http://www.netpress.com.mk/vestiimages/42491/avtopat.jpg">

Агенцијата за државни патишта објави јавен повик за избор на најповолен понудувач за изградба на регионалниот пат К1-Р-104 и реализацијата на врската со Р-104, од Коломот до мостот кај село Близанско.

Како што соопштуваат од министерството за транспорт и врски оваа одлука ја донела денеска Владата, а се очекува изградбата на регионалниот пат К1-Р-104 и реализацијата на врската со Р-104, од Коломот до мостот кај село Близанско  кој е во должина од 8,4 километри да започне на 30 јануари 2009 година и да заврши на 30.07.2010 година.

По изградбата на ХЕЦ „Козјак“ и нејзиното пуштање во работа, беше потопен  локалниот пат кај мостот Здуње, до Коломот, кој претставуваше единствена патна врска на месното население од Поречје кон Скопје. Заради тоа за патување од Скопје кон Поречје се користат обиколните патишта преку Прилеп или Кичево, кои се со приближна должина од по 200 километри. По изградбата на патот од Скопје до Поречје, драстично ќе се намали времето за патување на оваа релација и ќе се реши овој горлив проблем за жителите кој не бил решен во изминативе 18 години.

Кај крстосницата меѓу патот за Драчево и за селото Батинци почна реконструкцијата на дел од регионалниот пат Илинден - Калуѓерец во должина од 19 километри. Патот Р-104 ќе ги поврзува општините Илинден, Кисела Вода, Сопиште, Зелениково, Студеничани и Македонски Брод, како и повеќе населени места. На него ќе се изврши надградба на асфалтниот коловоз од крстосницата кај село Батинци до село Говрлево и надградба на патот кон „Марков манастир“. За реконструкцијата се обезбедени 144 милиони денари. Градежните работи ќе бидат завршени во наредните пет месеци, а ќе ги изведува градежната фирма „Алпина баот“. Премиерот Никола Груевски, кој го означи почетокот на работите, посочи дека подобрувањето на патната мрежа е еден од основните предуслови за да се обезбеди забрзан, олеснет и ефикасен транспорт на стоки и патници низ нашата земја што им е од особена важност на странските и на домашните инвеститори. Поправката на оваа делница е дел од капиталниот проект на Владата за реконструкција и рехабилитација на 11 регионални патни правци во земјава.

ИЗГРАДБАТА НА ПАТОТ НИЗ ПОРЕЧИЕТО НЕМА ДА ЈА НАРУШИ ИНТИМАТА НА РЕЗЕРВАТОТ "ЈАСЕН"

Сменско возење низ македонскиот Јелоустон

Патот ќе ги има сите инфраструктурни решенија, па дури и ограда која ќе оневозможува дивечот да претрчува преку патот. Тоа е еден совршено модерен, но и скап пат кој, за жал, во првата фаза, стасува само до Коломот од каде до спојот со патот кај Нова Брезница, остануваат уште 15-18 километри низ резерватот кој е со широчина од 2 до 2,5 метри и не овозможува движење на возила во двете насоки. Поради тоа ќе се воведат временски термини за возење низ "Јасен", односно два часа ќе бидат дозволени за движење на оние возила кои ќе доаѓаат од Македонски Брод кон Скопје, а потоа два часа ќе бидат слободни за возилата во спротивна насока, вели директорот на ЈП "Јасен", Михаил Малахов

Оддалечени само на 30-тина километри од Скопје, над 1.500 жители од поречките села Здуње, Близанско и од околните села на брегот на вештачкото езеро "Козјак", до Македонски Брод патуваат еден, а до Скопје повеќе од три часа. Причина е што пред неколку години почна полнењето со вода на акумулацијата и кај селото Здуње го потопи единствениот пат што ги поврзуваше 52-те поречки села со скопската населба Драчево. Владата го задолжи тогашното ЕСМ да пробие пат преку планината Козјак за да го доближи Поречието до Скопје на само 50-тина километри, наместо повеќе од 200 во еден правец, колку што има патот преку Кичево.

