Стари душеци, дрвени ормани, расипани апарати од домаќинството, цигли, тули, малтерисани хартии и друг преостанат градежен материјал се само дел од отпадот со кој граѓани секое лето редовно го полнат Скопје. По секое реновирање на домовите, што обично се прави во лето, покрај контејнерите за комунално ѓубре никнуваат депонии од градежен шут. Ваквиот отпад од населбите на Водно завршува во зелениот појас на парк-шумата, од Аеродром и од Лисиче покрај брегот на Вардар, а депонии има и во периферните делови на Скопје, покрај Лепенец, во Бутел и во Чаир. - Во нашата зграда последниов месец се реновираа четири стана. Тоа е вообичаено за лето, кога луѓето сакаат да си го искористат одморот за да исчистат генерално или да направат некое поголемо реновирање. Но од сите станари само еден постапи како што треба, па си го собра ѓубрето во вреќи и повика луѓе за да го однесат. Некои, пак, остатоците од градежните материјали и непотребните работи ги оставија пред зграда, покрај контејнерот каде што секој ден го фрламе ѓубрето од дома - раскажува еден жител од Карпош. „Комунална хигиена“ на барање на граѓаните може да достави контејнер со потребната големина и да го транспортира отпадот до Дрисла, услуга која се наплаќа во согласност со ценовникот на Јавното претпријатие. - Граѓаните што си го реновираат домот може да се јават на дежурниот телефон на „Комунална хигиена“ - 321 66 44 и да побараат контејнер за да го истовари градежниот шут. За изнајмување стандарден контејнер, со капацитет од еден кубен метар, се наплаќа 700 денари, а за оние со зафатнина од пет или седум кубни метри 1.500 денари. Цената важи за еднократно полнење и празнење на контејнерот, а ако комуналниот сад се изнајми за подолго време, услугата чини 3.900 денари. Ако собирањето и транспортот на шутот до Дрисла граѓаните сами си го организираат, депонирањето е бесплатно - објаснува Југослава Поленак, одговорна за односи со јавност во претпријатието. Но од „Комунална хигиена“ велат дека во практика скопјани речиси никогаш не ги бараат нивните услуги затоа што, и покрај законски предвидените казни, ретко се повикувани на одговорност од надлежните инспекциски служби ако отпадот го остават на дива депонија. - Ова е задача на инспекциите, а тоа го прави и нашата еко-патрола, која ги открива сторителите и прави записници. Се случува дури и ако некој граѓанин самиот плати на превозници да му го однесат ѓубрето, тој најчесто да заврши на некоја лединка или покрај пат како дива депонија, бидејќи луѓето што ги вршат тие услуги повторно никој не ги повикува на одговорност - додава Поленак. Од Градскиот комунален инспекторат велат дека постапуваат во согласност со Законот за управување со отпад и пишуваат казни за прекршителите. - Во последната акција наплативме три глоби од 50 евра за фрлање градежен шут на несоодветно место. Две казни беа изречени во Аеродром, а една во Карпош. Доколку тие се платат во рок од осум дена, казната се намалува за половина. Ваквите акции заедно со полицијата ги спроведуваме двапати неделно, а реагираме и по пријави од граѓани - вели Александар Бошковиќ, од Секторот комунална инспекција на Град Скопје. Според Законот, казните за фрлање отпад се движат од 30 евра до 200 евра.

Казна од 50 евра ќе се наплаќа ако на јавни површини се вршат физиолошки потреби, се фрла хартија, догорчиња, мастики, амбалажи, земја, отпадоци од растенија, песок, стари предмети од домаќинство. Со 50 евра ќе бидат казнети и тие што ќе палат и ќе уништуваат смет и ќе оставаат фекални остатоци од домашни миленици и мртви животни во контејнери, ќе паркираат возила на растојание до десет метри од контејнер, на јавни места ќе пасат добиток и живина, ќе го растураат сметот од вреќи, ќе фрлаат смет од кат во станбена зграда или куќа, ќе лепат плакати на кое било јавно место... Скопските општини и градот Скопје, пак, се должни да го исчистат снегот најдоцна во рок од шест часа. Во согласност со Предлог-законот за јавна чистота, физичките лица ќе бидат казнети со 50 евра и ако фрлаат отпадоци, догорчиња, мастики... и внесуваат домашни миленичиња без одобрение во ходници на јавни објекти.

