Најверојатно најозлогласените и најопасните штетници кои претставуваат најголема закана за прехрамбената индустрија се стаорците и глувците. Тие мораат да бидат строго контролирани во организациите кои произведуваат, складираат и дистрибуираат храна затоа што тие ги оштетуваат садовите каде храната е складирана, ја јадат храната и ја контаминираат со урина и измет. Најчести се домашниот глушец и таванскиот стаорец кои се размножуваат многу брзо, дури и по 25 – 30 пати во годината. Знаците за присуство на глувци и стаорци се лесно забележливи, појава на измет, звуци на гризење, масни дамки од крзното на глодарите, стапки, знаци на гризење и оштетување на електричната инсталација и траги од урина кои се видливи под ултравиолетова светлина. За ефикасно справување со глодарите, најважно е да се најдат нивните легла (во машина која не се употребува, меѓу палети, во близина на местото каде се складира отпадот). Доколку сте сигурни за присуството на глувци и стаорци, првиот чекор е да го отстраните целиот отпад од околината и да ги елиминирате изворите од каде би можеле глодарите да доаѓаат до храна и вода. Потоа со обиколка околу порсториите на организацијата, најдете ги и затворете ги сите места од каде што би можеле глодарите да влезат во просториите на организацијата. Контролата на глодарите треба да вклучува поставување на надворешни и внатрешни стапици. Сите стапици треба редовно да се проверуваат и одржуваат. Постојано треба да се знае колку се на број и да бидат јасно обележани. Бројот на стапици треба да се зголеми за време на зимскиот периот затоа што тогаш е почеста појавата на овие штетници. Поставувањето на отров за глодарите е друга алтернатива за елиминирање на нивната појава, но тоа е работа која треба да се остави за професионални овластени институции. [ http://isoconsulting.mk/efektivna-kontrola-na-shtetnici-kako-kluchen-faktor-za-proizvodstvoto-na-hrana/ - 1 ]