Во Струмица се проширува булеварот „Ленинова“

Почна проширување на дел од булеварот „Ленинова“ во Струмица. Од одделението за комунални дејности информираа дека со овој градежен зафат ќе се изврши проширување за 100 метри во должина и 2,7 метри во ширина, на делот од ученичкиот дом „Димитар Влахов“ до крстосницата на булеварите „Ленинова“ и „Маршал Тито“. Со проширувањето ќе се добие посебна сообраќајна лента за десни свртувања на моторните возила, со што ќе се надминат досегашните редици на чекање на приодите во кои најчесто се престројуваа возила за право и лево управување. Истовремено, со проширувањето ќе се направи и посебна лента со наизменичен режим на паркирање пред ученичкиот дом „Димитар Влахов“ и Управата за јавни приходи. Во текот на работното време на овој простор ќе можат да се паркираат само службените, а по работното време сите останати возила. Со овие зафати конечно ќе се избегнат мешаниците во централното градско подрачје.