Железница во Кавадарци?

Ангел Данов



КАВАДАРЦИ - Стопанството од Кавадарци има потреба од железнички сообраќај, бидејќи ќе се намалат транспортните трошоци на фирмите. Со изградба на дел од железничката пруга, кавадарчани ќе можат да патуваат со воз.

За оваа идеја стана збор на средбата на кавадаречкиот градоначалник, Александар Панов, и на бизнис-заедницата со директорот на „Македонски железници - Транспорт“, Оливер Деркоски. Притоа, беше договорено да се скенира теренот и да се изготви финансиска конструкција.

„Ова е се' уште идеја, а не проект во реализација. Во иднина ќе настојуваме кавадарчани да добијат железничка пруга, а фирмите поевтин транспорт. Најнапред ќе ги согледаме финансиските параметри. Потоа ќе одлучиме дали железницата ќе се гради преку јавно приватно партнерство, дали може да помогне државата, а зошто да не се искористат и европските фондови“, рече градоначалникот Панов.

Првиот човек на „Македонски железници“ ја поздрави идејата на градоначалникот. „До Кавадарци треба да се изградат 5-6 километри, еден крак што би го поврзал Кавадарци со железничката инфраструктура. Во градот има стопански капацитети што имаат потреба од железница“, нагласи Деркоски.

Изградбата на еден километар пруга чини најмалку милион евра во зависност од теренот. ИГМ „Трејд“ од Кавадарци искажала подготвеност делумно финансиски да ја поддржи реализацијата на ова идеја.

Кавадарци планира изградба на железница

Ќе се гради пруга до индустриската зона во Кавадарци?!

http://www.kapital.mk/clientControls/s.jovanova@kapital.com.mk - Соња Јованова

Изградба на нова железничка пруга од Градско до Кавадарци предвидува ВМРО-ДПМНЕ во својата предизборна програма. Станува збор за пруга во должина од шест километри на релација Градско-Шивец-Кавадарци, а ќе има за цел да им ја олесни работата на големите компании од Кавадарци, односно да им ги намали трошоците за транспорт. Партијата на Никола Груевски ветува дека проектот ќе го реализира од 2013 до 2016 година врз принципот јавно-приватно партнерство. За овој проект особено е заинтересиран сопственикот на фабриката за заварени цевки и профили ИГМ трејд од Кавадарци, Илија Гечев. 

“Нормално дека реализацијата на пруга кон Кавадарци е реално остварлива инвестиција, која ќе функционира како јавно-приватно партнерство, впрочем, нешто што функционира секаде во свет. Значи, ако остане истата влада ќе потпишеме договор наредната година и за четири години ќе ја изградиме пругата. И нема само ние да ја користиме. Тука се Тиквеш, Дрвниот комбинат и некои други, но ние ќе финансираме најмногу затоа што и најмногу ќе ја користиме“, додава Гечев.

Поврзувањето на Кавадарци со постојната железничка пруга од Коридорот 10, проект напишан во програмата на ВМРО-ДПМНЕ, не е нова идеја. Локалната бизнис-заедница, заедно со градоначалникот на Кавадарци, Александар Панов, уште на почетокот од годинава бараше од директорот на МЖ Транспорт, Оливер Деркоски, железнички сообраќај да се воведе и во Кавадарци со цел да се намалат транспортните трошоци на фирмите од овој крај. Според пресметките, најмалку еден милион евра ќе чини изградбата на само еден километар пруга, но дополнителни трошоци ќе има и за изградба на дополнителна инфраструктура, електрификација и слично.

Во близина на овој крак минува и пругата која оди до комбинатот Фени, која е изградена токму од оваа компанија во време кога се основаше комбинатот. Првите луѓе на Фени велат дека по железничката пруга во просек месечно превезуваат 35.000-45.000 тони материјал, најчесто руда и јаглен. Но, сметаат дека за ефикасна искористеност на оваа пруга предуслов е да има поголем број локомотиви и повеќе типови вагони за превоз на различни товари.