема потреба за семафори, а од градот очекуваат да се забрза сообраќајот во овој дел од градот. Оваа клучка ги поврзува булеварите Александар Македонски и Никола Карев на долното ниво, а на надвозникот се спојуваат булеварот Крсте Мисирков и улицата Цветан Димов. Клучката кај Бит-пазар е една од најфреквентните во градот. Таму секојдневно се создаваат големи редици возила. Градските власти очекуваат овој метеж значително да се намали со изградбата на булеварот Словенечка, која ќе ги поврзе населбите Радишани, Бутел и Чаир со крстосницата кај Момин поток.

Во Скопје стартува градежна офанзива

Проширување на клучката кај Тутунски комбинат, изградба на клучка Детелина на Бит Пазар, како и проширување на булеварот Гоце Делчев и Илинденска се четирите проекти, кои според градските власти се подготвени за изведба

Проширување на клучката кај Тутунски комбинат, изградба на клучка Детелина на Бит Пазар, како и проширување на булеварите Гоце Делчев и Илинденска, се четирите проекти, кои според градските власти, се подготвени за изведба. Според Аљоша Шопар, раководител на Секторот за планирање и уредување при Град Скопје, за овие објекти е веќе подготвена техничка документација, а во тек е и избор на изведувач.

- Вредноста на клучката Бит Пазар е 40 милиони денари и ова е проект кој е планирано да заврши до 1 септември годинава. Се работи за сообраќајно прекројување на клучката во вид на детелина без семафорско решение. Ново сообраќајно решение ќе има и кај Тутунски комбинат, а овој зафат кој треба да заврши до 1 август, ќе го чини Градот 11 милиони денари. Потоа, проширување на булеварот Гоце Делчев во делот од влезот во Универзитетот до Скопски саем, инвестиција која ќе чини 22 милиони денари и треба да заврши до септември. Најобемен проект е сепак, изградба на втората фаза од булеварот Илинденска, на потегот од фонтаната до крстосницата со улицата "8 септември", во должина од 2,2 километри, за која ќе потрошиме 160 милиони денари, а изградбата треба да заврши до декември годинава, објаснува Шопар.

Според надлежните, проширувањето на крстосницата кај Тутунски комбинат е од огромно значење за градот. Поентата е во тоа што со завршувањето на клучката кај Континентал, целиот сообраќај ќе се пренасочи на новиот мост кај Транспортен центар и од тука кон крстосницата кај Тутунски, каде е всушност тромеѓето меѓу општините Центар, К.Вода и Аеродром. Сообраќајното решение предвидува и проширување на улицата Трета македонска бригада на потегот од амбулантата, до сообраќајна полиција и оформување на 4 сообраќајни ленти од крстосницата пред сообраќајната полиција до крстосницата со Тутунски комбинат и тоа на делот кај училиштето и кај делот на Министерството за образование.

Втората фаза од булеварот Србија, трета фаза од булеварот Илинденска, со мост преку Вардар, како и проширување на Гологанов и Првомајска се проекти кои треба да се реализираат во наредната година.

- Сите административни процедури се завршени. Добивме и градежна дозвола од Општина Чаир. Неделава ќе се утврдат фазните привремени решенија за тоа како ќе се одвива сообраќајот додека траат градежните работи. Со тоа ќе се исполнат сите услови “Гранит” да го организира градилиштето и да почне изградбата. Таа треба да трае 120 дена и да чини околу 40 милиони денари. Градот ги обезбеди потребните пари - додаваат градските власти.

Со реконструкцијата на клучката таа треба да добие форма на сообраќајна детелинка и да овозможи движењето на возилата по неа да се одвива без семафорите. Така, на пример, тие што се движат во правец од Автокоманда кон т.н. Пластичарска улица, за десно ќе треба да завртат пред надвозникот, а за лево да поминат под него и потоа двапати да завртат десно. На ист начин ќе се организира и поврзувањето на Бит-пазар со т.н. Пластичарска улица. Наместо како досега возилата да чекаат на семафорот за да завртат лево на крајот од надвозникот, тие ќе треба да го искористат спротивниот крак и двапати да завртат десно.

Ова сообраќајно решение за една од најоптоварените раскрсници во градот се најавуваш е уште пред четири години од поранешната градска управа.

Преместувањето на подземните инсталации се очекува да биде најголемиот проблем при реконструкцијата на клучката кај Бит-пазар, сметаат градските власти. Електричните и телефонските кабли, водоводните и канализациските цевки, како и другата инфраструктура досега ја сопираа работата на повеќе градски и општински проекти, а истата ситуација најверојатно ќе се повтори и на овој проект, чија реализација треба да почне за околу една недела, а според процените би требало да трае околу четири месеци.

- Овие проблеми се јавуваат бидејќи не постои ефективен катастар пред се на електричните водови, а во помала мера и на телефонските кабли. Динамиката на извршувањето на градежните работи, како за почнувањето, така и за изградбата на клучката “Детелинка“ во голема мера ќе зависи од решавањето на проблемот со подземните инсталации - велат од градската управа.

Голем број градежни работи што градот или општините ги изведуваа во последниов период биле одолжувани поради проблеми со дислокација на подземните инсталации. Тоа речиси секогаш значело дека треба да се преземат дополнителни зафати за кои се издвојувале дополнителни суми пари што не биле предвидени за изградбата на тие проекти.