Со предлог-законот за јавна чистота, што минатата недела Владата го достави во Собранието, се воведува нова давачка. Освен за работата на јавните комунални претпријатија, граѓаните сега ќе плаќаат и сметка за јавна чистота. Министерот за трнаспорт и Врски Миле Јанакиески вели дека всушност нема да се оптовари буџетот на граѓаните, бидејќи и досега се плаќало за јавна чистота во сметките за вода и дека всушност тие пари само ќе се одвојат на посебна смета. Сепак тој не знаеше да каже дека дали оваа сума Ќе остане иста.
"Не се воведува нова давачка, бидејќи досега 30 отсто од тоа што луѓето го плаќале на име ѓубрарина одеа за одржување на јавната чистота. Не можам да кажам дали ќе има зголемување на оваа сума, бидејќи општините ќе треба да кажат дали ќе има потреба од дополнителни средства", рече Јанакиески.
Јавните институции чии тоалети се неисправни, валкани или ако во нив нема тоалетна хартија и апарат за сушење раце, согласно новиот закон за јавна чистота, ќе треба да платат казна од 1.000-2.000 евра во денарска противвредност. Одговорното лице во таа институција пак ќе биде казнето со глоба од 500 до 1.000 евра.
"Со законот ќе ги казнуваме и директорите на јавните институции каде хигиената ќе биде на ниско ниво. За немање тоалетна хартија во санитарните јазли со 2.000 евра ќе биде казнета институцијата, а со 1.000 евра директорот", рече Јанакиески.
За непуштање вода по извршена физиолошка потреба во тоалет на јавна институција, со Предлог-законот предвидена е мандатна казна од 50 евра за лицето кое го сторило прекршокот.
Парична казна во висина од 3.000 до 4.000 евра ќе платат правните лица кои ќе остават или фрлат градежен шут на јавна површина, а одговорното лице во таа фирма ќе плати од 500 до 1.000 евра казна. Со новиот закон за јавна чистота, Владата предвидува казни и за локалната самоуправа ако таа навреме не го исчисти снегот од јавните површини.
"Во зима општините се должни да го исчистат снегот од улиците шест часа по почнувањето на снежните врнежи. Ако тоа не го направат во определениот рок ќе бидат казнети", рече Јанакиески.
Организаторите на јавни манифестации, со новиот закон за јавна чистота, се должни по завршувањето на манифестацијата да го соберат сето ѓубре што учесниците на настанот или посетителите го оставиле зад себе.
"Тие се должни да го соберат сметот и да го остават на место определено за собирање и фрлање смет. Ако тоа не го направат, ќе бидат казнети со 2.000 до 3.000 евра", рече Јанакиески.
Контролата дали се почитуваат одредбите од овој закон ќе ја вршат комунални редари вработени во општините, како и униформирани полицајци, кои ќе имаат надлежност да изрекуваат мандатни казни на самото место. (Е.А.)

***

ПРАВНИТЕ ЛИЦА ЌЕ СЕ КАЗНАТ СО 1.000 - 4.000 ЕВРА ЗА:

- Фрлање градежен шут на јавна површина;
-Ако тоалетите се неисправни, валкани и ако во нив нема хартија;
-Ако организаторите на јавни манифестации не го соберат ѓубрето од јавната површина по завршувањето на манифестацијата;
-Ако хигиената во внатрешноста на објектот не е на задоволително ниво, ако внатре нема канти за отпадоци, и ако фасадата на објектот не се одржува во чиста и добра состојба;
-Фрлање предмети од домаќинствата, лисја, гранки, корења, песок, амбалажа и други отпадоци, освен на местата предвидени за тоа;
-Ако оставаат ѓубре покрај контејнерите и други садови за смет;
-Палење, закопување и уништување смет;
-Испуштање отпадни води и други течности од дворните места и објекти;
-Миење возила, камп приколки, предмети од домаќинствата и од правните лица на јавна површина;
-Сечење, складирање на дрва и јаглен на јавна површина;
-Паркирање возила на јавна површина;
-Производство, печење вар и дрвен јаглен, како и складирање и чување на градежен материјал на јавна површина без дозвола од надлежниот орган;
-Поправање, сервисирање возила и вршење занаетчиски дејности на јавна површина;
-Оставање нерегистрирани, хаварисани возила, приколки и камп приколки на јавна површина;
-Оставање измет од домашни животни и миленичиња на јавна површина.

