НАПРОЛЕТ ЌЕ ПОЧНЕ ИЗГРАДБАТА НА храмот на културата

Велешките уметници ќе добијат театар

Министерството за култура, кое ќе ја гради новата театарска зграда, годинава ќе одвои 14 милиони денари за својата приоритетна инвестиција

Велешани се нестрпливи да ги видат темелите на новиот дом на театарските уметници во својот град, кои според најавите од Министерството за култура, ќе бидат поставени напролет. Руинираната театарска зграда и лошите услови за работа ќе станат минато зашто државата одлучи да изгради достоинствена институција во која беспрекорно ќе се создава уметноста заштитена од Талија. За таа цел годинава ќе бидат одвоени 14 милиони денари.- Со години театарските уметници во Велес работат во несоодветни услови. Од тие причини сакаме трајно да го решиме проблемот и да создадеме вистински храм за нашите театарски уметници. Градот на Коста Солев Рацин, на Јордан Хаџиконстантинов-Џинот и уште многу важни личности и обележја, заслужува да добие храм на театарската уметност - смета државниот секретар во Министерството за култура, Елизабета Канческа-Милевска.

Со првичниот проект беше замислено, освен просториите за театарот, да се изградат и деловни простории. Но, Министерството одлучи проектот да претрпи одредени промени и да остане само театарска зграда.

До крајот на првата половина на месецов ќе бидат остранети неколку привремени трговски објекти, кои се наоѓаат во близина на локацијата на која треба да се гради, најави велешкиот градоначалник Аце Коцевски.

- Сопствениците се согласија да ги тргнат објектите. Во консултација и со премиерот Никола Груевски, а и на нивна молба, одлучивме да ги отстраниме објектите на третиот ден од Божик. Доколку сопствениците не можат сами, ние ќе им помогнеме во отстранување на објектите. Треба да се завршат уште неколку правни процедури од страна на Министерството за да може Општината да издаде дозвола за градба - објасни Коцевски.

Тој додаде дека на последната седница на Општината, било одлучено Министерството за култура, како инвеститор, да биде ослободено од должноста да плати надомест за уредување градско земјиште.

- Откако се промени планот и откако Министерството за култура ја презеде улогата на инвеститор, а не театарот, Општината одлучи да помогне на таков начин за изградбата на театарот. Годишно, од таа давачка, Општината го полни својот буџет со 10 милиони денари. Општината и граѓаните даваат безрезервна поддршка за изградба на театарот. Локацијата на објектот е одлична. Новиот театар ќе биде сместен во просторот помеѓу стариот и новиот дел на градот. Во негова близина се гради и нова црква, што ќе му даде посебен шарм на местото - смета Коцевски.

Идејното решение за новата зграда е од пред неколку години и го изработија архитектите Илија и Моника Стојчеви од Велес. Предвидено е театарската зграда да има околу 3.500 квадратни метри.

Сребра Пашовска

Во центарот на Велес, завчера попладне е поставен камен-темелник на зграда на театарот „ЈорданХаџиКонстантинов-Џинот“. Предвидено е освен театарски претстави во него да има опера, балет и детски претстави.Овој настан е од цивилизациско значење за Велес, пресвртница за театарскиот живот во градот. Претставите ќе добијат нова естетика, а ние актерите можност за поголемо докажување. Новата зграда на театарот е продолжување на сонот на нашиот сограѓанец, преродбеникот Џинот, за театар на македонски јазик - вели Јордан Витанов, директор на велешкиот театар.Објектот ќе има 3.800 квадратни метри површина, со две сали - голема за 368 посетители и мала сцена за стотина гледачи, како и луксузно фоаје. Дело е на архитектите Илија и Моника Стојчевски и Билјана Христова од ателјето „Проектин“.Конкурсното решение претрпе две измени, прво беше отфрлена библиотеката, а потоа и деловниот простор, за сега да имаме чиста театарска зграда со оригинална архитектура. За изградба на театарот Министерството за култура обезбеди 124 милиони евра, а рокот за изведба е една година. Го гради тетовската фирма „Еуро-проект“. Градот, пак, го ослободи инвеститорот од плаќање на комуналните такси.Кога првпат влегов во театарот во 1994, беше донесено решението да се гради, а подоцна ја видов и макетата од зградата. Растев, се запишав, завршив, се вработив, минаа 14 години, оттогаш досега ништо не се направи. Конечно се остварува овој сон - вели актерот Зоран Љутков. Многумина од актерите, и млади и стари, пензионери се фатија за лопатата, бидејќи за нив овој момент беше историја. Со мислата за нов театар ја игравме секоја претстава. Пресреќен сум, а уште повеќе ќе бидам доколку за две години заиграм повторно на овие штици пред моите сограѓани, кои сите години не' поддржуваа да истраеме во тоа што го работевме - рече Васил Зафирчев.

