Скопје

Зградата на „Нова Македонија“ - нов дом на министерствата

До крајот на ноември во објектот ќе се преселат пет министерства, ДИК и други служби

Деспина Трајковска

Зградата на поранешното НИП „Нова Македонија“, позната и како Дом на печатот, до крајот на ноември ќе се претвори во седиште на пет министерства и на повеќе владини институции. По неколкугодишното реновирање, во кое што Јавното претпријатие за стопанисување со станбен и деловен простор вложи 176 милиони денари, објектот конечно повторно ќе ги отвори вратите, но овој пат за владините служби.

Најмногу, вкупно девет ката од зградата, на располагање ќе има Министерството за образование и наука, кое целосно ќе се пресели во просториите од седми до 15. кат. Во подрумот, Министерството за економија ќе ги смести геолошките збирки и Државниот архив на Македонија за архивска граѓа. Приземјето, дел од подрумските простории и галеријата на зградата ќе ги користи Државната изборна комисија, заедно со Министерството за информатичко општество, кое ќе има простор и на вториот кат. На Јавното претпријатие за станбен и деловен простор му припадна првиот кат, заедно со Службата за општи и заеднички работи, која ќе има и други простории на приземјето и во подрумот. Министерството за локална самоуправа, пак, во иднина ќе биде на вториот кат од зградата, а на третиот Министерството за култура. На четвртиот кат ќе биде изграден посебен прес-центар на Македонската информативна агенција, а на два ката погоре ќе бидат Секретаријатот за законодавство и Комисијата за заштита на конкуренцијата.

„Иако имаше најави дека зградата ќе биде порано готова, плановите се пролонгираа од оправдани причини. Претходно ангажираната фирма не ги испочитува роковите, но исто така и не постоеше комплетен проект, а недостигаа и пари“, вели Ивица Коневски, директор на ЈПССДП, едно од државните јавни претпријатија што ќе користат простории во некогашниот Дом на печатот.

Инаку, со вселувањето на неколку министерства во една од најпознатите висококатници во Скопје, државата конечно ќе ги намали трошоците што ги има по основа на кирии за министерства, кои со години работат раштркани во повеќе најмени објекти. Колку пари досега се трошеле за таа намена, вчера од владината Служба за општи и заеднички работи не можеа да кажат.

„Тоа се големи математики со оглед на тоа што речиси сите министерствата се сместени во неколку објекти. Сепак, сумата е голема. Но, сега со преселувањето тие трошоци ќе станат минато. Тоа е само еден од бенефитите што ќе ги има државата од сконцентрирањето на поголемиот дел од министерствата на едно место“, вели Васе Доневски, директор на Службата за општи и заеднички работи на Владата.

Според него, концентрирањето на министерствата на едно место ќе овозможи и нивно пофункционално работење во однос на испраќање на пратките, архивирањето, а Службата ќе има и полесен и поедноставен увид за комуналиите и воопшто техничките работи на министерствата.

http://utrinski.com.mk/?ItemID=8562730F77FE6743A5ADB1B2E65F67AB

Министерствата ќе бидат кираџии во НИП „Нова Македонија“

Јавното станбено претпријатие бара од државните органи што треба да се сместат во зградата на НИП-от да платат кирија од 2,2 милиона евра за наредните три години

Јавното претпријатие за стопанисување станбен и деловен простор бара кирија од пет евра за квадрат од 11-те државни органи, кои треба да се сместат во зградата на НИП „Нова Македонија“ бидејќи Владата не префрлила 2,2 милиона евра за реновирање на објектот. Идејата на претходната влада, која преку ова јавно претпријатие за 6,6 милиони евра ја купи петнаесеткатницата на НИП-от, беше во неа да се сместат повеќе државни органи за да не се одлеваат високи суми од буџетот за кирии.

Претпријатието сега бара да се поништи владината одлука со која во зградата треба да се сместат повеќе министерства бидејќи државата не била сопственик и нема право да владее со имотот. Во станбеното претпријатие планираат овој простор да го издаваат под закуп, од што за три години ќе собереле 2,2 милиона евра. Претпријатието и' порачува на Владата со ребалансот на буџетот да ги даде парите за плаќање на трошоците за реновирање на објектот или за наредните три години да испланира пари за кирија на повеќе државни институции.

Министерствата и државните органи се во паника откако пред неколку денови го добиле известувањето од јавното претпријатие. Тие веќе си набавиле мебел и друга опрема, која им била потребна за вселување во новите простории.

- Влеговме во зградата за да видиме до каде се работите. Има што да се види, таа е руинирана. Секој ден се менуваат плановите за квадратурата и за тоа на кој кат ќе се сместиме. Ние веќе купивме и мебел. Од Владата бевме известени дека треба да ги завериме просториите во Катастарот, во книгата за евиденција на недвижости што ги користат државните органи. Но од Катастарот велат дека тоа не може да се направи бидејќи тие простории не се сопственост на државата - велат извори од министерствата.

Стечајната управничка на НИП „Нова Македонија“ Ангелина Гогушевска вели дека нотарскиот акт не е завршен и се уште како сопственик на зградата во Катастарот се води издавачката куќа во стечај. Извештај за зградата најави за во наредната недела откако тој ќе биде усвоен од Одборот на доверителите.

Поради директорски смени во Јавното станбено претпријатие нема кој да ги објасни новите предлози.

Според одлука на Владата на Владо Бучковски, донесена во јуни годинава, во зградата на НИП-от требаше да се сместат министерствата за економија, образование, локална самоуправа и за труд и социјална политика, како и Државниот архив, Агенцијата за државни службеници, Службата за општи и заеднички работи на Владата, Македонската информативна агенција МИА, Секретаријатот за законодавство и Комисијата за заштита на конкуренцијата. Јавното станбено претпријатие пресметало дека најголема закупнина за три години, од над 698.000 евра, треба да плати Министерството за образование бидејќи добило најголема површина од 3.881 квадрат на повеќе катови од зградата. Министерството за труд за 1.545 квадрати на третиот кат ќе треба да плати 278.000 евра.

Владата не зела дивиденда од ЕСМ

Владата на Владо Бучковски не префрлила 104.000 евра во државниот буџет од дивидендата на поранешното ЕСМ за 2005 година. Со овие пари требало да се плати дел од трошоците на Јавното станбено претпријатие за реновирање на зградата на НИП „Нова Македонија“.

Владата за таа цел требало да обезбеди вкупно 2,2 милиона евра, од кои околу 1,4 милион евра од годинашниот буџет, 104.000 евра од добивката на ЕСМ, 47.000 евра од вишокот пари од работата на „Македонски пошти“ и 763.000 евра од буџетот на Јавното станбено претпријатие.

Јавното претпријатие за стопанисување со станбен и деловен простор ги известило министерствата дека овие пари не се обезбедени.

http://www.dnevnik.com.mk/?itemID=C1EAFCB7E092A84B8689B2A736D34D2A&arc=1 - Дневник - Александра Филиповска - 09.09.2006

Dali moze nekoj da stave fotki od dalecina? Bi sakal da vidam vo globala kako lice celiot kompleks ( IK banka i stara - Nova Makedonija.. ( Od dijaspora pisuvam, taka da ne mozam da vidam...