Законот за комунални дејности не дозволува чување живина и добиток во град

Во урбаните делови на Скопје се' уште се чуваат коњи, кози, кокошки. Може и да не им е по волја на соседите кога наутро наместо мобилен телефон, ги будат петли, но нивните сопственици не се грижат многу за тоа. Една граѓанка од Дебар Маало пријавила во полиција дека постојано ги вознемирува кукурикање на петел, но оттаму и' било речено дека ако нејзините соседи имаат еден петел, тогаш тој има третман на домашно милениче и тука не може да се интервенира, а доколку има повеќе петли или кокошки, сеедно, тогаш ќе бидат убиени. Зошто две кучиња може да бидат третирани како домашни миленици, а два петла не - никој не знае да одговори.

И Јулијана Атанасова од населбата Лисиче има проблеми со својот сосед, кој според неа има фарма со 14 коњи и петнаесетина кокошки што шетаат низ дворот. Таа вели дека од непријатната миризба не може да го користи сопствениот двор, не може да отвори врата или прозор, а штом се затопли, нема мир ниту од инсектите. Потенцирајќи дека соседот за занимава и со продажба на коњите, Атанасова за решавање на проблемот се обратила во Општина Аеродром, „Комунална хигиена“, Градот и во Министерството за екологија. Но, решение нема од никаде. Сопственикот на земјиштето на кое се наоѓаат животните Цветан Димишковски, пак, појаснува дека не станува збор за фарма, туку за штала што ја изнајмува, а за која има одобрение уште од поранешната Општина Кисела Вода. Вели дека коњите не се негови, туку на неговиот помошник Дилавер Абди има само два коња, додека кокошките биле на соседите. Тој одгледува зеленчук и произведува расад и вели дека коњите му се потребни оти уште од прадедо неговото семејство се занимавало со земјоделство. Признава дека неодамна го посетиле градските инспектори и побарале да ги отстрани животните.

Од Градот велат дека според Законот за комунални дејности и Одлуката за комунален ред на Скопје, не е дозволено да се чува ситен и крупен добиток во урбана средина. А, токму овој дел во населбата Лисиче урбанистички припаѓа на Општина Аеродром.

„Комуналните инспектори имаат право да бараат отстранување на животните во урбана средина, а можат да постапат и по вториот прекршок - загадување на животната средина. Тие треба веднаш да донесат решение за одреден рок животните да бидат отстранети. Судската казна за ваков вид прекршок изнесува од 10.000 до 35.000 денари“, вели Александар Бошковиќ, комунален инспектор во Градот.

Во Министерството за животна средина велат дека се ненадлежни и упатуваат на Државниот ветеринарен инспекторат. Оттаму, пак, појаснуваат дека дури и да се работи за пријава дека му пречи кучето што го чува соседот во зградата, нивните ингеренции се само да проверат дали е тоа здраво и вакцинирано, а ваквите случаи се во надлежност на Комуналната инспекција.

http://www.utrinski.com.mk/?ItemID=76A8B726721DDF46B310BE51A51357C5 - Утрински - Снежана Калабакова - 29.04.2008

Запрежните коли со коњи претставуваат опасност за учесниците во сообраќајот

Казна од 50 евра е предвидена за напасување добиток на јавна површина, според новиот Закон за јавната чистота. Иако и досега со Законот за комуналните дејности се забрануваше чување ситни и крупни животни во урбана средина, одредбата не се почитуваше. Коњи слободно шетаа и во строгиот центар на Скопје, а најчесто се „укотвуваа“ кај Транспортниот центар. Имаше и случаи кога напаѓаа и луѓе. Причината за досега нерешениот проблем, според градските комунални инспектори, е тоа што Законот за комуналните дејности не предвидел казнени одредби за добиток во градски средини. Од надлежноста за разрешување на овој проблем се оградуваа и Градот и јавното претпријатие „Комунална хигиена“.

- Пред четири до пет години презедовме акција за собирање на коњите од јавните површини. Коњите се носеа во Зоолошката градина, но сопствениците веднаш дојдоа по нив, со тоа што платија по 800 денари за престој на коњите и плус трошоците за акцијата што беше спроведена со асистенција на полицијата - истакна Љубе Стојковски, раководител на Одделението за комунална инспекција во Градот. Од Одделението за односи со јавноста велат дека Градот Скопје треба да донесе новаа одлука за јавната чистота, која треба да ја усогласи со истоимениот закон, со која ќе го утврди начинот на кој ќе бидат одземани коњите оставени на јавна површина и како тие ќе се носат и ќе се чуваат во посебни боксови. Треба да се определи и колку ќе изнесува казната што треба да ја плати сопственикот доколку сака да си го земе коњот, како и да се реши што ќе се прави со животните што во одреден временски рок нема да бидат земени од сопствениците. Од јавното претпријатие „Комунална хигиена“ се децидни дека немаат никаква надлежност околу коњите, освен околу отстранувањето на пцовисаните животни.

