Во ГТЦ ќе се гради уште еден кат

http://www.a1.com.mk/vesti/novinar-email.asp?NovinarID=96&VestID=86139 - Александар Момировски

Ресторани, мини голф игралиште и забавен парк, игротеки и нови дуќани. Градскиот трговски центар се проширува. Ќе се гради уште еден кат, на кој се предвидени луксузни објекти.

На површина од 14.000 квадратни метри ќе има нови деловни простории кои акционерското друштво на државата ќе ги издава под закуп. Станува збор за инвестиција од десетици милиони евра, која ќе биде финансирана со државни пари или во соинвеститорство со приватна фирма.

Според информациите на А1, општинските власти веќе дале дозвола за градба, но допрва ќе се бира идејното решение за тоа како ќе изгледа третиот кат на трговскиот. Компаниите во градежниот бизнис треба да ги достават своите предлози.

Во втората фаза ќе се избере фирма која ќе го гради третиот кат, а се очекува изградбата да финишира кон крајот на следната година.

Новиот проект се објаснува како обид на надлежните од ГТЦ да се спротивстават на конкуренцијата, да ги повратат муштериите кои од ГТЦ поминаа во новоизградените трговски центри.

Ќе се надградува трет кат на ГТЦ

Новиот кат ќе има канцеларии, ресторани и хотелско сместување, но не и дуќани

Деспина Трајковска

Градскиот трговски центар наскоро ќе се надградува за уште еден кат. Канцеларии, ресторани, апартмани, центри за нега и здравје, спорт и рекреација, како и културен и бизнис дел, но не и бутици, се содржините кои ќе бидат дел од новиот, трет кат што ќе се гради врз основа на идејното решение избрано на меѓународен конкурс. Решението било избрано од 10 пристигнати труда, од кои еден дури од САД. Тоа се вклопува во околината и не отстапува од постојниот објект, односно, ја има задржано неговата автентичност.

„Ова решение е избрано, бидејќи успешно и ненаметливо е решен стаклениот покривач на галериите, кој дозволува непречена циркулација на воздухот, а наедно се реинтерпретира средишната улица која постои во изворниот модел. Нејзиното значење на внатрешна градска улица помеѓу различните содржини е уште повеќе потенцирана, што е и посебно обележје на нашиот објект“, вели Аго Абазовски, директор на ГТЦ.

Решението предвидува изградба на нови ескалатори и скали кои до покривот ќе водат директно од плоштадот, како и два пара нови лифтови во централниот дел на објектот. Планирано е и дополнување на комуникацијата со рампи за лицата со посебни потреби и тоа директно од подземната гаража до третиот кат.

„Иако на новиот кат нема да има дуќани, сметаме дека ГТЦ уште повеќе ќе ја зголеми својата атрактивност, бидејќи ќе има содржини за сечиј вкус. Предвидени се зони за спорт, култура, нега и здравје, детски занимални. Во најголем дел од катот ќе има простор за канцеларии и за ресторани, како и за апартманско, односно хотелско сместување“, вели Абазовски и посочува дека решението предлага и пет т.н, острови на покривната платформа кои ќе може да користат за летно кино, отворен простор за детска занимална, ѕид за качување и платформа за сончање.

Од ГТЦ се надеваат дека до крајот на годинава ќе ги завршат подготвителните работи, од изработка на главниот проект, па до обезбедување градежна дозвола и дефинирање на финансиската конструкција. „Реално очекувам изградбата да ја започнеме најдоцна до почетокот на идната година“, додава директорот на ГТЦ, кој смета дека се' уште е рано да се зборува колку ќе биде тешка оваа инвестиција, иако некои прогнозираат дека еден квадратен метар би чинел до 1.700 евра. Не е исклучена можноста во доградбата да инвестира Владата, или пак да се избере модел на приватно-јавно партнерство. Новиот кат на ГТЦ, кој е овозможен со изменетиот урбанистички план за Мал ринг, ќе го оформи постојниот објект во една целина, што е, всушност, замислата на идејното решение врз основа на кое ГТЦ се изгради во 1972 година.

Со хотелски апартмани кои имаат сопствени дворови, мензи и кафетерии, градинка со дневен центар, сали за фитнес и за аеробик, простории за културни и деловни настани, но и здравствена установа со општ лекар или стоматолог, Градскиот трговски центар, со надоградбата на трет кат, треба да заличи на големите светски центри. Со ваква идеја архитектите Јован Ивановски, Владимир Десков, Дејан Ивановски, Елена Пазарџиева и Ана Ивановска го изработија проектот што победи на конкурсот за доградба на ГТЦ. Во него се задржани основите од постојната градба, односно содржините се групирани во шест пресеци, а преземена е и главната средишна патека. Кон Водно ќе гледа угостителскиот дел составен од мензи, ресторани за брза храна и кафетерии и еден видиковец на покривот каде што посетителите ќе може да уживаат во погледот додека јадат сендвич. До него е просторот наменет за културни активности, промоции, изложби и деловни канцеларии за краткорочно закупување, сали за состаноци и за прес-конференции, а над нив е предвидено кино на отворено. Во продолжение следува спортскиот дел за фитнес, аеробик, пилатес, во чиј состав се наоѓаат и наменски продавници за спортска опрема, а одозгора и карпа за качување. Со поглед кон кејот ќе бидат хотелските апартмани за бизнис-корисници, детскиот центар со игралиште на покривот и центарот за нега и здравје на тело, над кој ќе се најде платформа за сончање. - Идејата е посетителите да си ги остават децата на час-два додека шетаат по продавниците или, пак, да им користи на вработените во околните институции. Со оглед на тоа што составен дел на трговскиот се и станбените згради, а тука живеат постари луѓе, планиран е и простор за амбуланта со општ лекар и стоматолог - објаснуваат архитектите. Во сите делови, освен угостителскиот и детскиот, оставен е простор и за дуќани кои се свртени кон внатрешноста на трговскиот центар. На третиот кат ќе се изгради и целосно застаклен објект во функција на бизнис-центар и нова управна зграда на ГТЦ. - Ова е отворено место низ кое секојдневно циркулираат стотици граѓани, клучна точка која ве поврзува со центарот и поради тоа ГТЦ го сметаме за простор кој содржи многу градски вредности. Оттаму и појдовме кога го работевме проектот. Отвореноста на просторот е важна бидејќи е единствен трговски кој дава таква слобода на посетителите и уживање во шетањето - велат авторите на проектот. Третиот кат, како и останатите два, ќе биде застаклен, но овојпат со рамен покрив кој ќе овозможи искористување на сончевата енергија преку панелите, вентилација и струење на воздухот и искористување на дождовницата за техничка вода. Ќе се постават и два пара лифтови во централниот дел на објектот. Во моментов е во тек тендер за избор на фирма која ќе го гради третиот кат на трговскиот. За подетални информации во врска со почетокот на изградбата, финансиите и со инвеститорите, од ГТЦ не беа заинтересирани да информираат.

http://www.vreme.com.mk/DesktopDefault.aspx?tabindex=0&tabid=1&EditionID=1571&ArticleID=103701