Почетната станица на автобусот со број 23 во Капиштец ќе стане нов цветен пазар, а автобуската постојка нема да се преместува и целиот простор ќе се уреди, најави градоначалникот на Центар, Владимир Тодоровиќ. Општинските служби веќе доставиле барање до Министерството за транспорт и врски да им се одобри да го преместат Цветниот пазар, со оглед на тоа што сегашниот, кај Старата железничка станица, се продава за да се гради затворен зелен пазар. - Земјиштето каде што е автобуската постојка е државно, па за таа парцела поднесовме програма со која на Министерството за транспорт и врски му предлагаме тука да биде пазарот за цвеќе и чекаме да ни ја одобрат локацијата. Објектите од пазарот би ги сместиле во зеленилото, каде што сега се наоѓа дрворед од тополи. Просторот ќе се уреди, дрвјата ќе се исечат затоа што се штетни, а ќе се направат патеки и пристап до паркинг-просторот &“8211; вели Тодоровиќ. Градоначалникот на Центар објасни дека прво ќе почека да види колкав дел од земјиштето ќе добие „Градски паркинг“ за да го прошири паркинг-просторот спроти поранешната зграда на „Нова Македонија“, па потоа ќе го доуредат и просторот за автобуската станица. Од Министерството за транспорт и врски потврдија дека се работи за државно земјиште, но оттаму, како и многу пати досега, одговорија дека немаат барање од Општината да ја преземе локацијата кај почетна 23. - До нас не е доставена програма за привремени објекти од Општина Центар. Ако биде доставена таква програма, Министерството ќе ја почитува секоја одлука на Општината што е во согласност со законската регулатива &“8211; одговори Драган Симоновски, портпарол на Министерството. Освен Цветниот пазар, кај Старата железничка станица ќе треба да се урне и објектот на дисконтот „Тинекс“. Тодоровиќ, кој е сопственик на синџирот маркети, вели дека властите се уште го толерираат на таа локација затоа што има важечки договор. - Имам договор до 2012 година за тој маркет, но со оглед дека околните дуќани ги урнаа и ние ќе мораме набргу да се дислоцираме. Маркетот ќе го префрлиме во катната гаража во Капиштец, која ја отвораме од септември &“8211; најави градоначалникот. Проблемот со Цветниот пазар се провлекува со години. Прво тој се наоѓаше на градскиот плоштад, а потоа беше префрлен спроти Зелено пазарче. И тука користеше привремена локација, а така најверојатно ќе биде и на новото место во Капиштец затоа што ќе биде сместен на трасата на која, според ГУП, треба да поминува Јужниот булевар. Пред Тодоровиќ, и поранешната градоначалничка Виолета Аларова се обидуваше да го дислоцира пазарот за цвеќиња на автобуската станица, но не успеа во тоа затоа што надлежното Министерство не &“38; ја одобри локацијата.

Цветен се продава, Општината се мисли

Допрва ќе се уредува локацијата кај последна „23“ каде што ќе се пресели пазарот, а се' уште не се знае ниту кој ќе стопанисува со него

Државното земјиште на кое се наоѓа Цветниот пазар ќе се продава на лицитација на 30 јули, а времените објекти за продажба на цвеќиња се' уште не се преселени на новата локација на последната станица на автобуската линија 23, спроти зградата на „Нова Македонија“. Новата локација допрва треба да ја уреди Општина Центар, а претходно Министерството за транспорт и врски треба да и' го додели земјиштето.

Според изјавите од одделението за односи со јавноста во Општината, тие дури пред три дена побарале надлежното министерството да им издаде одобрение за новата времена локација на Цветниот пазар. Тие, до Министерството доставиле програма за поставување времени објекти на просторот кај последна „23“.

- Барањето за Цветниот пазар до Министерството е испратено во викендот. Според планот за изгледот на новиот цветен пазар, времените објекти ќе бидат поставени еден до друг, во кружна форма. Така би се избегнало да има прва и втора линија како што беше досега, односно на новата локација сите ќе бидат рамноправно поставени - велат во Општина Центар. Од Министерството за транспорт велат дека штом ќе ја добијат програмата за поставување времени објекти ќе и' го отстапат земјиштето на Општина Центар за да може да го подготви просторот за новиот пазар.

На местото на сегашниот Цветен пазар, кој тука опстојува 12 години откако се пресели од плоштадот Македонија, според деталниот урбанистички план ќе се градат повеќе деловни објекти. На градежната парцела што ќе се продава, според важечкиот детален урбанистички план, е предвидена изградба на покриен зелен пазар. Површината на градежната парцела е 3.710 квадратни метри, а почетната цена на лицитацијата е 6.600 денари за квадратен метар.

