Маја Михајловска

Шарена фасада со риби и гулаби, огромна проѕирна купола, стаклен бунар со златни рипки, се карактеристичните обележја што ќе ги има спомен- куќата на Мајка Тереза.
Таа ќе биде лоцирана на платото пред Домот на АРМ во непосредна близина на сегашниот споменик на Мајка Тереза, на улицата Македонија. Според информациите од Министерството за култура, кое стои зад овој проект, спомен-куќата ќе почне да се гради во мај, откако на 22 април ќе заврши тендерот за избор на изведувач на градежните работи. Проектот за спомен-куќата го изработи архитектот Вангел Божиновски, кој е комплетен автор на идејното и на главното решение. Тој вели дека спомен-куќата ќе биде во духот на македонската национална архитектура бидејќи сакал да го прикаже скопскиот дом, куќа од времето на детството на мајка Тереза, која живеела во Скопје до својата 14-годишна возраст.
Затоа спомен-куќата ќе има изглед на стара куќа, со дворче, со порта и авлија.
- Целата спомен-куќа е со симболика, преку неа создадов приказна. Се обидов светот да го гледам како што може да го гледа мало девојче, свет на фантазии. Затоа наместо вода, во бунарот на приземјето ќе најдете златни рипки, но како што се оди кон катот и поткровјето се дава духовната преобразба во животот на Мајка Тереза. Обичната куќа нагоре се преобразува во црква. Има капела, а проѕирната купола дава отворен поглед кон небото - вели Божиновски.
Стаклениот бунар ќе има 81 златна рипка, според годините на Мајка Тереза. Божиновски објаснува дека рибите и гулабите се застапени на повеќе места во спомен-куќата затоа што се христијански симболи за Исус Христос и за Светиот Дух. Всушност целата фасада ќе биде насликана со риби и гулаби и ќе преовладува сината боја, карактеристична за сестринскиот ред на Мајка Тереза. Божиновски вели дека фасадата ќе биде направена со специјална технологија, за првпат применета во Македонија и ќе има ефект како да тече вода.
Подрумскиот дел ќе биде функционален и ќе се користи за културни активности и ќе има мал амфитеатар, кој ќе може да собере 30 до 40 луѓе. На првиот кат ќе има музејска поставка, а на поткровјето наместо во ентериер, се излегува надвор на огромна тераса каде што се наоѓа капелата на Мајка Тереза. Во капелата подот ќе изведен со мрежа од осветлителни тела. Карактеристично е што на врвот од куќата ќе има огромна купола, топка од акрилно стакло со дијаметар од 4 метри и ќе дава поглед кон небото.
Ќе има и четири фонтани, кои ќе бидат поставени од страната на улицата Македонија и, според Божиновски, треба да ги претставуваат четирите реки во рајската градина. Овој проект на Божиновски уште на самиот почеток беше проследен со многу контроверзи во јавноста, од тоа дека станува збор за наместен избор, па се до критиките дека е проект со апсолутен кич и невкус. Сепак, Божиновски смета дека до сега не наишол на сериозна професионална критика, туку дека се сведувала само на таа од студенти.
Спомен-куќата ќе биде со вкупна површина од 500 квадратни метри.

В петок ќе почне да се гради спомен-куќата на Мајка Тереза

Овој месец ќе биде поставен и камен- темелникот на музејот на ВМРО

Неделава ќе биде поставен камен-темелникот на спомен-куќата на Мајка Тереза, а кон крајот на овој месец ќе стартува и изградбата на музејот на ВМРО, најавуваат од Министерството за култура. Почетокот на градежните работи на спомен-куќата на најпозната скопјанка свечено ќе биде одбележан в петок.

Изградбата му е доверена на ГД „Гранит“ и, според договорот со Министерството за култура, кое е носител на проектот, ќе треба да заврши за четири месеци. Според Елизабета Канческа-Милевска, државен секретар во Министерството за култура, неделава ќе биде избран и изведувачот на градежните работи на музејот, чиј камен-темелник ќе биде поставен околу 20 мај.

„Оваа градежна сезона ќе се отвори уште едно градилиште и тоа за објектот на Македонската филхармонија. Неделава ќе биде распишан тендерот за градба и очекуваме целата процедура да заврши до почетокот на летото, за кога е планиран и стартот на изградбата“, вели Канческа-Милевска.

Спомен-куќата на Мајка Тереза ќе се гради во паркчето кај Домот на АРМ според проект на архитектот Вангел Божиновски, кој е комплетен автор и на идејното и на главното решение.

Проектот предвидува спомен-куќата да биде во духот на македонската национална архитектура, а околу неа ќе има плоштатче и двор. Музејскиот комплекс, пак, ќе се гради веднаш до Народниот театар, за кој се во тек градежни работи за негово обновување. Музејот ќе се гради според идејното решение на архитектот Зоран Јордановски, а автор на главниот проект е проектантската куќа „Неимар“. (Дс.Т.)

Спомен-куќата на Мајка Тереза ќе биде готова до средината на наредниот месец. Ова вчера го најави премиерот Никола Груевски кој, заедно со министерката за култура Елизабета Канческа - Милевска беа на градилиштето да проверат како течат градежните работи за изградба на куќата на големата хуманистка. Груевски рече дека е задоволен од текот на активностите и оти се се одвивало според предвидената динамика. Ова изјава на Груевски доаѓа само една недела откако Министерството за култура информираше дека Куќата на Мајка Тереза ќе биде готова до крајот на годинава.
Спомен-домот на Мајка Тереза се гради на местото каде што некогаш била Католичката црква во Скопје, во која Гонџа Бојаџиу е крстена, според проект на архитектот Вангел Божиновски. Таа зафаќа површина од 592 квадратни метри и ќе биде во духот на македонската национална архитектура. Околу Спомен-куќата се предвидени мини-плоштад и двор. За изградба на Спомен-домот на Мајка Тереза ќе се потрошат два милиона евра кои ги обезбеди Министерството за култура. (А.А.)

http://www.vest.com.mk/default.asp?id=157333&idg=8&idb=2481&rubrika=Skopje