- Во минатата недела граѓани бараа од нас да тргнеме мрша на мртов коњ. Нашата надлежност е да се собираат мршите од животните во градот, кои потоа се носат во санитарни гробници на Ветеринарската управа. Меѓутоа, имаме проблем кога се работи за коњ, бидејќи е големо животно. Немаме механизација со која би можеле да го кренеме. Се трудиме, иако не е наша обврска, и тоа да го решиме - вели Југослава Поленак од ЈП „Комунална хигиена“.

Полицијата во вакви случаи се справува на тој начин што против сопственикот на добитокот што слободно шета на јавни површини поднесува прекршочна пријава за пуштање животно без надзор.

- Во овој случај се соочуваме со проблем на утврдување на сопственикот на животното, бидејќи честопати тие се пуштени сами. Ние не сме надлежни за згрижување на добитокот од јавните површини. Тоа го правиме во соработка со локалната самоуправа - потенцира Борче Пешевски, портпарол во МВР. Посебен проблем, пак, претставуваат запрежни коли со коњи, што слободно се движат по улиците на градот и претставуваат опасност за учесниците во сообраќајот. Често се и причина за сообраќајни незгоди, иако движењето на запрежни коли во градското подрачје е забрането со закон.

Од Градот велат дека не се надлежни да санкционираат учесник во сообраќај што не ја почитува поставената сообраќајна сигнализација, туку дека тоа е исклучителна надлежност на полицијата. Единствена надлежност на Градот, според Законот за Градот Скопје, е поставувањето сообраќајни знаци. Градските власти потенцираат дека на влезот во Скопје, како и на повеќе магистрални и собирни улици, се поставени сообраќајни знаци со кои се информираат граѓаните дека движењето со запрежни коли е забрането.

Од МВР велат дека тие ги отстрануваат запрежните возила од сообраќајот и дека казната за нивното учество во сообраќајот и за нивното движење низ градот се движи од 25 до 45 евра, во зависност од тоа каде е затечено запрежното возило (на тротоар, во сообраќај или на други недозволени места).

- Проблем е тоа што во поголем број случаи тие се управувани од малолетни лица, па тешко ги пронаоѓаме нивните родители - објаснува Пешевски. Според портпаролот во „Комунална хигиена“, Поленак, запрегите во Скопје се последица, а не причина на проблемот.

- Проблемот е во непостоење систем на селекција на отпад и на третирање на рециклирање на територијата на цела Македонија. Се' додека не се најде комплетно решение на овој проблем, ќе постојат дивите собирачи на ПЕТ-амбалажата (пластични шишиња) и на друг отпад, а запрежните коњски коли ќе бидат нивно средство за транспорт и начин за обезбедување егзистенција - заклучи Поленак.

http://www.dnevnik.com.mk/?itemID=E5691143296B564DA5D514D18685B093&arc=1 - Дневник - Анела Петрова -  25.09.2008

Од Ветеринарскиот факултет советуваат да се внимава со дивите птици, оти се можни зарази

Треба да се преземат мерки за да се контролира размножувањето на птиците, велат стручњаците

Диви гулаби се гнездат по терасите и таваните на зградите во повеќе скопски населби и им задаваат главоболка и нервоза на скопјани. Граѓани од Аеродром, од централното градско подрачје, од зградите кај пазарчето Буњаковец и од Карпош 4 се жалат дека стотици птици им создаваат несоница и им ги валкаат балконите со изметот што, според стручњаците, може да биде штетен и по здравјето на човекот.

Ана Стојанова од населбата Карпош 4 вели дека почнала да зема таблети за смирување за да може да заспие зашто под нејзиниот прозор цела ноќ гулабите се „забавуваат“. Нејзините соседи ја заградиле терасата со метална жица.

- Кога отворам прозорец, однадвор доаѓа неподнослива миризба. Се обидував на разни начини да се ослободам од нив, ставав тропалки, кеси, хартии, направив и страшило, но нив секоја година ги има се' повеќе. На терасата не можам да излезам. Колку и да ја чистам, птиците за една ноќ ја испоганат. Се плашам да не се заразам од некоја болест, зашто ова се диви гулаби. Никој не води грижа колку ги има, со што се хранат и дали се здрави. Ако постои некоја надлежна институција за нив, веднаш би ја повикала, не прашувам за пари - се жали Стојанова. Тодор Ивановски, експерт за птици, вели дека е точно оти дивите гулаби се намножиле во Скопје и дека им задаваат проблеми на граѓаните.