(П.П.)

ИНВЕСТИЦИИ ВО КУЛТУРАТА

Во Велес "расте" новиот театар

Театарската зграда е комплицирана како содржина. Проектите мора да се реализираат интерактивно. Но, ние се надеваме дека театарот ќе биде готов до предвидениот рок, вели директорот на Велешкиот театар Витанов

Работите на новиот театар во Велес интензивно се одвиваат. Од поставувањето на камен-темелникот во мај минатата година, досега веќе триесетина отсто од инвестицијата е реализирана. Со изградбата на овој објект, кој се планираше од поодамна, конечно се потврдува дека Велес, градот основоположник на театарската уметност кај нас, заслужува да има соодветен и функционален нов театарски објект. Инаку, оваа инвестициона градба од областа на културата е финансиски планирана за буџетот на Министерството за култура за оваа година. За градежните работи на новата театарска зграда Владата во буџетот испланира три милиони евра, додека според проектот за целосната доизградба ќе бидат потребни уште толку, за кои се очекува исто така дека ќе бидат обезбедени од страна на инвеститорот, односно Владата на Република Македонија.

"Театарската зграда е комплицирана како содржина. Проектите мора да се реализираат интерактивно. Но, ние се надеваме дека театарот ќе биде готов до предвидениот рок. Проектите за сценски технологии се завршени пред еден месец и се дадени на ревизија", изјави за "Вечер" Јордан Витанов, директорот на Народниот театар "Јордан Хаџи Константинов Џинот" од Велес.
Според Витанов, завршени се проектите за светлосниот парк, за сите инсталации, аудио и видео системите, технологијата на сцената. Направен е и проектот за подот кој е комплициран поради платформите кои треба да се подигаат и спуштаат. Потоа ќе следува и тендерската постапка по која ќе треба да се најдат соодветни изведувачи, кои би можеле да работат паралелно со изведувањето на преостанатите градежните работи.

"Проектот за партерно уредување и паркинг просторот е даден на ревизија. Се надеваме дека скоро ќе го тендерираме и дека ќе започнат градежните работи и за овој дел од објектот. Побаравме да се постават соларни системи на зградата кои би биле од големо значење за нас затоа што би придонеле за заштеда на средства при загревањето на објектот. Во моментов се изработува и проектот за внатрешно уредување на театарот", рече Витанов.
Граѓаните на Велес очекуваат дека до крајот на јули или почетокот на август градежните работи ќе бидат целосно завршени, а по завршувањето и на другите работи околу објектот се очекува тој да биде отворен во наредната 2010 година.

ГОДИНАВА ЌЕ БИДАТ ГОТОВИ НЕКОЛКУ КУЛТУРНИ ОБЈЕКТИ

Ќе се отворат нови музејски и театарски врати

Нови лакирани штици што живот значат, завеси без децениска прашина, гледалиште што ќе мириса на ново, услови за големи и поголеми претстави ќе има во новата зграда на Народниот театар од Велес, „Јордан Хаџиконстантинов-Џинот“, чија изградба се очекува да заврши до јуни годинава. Во групата капитални градби чија изградба треба годинава да заврши се и Музејот на македонската борба, Музејот на жртвите на комунизмот, како и Спомен-домот на Тоше Проески. По градбата во сите објекти ќе почне и внатрешното уредување и опремување со соодветни театарски елементи и музејски постановки, експонати.

Најзагреани за својот нов објект се актерите од велешкиот театар „Јордан Хаџиконстантинов-Џинот“, кои со децении работат во својата ладна, стара, дотраена зграда.

- Со нетрпение очекувам да биде завршена новата театарска зграда и да се подигне завесата. Така театарската магија да ги привлече велешани, да биде поблиска до секој жител на градот, кои и досега знаеја да уживаат во театарот. Се надевам дека тие очекувања ќе ги оправдаме - вели Слободанка Чичевска, која 30 години настапува на велешката сцена.