Амбасадата на САД ќе биде модерен и уникатен објект

Досега целосно се завршени два објекта на Градиште, а при крај е изградбата и на централниот објект

Над 300 работници на „Гранит“ речиси деноноќно работат на новиот комплекс, кој веќе идната година ќе биде ставен во функција

ДАНИЕЛА ТРПЧЕВСКА

Изградбата на новата американска амбасада во близина на скопското Кале се одвива со забрзано темпо. Над 300 работници на „Гранит“ речиси деноноќно работат на новиот комплекс, кој веќе идната година ќе биде ставен во функција. Најавите се дека во втората половина на 2008 година неколкуте служби на амбасадата на САД ќе се преселат на новата локација, каде што на површина од 11 хектари се градат повеќе целини.

Контурите на новиот комплекс, кој ќе биде еден од најголемите дипломатски објекти што ги изградиле САД на Балканот, веќе јасно се наѕираат. Досега целосно се завршени два објекта, а при крај е изградбата и на централниот објект каде што ќе се наоѓаат работните канцеларии на вработените во амбасадата, како и конзуларното одделение за издавање визи за граѓаните.

„Активностите се во завршна фаза, а два објекта веќе се комплетно завршени. Тоа се таканаречените влезни партии, а деновиве треба да заврши изградбата и на централниот главен објект. Во меѓувреме, се работи и на преостанатите три објекти, кои треба да бидат готови во текот на овој месец“, велат од „Гранит“, македонска градежна фирма која како локален подизведувач е задолжена за изградба на новиот дипломатски објект. За дизајнот и за договорот за изградбата на амбасадата е задолжена американската фирма „Келог Браун и Рут сервиси”.

И од амбасадата на САД во Скопје потврдуваат дека објектите што се градат на локацијата Градиште се во завршна фаза и веќе е започнато со привршување на поставувањето водоводна мрежа и електрична инсталација. „Веруваме дека некои делови од комплексот ќе бидат завршени и готови за употреба до втората половина на 2008 година“, вели Стивен Зигенфус, директор на проектот за изградба на новата амбасада.

Димензиите на проектот, како што објаснува Зигенфус, се замислени за потребите на мисијата во Македонија, но големината и импресивноста зборуваат за посветеноста на владата на САД кон Македонија и стабилноста на Балканот.

„Иако е еден од најголемите дипломатски објекти што сме ги изградиле на Балканот, тој не е проектиран да биде наш примарен резиденцијален објект ниту, пак, ќе биде објект во кој ќе живеат дипломатите назначени во Македонија“, додава тој.

Комплексот ќе се состои од шест до осум целини. Главната зграда на амбасадата, во која ќе бидат сместени работните канцеларии и приемното одделение, се протега на простор од над 4.000 м2, додека на 9.000 м2 се распространети придружните објекти, како што се работилници и магацини.

Според проектот, комплексот на Градиште ќе биде составен од повеќе модерни објекти, околу кои ќе има тревнат простор и дрвја. Најатрактивен дел се очекува да биде атриумот, во кој ќе се изложуваат дела на познати сликари. „Сакавме да изградиме нешто што ќе биде и модерно и актуелно, но исто така и уникатно за Македонија“, објаснуваат од амбасадата, додавајќи дека најважна карактеристика на проектот е тоа што ќе обедини повеќе објекти на едно место, со што ќе се зголеми ефикасноста на работата.

Сите објекти на новата амбасада ќе бидат пристапни за луѓе со инвалидитет. Особено внимание се посветува и на безбедносниот аспект и заштитата на персоналот и на посетителите во амбасадата, поради што околу целиот комплекс се гради заштитна ограда.

Кога ќе се отвори комплексот, нема да има спортски објекти или пливачки базени, но доколку подоцна биде донесена одлука за изградба на такви објекти, ќе има доволно простор да се изградат, најавуваат од амбасадата.

Во изградбата на новата амбасада, која се протега на површина од 44.490 квадратни метри на локалитетот Градиште, ќе бидат инвестирани околу 80 милиони долари. Приближно 70 Американци и повеќе од 200 лица вработени од Македонија ќе работат во новата амбасада по нејзиното отворање.

