Коњските коли опасност за сообраќајот

Коњските запрежни коли станаа секојдневие на Скопје. Ги има насекаде. На булеварите, крстосниците, по главните градски сообраќајници.

Движењето на овие коли низ центарот на градот, освен што предизвикува метеж, претставува и потенцијална опасност за секој учесник во сообраќајот. Граѓаните се револтирани. Бараат да се забрани движењето на запрежните коли со цел автомобилите слободно да се движат по градските улици.

„Ова сигурно не е убаво. Има многу странци што доаѓаат во Скопје, има многу луѓе од внатрешноста што доаѓаат и кога ќе го видат тоа, сигурно дека не е добро, меѓутоа мислам дека нема решение и се залажуваат сите оние што сметаат дека тоа е така едноставен проблем и дека тој може да се реши со нечија добра волја. За жал сметам дека не е така, луѓето во очај ги користат и мислам дека треба барем да го избегнуваат строгиот центар“.

„Застануваат секаде каде што ќе им текне. Затвораат ленти за сообраќај. Тоа е срамота за градот пред се. Го кочат многу сообраќајот. Тоа е животно, не смееш никако да реагираш, не смееш да му свириш“, велат граѓаните.

Согласно Законот, Министерството за внатрешни работи треба да врши санкционирање и исклучување на овие коли од сообраќајот. Сепак, ретки се случаите кога сообраќајните полицајци вршат контрола и исклучување од сообраќај на овие превозни средства.

Казните се во противвредност од 25 евра. Од Министерството за внатрешни работи истакнуваат дека од почетокот на годината имаат изречено триесетина вакви казни.

„Ние преземаме соодветни мерки согласно со законските прописи, но наидуваме на проблем каде што не можеме во целост да ги реализираме нашите законски обврски. Често пати запрегите ги управуваат малолетни лица коишто немаат лични карти или лица коишто се полнолетни, но исто така немаат лични карти и доаѓаме до проблем дека не можеме да им изречеме соодветна казна“, изјави Благоја Котев, виш инспектор при СВР Скопје.

„Доколку лицето го повтори прекршокот, ние имаме законска обврска, имаме можност истиот да го приведеме, но наидуваме на проблем што со запрегата“, додаде Котев.

Со оглед на тоа како досега се одвиваа работите, се чини дека коњските коли и понатаму ќе останат дел од скопскиот сообраќаен метеж. И покрај напорите на сообраќајната полиција да го реши овој проблем, засега не постои конкретна иницијатива со која ќе се натераат сопствениците на запрежните коњски коли да ги избегнуваат главните градски сообраќајници.

Запрежните коли со коњи претставуваат опасност за учесниците во сообраќајот

Казна од 50 евра е предвидена за напасување добиток на јавна површина, според новиот Закон за јавната чистота. Иако и досега со Законот за комуналните дејности се забрануваше чување ситни и крупни животни во урбана средина, одредбата не се почитуваше. Коњи слободно шетаа и во строгиот центар на Скопје, а најчесто се „укотвуваа“ кај Транспортниот центар. Имаше и случаи кога напаѓаа и луѓе.Причината за досега нерешениот проблем, според градските комунални инспектори, е тоа што Законот за комуналните дејности не предвидел казнени одредби за добиток во градски средини. Од надлежноста за разрешување на овој проблем се оградуваа и Градот и јавното претпријатие „Комунална хигиена“.

- Пред четири до пет години презедовме акција за собирање на коњите од јавните површини. Коњите се носеа во Зоолошката градина, но сопствениците веднаш дојдоа по нив, со тоа што платија по 800 денари за престој на коњите и плус трошоците за акцијата што беше спроведена со асистенција на полицијата - истакна Љубе Стојковски, раководител на Одделението за комунална инспекција во Градот. Од Одделението за односи со јавноста велат дека Градот Скопје треба да донесе новаа одлука за јавната чистота, која треба да ја усогласи со истоимениот закон, со која ќе го утврди начинот на кој ќе бидат одземани коњите оставени на јавна површина и како тие ќе се носат и ќе се чуваат во посебни боксови. Треба да се определи и колку ќе изнесува казната што треба да ја плати сопственикот доколку сака да си го земе коњот, како и да се реши што ќе се прави со животните што во одреден временски рок нема да бидат земени од сопствениците. Од јавното претпријатие „Комунална хигиена“ се децидни дека немаат никаква надлежност околу коњите, освен околу отстранувањето на пцовисаните животни.

- Во минатата недела граѓани бараа од нас да тргнеме мрша на мртов коњ. Нашата надлежност е да се собираат мршите од животните во градот, кои потоа се носат во санитарни гробници на Ветеринарската управа. Меѓутоа, имаме проблем кога се работи за коњ, бидејќи е големо животно. Немаме механизација со која би можеле да го кренеме. Се трудиме, иако не е наша обврска, и тоа да го решиме - вели Југослава Поленак од ЈП „Комунална хигиена“.

Полицијата во вакви случаи се справува на тој начин што против сопственикот на добитокот што слободно шета на јавни површини поднесува прекршочна пријава за пуштање животно без надзор.

- Во овој случај се соочуваме со проблем на утврдување на сопственикот на животното, бидејќи честопати тие се пуштени сами. Ние не сме надлежни за згрижување на добитокот од јавните површини. Тоа го правиме во соработка со локалната самоуправа - потенцира Борче Пешевски, портпарол во МВР. Посебен проблем, пак, претставуваат запрежни коли со коњи, што слободно се движат по улиците на градот и претставуваат опасност за учесниците во сообраќајот. Често се и причина за сообраќајни незгоди, иако движењето на запрежни коли во градското подрачје е забрането со закон.

Од Градот велат дека не се надлежни да санкционираат учесник во сообраќај што не ја почитува поставената сообраќајна сигнализација, туку дека тоа е исклучителна надлежност на полицијата. Единствена надлежност на Градот, според Законот за Градот Скопје, е поставувањето сообраќајни знаци. Градските власти потенцираат дека на влезот во Скопје, како и на повеќе магистрални и собирни улици, се поставени сообраќајни знаци со кои се информираат граѓаните дека движењето со запрежни коли е забрането.

Од МВР велат дека тие ги отстрануваат запрежните возила од сообраќајот и дека казната за нивното учество во сообраќајот и за нивното движење низ градот се движи од 25 до 45 евра, во зависност од тоа каде е затечено запрежното возило (на тротоар, во сообраќај или на други недозволени места).

- Проблем е тоа што во поголем број случаи тие се управувани од малолетни лица, па тешко ги пронаоѓаме нивните родители - објаснува Пешевски. Според портпаролот во „Комунална хигиена“, Поленак, запрегите во Скопје се последица, а не причина на проблемот.

- Проблемот е во непостоење систем на селекција на отпад и на третирање на рециклирање на територијата на цела Македонија. Се' додека не се најде комплетно решение на овој проблем, ќе постојат дивите собирачи на ПЕТ-амбалажата (пластични шишиња) и на друг отпад, а запрежните коњски коли ќе бидат нивно средство за транспорт и начин за обезбедување егзистенција - заклучи Поленак.

http://www.dnevnik.com.mk/default-mk.asp?ItemID=E5691143296B564DA5D514D18685B093&arc=1 - Дневник - Анела Петрова -  25.09.2005

"Урбана" метропола.  

"Урбана" метропола.