ПЕШАЧКИОТ МОСТ КАЈ СТАДИОНОТ ГОДИНАВА НЕМА ДА СЕ ГРАДИ

Градскиот стадион ќе остане без паркинг

Од Општина Центар се надеваат дека северната трибина нема да се изгради до 2009 година и затоа не ја предвиделе изградбата на мостот што треба да го поврзе стадионот со паркиралиштето

Пешачкиот мост преку Вардар, кој треба да го поврзува паркингот што ќе се гради на улицата Лазар Личеноски под Кале и Градскиот стадион, чија северна трибина е во изградба, нема да се гради годинава зашто Општина Центар не го предвидела во програмата за работа. За сметка на тоа, како приоритетна за Општината е изградбата на Мостот на цвеќето, што ќе ги спои Градскиот трговски центар и платото пред Македонската опера и балет.

Изградбата на мостот кај стадионот е од исклучително значење за спортскиот објект, бидејќи според детаљниот урбанистички план, паркирањето за посетителите е предвидено од другата страна на реката, на паркингот што треба да се гради на „Лазар Личеноски“. Доколку Општина Центар не го изгради мостот до 2009 година, до кога е предвидено да се заврши северната трибина, неизвесно е каде ќе паркираат посетителите, оти стадионот ќе биде недостапен од предвиденото место за паркинг.Од Општина Центар велат дека мостот е предвиден во урбанистичката документација, но за оваа година неговата изградба не е предвидена.

- Овој пешачки мост не е предвиден за годинава. За него нема ниту проектна документација, а во нашата Програма за работа во 2008 година како приоритетен е ставен Мостот на цвеќето, што ќе ги спојува ГТЦ со Македонската опера и балет. Се надеваме дека северната трибина нема да биде изградена до 2009 година, па поради тоа и овој мост не е предвиден. За изградбата на трибината, сепак, е потребен подолг временски период. Засега не знаеме ниту колкав ќе биде ниту колку ќе чини мостот кај стадионот - вели Лидија Неделковска, шеф на кабинетот на градоначалничката на Центар, Виолета Аларова.

Директорот на Јавното претпријатие за стопанисување со станбен и деловен простор (ЈПССДП), Ивица Коневски, кое ја води изградбата на трибината, не сакаше многу да коментира околу пешачкиот мост.

- Се надевам дека тој мост ќе биде изграден во 2009 година, бидејќи е предвиден во детаљниот план, а за него постојат и локациски услови. Неговата изградба е обврска на општинските власти - вели Коневски.

Додека пешачкиот мост кај стадионот не е ниту под точката разно во плановите на Центар, таму веќе наголемо се изработува проектната документација за Мостот на цвеќето. За изградбата на овој мост, со кој градоначалничката Аларова сака да го одбележи вториот мандат, во општинскиот буџет се предвидени 450 илјади евра. Во изградбата со 70 отсто од потребните пари ќе учествува и Комерцијална банка, која има интерес овој објект што поскоро да се изгради, бидејќи така централата на банката ќе биде подостапна.

За изградбата на Мостот на цвеќето, кој од двете страни ќе биде преполн со цвеќиња, се зборува со години, но тој дури неодамна беше внесен во урбанистичкиот план за локалитетот „Пресвета Богородица“. Мостот кај стадионот, пак, е предвиден во плановите во 2004 година.

Анела Петрова

Градот ќе ги санира оштетените мостови на Вардар

Во текот на следните два месеца повеќе фирми ќе изготват проекти за идните реконструкции

Сања Наумовска

Градот Скопје ќе реконструира 12 моста на Вардар, од кои четири се пешачки. На сите мостови веќе е направена обиколка и е подготвена фотодокументација врз основа на која во текот на следните два месеца повеќе фирми ќе изготват проекти за идните реконструкции. Со проектите, велат во Градот, ќе се знае колку време и финансии ќе бидат потребни за секој мост поединечно, од што ќе зависат и динамиката и редоследот на реконструкциите. Се очекува во почетокот на летото да започне обновата на дел од мостовите кои се во најтешка состојба.

Најголеми оштетувања, според првичните забелешки на стручњаците, имаат постарите мостови, оној кај „Холидеј ин“, кај Народна банка, мостовите „8 Септември“ и „Обединети нации“. Кај сите е регистрирано оштетување на коловозот, тротоарите, оградата и конструкцијата, а во голем дел ќе треба да се менува или дополнува и осветлението. Во план на градските власти е и декоративно осветление, кое на мостовите „Обединети нации“ и „8 Септември“ може да се комбинира и со додавање реклами.

