Седум идеи за десеткатницата спроти „Бристол

Зградата ќе почне да се гради летово, ќе ја финансираат сите институции што ќе се сместат во неа

Деспина Трајковска


Седум идеи се во игра околу изгледот на фасадата на десеткатницата што ќе се гради спроти „Бристол“ во која ќе се сместат седум владини институции. Никој се' уште не знае дали некоја од предложените фасади е стилска, или модернистичка, бидејќи во повикот за идејното решение не се инсистираше на одреден стил. Но, со оглед на тоа дека беше укажано фасадата да се вклопи во планираниот амбиент на соседните објекти, а токму во непосредна близина за свои потреби ЕЛЕМ ќе ја гради другата десеткатница во стил на класицизмот, извесно е дека и овој објект ќе биде стилски.

Сепак, како точно ќе изгледа зградата во која ќе се смести половина влада, ќе се знае за најмногу два месеца. Од Службата за општи и заеднички работи до тогаш очекуваат да се избере конечното решение. Велат дека утре комисијата ќе почне со отворање и разгледување на пристигнатите трудови.

„Сметаме дека за месец до два ќе биде донесен конечен заклучок. Потоа ќе следи период на изготвување на проектите, тендерирање за изведувач и другите потребни процедури. Очекуваме со изградба на објектот да се почне најдоцна до почетокот на летото“, вели Васе Доневски, директор на владината служба.

Доневски објаснува дека владината служба е задолжена да ги заврши процедурите за избор на изгледот на фасадата, изработката на проектот, да најде изведувач и да ја обезбеди градежната дозвола, додека, пак, институциите што ќе се сместат во зградата ќе инвестираат во објектот. Предвидено е во десеткатницата работни простории да има за Централен регистар, за Комисијата за хартии од вредност, за Агенцијата за супервизија, за Регулаторна комисија, М-НАВ, а дел од објектот ќе биде резервиран и за АД за станбен и деловен простор и за Фондот за осигурување на депозити.

Веднаш до неа, во другата десеткатница сопствени канцеларии ќе има ЕЛЕМ. И тие се во потрага по изглед на фасада на објектот која е планирано да биде во стилот на класицизмот.

Инаку, маркиците за двете згради беа нацртани со последната корекција на предметниот ДУП. Тој предвиде и изградба на катна гаража во непосредна близина. Иако јавноста, а пред се' граѓаните од овој реон реагираа на урбанистичките замисли, сепак, Општина Центар не се премисли во намерите. Во моментов се чека исходот од граѓанската иницијатива поднесена до Уставниот суд за преиспитување на уставноста на урбанистичкиот план.

Избор од 11 решенија за катната гаража

Фасадата за катната гаража што треба да се гради во непосредна близина на двете десеткатници, на паркингот кај „Автомакедонија“ ќе се избира меѓу 11 предложени идеи. Толку идејни решенија се доставени до Министерството за транспорт и врски кое е задолжено да ги истера постапките за овој објект. Во јавниот повик не се инсистираше на одредени услови за изгледот на фасадата, но беше потенцирано таа да биде во согласност со околните планирани објекти. Иако од Министерството не планираат да ја градат катната гаража, сепак, договорено е тие да го изберат нејзиниот изглед.

„Ние ќе ја избереме фасадата за потенцијалниот инвеститор да не отстапи од изгледот на околината. Потоа парцелата ќе ја понудиме на продажба“, информираа од Министерството за транспорт. (Дс.Т.)

На лето ќе почне изградбата на зградата спроти „Бристол“

Новата административна зграда што ќе се гради во зеленилото спроти хотелот „Бристол“ ќе биде во стил неокласицизам, а е дело на тимот од тројца архитекти: Никола Стакинов, Лазар Димов и Живка Христова.
- Главниот проект би требало да биде готов за еден месец, а ќе го прави фирмата „Неимар инженеринг“. После тоа, од јуни или евентуално јули, зградата би требало да почне да се гради - вели Васе Доневски, директор на Службата за општи и заеднички работи на Владата.
Изградбата на дваесет и девет метарскиот административен објект ќе ја финансираат седумте институции кои ќе бидат сместени во неа, односно Централниот регистар, Комисијата за хартии од вредност, Агенцијата за супервизија, Регулаторната комисија, М-НАВ, како и дел од АД за стопанисување со станбен и деловен простор и Фондот за осигурување на депозити. Владината Служба за општи и заеднички работи е задолжена само за изборот на идејното архитектонско решение, изработката на проектот, тендерот за изведувач и за обезбедување градежна дозвола.
Носењето на ДУП-от кој ги предвидува овие две згради, предизвика лавини негативни реакции кај граѓаните, но и кај стручната јавност, која обвини дека двете нови згради се продолжување на дехуманизацијата на градското централно подрачје и узурпација на просторот за домување и на зелените површини.

http://www.plusinfo.mk/vest/36479/Na-leto-kje-pochne-izgradbata-na-zgradata-sproti-Bristol

Жерновски бара да се стопираат градежните работи спроти „Бристол“

22 април 2013   Андреј Жерновски од коалицијата Сојуз за иднината, кој на вчерашниот трет изборен круг победи на изборите во општина Центар, бара да се стопираат градежните активности спроти хотел Бристол, каде според него, требало да продолжи изградбата на две вискокатници во барокен стил.     Тој ја повика власта да почека со градењето и како што рече, уништувањето на зеленилото во Центар.   „Ни еден сантиметар од општина Центар нема да има промена доколку тоа не е верификувано од страна на жителите на општина Центар. Сакам да ја повикам власта да прекине со ова злодело што се прави во општина Центар и да почека да влезе новата општинска власт. Сето ова се прави после поразот кој беше признат од страна на власта. Со моето влегување во градоначалничкиот кабинет веднаш ќе биде направена ревизија на деталниот урбанистички план, ќе биде проверено дали воопшто има одобрение за градба. Мене ми е јасно дека ова е објект од прва категорија, дека министерството за транспорт и врски ја води целата процедура, меѓутоа сакаме до крај да ја провериме како дошло да имаме ваков урбанистички план. Сите ингеренции што ни се на располагање ќе ги преземеме само да го спречиме ова што денеска се прави“ изјави Жерновски.   Тој најави ревизија на сите проекти во Центар и да се провери дали е се законски.