Градоначалникот на општина Илинден, Жика Стојановски, директорот на УСАИД, Кит Прентон, и директорот на ОУ „Гоце Делчев“, Александар Митревски, вчера потпишаа Меморандум за разбирање и соработка за реконструирање на училиштето. Со реализација на проектот, 42 дрвени прозорци, кои се застарени и оштетени, ќе се променат со алуминиумски. Со тоа на 760 ученици од основното училиште „Гоце Делчев“ ќе им се овозможат подобри услови за работа и за следење на наставата, односно потопли училници. Вкупната вредност на проектот изнесува 30.000 американски долари и се превидува да заврши за три месеци.

Р.П.
http://www.vreme.com.mk/DesktopDefault.aspx?tabindex=3&tabid=1&EditionID=1310&ArticleID=84266 - Време

Владата почна проект за изградба на 100 нови училишта низ Македонија, кои ќе бидат реализирани преку јавно-приватните партнерства и капиталните инвестиции во основното и во средното образование, соопшти вчера владиниот портпарол Ивица Боцевски- Ќе бидат издвоени 512 милиони денари од буџетот, а упатен е повик и до сите општини да аплицираат и да се приклучат кон проектот, кој има цел да се намали бројот на ученици по клас. Овие основни и средни училишта ќе бидат изградени по принципот на јавно-приватните партнерства. Засега има 44 апликации од општините - рече Боцевски. Тој посочи дека станува збор за темелни инвестициски зафати во 101 основно училиште и во 22 средни училишта. Инвестициите ќе се обезбедат со долгорочен лизинг, каде што најголемиот дел од средствата ќе бидат на товар на Владата, а минимален дел на самите општини. - Делот кога ќе бидат вклучени општините ќе биде по многу години од денеска, а во тој период општините ќе бидат финансиски здрави за да влезат во овој проект. Во моментов е потребно партнерство, каде што во јавно-приватните партнерства партнер ќе биде приватниот сектор и тие ќе се натпреваруваат во однос на лизингот - истакна Боцевски. Владата, информира Боцевски, покренала прашање и за имотните листови за објектите што се во сопственост на државата. - Владата пристапи кон темелно попишување на имотот и вадење имотни листови на институциите во нејзин состав. Правната сигурност, безбедност и култура треба да почне од самите јавни институции и од оние што имаат мандат да го овозможат владеењето на правото - додаде портпаролот Боцевски.

КАПИТАЛНИ ИНВЕСТИЦИИ ВО ОБРАЗОВАНИЕТО

Ќе се довршуваат Зеф Љуш Марку и Коменски, ќе се поправа Уметничко

Доизградба на зградата на Гимназијата "Зеф Љуш Марку", довршување на започнатата училишна градба на "Ј.А.Коменски", реконструкции на Уметничкото училиште "Лазар Личеновски", на Гимназијата "Никола Карев", "Кочо Рацин", "Нико Нестор" во Струга, се само дел од училиштата кои се најдоа на листата на Министерството за образование, каде ќе се подобруваат условите за следење на наставата во наредниов период.

Владата годинава во основните и средните училишта ќе вложи рекордни 512 милиони денари, што претставува и најголемата инвестиција досега во македонското образование. Парите од државниот буџет се наменети за инвестициски зафати во 101 основно училиште и 22 средни училишта. Темелно ќе се поправаат една третина од основните, и една четвртина од средните училишта во земјата. Овде влегува и доизградба на веќе започнати училишни објекти.
Ова го најави владиниот портпарол Ивица Боцевски, кој посочи дека годинава е рекордна по капиталните инвестиции од државниот буџет за образованието. Во споредба со буџетите од последните неколку години парите се зголемени за повеќекратно.

Во насока на остварување на владината намера за подобрување на условите, односно за воведување на едносменско работење и помал број на ученици во паралелките, ќе се градат и уште 100 нови училишта по принципот на јавно приватно партнерство. Но, иако рокот за пријавување на општините бил пролонгиран три пати, биле пријавени само 44 објекти.

- Апелираме до сите општини, без разлика дали претседателите и советниците припаѓаат на позицијата или опозицијата, дека се уште постои можност да се пријават за потребите за изградба на училишни објекти и листата е се уште отворена, вели владиниот портпарол.
Тој додава дека во тек е изработката на стратегискиот план кој е основа за идното распишување на јавен повик за финансирање на проектот за 100 училишта, на кој можат да аплицираат сите заинтересирани приватни домашни и странски компании кои ги исполнуваат условите. Во јавното приватно партнерство партнер ќе биде приватниот сектор и тие ќе се натпреваруваат во однос на лизингот. Општините се оние кои ги согледуваат потребите и кои ќе го димензионираат опфатот со деца и локациите каде е потребно да се градат училиштата.