ВОЗЕЊЕ НИЗ ЈАСЕН
На терен ситуацијата е следна. Од Драчево преку Марков Манастир до село Нова Брезница е изграден модерен широк пат кој ги задоволува стандардите за безбедно возење во двете насоки. Оттука започнува тесен кривулест пат кој поминува низ резерватот "Јасен" со кој стопанисува истоименото јавно претпријатие. Низ резерватот е забрането да се вози. Но, затоа пак, од страната на Македонски Брод веќе е пробиен и нивелиран современ пат со широчина од над девет метри кој го обиколува езерото "Козјак" од неговата лева страна. Засега патот е пробиен до месноста Коломот и се очекува до тука да биде асфалтиран на почетокот на идната година. Патот го гради "Бетон", а финансиер е Агенцијата за државни патишта.

-Патот ќе ги има сите инфраструктурни решенија, па дури и ограда која ќе оневозможува дивечот да претрчува преку патот. Ќе има специјални пропусти под патот, за да може дивечот да стигне со водата и да се напојува. Тоа е еден совршено модерен, но и скап пат кој, за жал, во првата фаза, стасува само до Коломот од каде до спојот со патот кај Нова Брезница, остануваат уште 15-18 километри кој се надевам дека во наредната фаза ќе биде завршен - вели директорот на ЈП "Јасен", Михаил Малахов.

Засега, патот низ резерватот кој е со широчина од 2 до 2,5 метри не овозможува движење на возила во двете насоки. Малахов вели дека поради тоа ќе се воведат временски термини за возење низ "Јасен", односно два часа ќе бидат дозволени за движење на оние возила кои ќе доаѓаат од Македонски Брод кон Скопје, а потоа два часа ќе бидат слободни за возилата во спротивна насока.

-Така граѓанитеод Поречието ќе имаат можност за само 40 километри од Македонски Брод да стасаат до Скопје. Засега, тие мораат да поминат многу поголема должина и од Македонски Брод преку Кичево, Гостивар, Тетово да стигнат во Скопје, што е барем 3-4 пати поголема должина. Тоа се ефектите од тој пат, за кој се надевам дека многу брзо ќе почне да се реализира и оваа втора фаза и ќе заврши наредните години - вели Малахов.

Тој смета дека движењето на возила по патот низ резерватот нема да ја наруши интимата на овој простор кој долги години беше затворен за посетителите.
-Патниот правец низ резерватот влегува во една зона во која, во принцип, минимална е заштитата, бидејќи во таа зона и нема некои определени големи природни богатства кои би требало да бидат заштитени на посебен начин. Од таа причина, доволна е една ограда која нема да дозволи претрчување на дивечот и негово уништување од несовесни граѓани, или предизвикување на пожари. Значи, ќе се направи безбедносна зона која ќе оневозможи такво нешто да се случи. Ова не е единствен случај на планетава, такви јавни патишта имаме секаде низ светот, како што е националниот парк во САД, Јелоустон, каде што има огромни сообраќајници по средината на паркот, а во него нема никакви проблеми - вели Малахов.

СКОК НА НЕДВИЖНОСТИТЕ
Новиот пат кој ќе го скрати патувањето на скопјани до Охрид и акумулацијата "Козјак" кое е на само 30 километри од Скопје, предизвикува во последно време вредноста на земјиштето околу езерото драстично да скокне. Малахов вели дека сопствениците на земјиштето околу езерото им ја подигаат цената, односно таа добива поголема вредност бидејќи има интерес тука за градење на куќи за одмор или за постојано живеење.

-Има голем скок на недвижностите од речиси 500 насто. Тоа значи ако порано квадрат земјиште околу езерото чинеше 2-3 евра, сега чини 50 евра. Искрено се надевам, дека инспекциските служби, односно општините кои се задолжени за урбанизација на тој простор, ќе бидат побрзи од оние кои имаат намера да купат земјиште и сето тоа да биде регулирано. За куќите што ќе се градат да бидат во склад со архитектурата на подрачјето на Поречието, да бидат решени сите комунални проблеми, како што е загадување на овој бисер на природата во Македонија. И тие куќи да имаат единствена намена, а тоа е да бидат место каде што би можеле да се одмараат, а не да се прават бетонски палати кои никому нема да му служат бидејќи ќе бидат мртви споменици за желба за покажување кој и колку пари спечалил - додава Малахов.