АНГЕЛ НАКОВ, ИЗВРШЕН ДИРЕКТОР НА КОМПАНИЈАТА СКИ-ЦЕНТАР КОЖУФ

Џет-сетот на скијање со хеликоптери

Хелиодромот ќе биде прв од ваков вид во Југоисточна Европа, а ќе се користи за транспорт на патници, панорамски разгледувања и што е најважно за спасувачки активности, гаснење на пожари и брз транспорт на евентуално повредени туристи

На 8 декември и официјално ќе биде отворен ски-центарот Кожуф за љубителите на зимските спортови. До отворањето на долго најавуваниот туристички комплекс потребно е да се заврши со фините подесувања на шестоседната жичарница, која во моментот се монтира. Во првата седмица од ноември се очекува во употреба да се пушти и 20-киловолтниот подземен далновод во вкупна должина од 14 километри и да се довршат уште три километри од асфалтниот пат од Смрдлива Вода до ски-центарот. За значењето на овој проект за развој на туризмот во Македонија и за бенефитите што ќе и ги донесе на земјава на економски план зборувавме со Ангел Наков, извршен директор на компанијата ски-центар Кожуф и еден од четворицата акционери.

Центарот, според најавите, требаше да почне со работа во сезоната 2006/2007 година. Дали имавте некакви проблеми поради кои се одложуваше стартот?
- Нашата најава за отворање на центарот за промотивно скијање во сезоната 2006/2007 година се реализираа и изминатата сезона имавме над 2.000 посетители од нашата земја и од странство. Целта беше голем број спортисти, новинари, туристички работници и инвеститори да дојдат на Кожуф и промотивно да се запознаат со нашиот проект и да дадат оценка и забелешки за работите кои ги правиме и кои планираме да ги реализираме. Морам да напомнам дека овој проект од самиот почеток го водиме на високо професионално ниво и секогаш во консултации со огромен број експерти од сите области. Промотивното скијање во изминатата сезона ни беше последна проверка дека ќе има голем интерес за центарот пред почетокот на изградбата на големите инфраструктурни објекти.

При промоцијата на проектот најавувавте дека грчки туристи со хеликоптери ќе доаѓаат на скијање во центарот. Ги добивте ли потребните дозволи за хелиодромот?
- Изградбата на меѓународниот хелиодром е составен дел на Генералниот урабанистички план на ски-центарот Кожуф. Неговата изградба е планирана во две фази. До 2008 година тој треба да се изгради и да се пушти во употреба само за домашни потреби, а до 2009 година да се опреми за да се користи и како меѓународен хелидром. Во меѓувреме е подготвена и Физибилити студија за неговата изградба и за начинот на кој ќе работи, а во моментов треба да почнеме со подготовка на проектната документација согласно законската регулатива во нашата земја. Овој хелиодром ќе биде прв од ваков вид во Југоисточна Европа, а ќе се користи за транспорт на патници, панорамски разгледувања и што е најважно за спасувачки активности, гаснење на пожари и брз транспорт на евентуално повредени туристи. Очекуваме џет-сетот од соседните земји на скијање да пристигнува со сопствени хеликоптери на хелиодромот. Наутро ќе доаѓаат и по завршувањето на скијањето ќе си заминуваат.

Има ли најави од инвеститори за изградба на хотели во центарот, како што најавувавте?
- Во овој момент во завршна фаза се разговорите со две компании кои се носители на франшизи на големите светски ланци на хотели. Ние се надеваме дека разговорите ќе завршат успешно и во наредната година ќе се изградат овие хотели од висока класа со вкупно 400 легла. Покрај овие големи хотели во наредната година ќе се изградат уште четири помали со вкупен капацитет од 200 легла. Во нив инвестираат домашни компании.

Зошто се откажавте од идејата за продажба на земјиштето во ски-центарот за изградба на викендички. Мислите ли дека ќе има поголем интерес за купување ако куќарките ги градите сами, а потоа ги продавате?
- Кампањата за продажба на одреден број локации за изградба на викенд куќи се реализираше во периодот од декември 2006 до март 2007 година за граѓаните од земјава, за да направиме едно македонско јадро кое ќе биде иден носител на развојот на туристичката населба од аспект на сите инфраструктурни и туристички содржини. Несомнено е дека во наредната година најголем број купувачи на готови викенд куќи ќе бидат Грците и Англичаните, за што уште сега постои голем интерес. Ски- центарот Кожуф има свои посредници за продажба на недвижнини во Грција и во Велика Британија и тие веќе се подготвуваат за почетокот на продажбата што ќе почне во март в година.