Десетината цвеќари што работат на пазарот велат дека во последно време ниту некој ги посетил од Општината ниту ги информирал за дислокацијата.

- Имавме средба со градоначалникот на Центар, Владимир Тодоровиќ, но никој ништо не спомна. За дислокација на пазарот се зборува во последните десет години и ништо не се случило. Сегашната локација е привремена оти е на трасата на Јужен булевар, но и таа што ја предлагаат кај последна „23“ е на истата траса и пак ќе биде привремена. На средбата со градоначалникот се договоривме наместо 15, во новиот пазар да има 20 нови куќарки. Бараме подобри услови за работа, внатре во објектите да има вода и тоалет, но и подобро уредување на околината. Сегашните дуќани се пред распаѓање. Се надеваме дека и „Паркови и зеленило“ ќе помогне, а можеме и ние да инвестираме - вели еден од пазарџиите.

Изминатите неколку години беа предложувани и други локации за нов цветен пазар, на кејот на Вардар, спроти Народна банка или на „Илинденска“, но ниедна од нив не им одговарала на цвеќарите. Од „Паркови и зеленило“, кои стопанисуваат со Цветниот пазар, велат дека ништо не им е кажано за дислокацијата.

- Немаме конкретни информации од Општината Центар. Имаме писмо дека пазарот ќе се пресели, но не е прецизирано кога, ниту дали и на новата локација нашето претпријатие ќе стопанисува со него - велат од „Паркови и зеленило“.Оттаму додаваат дека не се знае ниту дали цвеќињата ќе се продаваат во нови куќарки или ќе се преселуваат старите, кои се дотраени.

Цветниот пазар ќе се сели на последна „23“

Цветниот пазар се уште нема добиено нова локација, иако конечна преселба се најавуваше уште пред два месеца. На негово место треба да се гради пазар од затворен тип, за кој земјиштето летово го купи компанијата „Кам фуд“. Единствена пречка за почеток на градбата се привремените објекти во кои се продава цвеќе. Продавачите велат дека засега нема ништо ново и никој не побарал да се преместат од оваа локација. На последната седница на Советот на општина Центар, градоначалникот Владимир Тодоровиќ изјави дека треба што поскоро да се најде нова локација за цвеќарите. Тој најавуваше дека тоа ќе биде последната станица на автобусот со број 23, но просторот засега е празен. - Се уште не е завршена постапката за донесување програма за поставување привремени објекти и урбана опрема - одговори Јовица Ацковски, портпарол на Центар. Во јавното претпријатие „Паркови и зеленило“ велат дека добиле писмо од Општината во кое се бара да се дислоцираат тезгите за цвеќе од пазарот, но не е понудена нова локација. - Не можеме да го спроведеме селењето затоа што немаме решение со точно одредена локација каде што треба да ги префрлиме објектите. Се обративме и до Советот на Градот и оттаму ни ја посочија последната станица на 23-ка, но само како мислење, а не сме добиле официјална одлука - велат од „Паркови и зеленило“.

Р.П.

Цветниот пазар ќе се дислоцира, бидејќи местото каде што се наоѓа сега е во приватна сопственост

Членовите на Секцијата на цвеќари на Цветниот пазар вчера во Занаетчиската комора во Скопје одржаа прес-конференција во врска со дислокацијата на Цветниот пазар. Околу 60-ина сопственици на цвеќарници истакнаа дека стравуваат за својата егзистенција, бидејќи тоа што го работат им е единствен начин да преживеат. Претседателката на Секцијата на цвеќари, Анета Маневска, истакна дека тие имаат навистина голем проблем и дека овој проблем е долгорочен, односно пред година-две за дислокација на Цветниот пазар.
- Ние сме свесни дека ова се привремени објекти, и дека кога-тогаш нас мора да не дислоцираат на друго место. Ние се обидуваме да дојдеме до институциите кои се надлежни за нашиот проблем и да пронајдеме начин како да се реши овој проблем. Прво бевме упатени до Општина Центар, до градоначалникот Тодоровиќ, кој по негова иницијатива пред една година не викна на неофицијален состанок и ни вети дека стои позади нас како тотална поддршка и дека нема да дозволи воопшто да не дислоцираат додека не ни најдат нов објект - истакна претседателката Анета.

Таа додаде дека апелираат до надлежните институции, првенствено до Општина Центар, дека сите метрополи имаат цветен пазар, бидејќи е важен сегмент за градот.
- Сепак тоа е естетскиот дел од градот и работата е што ние 60 семејства егзистираме од тука. Потребните давачки кон државата ние целосно ги почитуваме и ги плаќаме. Исто така, зад нас стојат и земјоделците кои имаат подигнато кредити од државата за да го пласираат својот производ цвеќето кое 80 отсто го пласираат на Цветниот пазар, затоа што ние не работиме само со увозно цвеќе, туку работиме и со домашно македонско цвеќе. Имаме проблем, институциите не се огласуваат, си ја префрлаат топката едни на други, но ние, сепак, ќе останеме упорни да добиеме локација, каде што ќе можеме да продолжиме со работа и да не останеме на улица, додаде Анета.