Милена ГЕОРГЕВСКА

Привршува изградбата на новиот објект на „Ј.А.Коменски“

Изградбата на новата училишна зграда на „Јан Амос Коменски“ е во завршна фаза. Деновиве се поставуваат подовите кои се изработени од еколошки материјали, се поплочуваат делови од холовите и се врши последната рака од варосувањето. По изведбата на овие активности, ќе се продолжи со работа на надворешниот дел од објектот. Ќе се изведуваат водоводните и приклучоците за фекалната канализација, како и потребните приклучоци за електрика.

„Големите зафати се завршени. Сето ова што останува да го доработиме е ‘ситна‘ работа која единствено може да се пролонгира доколку временските услови бидат неповолни. Евентуалните дождови ќе не' спречат да се раскопува теренот за изведба на приклучоците, што всушност, е работата што преостанува да се заврши за објектот да се предаде во употреба. Исто така, останува да ги изведеме и тротоарите и пристапите кон новиот објект“, вели Петар Ивановски, раководител на Сектор за комунални работи на Општина Карпош, кој смета дека, со оглед на текот на активностите, голема е веројатноста објектот да биде функционален уште од идниот месец.

Ова ќе биде прво училиште во земјава кое започна да се гради со општински пари, но поради малерозните настани што ја следеа изградбата, прекин на работите поради финансиски проблеми на Општината, а потоа и опожарување на училиштето, во проектот со финансиска помош се вклучи и Владата. Новиот објект на „Јан Амос Коменски“ започна со изградба пред околу дваест месеци и за таа намена Општината издвои 1,2 милиони евра, а Владата донираше 400.000 евра. Според проектот, новото училиште ќе има две нивоа - приземје и кат. (Дс.Т.)

http://www.netpress.com.mk/vestiimages/23570/Sulejman%20Rusiti.jpg">

Министерот за образование и наука, Сулејман Рушити и швајцарскиот амбасадор во земјава, Никол Вирш, денеска, ќе потпишат Меморандум за разбирање за доградба и реновирање на четири основни училишта.

Оваа година планирано е да доизгради основното училиште “Рајко Жинзифов” во с. Горно Оризари, општина Велес, ќе се реновираат основните училишта “Кирил и Методи” и “Јохан Хајнрих Песталоци” во општина Центар и ќе се доделат средства за довршување на основното училиште “Јан Амос Коменски” во општина Карпош. Вкупните средства доделени од Швајцарската Агенција за развој и соработка изнесуваат 25,40 милиони денари, а вкупните средства обезбедени од Министерството за образование и наука изнесуваат 27,70 милиони денари, наведено е во соопштението од министерството.

Швајцарија ја поддржува Македонија во реновирањето и доизградбата на основните училишта уште од 2000 година, преку тогашната Програма за хуманитарна помош. Како резултат на добрата соработка со Министерството за образование и наука, програмата прерасна во заедничка активност и во моментов се реализира третата фаза која започна во 2007 година и ќе трае до крајот на 2009 година. Досега повеќе од 40 училишни згради се довршени или реновирани  во земјава.

http://www.netpress.com.mk/vest.asp?id=23570&kategorija=1 - Net press

Се реновира училиштето „Лирија“ во Тетово

ТЕТОВО – Основното училиште „Лирија“, едно од најстарите во Тетово, интензивно се реновира. Се подновуваат вратите и прозорците стари повеќе од 60 години. Средства за овој зафат во износ од 30.000 долари обезбеди УСАИД, преку проектот ПЕП, наменет за основно образование.

„Во наредните пет години ќе се реновираат сто училишта во Македонија. Целта на проектот е да се создадат подобри услови за учење“, рече вчера во Тетово Двејн Ли, директор на проектот.

Во првата фаза се вложени 500 милиони долари од УСАИД за училишта во Македонија. За 21 училиште во Тетово, во функција на подобрување на условите за работа, локалната самоуправа годинава издвоила 300.000 евра, информира Енвер Беќири, одговорен за образование во Општина Тетово. (Г.Е.)