- Веќе неколку месеци сум пензионер, но целиот работен век во Природонаучниот музеј го посветив на истражување на птиците. Професионално и приватно сум засегнат со проблемот и енормното размножување на дивите гулаби. Точно е дека ги има многу. Тие се размножуваат до три пати во годината и вообичаено имаат по две пилиња во гнездото - вели тој.

Ивановски дополни дека во светот постојат неколку начини на заштита. Гулабите се хранат со специјална храна која содржи едно хемиско средство што не дозволува размножување, а е безбедно за животот и здравјето на гулабите.

- Некои приклучуваат жици со струја од мал напон за да ги одбијат гулабите. Во некои европски градови во кои ги има многу, како во Рим, на пример, граѓаните ставаат зашилени метални огради. Како и да е, треба да се преземат мерки за да се контролира размножувањето на птиците - вели Ивановски.Од Факултетот за ветерина велат дека мора да се спроведе акција и да се утврди вистинската состојба со бројот на гулабите.Александар Цветковиќ, асистент на Катедрата за биологија , патологија на риби, пчели и дивеч, вели дека нема место за паника, ниту, пак, треба да се спроведуваат радикални мерки. Тој ги предупредува граѓаните, сепак, да внимаваат кога се во допир со гулабите зашто станува збор за диви птици.

- Од искуството на другите метрополи, најдобро решение е контрацепцијата, за контрола на размножувањето. Со додавање препарати во храната што ќе им се остава во посебни хранилишта, ќе се намали бројот на гулабите. Луѓето треба да внимаваат кога го чистат изметот зашто без ракавици може да се заразат. За да се намали ризикот од зарази, ѓубрето во градот мора да биде затворено во контејнер, а луѓето да се одвикнат од хранењето на гулабите. Со организирана акција на здруженијата за заштита на животните и на локалните власти може да им се помогне и на луѓето и на гулабите - вели Цветковиќ.

ИНФО -Големи и бучни љубовџии

Латинското име на градскиот гулаб е Columbia livia. Се храни со семки, билки, но и со друга храна на која ќе наиде, освен месо. Над Скопје летаат во неколку јата од по стотина гулаби. Живеат исклучиво во двојки и се мирољубиви. Експертите велат дека куриозитет за овие птици е што мажјаците се големи и бучни љубовџии.

http://dnevnik.com.mk/?ItemID=2DDDE0EA4132C04C84B898AC1FC312C8

По булеварите во Аеродром се шетаат коњи. Се случува тие одеднаш да излетаат на коловозот, па возачите нагло кочат, свират, вртат во спротивна насока и што ли уште не за да не удрат во животните. За нивно отстранување никој не се ангажира. Никој не презема мерки да ги отстрани, дури ни по неколкуте инциденти во март годинава, кога коњ гризна девојка за глава, а друг, пак, скрши рака на мајка која одвај го одбрани бебето од неговите заби. Мерки не презедоа ниту Градот ниту Општината, а нема резултати ниту, пак, од работата на полицијата која може да ги казни луѓето што ги чуваат коњите среде град.
Жителите на Аеродром се жалат дека коњи се појавуваат на речиси секоја зелена површина во нивната општина и оти непречено пасат и во булеварското зеленило и на останатите сообраќајници.
"Ако не се на булевар АСНОМ, тогаш се на Јане Сандански или, пак, под Железничка, буквално ги има секаде и вака е со години. Ниту некој ги казнува газдите што ги пуштаат слободно да шетаат по улица ниту, пак, животните ги тргаат од тука. Се чека некој да загине, па овој проблем сериозно да се сфати", велат жителите на Аеродром.
Од Градот велат дека нивната комунална инспекција прави напори, врз основа на Законот за јавната чистота, да забрани напасување на животни, да ги најде сопствениците и да ги казни, но проблем им било што да прават со коњот откако ќе го отстранат од јавната површина, бидејќи во законите не било прецизно одредено како да ги третираат. Тоа допрва ќе го решат со Министерството за транспорт и врски, и ќе го до прецизираат законите. Токму поради недореченоста во Законот, од Градот велат дека досега и нема казнети за чување и напасување коњи. (Е.А.)

http://www.vest.com.mk/default.asp?id=158300&idg=8&idb=2499&rubrika=Skopje

Од почетокот на годинава па до крајот на минатиот месец, 190 скопјани се казнети за неправилно преминување на улица. И покрај казната од 35 евра за поминување на црвено светло и 25 за преминување надвор од пешачкиот премин, скопјани се шетаат по улица како по корзо

Од почетокот на годинава па до крајот на минатиот месец, 190 скопјани се казнети за неправилно преминување на улица. Надлежните во СВР велат дека најчесто се преминува или среде коловозот или на црвено светло, при што речиси воопшто не се почитуваат сообраќајните знаци, семафорската сигнализација, ниту пак се води сметка за тоа дека постојат означени премини за поминување преку улица. И покрај казната од 35 евра за поминување на црвено светло и 25 евра за преминување надвор од пешачкиот премин, скопјани се шетаат по улица како по корзо.