Во подобра состојба се поновите мостови, кај Транспортниот центар, мостот „Близнак“ на булеварот „Србија“ и скоро обновуваните „Гоце Делчев“ и железничкиот мост на „Адолф Циборовски“. Тие ќе се декорираат само со помодерно осветление и реклами, а на „Близнак“ ќе му се менуваат и рабниците на тротоарите.

Што се однесува до четирите пешачки моста на Вардар, „Газела“, мостот кај автополигонот, под Кале и кај Топланата Исток, освен „Газела“, кој е понов и само ќе се осветлува, на сите други им претстои реконструкција на конструкцијата, оградата и осветлението.

„Проектот за реконструкција на мостовите на Вардар е во почетна фаза. Откако е направена обиколка на сите мостови, ќе следува изработка на проекти за секој поединечно. Очекуваме до лето да знаеме од кои мостови ќе започне реконструкцијата“, вели Алјоша Шопар, раководител на Секторот за урбанизам во Град Скопје, нагласувајќи дека во меѓувреме ќе се соработува и со Министерството за внатрешни работи заради обезбедување согласност за работа на мостовите кои се објекти од висок приоритет. Реконструкцијата ќе биде под надзор и на ИЗИИС, институција што има обврска секоја година да ја проверува и следи состојбата во која се наоѓаат мостовите.

Ограничен сообраќајот на мостот „Гоце Делчев“

Од 30 април, среда, поради реконструкција на мостот „Гоце Делчев“, Градот Скопје ќе воведе изменет сообраќаен режим. Во периодот од 30 дена, градежните работи ќе се изведуваат во две фази. Во првата фаза ќе се реконструира коловозот на лентата која води од улицата „Илинденска“ кон Старата чаршија, а во втората фаза коловозот во правец од трговскиот центар „Мавровка“ кон Владата. (С.Н.)

Велешани, кои живеат во близина на мостот, се загрижени да не дојде до попуштање на конструкцијата и негово уривање

Состојбата на мостот Гемиџии, кој ја поврзува левата со десната страна на Велес, е се полоша. Надлежните од Општината и од Фондот за регионални и магистрални патишта и натаму не преземаат ништо за да се санираат пукнатините на десната страна на мостот, веднаш до железничката рампа. Иако, мостот во ваква состојба се наоѓа веќе неколку месеци, надлежните засега само со потпирачи го спасуваат мостот да не попушти. Граѓаните на Велес, кои живеат во близина на овој мост, се повеќе ја искажуваат својата загриженост за состојбата.
-Секојдневно ги следиме промените на мостот и сме многу вознемирени.

Апелираме што побрзо да реагираат надлежните, за да се спречат евентуални несакани последици - велат жителите.

Во Фондот за регионални и магистрални патишта, кои се надлежни за состојбата на мостовите, се информирани за случајот. Нивни екипи се појавиле на лице место пред неколку месеци, биле направени одредени мерења, но оттогаш ништо не е направен за да се санираат пукнатините. На мостот Гемиџии, преку кој се одвива речиси целокупниот сообраќај во Велес, според стручњаците, не е алармантна само пукнатината на горниот дел туку во прашање е оштетувањето и на првиот потпорен столб. Стабилноста на столбот, но и на мостот веќе една година се обезбедува со железни потпирачи. Жителите од Велес веруваат дека Фондот, кој целосно е запознат со состојбата на мостот, во најскоро време ќе преземе мерки. Мостот е изграден во шеесетите години на минатиот век.

Фото вест

Предизборната шминка ги зафати и мостовите. Градот, кој неодамна најави нивна обнова, се чини дека ќе се задоволи само од бојадисување на заштитната ограда. Очигледно темите како безбедност, проодност и реконструкција ќе бидат оставени како материјал за кампањите и почетокотот на некој друг градоначалнички мандат.

Градежната фирма Делта Пром ќе ја гради пешачка патека во Велес преку Железниот мост, со цел да се поврзат жителите од левата и од десната страна на Вардар. Овој избор следува по завршувањето на тендерската постапка за изградба на пешачката патека, за што неодамна дозвола даде и Министерството за транспорт и врски.

Оваа фирма, според тендерската комисија, дала најповолна понуда во висина од 78.049 евра. Од локалната самоуправа информираа дека изборот е направен помеѓу три градежни фирми. Од тендерот отпаднале скопската фирма Факом, чија понуда изнесувала 140.813 евра и велешкото градежно претпријатие Изгрев со понудени 94.407 евра.