Општина Карпош ќе гради нова училишна зграда за основното училиште "Димо Хаџи Димов" во населбата Влае. Општинарите велат дека сегашните бараки во кои учат децата се во катастрофална состојба. Тие биле изградени по земјотресот, како привремено решение, но во нив се учи веќе половина век. Општинарите велат дека под итно е потребно да се изгради нов објект за ова училиште. За таа цел општинарите распишаа јавен оглас за избор на најдобро идејно-архитектонско решение за новата училишна зграда и партерно уредување на дворот. За најдобрите проекти предвидени се парични награди. Првонаграденото решение ќе добие 180.000 денари, а за второто и третото место предвидени се по 60.000 денари.
Од Карпош велат дека штом ја завршат изградбата на основното училиште "Јан Амос Коменски", ќе се насочат кон активности за изградба на училишна зграда за "Димо Хаџи Димов".
"За основното училиште 'Јан Амос Коменски' направивме одлична училишна зграда. В година цел ќе ни биде исто такви одлични услови за учење да добијат и децата од 'Димо Хаџи Димов'. Средствата за изградба на објекти ќе ги обезбедиме преку странски донации, но и од буџетот на Општина Карпош за наредната година", велат од Општина Карпош. (А.А.)

Нова зграда за велешката библиотека

Во нови простории ќе се пресели библиотеката „Гоце Делчев“ во Велес. Велешкиот градоначалник Аце Коцевски вчера најави дека зградата на поранешниот Центар за детско творештво „Ѓоре Органџиев“ ќе биде целосно реновирана и пренаменета за библиотека. Големи читалници, соби за видеопроекции и оддели за светска и за домашна книжевност ќе има во новите простории на библиотеката. Реконструкцијата и преселбата се во тек и до денес се префрлени околу 100.000 книги од старата зграда, која беше руинирана. Реновирањето се изведува со пари што биле обезбедени од продажбата на стариот простор на библиотеката.Во рамките на библиотеката ќе биде изградена голема повеќенаменска сала со површина од 268 квадратни метри и ќе има 220 седишта.

ОПШТИНА КАРПОШ ЗАВРШУВА СО ИЗГРАДБАТА НА УЧИЛИШНАТА ЗГРАДА ВО ТАВТАЛИЏЕ

Нов Коменски за новата учебна година

Изградена според проект на "Проинг" Тетово, се простира на површина од околу 4100 метри квадратни, има два ката на кои се распоредени кабинети и училници, како и една училишна библиотека. Веднаш до училиштето, на 350 квадратни се просториите наменети за училишна кујна и трпезарија

Повеќе од 650 ученици од Карпош новата учебна година ќе ја почнат во новата училишна зграда на Јан Амос Коменски", најавија одговорните од општина Карпош. Во моментов се уредува влезот на училишната зграда, се поставуваат мермерни плочи, а се врши и комплетно партерно уредување на училишниот двор.
- Имавме големи проблеми коишто во меѓувреме неочекувано ни се појавија, па сепак работевме со несмалено темпо и денеска, по нешто повеќе од две години можеме да се пофалиме дека проектот со успех го завршивме. Донесена е и одлуката на Влада за одобрување на средства за набавка на нов инвентар во училиштето, па сега остануваат да се привршат уште некои ситници. Како и да е, на 1 септември уште еднаш ќе покажеме дека сме прва општина којашто успеа да изгради ново училиште, рече Стефанија Макаровска, шеф на кабинет на градоначалникот на Општина Карпош.
За изградба на новата училишна зграда, од општинскиот буџет беа издвоени 1,2 милиони евра. Со донација од Светската банка беше изградена училишната трпезарија, а откако старите бараки двапати беа опожарени, Владата донираше 400.000 евра. Карпош е првата општина којашто со дозвола од Министерството за финансии подигна кредит од УНИ банка за довршување на зградата. Изградена според проект на "Проинг" Тетово, се простира на површина од околу 4100 метри квадратни, има два ката на кои се распоредени кабинети и училници, како и една училишна библиотека. Веднаш до училиштето, на 350 квадратни се просториите за училишна кујна и трпезарија. Изведувач на градежните работи е ГП "Гранит".
ОУ "Јан Амос Коменски" е едно од неколкуте учлишта во градов кои уште од катастрофалниот земјотрес во 1963 година е привремено сместено во бараки, кои ни оддалеку не ги задоволуваше потребните услови и стандарди за нормално одвивање на наставата. Бараките беа дотраени и во фаза на распаѓање, во кои се вложуваа огромни средства, но само за санирање.
По изградбата на "Јан Амос Коменски", општинарите најавија дека ќе почнат подготовките за изградба на ново училиште на "Димо Хаџи Димов" во Влае.