-Пешаците и велосипедистите се една од најмасовните категории на учесници во сообраќајот кои воедно се и најнедисциплинирани. Колку и да имаме успех кај дисциплинирање на возачите, со пешаците сеуште имаме проблем. Кај нас дури е чудно кога ќе видите некој да оди 50 метри за да помине на пешачки. Сигурно не се сеќавате кога последен пат сте виделе ако нема автомобили некој да чека да се запали зелено светло. Тоа мора да се смени бидејќи им даваме лош пример на децата. Затоа и Советот за безбедност во сообраќајот ќе започне со масовна акција за подигање на свеста и сообраќајната култура на пешаците, а ќе го подигнеме и нивото на едукација на граѓаните и на казнените мерки, вели Тоше Јанев, портпарол на Републичкиот совет за безбедност во сообраќајот.

Емилија Стефанова

Жителите на Злокуќани се преплашени од скорпиите што доползеле во нивните дворови и домови. Не знаат од каде дошле, ни дали и колку се опасни. Мајките се загрижени за своите деца зашто, како што е познато, повеќето скорпии, кои обично живеат во суви предели, при каснување ослободуваат отров кој може да биде смртоносен. Лилјана Кочовска, жителка на улицата Скупи 20 во населбата Злокуќани, завчера нашла скорпија на ѕидот од куќата во задниот дел на дворот. - Ја видов попладнето додека пресадував цвеќе во дворот. Се преплашив и веднаш го викнав сопругот. Тој ми кажувал дека и порано наоѓал скорпии, ама мене не ми се веруваше. Ме плаши тоа што постарите велат дека скорпиите живеат во гнезда во кои ги има многу. Можеби некое такво гнездо има во близина на мојата куќа. Не знам дали се отровни и опасни - рече Кочовска. Нејзините соседи велат дека не е првпат да најдат скорпии во дворовите или бавчите. Еден од нив неодамна фатил една долга шест сантиметри. Жителите велат дека слушнале дека скорпиите случајно се пренесени во земјава при увозот на стока од африканските земји. Во контејнерите во кои се сместуваат производите честопати има пукнатини во кои се кријат и се разбегуваат при отворањето. Ова е само еден од можните начини како скорпиите би стигнале до овде. Експертите по биологија не ја исклучуваат таквата можност. Стое Смиљков, професор на Природно-математичкиот факултет, вели дека и кога би дошле до овде, скорпиите не би можеле да живеат долго затоа што климата не им одговара и нема да ја преживеат студената зима. - Точно е дека кај нас има скорпии, меѓутоа се работи за неотровни видови кои ретко се среќаваат и воопшто не се опасни. Ова не е прв случај скопјани да донесат примерок на овој вид. Во нашата земја повеќе смртни случаи има од каснување од пчели, отколку од скорпии. Овој вид воопшто не каса и не е опасен за здравјето на луѓето и покрај тоа што многу потсетуваат на оние од Африка, кои се отровни - рече Смиљков, професор по зоологија на безрбетни животни. Во нашето поднебје, како што објаснува тој, има два вида скорпии, еускорпија италика и еускорпија кафкарика, кои обично живеат во потоплите краеви покрај реките или езерата. Можат да се најдат по течението на реката Вардар, се до Матка, а најчесто ги има во Дојран, Валандово или во Охрид. Една женка може да роди од 15 до 20 мали скорпии годишно. Имаат животен век од 3 до 4 години. Скорпиите влегуваат во групата на членконогите, но не се инсекти. Не прават гнезда со јајца, туку ги раѓаат младите скорпии. Според професорот, место за загриженост на граѓаните нема, иако средбата со скорпиите за никого не е пријатна.

http://www.vreme.com.mk/DesktopDefault.aspx?tabindex=2&tabid=1&EditionID=1538&ArticleID=101262