Во Општината велат дека по добиените услови за градба, од Министерството за транспорт и врски сега чекаат дозвола за да почнат градежните активности. Согласност за изградбата на пешачка патека преку железниот мост даде и ЈП Македонски железници. Со изградбата на пешачката патека, жителите од левата страна на влезот во Велес, посебно од населбата Речани, нема да бидат принудени повеќе на десната страна на градот да одат преку новиот, стариот или пак преку малото мовче.

Инаку, до шеесеттите години на минатиот век, Железниот мост беше единствениот преку кој се одвиваше, покрај железничкиот и целокупниот автобуски и патнички сообраќај во Велес. По изградбата на Новиот мост, преку Железниот мост, беше направена мала пешачка патека која претставуваше опасност за минувачите.

http://vecer.com.mk/?ItemID=0FFAB23D817EF64A84FCA464E72239FC

Тротоарите по асфалтирањето ќе бидат заградени со столпчиња за да се спречи паркирањето

Нов асфалт за кратерите на мостот Обединети нации

Од Градот велат дека мостовите генерално се дотраени и неугледни, па затоа ќе ги разубавуваат со нови огради и илуминација

Мостот на револуцијата кај МАНУ и мостот Гоце Делчев ќе добијат нова ограда, но и сосема ново осветлување со кое Градот Скопје сака да ги разубави овие објекти и да им даде нов лик. Неодамна Камениот мост доби ново осветление кое ги воодушеви граѓаните зашто им се отвори поинаква перспектива за значајното обележје. Веќе се распишани конкурси за идејни решенија за нови заштитни огради и илуминација на мостовите. Рокот за доставување на предлозите од авторите е 4 септември.

Она што е нејасно е зошто Градот се решил на ваков чекор, имајќи предвид дека годинава веќе беа санирани оградите на сите мостови во Скопје, односно тие беа поправени и бојосани. Од градското одделение за односи со јавност објаснуваат дека причината за сосема нови решенија за оградите и осветлението лежи во нивната старост.

- Дотраените и неугледни мостови во Скопје беа основна причина поради која градоначалникот Коце Трајановски распиша јавни конкурси со кои треба да се изработи идејно-обликовно решение за заштитна ограда и илуминација на Мостот на револуцијата и на мостот Гоце Делчев. Оградите на мостовите датираат од нивната изградба и не кореспондираат со естетско-урбанистичките потреби на градот Скопје, како престолнина на Република Македонија - изјавија од Градот.

За тоа каков ќе биде обликот, бојата, формата на оградите и илуминацијата, ќе се знае по изборот на најдобро конкурсно решение. Конкретните решенија, велат градските власти, треба да произлезат од трудовите на анонимните учесници, кои ќе ги оценува посебна комисија.

Првата награда за најдобро авторско решение изнесува 60.000 денари, втората 40.000 денари, а третата 20.000 денари. Ќе бидат откупени и три труда со 15.000 денари.

Градските власти велат дека при кроењето на Буџетот за 2010 година ќе се обидат да одвојат пари за разубавување и на другите позначајни мостови на Вардар.

Пред неколку месеци Градот го спроведе проектот за уредување на коловозните и на тротоарските површини на мостовите. Беа санирани 10 моста за сообраќај, плус два пешачки. Се обновија оградите, осветлението и поголемите оштетувања на тротоарите и на коловозите за да се зголеми безбедноста на возачите и пешаците.

Скопските мостови со години, како што многупати информирале и самите градски власти, не се во добра состојба. Проблемот со оградите, пукнатините и искршените тротоари делумно се реши годинава, но она што е поголем проблем се целосните реконструкции за кои се потребни многу пари. Градските власти не милуваат да зборуваат многу на оваа тема бидејќи со години се занимаваат само со „козметика“. Еден од мостовите во Скопје, кој се води како критичен и одамна е посочен за реконструкција, е мостот Обединети нации во Карпош 4, а ништо подобар не е и железниот мост во Сарај.

Движењето на кејот ќе биде блокирано најмалку три години

До средината на 2012 година делови од кејот ќе бидат претворени во градилишта

Град Скопје не избра идејно решение за осветлување и за нова заштитна ограда за мостот „Гоце Делчев“ и „Мостот на револуцијата“. Според градските власти, комисијата така одлучила затоа што пристигнале само три трудови, од кои едниот бил дисквалификуван поради тоа што не ги исполнувал условите. - Предложеното решение за „Мостот на револуцијата“ не го подобрува естетскиот изглед на мостот значајно, а оградата не се разликува од постојната. Трудот за мостот „Гоце Делчев“ не ги исполнува условите за максимална тежина на оградата - велат во Градот. Надлежните повторно ќе го распишат конкурсот, а работата на мостовите планираат да ја почнат в година.