Со новиот ДУП кој е во фаза на донесување, во рамките на студентскиот центар "Стив Наумов" се предвидува изградба на пет нови објекти од тврда градба и спортски терени

Студентскиот центар "Стив Наумов" во населбата Автокоманда ќе прерасне во модерен студентски град. Со новиот детален урбанистички план кој е во фаза на донесување, во рамките на центарот се предвидува изградба на нови објекти од тврда градба со што ќе се зголеми капацитетот за сместување на студентите. Сегашните бараки ќе се исфрлат од употреба, а на нивно место ќе се изградат спортски терени. Планот предвидува и изградба на катна гаража спроти црквата "Свети Архангел".

-Реализацијата на овој детален урбанистички план е влезен како приоритет во програма на Владата на Македонија, која истовремено и ќе го финансира. Инаку, со планот е предвидено такво собраќајно решение кое надвор од центарот ќе заврши со катна гаража, додека самиот студентски центар ќе претставува пешачка зона. Притоа, дендропаркот пред Шумарскиот факултет, и црквата, нема да бидат узурпирани. Новина е и тоа што е извршена парцелизација на земјиштето со што се овозможува поединечно издавање на градежна дозвола за секоја парцела, вели Мирослав Марковски, раководител на секторот за урбанизам и просторно планирање во Општина Гази Баба. Тој додава дека изработка на планот во кој се внесени бројни предлози е веќе подготвен и деновиве ќе се најде на ревизија во Министерството за транспорт и врски, по што ќе биде ставен на јавна анкета, а потоа следи и согласност од Градот и Министерството.

Инаку, со планот се предвидува да бидат задржани двете машки и едната женска зграда, а да се изградат пет нови со вкупен капацитет од 2000 легла. Катната гаража треба да биде со капацитет од 375 возила. Со урбанистичкиот план се предвидува и нов објект на местото на сегашната менза. Од студентскиот центар се надеваат дека тендерот за изградба на новите објекти ќе бидат распишани до крајот на годината.

Кичево, 1 ноември (МИА) -  До крајот на оваа година би требало да започне изградбата на нова училишна зграда во населбата Пашино, како дел од основното училиште „Санде Штерјоски“ во кое настава следат повеќе од 1.600 ученици.

Од страна на Министерството за образование и наука обезбедени се пет милиони денари за почеток на изградбата, а општина Кичево даде свој придонес со тоа што го ослободи Министерството од плаќање комуналии за изградба на училишниот објект.

Во новиот училишен објект ќе учат околу 500 ученици од деловите на градот во околината на стадионот на „Влазрими“, односно од населбите кои гравитираат во тој дел. На тој начин, како што вели раководството на училиштето, ќе се овозможи конечно во двата постоечки објекти во кои се одвива наставата таа да биде во две, наместо во три смени.

- Организирањето на современа настава е она кон што се стремиме во едукацијата на нашите деца, а изградбата на нови училишни објекти е еден од чекорите кои водат кон тоа, изјави директорот на училиштето Љуљзим Мехмеди.св/вј/9:45

Околу 700 ученици од Тафталиџе новата учебна година ја почнаа во новиот објект а осветувањето и симболичното сечење на црвената панделка беше означено вчера, на 32. роденден на Општина Карпош

Околу 700 ученици од Тафталиџе новата учебна година ја почнаа во новата училишна зграда на "Јан Амос Коменски", а симболичното пуштање во употреба беше означено вчера, на 32. роденден на Општина Карпош. Со благослов на поглаварот на МПЦ г.г. Стефан, црвената панделка ја пресекоа министерот за образование Перо Стојановски и в.д. градоначалникот Сашо Димиќ.

Честитајќи го отворањето на новата училишна зграда, министерот Стојановски истакна дека одлуката на Владата на РМ по опожарувањето на старите бараки да обезбеди средства и со тоа да ја потпомогне и забрза изградбата, се покажала како оправдана бидејќи новиот модерен објект не само што ги исполнува сите стандарди за современа едукација, туку претставува и допадлив простор во којшто учениците и професорите со задоволство ќе го минуваат поголемиот дел од своето секојдневие.