Сите јавни претпријатија и компании што имаат подземни инсталации, како “Водовод“, ЕВН, “Т-хоум“, “Топлификација“ и слично имаат свои регистри за тоа каде им се наоѓаат цевките или каблите, но се уште не е направена заедничка база на податоци што би можеле да ја користат сите што треба да ископуваат некоја површина. Засега пред да се изврши некоја работа треба да се собираат посебни податоци од секоја фирма, со што се усложнуваат административните процедури пред почетокот на градбите.

Најнов е примерот со втората фаза од клучката кај хотелот “Континентал”, односно изградбата на кружниот тек на крајот од улицата Беласица. Досега се преместуваше топлификациската мрежа, се интервенираше на водоводот и на канализацијата, а неодамна биле откриени кабли што не биле регистрирани, па сега се чекаат екипи на ЕВН за да го преместат. Во меѓувреме градежниците работат на споредни работи.

Сличен проблем имаше и на булеварот Словенија, кој се градеше околу пет години. Освен електричната мрежа и телекомуникациските инсталации, градежниците таму требало да се справат и со гасоводните цевки на “Гама“.

Неодамна почнаа подготвителните работи за проширувањето на булеварот Илинден. И таму се забележани инсталации за кои не е доставена соодветна проектна документација до градските служби. Поради тоа од градот најавија дека нема да преземат одговорност ако за време на градежните работи се оштети некоја од нив.

Требаше да се преместат електричните кабли и цевките за атмосферската канализација за да се изведе проширувањето на раскрсницата меѓу улиците Сава Ковачевиќ и Народни херои, каде што се изградени дополнителни сообраќајни ленти во должина од по 65 метри.

И при изградбата на надземниот премин “Влајко” во населбата Влае се појавија слични проблеми. При копањето на темелите биле откриени подземни инсталации, електрична мрежа и канализација. Поради тоа проектантите мораа да бараат друго место за да се ископаат таканаречените “бунари“, во кои се постави основата на конструкцијата.

http://www.porta3.com.mk/index.php?option=com_content&task=view&id=1127&Itemid=54

Крстосницата на Бит Пазар, која во моментов претставува едно од најтесните сообраќајни грла во градот, во наредните два месеца ќе се трансформира во модерна клучка во форма на детелинка. Според надлежните во Градот, ќе се реконструира натпатникот и ќе се изградат 4 сообраќајни прстени по кои сообраќајот ќе се одвива по системот вртење надесно, при што семафорите целосно ќе се исфрлат од употреба.
- Градежните работи на клучката започнуваат кај Поликлиниката "Бит Пазар", а ќе продолжат кај Полициската станица. Потоа ќе се работи на десниот крак од сообраќајното решение, за работите да завршат со кракот кај булеварот "Никола Карев". Градежните работи ако послужат временските услови би требало да завршат за 2 месеца, објаснуваат во Градот.

Според градоначалникот на Скопје, Трифун Костовски, клучката ќе биде од истиот тип како и клучката детелинка на влезот во Скопје, од правецот на Куманово кон населбата Аеродром.
Од Градот потенцираат дека Општината Чаир, навреме ја издала потребната документација за изградба на клучката, но дека проблемите настанале поради подземниот катастар и прибирање на точните локации за подземните инсталации, но и поради прибирање на потребните дозволи за дислокација на каблите.

За клучката Градот подготви идејно решение и обезбеди 40 милиони денари, а градежните работи ќе ги изведува фирмата "Гранит".

До крајот на годинава ќе се вози на клучката „Детелинка“

Во иднина сообраќајот ќе се одвива според системот вртење само вдесно, а семафорите ќе бидат извадени

До крајот на годинава би требало да заврши изградбата на новата клучка „Детелинка“ кај Бит-пазар, со што ќе се реши сообраќајниот хаос во овој дел од градот, најави вчера градоначалникот Трифун Костовски при посетата на градилиштето. Екипи на градежното претпријатие „Гранит“ започнаа со изградба на еден од четирите листа од клучката кај поликлиниката „Бит- пазар“, а потоа ќе се гради кај полициската станица и спроти неа и, на крај, на кракот на булеварот „Никола Карев“.

Со изградба на клучката целосно ќе се реконструира натпатникот кај Бит- пазар, по кој во иднина сообраќајот ќе се одвива по системот вртење само вдесно. Семафорите ќе бидат извадени, бидејќи нема да има потреба од вртење влево и вкрстување на сообраќај во спротивни правци.

„Тесното сообраќајно грло на Бит-пазар ќе се трансформира во модерна клучка во форма на детелинка, со што ќе се реши проблемот со застојот во сообраќајот на овој потег. Се надеваме на добри временски услови и да нема проблеми со подземните инсталации, за да може навреме да завршат градежните работи“, истакна Костовски, најавувајќи дека со овој проект, како и со изградбата на клучката „Континентал“ и хортикултурното уредување на булеварите „Никола Карев“, „Цветан Димов“ и „Крсте Мисирков“, Општина Чаир ќе добие вистински урбан лик. За урбанизацијата ќе придонесат и проектите што ги најави градоначалникот на Чаир, Изет Меџити, како изградбата на надземен премин меѓу пазарот и поликлиниката, изградбата на подземен паркинг на две нивоа и мини- плоштад, како и најавената изградба на трговскиот центар на Бит-пазар.

За изградба на клучката кај Бит- пазар, Градот Скопје одвои 40 милиони денари. Општина Чаир ги обезбеди градежните дозволи, а беше решен и мал имотен спор. (С.Н.)

http://utrinski.com.mk/?ItemID=D50BE9EA049EFB48845BA754FA40A983

Започна изградбата на вториот крак на клучката-детелинка „Бит-пазар“

Третата и четвртата позиција ќе се градат по целосно завршување на првите две