Коњи и магариња секојдневно пасат во близина на населбата Ново Лисиче. На просторот каде што има тревници, но и на просторот што се уште е во државна сопственост и не е доволно урбанизиран, сопствениците го оставаат добитокот на пасење. Ваквата состојба стана уште поалармантна деновиве, кога на импровизираното „селско пасиште“, во чијашто близина има згради, сопствениците на животните фрлиле и две мрши од мртви коњи. Жителите на оваа скопска населба се жалат на непријатната миризба што доаѓа од мршите, како и на миризбата од изметот на коњите, кои станаа секојдневни посетители на зелените површини во овој дел на Скопје. - Се плашиме децата да ги пуштиме надвор да си поиграат за случајно да не дојдат во близина на некој од двата коњски трупа што неколку дена никој не ги отстранува од зеленилото. Не знаеме каде да реагираме и да се обратиме за да се изнајде решение на проблемот затоа што ова не е прв ваков случај, да се пасе крупен добиток во градско подрачје, каде што е забрането - вели Мими Антевска од Ново Лисиче. Покрај коњите и магарињата, на жителите на оваа скопска населба дополнителен проблем им создаваат и кучињата-скитници, чијшто број во последните денови драстично е зголемен затоа што се собираат околу мршите на животните. - Кучињата-скитници јадат од мртвото животно, а потоа доаѓаат пред влезовите на зградите и лежат таму. Сите поминуваме од таму, а најмногу не загрижува тоа што често децата знаат и да си поиграат со таквите кучиња. Се плашиме од болести и од бактерии. Се чувствуваме како да живееме во зоолошка градина - вели Никола од Ново Лисиче. Од општината Аеродром, во чијашто територија припаѓа и овој дел, тврдат дека досега ниту еден граѓанин не се јавил да побара од нив да се реши проблемот со пасење на крупен добиток. - Општината нема надлежност да ги отстрани двете коњски мрши затоа што тоа е во надлежност само на Град Скопје - велат од Општина Аеродром.

Отруените животни опасни за живот

Постои веројатност од труење на луѓето, пред се', децата, ако дојдат во допир со мршата, вели директорот на Клиниката за токсикологија

Најчесто на удар на трујачите се кучињата-бездомници

Мршите од отруените животни може да бидат мошне опасни, особено за здравјето на децата, кои играјќи си може да дојдат во допир со нив. Практиката покажува дека животните најчесто се трујат со пестициди или тијанидни соединенија, за кои експертите тврдат дека се исклучително силни отрови.Во минатата година, од улиците на Скопје, комуналците собрале вкупно 374 мрши на кучиња и 86 на мачки. За годинава се' уште немаат податоци, но во просек се собираат по 50 мрши месечно.

ЕКСТРЕМНО СИЛНИ ОТРОВИ

Димче Велковски, ветеринар во Ветеринарниот центар Скопје, вели дека средствата со кои се трујат кучињата се употребуваат за заштита на растенијата од растителни вошки.

- Ако се употребуваат во недозволени количини, тие се екстремно опасни материи. Обично ги користат лицата со тешки психички растројства кога се самоубиваат.. Толку се силни што дејствуваат уште при допир со кожата - истакнува Велковски.Тој вели дека глетката е морничава кога животните умираат: грчење и треперење на телото, дезориентираност, лигавење, блокада на центарот за дишење и престанок на работата на срцето.

- За жал, не постои законска рамка со која би се забранила слободната продажба на ваквите лекови во земјоделските аптеки. Со издавање на средствата исклучиво на рецепт би можела да се регистрира продажбата - вели Велковски. Директорот на Клиниката за токсикологија, Андон Чибишев, вели дека е многу опасно неконтролираното труење на миленичињата.

- Поголема веројатност да настане труење на луѓето, пред се', на децата, ако дојдат во контакт со отруеното животно. Животното додека умира повраќа или се лигави. Децата од жал го допираат кучето за опашка или го галат. Ако не го допрат, мали се шансите да настане труење. За среќа, досега во својата лекарска практика не сум сретнал таков случај. Сепак, ако треба да се преземе нешто, има служби задолжени за овие животни. Не е дозволено кој било да се справува со тоа - објаснува Чибишев.

НАДЛЕЖНИТЕ РЕАГИРААТ НА ПОВИК

Раководителот на стационарот „Вардариште“, Слободан Петревски, додава дека жителите треба ваквите случаи да ги пријават на дежурниот телефонскиот број на јавното претпријатие „Комунална хигиена“.На масовното труење реагираат и од Здружението за заштита на животните и животната средина „Срце за животните“.

- Изминатиов период имаше масовно труење на кучиња и мачиња: во Ново Лисиче, Волково, Црешево, крај патот за Матка. Ваквото труење е кривично дело, а извршителите треба да одговараат. За жал, досега не е откриен виновникот во ниту еден случај. Надлежните молчат, и покрај тоа што сме поднеле и кривична пријава против непознат сторител - вели претседателот на Здружението, Вангел Мичевски. Жителка на Ново Лисиче неодамна останала без своето галениче.

- Во ова општо труење животни, настрада и мојата мачка. Постојано некој ги труе миленичињата - посочи скопјанката.Од Јавното претпријатие „Комунална хигиена“ велат дека тие редовно реагираат ако добијат повик.

- Ние не можеме да знаеме каде се' има мрши. Штом ќе добиеме информација, веднаш реагираме. Мршите се собираат со специјални возила и се носат во депонијата „Дрисла“, каде што се спалуваат - изјави Катерина Лаова, портпарол во „Комунална хигиена“. За жал, местото каде што тие лежеле ниту е исчистено ниту е затрупано со песок,.

