ЗГРАДАТА ВО ТАФТАЛИЏЕ ЌЕ ПРОРАБОТИ ЛЕТОВО

Во новиот Катастар ќе се чека ред со бројче

Се очекува зградата да се отвори кон крајот на јули, да има двојно повеќе шалтери, а граѓаните да добијат подобри услуги за своите граѓански барања

Новата зграда на Катастарот е готова, а турканиците се минато, оптимистички најавуваат од Државниот завод за геодетски работи. За да нема одење преку ред, граѓаните ќе земаат бројчиња за чекање, шалтерите од седум ќе се зголемат на 15, а предметите ќе се решаваат побрзо. Новата зграда, која е поширока, но и поубава на изглед, се наоѓа во Тафталиџе, веднаш до стариот објект. Се градеше една година и тоа според сите светски стандарди, што значи далеку подобри услови за вршење на секојдневните барања на граѓаните.Директорот на Државниот завод за геодетски работи Љупчо Георгиевски вели дека новата зграда на скопскиот Катастар се очекува да проработи во јули годинава. Веќе бил извршен интерен технички прием, во присуствона претставници од Светска банка, но се појавиле некои недостатоци. Деведесет отсто од недостатоците се веќе отстранети. Зградата е приклучена на водоводна мрежа, а кон крајот на мај очекуваме да биде приклучена и од ЕВН. До крајот на овој месец ќе го подготвивме и проектот за добивање употребна дозвола. Во тек е тендер за набавка на мебел и 160 компјутери, кој ќе трае десет недели. Нашите планови се сите овие нешта да бидат завршени во јуни, а а во јули да почне нормално да функционира - објасни директорот Георгиевски. По пуштањето во употреба на новиот објект, беше предвидено старата зграда на Катастарот да биде урната, а на нејзино место да се гради паркинг. Сепак, и покрај ваквите планови, уривањето е одложено за наредната година. Во овој период не планираме да ја уриваме, зашто таму има седум шалтери за кои решивме да работат само за издавање имотни листови. Имаме во план двете згради паралелно да функционираат до наредната година, а дури потоа старата да биде урната - објасни директорот. Она што ќе биде новина плус, вели тој, е отварањето шалтер на некоја банка во новиот Катастар.Но, и тоа, вели тој, ќе мора да оди на тендер, со цел да се запази законската процедура. Сакаме граѓаните во истите простории да ја добиваат и оваа услуга, односно да не мора да излегуваат надвор и да бараат банка за да завршат работа - потенцира Георгиевски.Проектот за изградба на нова зграда, информираше Георгиевски, е финансиран од Светска банка, од договор за заем, потпишан во 2005 година. Вкупната потрошена сума, без внатрешно опремување, изнесувала 1,2 милион евра. Надзорот врз трошењето на парите, како и изборот на фирми изведувачи го имала Светска банка. Иако новиот Катастар располага со повеќе простор и покомотни простории, во него не се планираат нови вработувања. Во моментов има 240 вработени, а раководството смета дека е сосема доволно за вршење на сегашните предмети. Директорот Георгиевски кажа дека во иднина ќе се залага за вработување нови млади кадри.- Би сакал да можеме да примиме млади и љубезни кадри со соодветно образование. Иако ќе се работи за шалтерски работници, доколку дојде до тоа, би примале само со високо образование, и тоа исклучиво правници или геодетски инженери - вели тој.

Јорданка Ивановска

http://www.dnevnik.com.mk/?ItemID=5FE6FBF497468E4CB0498CA7570D1B49 - Dnevnik

Катастарот се сели во нов објект

На ред ќе се чека со бројче, а ќе има вкупно 15 шалтери

Од вчера во новиот објект се монтира мебелот. Директорите на Градскиот и на Државниот катастар во проверка на теренот

По неколкудецениско опстојување во руинираните бараки во Тафталиџе, скопскиот катастар се дислоцира во нови простории. Новиот објект се наоѓа веднаш до стариот и во него од вчера почна да се монтира мебелот. Наредната недела ќе се префрлат и купиштата предмети и документацијата. И покрај преселбата, Катастарот ќе работи, но со намален интензитет. Директорот Никола Тодоров вели дека службите ќе работат со странки, ќе ги издаваат имотните листови и другата документација, а единствено забавена ќе биде процедурата за издавање копии од планови и историјатите.

„Очекуваме вселувањето во новиот објект да го завршиме до крајот на идната недела, по што работите ќе се вратат во нормален тек. Но, и покрај преселувањето, не очекуваме никакви проблеми. Сепак, граѓаните треба да имаат малку трпение, оти со ова ќе се стави крај на досегашните турканици и неподносливи услови за работи“, вели Тодоров, кој е убеден дека во новиот објект турканиците ќе станат минато, бидејќи приемот на странките ќе се врши по електронски пат, односно ќе се зема бројче, а наместо досегашните седум, ќе работат дури 15 шалтери.

За изградба на новата зграда се потрошени околу 1,2 милиони евра и во овие средства не се влезени средствата за внатрешно опремување. (Дс.Т.)