Градоначалникот на општина Центар, Владимир Тодоровиќ изјави дека целосно ги подржува барањата на цвеќарите и дека нема да дозволи тие да бидат дислоцирани на ниедно друго место се додека не се најде соодветно место каде што ќе бидат сместени.
- Цвеќарите нема потреба да стравуваат во врска со преместување на друга локација. Се додека не се најде соодветно решение за нивниот проблем тие ќе останат на Цветниот пазар. Кога ќе се реши сето ова, новата локација на Цетниот пазар ќе биде на последна автобуска станица 23 спроти зградата на Нова Македонија, изјави Тодоривиќ.

Цвеќарите „овенаа“ чекајќи нов пазар

Цветен пазар конечно ќе се сели

Цвеќарите ги затвораат дуќаните

градонаЧалникот трајановски СЕ ПИШМАНИ

Нема нов Цветен пазар

Пред неколку месеци, градоначалникот Коце Трајановски најави преселба на цвеќарниците кај последна 23-ка, но ветувањето сега паѓа во вода оти Градот нема пари за нови цвеќарници

Цвеќарите на нова локација, но во старите куќарки

На цветниот пазар моментално работат 15 цвеќарници, кои се во катастрофална состојба, а при евентуална преселба, може и да се распаднат

Цветен пазар се сели кај последна „23“

Објектите од Цветниот пазар ќе се селат на локацијата на последна „23“, одлучи градската власт. Иако изминативе недели преовладуваше ставот дека нема да им се најде нова платформа за продажба, на завчерашната седница на Советот беше усвоена одлука со која ова прашање, по една година неизвесност и преговори со продавачите, конечно се затвора. На оваа локација, на улицата Народен фронт во Капиштец, предвидена е и дејност продажба на сувенири, но тоа е опција и не е задолжително. На површината на постојното паркиралиште на „Градски паркинг“, долж улица Мито Хаџивасилев-Јасмин, ќе се овозможи двострано паркирање за лесни возила, како и терминал за автобуси и такси.

Градот претходно имаше средби со цвеќарите во рамките на Занаетчиската комора. Оттаму објаснуваат дека објектите ќе бидат од привремен карактер. Ќе останат на ова место се' до реализација на урбанистичкиот план, а тоа значи додека државата не реши да го продаде и ова место за она што е предвидено да се гради.

- Цветниот пазар ќе се состои од 16 монтажни објекти со површина до 16 м2. Платформата за туристички и културни настани ќе се користи за збогатување на туристичката понуда во градот - велат надлежните.

Како што е познато, на старата локација, спроти Зелениот пазар, предвидена е изградба на затворен објект, исто така пазар, откако фирмата „Камфуд“ го купи државното земјиште на лицитација. Тогаш и се отвори дилемата дали продавачите ќе останат на улица или сепак Општина Центар или Градот ќе најдат друга локација за овој единствен пазар на цвеќе. Секцијата на цвеќари при Комората една година апелираше за разбирање кај градските власти, имајќи предвид, како што кажаа, дека од оваа дејност егзистираат околу 60 семејства. Освен продавачите, од неа живеат и земјоделците што кај нив го пласираат цвеќето.

Во рамките на оваа пограма, предвиден е и терминал за автобуси, но и стојалиште за девет возила за такси-станица. Во рамките на терминалот ќе има автобуско стојалиште за пристигање и поаѓање на автобуси, и тоа за два единечни, паркинг-простор за два автобуса, како и билетарница и тоалет за вработените.

Овој пазар 15 години шета од локација на локација. Прво беа поставени тезги на плоштадот Македонија, а по некое време беа преселени спроти Зелен пазар. И оваа локација, кај последна „23“, за овие стопанственици не е сигурна, имајќи предвид дека од 1 јануари, државното земјиште преоѓа во раце на општинските власти и тие со негова продажба ќе сакаат да остварат што поголем профит.

Јорданка Ивановска

На терминалот на автобусот со број 23 во населбата Капиштец деновиве се рамни теренот на кој ќе се гради новиот Цветен пазар, откако градските власти пред извесно време ги исекоа канадските тополи што беа засадени тука. Истовремено, Град Скопје распиша и тендер за фирма што ќе го изгради осветлувањето и ќе ги постави електричните инсталации за пазарот. Иако се најавуваше дека цвеќарниците ќе се преселат на новата локација до крајот на годината, сега е веќе извесно дека Цветниот пазар нема да биде готов овој месец.