ЈАМА ЗА МРШИТЕ ВО „ДРИСЛА“

„Комунална хигиена“ има изработено проект за изградба на гробница за бездомни животни, во рамките на „Дрисла“, на барање и на граѓаните кои што не знаеја каде да ги носат своите умрени миленичиња, но тој се уште не е реализиран, бидејќи треба да се финансира од Градот.Од Градот велат дека во буџетот за годинава се предвидени три милиони денари за изградба на јама во која ќе се погребуваат животните скитници.

- Избрана е фирма на тендер, потпишан е договор и јамата ќе се прави во рамките на депонијата „Дрисла“според утврдени стандарди, со два вкопани бетонски прстени со капак и систем за вентилација. Само се чека од ЈП „Комунална хигиена“ да ја одреди точната локација на која ќе се гради јамата во рамките на депонијата „Дрисла“, потенцираат од Одделението за односи со јавност во Градот. Ако подготвителните работи течат според планот, изградбата се очекува да почне пролетва.

ИНФО-Труењето е кривично дело

Во минатата година, од улиците на Скопје, комуналците собрале вкупно 374 мрши на кучиња и 86 на мачки. Животните најчесто се трујат со исклучително силни отрови, поточно пестициди или тијанидни соединенија.Иако труењето е кривично дело, во изминатиот период масовно труења имаше во Ново Лисиче, Волково, Црешево, Матка...

Наезда од змии во Реонски центар Аеродром

Експертите за влекачи од Природонаучниот музеј велат дека ова е период кога змиите се будат од зимскиот сон и кога забрзано бараат партнер за парење, па затоа граѓаните ги забележуваат и на места на кои не ги очекуваат

Граѓаните од Реонски центар Аеродром се ужаснати од наездата на змии што се шетаат по нивното маало. Станарите што живеат на булеварот Видое Смилевски Бато во зградите број 42, 40 и 2а се жалат оти змиите речиси им се плеткаат околу нозе и често се случува на паркингот да ги прегазат со автомобил.

- Не сум плашлив тип, ама од змии се ужаснувам. Просто неверојатно е како може да ги има и во град, во урбана средина, каде што има метеж од луѓе и автомобили. Пред некој ден се враќав од работа околу пладне кога на паркингот наидов на огромна змија. Не сакајќи ја прегазив. Прво ми беше жал што ја прегазив, а потоа ме фати страв. Жена ми е бремена и не знам како ќе беше ако таа го забележеше влекачот. Се договоривме со соседите, кои исто така се соочиле со змиите, писмено да ја известиме општината и да побараме помош - вели Јован Бошковски, станар од зградата 2а.

Градоначалникот Ивица Коневски вели дека во неговиот кабинет до вчера немало ниту едно известување за овој проблем на граѓаните од тој дел од општината. Службите во општината ќе го испитаат случајот и ќе преземеме безбедносни мерки - вели Коневски.

Експертите за влекачи од Природонаучниот музеј велат дека ова е период кога змиите се будат од зимскиот сон и кога забрзано бараат партнер за парење. Затоа граѓаните ги забележуваат и на места на кои не ги очекуваат.Светозар Петровски, кустос-советник во Музејот, вели дека станува збор за водни змии, за кои верува дека не се отровни.

- Граѓаните не треба да се плашат, туку само да бидат претпазливи. Во Реонски центар Аеродром земјиштето е влажно. Нормално е во скопскиот регион на крајот од март да почнат да се будат змиите од зимски сон. Сметам дека станува збор за водни змии. Тие најчесто бегаат и се кријат кога ќе почувствуваат движење. Граѓаните не треба да се плашат, туку да научат да живеат со природата. Македонија е потписничка на неколку европски конвенции за заштита на змиите, па убивањето на овој вид влекачи не е дозволено. Со оглед на тоа дека човекот дошол на нивна територија, треба да се има малку трпение оти и на змиите им треба време да си најдат друго место за живот - вели Петровски и дополнува дека змиите не се агресивни, освен ако не се најдат притеснети, па како и секое живо суштество мора да се брани.