Екопатролата му заштеди на Градот 50.000 евра

Старите телевизори и шпорети се исфрлаат во специјални контејнери

Кабастиот отпад може да се однесе и во рециклажниот центар на улица „Илинденска“

Сања Наумовска

Вчера беше изречена првата казна за фрлање на јавна површина. Скопјанец кој фрли догорче на паркинг во центарот на градот е казнет со 50 евра и е една од првите жртви на примената на новиот Закон за јавна чистота, кој предвидува глоба од 50 евра за фрлање отпад на јавна површина. Законот забранува и фрлање отпад од домот, како што е мебел, бела техника, градежен шут и слично во контејнери или, пак, на јавна површина, што се казнува со парична казна од 50 до 1.000 евра. Но, граѓаните се во недоумица каде и кога можат да се ослободат од непотребните работи од својот дом, а притоа да не го прекршат законот.

Јавното претпријатие „Комунална хигиена“ потсетува дека постојат неколку начини да се исфрли кабастиот отпад од дома. На дежурниот телефон на претпријатието 3216-644 секој граѓанин може да побара и да добие на располагање контејнер со зафатнина од 5 или 7 кубни метри. За тоа ќе треба да плати 1.500 денари. Ако има потреба контејнерот да стои на бараната локација подолго време, на пример додека се гради и руши куќа, цената е 3.900 денари.

Што се однесува, пак, за ситуации кога граѓаните имаат за фрлање мал дел од мебелот, како што се телевизор, столови или други ситници, тие можат да го однесат сами во рециклажниот центар на „Комунална хигиена“, кој се наоѓа на улицата „Илинденска“, зад бензинската пумпа на „Макпетрол“, и да го остават таму. Во „Комунална“ информираат дека на истиот начин се постапува и со градежниот шут, за кој, според законот, казните се многу високи и се движат од 50 до 4.000 евра. Граѓаните, освен нарачувањето контејнер од „Комунална хигиена“, имаат можност градежниот отпад самите да го однесат до „Дрисла“, каде што нема да им се наплати за депонирањето.

„Јавното претпријатие размислува и за други опции со кои ќе им излезе во пресрет на граѓаните во новата ситуација. Планирана е есенска акција, во која на повеќе локации низ општините ќе се поставуваат контејнери во кои граѓаните ќе можат да го исфрлат кабастиот отпад“, вели Југослава Поленак од „Комунална хигиена“. Таа објаснува дека претпријатието ја разгледува и можноста за формирање служба која на повик ќе доаѓа во домовите на граѓаните и за исфрлање помали делови од домаќинствата.

http://utrinski.com.mk/?ItemID=0B6548F948176741BD23CAD174414881

"Прв пат од нашето досегашно редовно работење имаме видливи резултати. Улиците се почисти, луѓето повеќе внимаваат каде го фрлаат отпадот, хигиената е на едно ниво", вели генералниот директор на скопска Комунална хигиена

Комуналците се презадоволни од ефектите што се добиени само пет дена по примената на Законот за јавна чистота. Првпат од нашето досегашно редовно работење имаме видливи резултати. Улиците се почисти, луѓето повеќе внимаваат каде го фрлаат отпадот, хигиената е на едно ниво, а македонската метропола изгледа почисто од порано - истакна генералниот директор на ЈП Комунална хигиена Скопје, Златко Димовски, на вчерашната седница на Групацијата за комунална хигиена. Тој рече дека ваквите резултати се добиени поради строгите санкции и високите парични глоби предвидени со новиот Закон. За добивање на уште поголеми и трајни ефекти, Димовски ја искажа потребата од што поголема и поинтензивна соработка меѓу јавните комунални претпријатија и локалните власти.
- Општините треба да ни помогнат за поставување на поголем број корпи за отпадоци или други садови, а се разбира неопходна е соработката на комуналните инспекциски служби и полицијата со нашата еко-патрола, додаде Димовски.

Во кој правец да делуваме? За што поконкретно?