Емран ИСЉАМИ
Горан НАУМОВСКИ

Американците ни го земаа Кале каде што игравме фудбал, сега сакаат да се преселиме. Демек, им сметаме, а сега им пречи начинот на кој го прославуваме нашиот празник Ѓурѓовден - вели Рамиз Мемедовски, водоинсталатер од скопската населба Топаана.
Тој со неизвесност ја очекува судбината на својата работилница и куќата каде што живее, на кои им се заканува да бидат урнати поради безбедноста на американската амбасада што се гради на Кале.
- Младоста и староста ги минав во Топаана. Парчето леб го заработувам како водоинсталатер. Пред две недели, комшиите ме информираа дека некој во Топаана дошол и понудил пари да се преселиме. Причина било дека ќе им пречиме на Американците од амбасадата - вели тој. Американската амбасада е оддалечена од населбата 100 метри. Според неофицијални информации, луѓето од дипломатското претставништво инсистирале жителите на населбата да бидат преселени на друго место.
Дел од жителите се против понудата која пред неколку недели ја пренел претставник на амбасадата. Градоначалникот и советниците на општината Чаир тврдат дека знаат за овие информации, но се уште не добиле никакво официјално барање.
Според невладини активисти, од 300 куќи во населбата во кои живеат околу 3.000 жители, 80 отсто немаат имотен лист. Сопственикот на секоја куќа што ќе биде урната од американската амбасада би требало да добие обесштетување до 30.000 евра, велат нашите извори. Како што дознаваме од општина Чаир, Американците сметале дека државните органи нема да имаат проблем да ја урнат населбата, зашто тој дел од Топаана е дивоградба.
Браќата Орхан и Сали Демировски, чии куќи се на првата линија на рушење, со задоволство го очекуваат отворањето на амбасадата, бидејќи како што тврдат, им било ветено дека конечно ќе им биде решено станбеното прашање.
- Странец кој говореше македонски, вети дека нашите куќи ќе бидат урнати, а ќе добиеме станови. Ние сме две семејства, па очекуваме да добиеме два стана - вели Сали Демировски.


Државата да даде отштета

Државата треба да го реши станбеното прашање на оние на кои ќе им биде урната куќата, порачува градоначалникот на општина Чаир, Иџет Меџити. Тој тврди дека во општината има информации дека Ромското маало во Топаана ќе биде урнато, но засега никој не доставил официјално барање до градежната инспекција.
- Деталниот урбанистички план е во завршна фаза. Општината ќе понуди дивоградбите во Ромското маало да се легализираат. Но, ако се реализира идејата населбата да биде урната, тогаш ќе бараме државата да им го реши станбеното прашање, а не ние - тврди Меџити.

Амбасадата на Соединетите Американски Држави во Скопје ќе се сели во новиот комплекс на Кале. Оттаму велат дека резиденцијата на американскиот амбасадор во земјава Филип Рикер на Водно нема да се пресели. Додека трае селидбата, конзуларните работи на амбасадата ќе бидат во прекин, а агенциите што посредуваат во добивање американска виза на клиентите им препорачуваат да ги забрзаат постапките и да ги завршат до крајот на месецов.
- Ние ќе направиме се што можеме за да го елиминираме или минимизираме прекинот на работата, но можно е да има краток период во кој некои наши услуги нема да бидат на располагање – велат во Амбасадата на САД.
Од амбасадата тврдат дека се уште немаат точен датум за селидбата, но очекуваат во новите простории да се сместат најдоцна до крајот на април. Заедно со администрацијата во огромниот објектот на Кале ќе бидат преселени и неколку американски организации, меѓу кои и УСАИД.
- Веруваме дека ќе се вселиме во новата амбасада пред лето, но тоа ќе зависи од завршувањето на градбата. Во новиот комплекс ќе бидат вклучени и неколку наши канцеларии кои досега беа на различни локации низ Скопје и складишта во кои ќе се чува имотот на амбасадата – информираат од амбасадата.
Во новиот комплекс деновиве забрзано се работи на партерното уредување. Градежната механизација повеќе ја нема, а на терен може да се забележат работници кои ги поплочуваат патеките и го довршуваат дворот. Новиот комплекс се простира на локалитетот на Кале познат како Градиште, на потегот од Француски Гробишта до резиденцијата на поглаварот на МПЦ г. г. Стефан.
На локацијата има неколку големи објекти, од кои централниот е наменет за канцеларии на вработените и за конзуларното одделение, а во останатиот дел, како што тврдат од амбасадата, ќе се сместат уредите за вентилација и за климатизација.
Влезот во новата амбасада, според идејниот проект, е од страната на улицата Самоилова, а со еден крак ќе може да се влегува директно и во задниот дел на комплексот. За тоа беше пробиена нова уличка, која е асфалтирана, а се поставија и тротоари. Деновиве забрзано се расчистува просторот од левата страна на Самоилова за да се продолжи пешачката патека до амбасада.
Локацијата на Кале, со површина од околу 45.000 квадратни метри, беше продадена летото во 2005 година. За изведбата на проектот вреден 80 милиони долари беа назначени американската фирма „Келог Браун и Рут сервиси“ и македонската „Гранит“. Продажбата на земјиштето предизвика реакции кај граѓаните и кај некои архитекти, кои потпишаа и петиција против продавање и изградба на објект на локалитетот на Кале.