Сиви врани ги напаѓаат скопјани среде бел ден, во близина на зградата на Владата. Повеќе граѓани раскажуваат дека последниве два дена птици ги напаѓале минувачите на кејот и на улицата пред Владата. - Одејќи накај работа по булеварот Илинден, канџи од птица одеднаш ми се забија во главата. Се се случи набрзина, птицата доста силно ги вкопа канџите и потоа одлета. Немаше други минувачи во околината, а немаше ниту дрвја, затоа не знам од каде долета враната “ вели една скопјанка, која била нападната вчераутро. Слично доживување имала и друга жителка на градот, која минувала на истата локација. - На кејот на Вардар, зад Владата, минувачот пред мене го колвна врана. Изгледа ударот не беше многу силен, па човекот не се вознемири многу и си продолжи. Малку подоцна, на скалите кои водат кон мостот Гоце Делчев, и мене ми се случи истото. Се обидов да ја избркам птицата со чантата, но таа одлета, па се врати и повторно ме колвна. Навистина се исплашив “ вели скопјанката. Птици ги напаѓале скопјани и во попладневните часови. - Ја забележав птицата како ме мерка и тргна накај мене, но јас ја наведнав главата и таа ме утна. Вториот пат, кога веќе бев качена на скалите, повторно ме зафати со канџите, но не ме повреди “ раскажува друга минувачка на истото место, која била нападната од врана вчера попладнето кога се враќала од работа. Оринтологот Методија Велевски од Македонското еколошко друштво вели дека секоја пролет, особено во мај, овие случаи се чести затоа што враните во тој период имаат млади во гнездата. Тој објасни дека наспроти уверувањето на скопјани дека ги напаѓаат гаврани, всушност станува збор за сиви врани, кои имаат малку црна боја и се помали од гавраните. - Гаврани не живеат во Скопје, туку ги има надвор од населените места. Може да дојдат во периферијата и во руралните делови по храна, но се гнездат надвор од градот. Тие што напаѓаат се сиви врани поради тоа што сметаат дека младите им се во опасност. Ако видат црна чанта или склопен црн чадор, тоа веројатно им личи на птица, па затоа реагираат “ вели тој. Велевски објаснува дека птиците напаѓаат за да заплашат и да ги избркаат минувачите од местото, а не за да ги повредат. - Некои птици можеби се понасилни, па врз човекот ќе слетаат и по неколку пати, но луѓето треба да се тргнат и да го сменат патот. Ги има по парковите и насекаде низ градот поради што минувачите треба да ги избегнуваат местата каде што ќе ги забележат агресивните птици “ вели Велевски.

Шарка во зграда кај Расадник

Жителите на Кисела Вода изминативе дваесетина дена во повеќе наврати виделе змии во зеленилото, покрај контејнерите, по улиците, а минатата недела нашле шарка во подрумот на зградата број 23 на улица Народни херои

Змии ја сардисаа велосипедската патека покрај Вардар

Експертите велат дека змиите може да се од видот рибарка или белоушка, кои не се отровни

Снежана Калабакова

Темнокафени и тенки змии со должина околу метар деновиве се честа појава на велосипедската патека на кејот на Вардар во вечерните часови. Најверојатно змиите се хранат со жабите во реката, па затоа се во нејзина близина, раскажуваат рекреативци со ролерки кои имале тет-а-тет средба со влекачите. Змии има и во стар Аеродром, велат жители на населбата и додаваат дека ги гледаат и на паркинзите.

Експертите смируваат и тврдат дека не станува збор за змии-отровници, бидејќи тие живеат на поголема надморска височина. Нивна појава не би требало да се очекува, бидејќи отровниците се хранат со глувци и со гуштери. Змиите покрај Вардар може да се од видот „рибарка“ или „белоушка“. Но, вработените од ЈП „Комунална хигиена“ велат дека не сретнале змии од ниеден вид, иако подолг период се на кејот на Вардар и ја реализираат акцијата за негово чистење од трева и друга дива вегетација.

„Првиот пат многу се исплашив, но се исплаши и змијата подготвена да ме нападне, бидејќи за малку ќе ја прегазев со ролерките. Вториот пат лежеше спокојна на патеката неколку метри од мене, претпоставувам веќе проголтала храна. Од пријателите што возат ролерки покрај Вардар дознав дека неколку пати и тие виделе змии“, се пожали скопјанец, кој за доказ ни испрати фотографија од змијата, снимена со мобилен телефон.

Тој исплашен од она што го видел се обратил до Службата за дезинфекција, дератизација и дезинсекција, а оттаму му рекле дека тие не се надлежни за змиите. Ист одговор добил и од ЈП „Комунална хигиена“. Ако змиите се отровни може да настрада некој од луѓето што таму рекреативно трчаат, посочува овој скопјанец и додава дека дури и да не се отровни, сепак, треба да постои предупредување за сите рекреативци.

Елица Танасова, биолог во Градскиот завод за здравствена заштита, потврди дека еден граѓанин пријавил појава на змии на велосипедската патека покрај Вардар. Сепак, според Танасова, ГЗЗЗ не е надлежен за оваа работа. Нивните искуства при извршувањето ларвицидна дезинсекција во Градскиот парк покажуваат дека змиите-белоушки, што живеат во езерцата и во каналите, ги имало во тој дел од градот.