Во чест на големиот ден, дедо Стефан на учениците им подари Библија, а маестро Борис Трајанов, во името на Граѓанската иницијатива, Ден на дрвото во дворот на училиштето посади 32 фиданки. На свеченоста која во свој стил ја водеше Весна Бејби Петрушевска, присуствуваа голем број познати имиња од политиката и шоу бизнисот.

ОУ "Јан Амос Коменски" е формирано по катастрофалниот земјотрес во 1963 година и оттогаш, цели 45 години беше времено сместено во бараки кои ни оддалеку не ги задоволуваа потребните стандарди. Карпош е првата општина во државава која иницираше и почна да гради училишна зграда, за што од буџетот издвои 1,2 милиони евра. Со донација од Светската банка ја изгради училишната трпезарија, а откако старите бараки два пати беа опожарени, Владата донираше 400.000 евра. Карпош е првата општина којашто со гаранција на УСАИД и дозвола од Министерството за финансии подигна кредит од УНИ банка за довршување на зградата. Објектот се простира на површина од околу 4100 метри квадратни, на два ката каде се распоредени кабинети и училници, како и една училишна библиотека. Училишната кујна и трпезаријата се наоѓаат на 350 квадратни веднаш до објектот.

По повод 32-годишнината од формирањето на Општина Карпош, вчера беше одржана свечена академија, а завчера на платото на ТЦ Карпош 3 се реализираше традиционалната манифестација Ем умеам ем можам.

http://vecer.com.mk/?ItemID=171E47DE9615784398CEF9AFFD8BDA0F

http://netpress.com.mk/vestiimages/47627/stiv%20naumov.jpg">

Премиерот Никола Груевски и министерот за образование и наука, Перо Стојановски ќе присуствуваат на отворањето на машката зграда број 1 во студентскиот дом „Стив Наумов“, соопштуваат од министерството за образование.

http://netpress.com.mk/vestiimages/49554/ucilnica%201.jpg">

Ново градско средно училиште  ќе се гради во општината Шуто Оризари. Камен темелникот ќе биде поставен денеска а на  настанот ќе земат учество премиерот Никола Груевски, министерот за образование и наука Перо Стојановски, Неждет Мустафа, министер без ресор, Амди Бајрам, пратеник како и претставници од општина Шуто Оризари.

Како што информираат од министерството за образование, новото училиште ќе се простира на површина од 9.390 квадратни метри и ќе биде опремено согласно со современите стандарди за административен простор, простор за кабинетска настава , фискултурна сала, простор за помошен и технички персонал, како и простор за библиотека и простор за средби со родители. Училиштето воедно ќе биде обезбедено со адекватна сообраќајна инфраструктура за безбеден пристап на ученици.

ПОЧНА ИЗГРАДБАТА НА СРЕДНО УЧИЛИШТЕ ВО ОПШТИНАТА ШУТО ОРИЗАРИ

Во скопската општина Шуто Оризари денеска свечено беше поставен камен-темелник за изградба на средно училиште, за економко-правна и трговска насока, инвестиција на Владата од 100 милиони денари. Објектот ќе се гради на површина од 9.390 метри квадратни, ќе има современа опрема и капацитет за околу 950 ученици. Според најавата на Владата, новото училиште треба да проработи за седум до девет месеци.

 - Ромската заедница во минатото беше често маргинализирана и беше предмет на бројни предрасуди и токму поради тоа сиромаштијата кај Ромите е застапена со поголем процент отколку кај другите етнички заедници. Но, токму образованието е еден од клучните фактори кои ја одредуваат сиромаштијата, квалитетот на живот и високото ниво на невработеност... Училиштето ќе има повеќекратни позитивни ефекти врз прогресот на ромската заедница, а со тоа и врз прогресот на државата, чиј нераскинлив дел се Ромите од Македонија. Ова е инвестиција во иднината на младите ромски генерации и во иднината на општината Шуто Оризари, рече премиерот Никола Груевски. Тој им порача на младите Роми да учат и посака по пет години повеќе да не се бројат запишаните Роми во средно, туку да се зборува за бројот на ромски деца запишани на факултет.

Министерот за образование и наука Перо Стојановски  посочи дека поразителниот факт дека децата Роми се жртви на злоупотреби и компаративната споредба за нивната вклученост во образовниот процес и степенот на нивната едуцираност придонеле Владата и Министерството за образование и наука да преземат повеќе активности за развивање на свеста кај оваа популација за полезноста на образованието.