Беше најавено дека Фондот за регионални патишта ќе го гради патот од локалитетот Смрдлива Вода до ски-терените на Кожуф, за што Владата одвои и 4 милиони евра. Завршен ли е патот?
- Фондот за патишта минатата година не почна со изградба на регионалниот пат од месноста Смрдлива Вода до ски-центарот Кожуф и во продолжение до Кавадарци и Демир Капија бидејќи го завршуваше идејниот проект за овој патен правец и го вклучи во програмата за изградба за 2007/2008 година. Годинава се изработи главниот проект што го финансираше нашата компанија, а Фондот за патишта го распиша меѓународниот тендер за негова изградба. Тендерската документација ќе се отвори на 23 ноември годинава и очекуваме неговата изградба да почне во декември во понискиот дел на месноста Смрдлива Вода. Овој пат во должина од 17 километри треба да биде завршен до крајот на октомври в година.

Што е со инфраструктурното поврзување на центарот со околните населени места за полесно и побрзо пристигнување до комплексот. Патот не беше направен, а чинам дека тоа е една од најважните работи за да ги привлечете посетителите.
- Годинава сами го правиме асфалтниот технички пат од Смрдлива Вода до ски-центарот. Патот, годинава, ќе биде во употреба за туристите, а наредната додека се гради регионалниот пат, ќе го користиме за транспорт на градежните материјали. Во 2008 година е предвидено да се заврши проектот за патниот правец од ски-центарот до Кавадарци и до Демир Капија, а нивната изградба да се реализира во 2009 година. Овој пат ќе биде долг 50 километри и е од огромна важност за развој на целиот кавадаречки, неготински и демиркаписки регион. Со него ќе се овозможи интензивен развој на преку дваесетина села од регионот и на винскиот туризам со преку 60 мали винарии, како и развој на производството на здрава храна и прометот со недвижности. Од овие причини сметам дека Владата ќе му даде приоритет и на овој патен правец во наредната година, како што тоа го стори годинава со патот од страна на Гевгелија.

За љубителите на скијањето најважни се цените на ски-картите. Дали тие ќе бидат скапи за македонските граѓани, со оглед на фактот дека најмногу гости очекувате од соседните земји.
- Цените на ски-картите годинава со сигурност ќе бидат прифатливи за македонските скијачи. Тие кај нас ќе ја добијат најдобрата вредност за своите пари. Тие се уште не се дефинирани, но наскоро ќе ги објавиме. На денот на отворањето, симболично, скијањето ќе биде бесплатно. Во употреба за нив ќе бидат два ски-лифта и една шестоседна жичарница, што се последен збор на техниката на австриската компанија Допелмаер. Со три нови машини за подготовка на скијачките патеки секојдневно ќе се средуваат околу 20 километри скијачки патеки со ширина од 50 метри. Скијачите на располагање ќе имаат и околу 300 места за седење внатре и 1.000 места за седење надвор во планинските ресторани.

Вкупната инвестиција во ски-центарот Кожуф беше најавено дека ќе изнесува 72 милиони евра. За колку време очекувате да Ви се поврати инвестицијата.
- Нашиот проект е прв од ваков вид во нашата држава. Ние успеавме во изминатите седум години да ги пробиеме сите административни и биркратски бариери со целосно почитување на законската регулатива и да дојдеме во позиција да го реализираме проектот. Морам да Ви кажам дека единствено во периодот на таа борба, по некој пат се запрашував за можноста да доживееме финансиски неуспех. Но, сега можам со сигурност да кажам дека вложениот капитал ќе се врати во период од три години и уште многу години ќе носи профит на нашата компанија и на нашите акционери.

Сакам да им порачам на сите потенцијални инвеститори дека планинскиот туризам е профитабилна работа и дека на Македонија Господ и подарил уште многу места погодни за изградба на врвни планински комплекси. Ние ја поддржуваме Владата во нејзините напори за изработка на основна стратегија за развој на туризмот и ја убедуваме дека планинскиот, езерскиот и бањскиот туризам се економската иднина на Македонија.

Стопанска банка застана зад проектот

Колку досега е вложено во неговата изградба и какво е учеството на Стопанска банка во овој проект?
- Досега во овој проект се вложени околу 12 милиони евра, како финансиски капитал, кноњ хоњ и работа. Учеството на Стопанска банка во овој проект е од огромно значење. Во овие тешки економски услови и големи напори за нови инвестиции, таа беше единствената банка која веруваше во иднината на овој проект и го обезбеди буџетот за 2007 година. Таа верува во иднината на ваков вид проект за развој на туризмот и заедно со нас се убедени дека покрај Охрид, Македонија ќе добие и врвен планински комплекс со туристичка понуда во текот на целата година. Од страна на менаџерите на банката постојано ни потенцираат дека ако Владата покаже конкретни чекори во развојот на инфраструктурата, тие се спремни да ги финансираат и следните фази на нашиот проект, но и други проекти во земјата. Позитивниот пример на овој проект со сигурност ќе го следат и други финансиски институции. Ние заедно со Стопанска банка имаме единствен став дека нашиот проект ќе придонесе за сериозен регионален развој, нови вработувања и зголемување на бруто националниот доход.

Радмила Ј. НИКОЛОВСКА