Општина Сарај следната недела ќе организира кампања за подигање на еколошката свест кај месното население. Муамеди Бекир, директор на ЈКП"Сарај", најави дека од понеделник во секое населено место ќе организираат предавања и работилници, на кои треба да им се укаже на жителите дека ѓубрето и градежниот шут не смеаат да го фрлаат на јавните површини. Тој објасни дека ако во разумен рок не успеат да ги спречат граѓаните да создаваат диви депонии ќе воведат парични казни.
"Луѓето мора да сфатат дека не можат ѓубре да го фрлаат каде ќе стигнат. Прво ќе делуваме едукативно, но ако и тоа не биде ефикасно ќе воведеме и парични казни, кои ќе се движат од 5.000 до 20.000 денари", вели Бекир.
Тој вели дека со редовно собирање на сметот од домаќинставата засега се опфатени само населбите, Сарај, Крушопек, Глумово, Шишевво и Долна Матка, при што дневно собираат околу 10 тони ѓубре.

http://www.vest.com.mk/default.asp?id=58906&idg=3&idb=816&rubrika=Skopje - Вест - Е.А. - 3/27/2003

колку за инфо еве една кампања од 2003 за која нема повратна информација какви ефекти има од истата или дали е воопшто и спроведена...

Депонија среде Градски парк

Според проектот за новиот дел од паркот, на местото на депонијата треба да има уште едно езерце

Огромна депонија преполна со најлон кеси, хартии, пластика, облека, чевли и друго ѓубре, подолго време постои во новиот дел од Градскиот парк. На ѓубриштето има и купишта лисја, гранки и други остатоци од растенија. На местото каде што, според проектот за новиот дел од паркот, требало да има уште едно езерце, пред повеќе години е ископана дупка, која никогаш не била наполнета со вода. Денес, таа се користи за фрлање ѓубре и го нагрдува паркот.

Депонијата се наоѓа веднаш до патеките и е на дофат на рацете на децата кои секојдневно го посетуваат паркот. Од неа демнат опасности на зарази, бидејќи не е исклучено да има шприцеви од употреба на дрога.

Во ЈП „Паркови и зеленило“, кое стопанисува со Градски парк, велат дека дупката со години ја полнат со лисјата што ги собираат и од нив произведуваат природно ѓубриво за своите потреби. Во неа до скоро имало само лисја и гранки, но сега, велат во претпријатието, несовесни граѓани дупката ја користат и за фрлање секаков друг отпад.

Вработените неколку пати им укажувеле на лицата кои биле фатени на самото место како фрлаат ѓубре, но тоа очигледно не дало плод. Заради тоа, нагласуваат во „Паркови и зеленило“, во текот на неделава ќе побараат помош од „Комунална хигиена“ да се расчисти целата депонија. (С.Н.)

http://utrinski.com.mk/?ItemID=2BE75F7BDA2D984BA78A8F46FBB145D5

Жителите во реоните каде што комуналните екипи го собираат претпладне домашниот отпад треба да го фрлаат меѓу седум и девет часот наутро, а оние од локациите каде што се собира попладне од 19 до 21 часот

Ве молиме отпадот да го фрлате во контејнерите во точно определено време. Строго е забрането фрлање кабаст и градежен отпад и паркирање пред контејнер". Овие пораки на ЈП Комунална хигиена испишани на флуоресцентни самолепливи ливчиња ќе бидат залепени на сите контејнери во градов, што е дел од кампањата Заедно за почисто Скопје".

- Сите сакаме да живееме во почист град, но малкумина внимаваат кога и каде фрлаат ѓубре. Најлесно е да се покаже со прст кон оној што не го исчистил ѓубрето, но многу е тешко да се открие тој што го направил. Време е за менување на старите навики", велат од скопски Комуналец и апелираат до граѓаните да го фрлаат ѓубрето неколку часа пред камионите на комуналците. Тоа за жителите во реоните каде што комуналните екипи го собираат претпладне значи дека домашниот отпад во контејнерите треба да го фрлаат меѓу седум и девет часот наутро, а оние од локациите каде што се собира попладне од 19 до 21 часот.

- Терминот за фрлање отпад е различен за различни делови од градот. Нашите екипи работат во три смени, па се случува во некои реони тој да се подига наутро, некаде на пладне, некаде навечер. На налепниците ќе биде наведено точното време за фрлање, но и без тоа самите граѓани знаат кога доаѓаат нашите камиони така што можат да се придржуваат на редот, велат од Комунална хигиена. Тие потсетуваат на правилото сметот да се фрла во заврзани црни вреќи за да не се растура по околината, но и можноста за изрекување на казни според Одлуката за комунален ред донесена во 2005 година од Советот на град Скопје. По­мог­не­те во вашата и наша околина во иднина да нема диви депонии или при­до­не­се­те да има барем една помалкуу, апелираат од ЈП Ко­му­нал­на хигиена.

http://vecer.com.mk/?ItemID=475CA6CA9BC72043B1AEBCD13CBD3997