Р.П.

Општините Аеродром и Гази Баба ќе градат нов пешачки мост на реката Вардар, кој ќе се наоѓа во близина на спортската сала „МЗТ“ и ќе има цел да ги поврзува двете општини. Според најавите, мостот најверојатно ќе почне да се гради идната година затоа што општините за оваа година немаат издвоено пари за таа намена. - Веќе подолго време се водат преговори за изградба на овој мост затоа што постои реална потреба на тој начин да се поврзат двете општини. Претставници од Аеродром, Гази Баба и од Градот постојано вршат консултации во врска со подготвувањето на проектот и најверојатно тој ќе почне да се гради веќе следната година и“велат од Одделението за односи со јавност на Град Скопје.

Е.М.

Два предлога за оградата и илуминацијата на мостот „Гоце Делчев“

Тројца автори конкурирале за идејно решение за мостот „8 Септември“

Мостот кај „Холидеј ин“ со орнаменти од културното наследство

Градоначалникот тврди дека во обновата на оградите нема да се користат антички примеси

Деспина Трајковска


Мостовите кај „Холидеј ин“ и кај „Александар палас“ ќе се обноват по теркот на идеите на истите автори според чии идејни решенија се гради музејот на ВМРО и се лијат четирите лава наменети за мостот „Гоце Делчев“. Тоа, според едниот од авторите, но и според тврдењата на градоначалникот Коце Трајановски, не значи дека мостовите ќе имаат антички орнаменти или симболи од времето на Александар Македонски. Иако се' уште не сакаат јавно да ги обелоденат, авторите велат дека станува збор за решенија, според кои, мостовите ќе добијат современ изглед искомбиниран со модерни детали и примеси од богатото македонско културно наследство.

Градоначалникот Трајановски накусо објасни дека и двата моста ќе имаат ограда од ковано железо, најверојатно канделабри кои со својот изглед ќе даваат посебен белег, а на ниту еден од нив нема да има скулптури или други елементи за кои се шпекулира во јавноста. Столбовите на мостот кај „Холидеј ин“ ќе бидат повпечатливи од досегашните и на некои делови ќе има кружни форми.

„Идејното решение, генерално, е изработено со користени елементи од нашето културно наследство. Шпекулација е дека тоа е во антички стил“, ни изјави вчера Константин Јанев, автор на првонаграденото решение за обнова на мостот кај „Холидеј ин“. Тој истовремено е автор и на четирите лава кои ќе го „чуваат“ мостот „Гоце Делчев“, а учествувал и во обновата на Ристиќевата палата.

Авторот на избраното идејно решение за заштитна ограда и илуминација на мостот „8 Септември“, Зоран Јордановски, наводно, веќе работел на одредени корекции на решението. Тој моментално е во Фиренца, на пракса во една компанија. Неговиот татко не' информираше дека за Јордановски ова ќе биде втор голем проект на кој ќе работи и тоа кратко време по магистрирањето. Прв проект му бил објектот на музејот на ВМРО.

Од Градот не сакаат да предвидуваат кога теренски ќе почне реализацијата на проектите. Велат во тек е избор на фирма што ќе ги изработи основните и изведбени проекти врз основа на идејните решенија, по што ќе се распише тендер за изведувач.

Инаку, градските власти велат дека се' уште трае постапката за избор на идејно решение за обнова на мостот „Гоце Делчев“. Тоа е втор обид, откако првиот беше поништен, бидејќи единственото понудено решение не ги исполнуваше условите пропишани со конкурсот. На вториот повик се понудија два труда кои се' уште се предмет на анализа од надлежната комисија.

http://utrinski.com.mk/?ItemID=7DAF731B8C80184B9E4A5BF48BBE54FF

Нема нова ограда на мостот „Гоце Делчев“

Ниту во вториот обид не е избрано идејно решение, според кое, би се обновила оградата на мостот „Гоце Делчев“. Со образложение дека пристигнатите трудови не одговараат целосно на програмските барања, Градот Скопје го поништи повикот на кој биле доставени четири труда. Од истите причини надлежните го поништија и првиот конкурс.

„Недоследно почитување на прописите во конкурсот од типот на параметри и димензии, е една од причините за поништување на повикот. Оние трудови, пак, што ги исполнија овие услови, не доставија квалитетни идејни решенија“, објаснија вчера градските власти и најавија дека наскоро ќе распишат нов конкурс, трет едноподруго и под истите услови. (Дс.Т.)