-  Новото училиште во општина Шуто Оризари ќе биде опремено согласно со современите стандарди за административен простор, простор за кабинетска настава, за училници, фискултурна сала, простор за помошен и технички персонал, како и простор за библиотека и простор за средби со родители. Училиштето ќе биде обезбедено со адекватна сообраќајна инфраструктура за безбеден пристап на учениците, информираше ресорниот министер.

Почетокот на изградбата беше бурно поздравен од населението на оваа, единствена ромска општина во Европа, а политичките претставници од таа етничка заедница - министерот  без ресор Неждет Мустафа, и пратеникот Амди Бајрам,  истакнаа дека по заслуга на сегашната Влада се реализира идеја стара 13 години и дека премиерот Груевски го исполнува  ветувањето што на жителите  им го дал во април 2007 година.  

За поголема вклученост на Ромите во образованието, Владата од оваа учебна година воведе и стипендии за ученици Роми што се запишале во прва година средно, со месечен износ од 2.200 денари. Тоа е стимулативна мерка за поттикнување  на Ромите да го продолжат образованието и е во рамките на Декадата на Ромите (2005-2015).

По поставувањето на камен-темелникот на првото средно училиште во Шуто Оризари, на новинарите им се обрати Имер Реџепи, кој тврди дека земјиштето на кое ќе се гради објектот е негово.

- Татко ми го поседува земјиштето пред 1960 година, тоа е одземено во 1964, а вратено во  2005 година со Законот за денационализација, за што имаме и имотен лист и документација од министерствата за финансии и за транспорт и врски.  Ја информиравме општината пред три недели дека ова е приватно земјиште, но таму не сакаат да чујат за тоа. Ништо не ни предложија, не знам што предвиделе, но ова ќе го реши судот, рече Реџепи, кој за расчистување на случајот ангажирал и адвокат.

http://www.sitel.com.mk/?ItemID=AF2CDCECFDDE4E48B7325BBAB67E5D7D - http://www.sitel.com.mk/?ItemID=AF2CDCECFDDE4E48B7325BBAB67E5D7D

УЧИЛИШТАТА ВО ОПШТИНА КАРПОШ - РЕПЕР ЗА ЕВРОПСКИ ШКОЛСКИ СТАНДАРД

Најсовремена зграда за ОУ "Димо Хаџи Димов"

Целосно ново, футуристичко училиште, на повеќе катови, со две големи спортски сали, тениски терени и нови училници од светски стандарди, во кои ќе има услови за повеќе од 1600 ученици, во блиска иднина ќе се гради на местото на постојното веќе дотраено училиште Димо Хаџи Димов во Влае. Инвестицијата од 2 милиони евра, во Општината Карпош, вчера, ја соопштија премиерот Никола Груевски заедно со В.Д градоначалникот Саша Димиќ преку презентирање на предлог планот за идејното архитектонско здание на новото училиште во Влае.
- Дојдов тука во училиштето да ги погледнеме условите и на некој начин да го означиме почетокот на изградбата на ова веќе дотраено училиште сместено во трошни бараки кои се потенцијална опасност од пожари и надворешни временски услови, изјави премиерот Груевски. Тој додаде дека половина од средствата за изградба, 60 милиони денари, се веќе обезбедени, а вториот дел од нив ќе биде обезбедени во текот на наредната година и ако е потребно, како што рече, ќе помогне и Владата.

В.д. градоначалникот и кандидат за градоначалник на Општина Карпош, Сашо Димиќ, напомена дека училиштето "Дими Хаџи Димов" е најголемото училиште на територијата на општината Карпош со 1400 ученици и ја потенцираше лошата состојба на училиштето.

"За жал, во ова училиште образовниот процес се одвива во едни руинирани услови кои датираат од 1964 година. Очекуваме оваа година да започне изградба на ново училиште и тоа ќе биде најсовремено училиште во Македонија со капацитет од 1600 ученици. Ова училиште ќе ги има сите услови што се потребни за одржување на наставата и тоа со сите стандарди", изјави Димиќ.
Инаку, во проектот покрај модерното просторно испланирано сместување на учениците во него се предвидува изградба на две големи спортски сали, една на самиот покрив од објектот, тениски игралишта и современ амфитеатар во средиштето на објектот. Учениците за време на извршувањето на градежните активности ќе бидат сместени во специјални контејнери, како во примерот на Јан Амос Коменски.