Трета среќа за разубавување на мостот Гоце Делчев

По два поништени конкурса за идејно решение за заштитна ограда и илуминација на мостот „Гоце Делчев“, Градот Скопје распиша трет конкурс. Крајниот рок за поднесување на трудовите е 15 март годинава.

Двата претходни конкурса, како што објаснија градските власти, беа поништени поради тоа што пристигнатите идејно-обликовни решенија, од една страна, не го подобрувале естетскиот изглед на мостот, а од друга, не ги исполнувале условите за максимална тежина на предложената ограда, што е важно за статичката стабилност на објектот. Неофицијално, еден од трудовите нудел ограда во барокен стил, со цел да се вклопи со лавовите што Општина Центар планира да ги постави на почетокот од двете страни на мостот.

- Дотраеноста и неугледноста на оградите беа главни причини Градот да распише конкурси за разубавување на неколку скопски мостови - велат градските власти во однос на нивната одлука за менување на сегашната инфраструктура.

По неуспешните два конкурса, паричните награди во третиот се зголемени во просек за околу 30 отсто. Првата награда, која претходно изнесуваше 60.000 денари, сега е зголемена на 90.000 денари, втората е двојно повеќе, односно 45.000 денари, а третонаградениот е предвидено да добие исто како и во претходните конкурси, односно 15.000 денари. Проектите, освен што треба да понудат решенија за разубавување на мостот, предвидено е да ја дефинираат и финансиската конструкција.

И додека се чека труд што ќе понуди најдобро естетско решение за мостот „Гоце Делчев“, подготвителните работи за менување на оградите на мостовите кај „Холидеј ин“ и кај хотелот „Александар палас“ се во тек. Ќе се избира фирма што ќе ги изработи основните и изведбени проекти врз основа на идејните решенија, по што ќе се распише тендер за изведувач.

Како што неодамна објасни градоначалникот Коце Трајановски, мостовите ќе добијат современ изглед, искомбиниран со модерни детали и примеси од богатото македонско културно наследство. Според него, двата моста ќе имаат ограда од ковано железо, како и канделабри во тој стил. (Ј.И.)

Пукнатините на мостот "Гемиџии" во Велес се повеќе се шират. Бетонот се распаѓа и одронува. Водоводната цевка поставена долж мостот е во опасност да пукне и да направи поплава бидејќи бетонскиот блок е целосно одвоен од конструкцијата на мостот и лежи врз цевката. Искршените гранки и трупци насобрани на раклите дополнително вршат притисок на самиот мост.
-На мостот "Гемиџии" му е потребна итна санација. Доколку тоа не биде сторено во најскоро време, водоводната цевка може да пукне и без вода за пиење да останат сите жители од левата страна на Велес. Состојбата со пукнатината е повеќе од критична - вели Ордан Тутунџиев, советник од ЛДП чија куќа е веднаш до самиот мост.

Тутунџиев заедно со уште неколку советници од другите партии неколкупати досега поставиле советничко прашање во врска со состојбата на мостот, но одговорот на градоначалникот на општина Велес, Горан Петров секогаш бил дека мостот "Гемиџии" не е во надлежност на Општината туку на Министерството за транспорт и врски.
-Граѓаните секојдневно поминувајќи под мостот се плашат да не им падне дел од бетонот врз глава. Зарем не треба да се преземат мерки и да се санира овој мост кој е главна сообраќајна врска од едната до другата страна на Велес - вели Тутунџиев.

Општината Велес на повеќе пати досега интервенирала до Министерството за транспорт и врски за санирање на мостот "Гемиџии". Оттаму експертите констатирале дека е потребна санација но, барем до сега Министерството нема обезбедено пари иако минатата година беше ветено дека санирањето ќе биде извршено во текот на оваа година.

Но реално целата работа може да се заврши и за помалку  од една недела.

Нов мост на Црн Дрим

СТРУГА - Локалната самоуправа најавува изградба на нов мост на реката Црн Дрим во Струга. Пред почетокот на туристичката сезона еден од двата дрвени моста беше затворен за движење, а граѓаните за да стигнат на другата страна од кејот требаше да прават цел круг.

Градоначалникот на Струга, Рамиз Мерко, потенцира дека се очекуваат претставници од фирмата „Искра“ од Куманово, кои треба да презентираат проекти за мостови. Дури потоа ќе се распише тендер за изградба.

Во незавидна состојба е и мостот кај испустот на реката Црн Дрим. Според Мерко, овој премин е изграден од ХЕЦ „Глобочица“, а санацијата е во нивна надлежност. (Д.Р.)