„Во Македонија има два вида змии-отровници, поскок и шарка. Поскокот живее во низините до 1.400 метри надморска височина, а шарката ја има до 2.700 метри надморска височина. За нив е карактеристично што не се тенки, исклучок се само опашките, и се долги од 60 до 70 сантиметри. Кај змиите надворешното уво е закржлавено, а очните капаци се неподвижни. Но, затоа, пак, е развиено внатрешното уво и тие слушаат преку вибрации. Човек од 50 до 70 килограми тежина може да го насетат на оддалеченост од 18 до 20 метри. Првата реакција на змиите е да се повлечат, а понекогаш и остануваат. Отровниците во принцип не се агресивни, дури и на оддалеченост од 10 сантиметри нема да нападнат, освен ако не се згази на неа. Отровот љубоморно го чуваат за пленот што им претставува храна“, објасни д-р Светозар Петковски, кустос-советник во Природнонаучниот музеј во Скопје.

Ако некој го касне змија-отровница и на белегот од двата заба не се појави крв и модринка, тогаш таа не пуштила отров. Доколку се случи тоа, кај нас има серум „антиватеринум“ и лицето каснато од змија-отровница може да се спаси.

Слон се шеташе во скопската населба Маџир Маало

Сеад Ризвановиќ	http://www.a1.com.mk/vesti/default.aspx?VestID=114030#komentari - Коментари (0)   javascript:otvoriVideoPrilog%2809/sead-slon-22-09.wmv,%20114030%29">

Животното му припаѓа на циркусот

Слон избега од циркус и без ничија контрола половина час се шеташе во скопската населба Маѓар Маало. Животното му припаѓа на циркусот кој ги поставува шаторите на просторот пред Народна банка.

Жителите од околните куќи велат дека се револтирани, но и исплашени за својата безбедност.

„Кога свикаа, дојдоа од таму луѓето, притрчаа, да го бркаат животното, не се виновни нормално, меѓутоа немало кој да го раководи него. Небезбедно и за нашите деца и за луѓето што треба тоа да го работат“, вели Марјан Спасовски, жител на Маџир маало.

Кога слонот се шетал, на улицата имало деца кои љубопитно го гледале несвесни за опасноста.

Од градот Скопје велат дека тие ја издале дозволата на циркусот, но не се надлежни за контролата на неговата работа ниту за животните.

Нејасно е кој треба да се грижи за работата на циркус преполн со опасни диви животни. Од Министерството за култура велат дека тие издаваат дозволи за странски уметнички групи, но циркусот не спаѓал таму, бидејќи само циркусот е исклучок од законот за вработување и работа со странци.

http://www.a1.com.mk/vesti/default.aspx?VestID=114030

Елена Мачевска

Десетици илјади кози, свињи, кокошки, коњи и говеда се чуваат во дворовите низ скопските населби. Иако одгледувањето домашни животни во градот е забрането со Законот за комунални дејности, сепак луѓето не се откажуваат од можноста да си обезбедат поевтина храна, а има случаи и кога од животните се остварува приход. Од непочитувањето на Законот, најмногу штета имаат граѓаните чии куќи се наоѓаат веднаш до нечија штала или кокошарник. Проблемот е најголем преку лето, кога поради високите температури смрдеата се шири низ населбите. Сепак, и покрај постојаните меѓусоседски негодувања, ретко кој од граѓаните ваквиот прекршок го пријавува на комуналните инспектори во Општината, на чија територија се одгледуваат животни. - Соседите до нас чуваат кози, крава и неколку свињи. Додека температурите се ниски, присуството на животните воопшто не се забележува, но во лето состојбата е страшна. Не можеме прозор да отвориме, а не, пак, да седнеме во двор - раскажува жителка од општина Аеродром. Општинските комунални инспектори иако контролираат, имаат врзани раце, затоа што во Законот за комунални дејности, со кој се забранува чување домашни животни на градско подрачје, законодавците не предвиделе парична казна, туку само опомена. - Според овој Закон, предвидена е само усна опомена за граѓаните, а не глоба. Законот дозволува домашни животни да се чуваат во руралните средини, но и тука доколку не се чуваат соодветно сопствениците можат да се казнат според Законот за јавна чистота - објаснуваат од одделението за односи со јавност на Општина Аеродром. Од Планот за управување со отпад на Град Скопје за 2010-2015 година, јасно се гледа дека речиси и да нема општина во главниот град каде што не се забележани живеалишта на добиток и на живина. Само на територијата на Аеродром има околу 42 коњи, 130 говеда, 364 овци, 674 свињи и над 5.220 кокошки. И централното градско подрачје не е имуно на чувањето домашни животни и на живина. Во Општината Центар, според податоците добиени од Град Скопје, има околу 200 овци, пет коњи и две говеда, 22 кози и 12 свињи како и 20 кокошки. На целата територија на Скопје има вкупно 8.000 говеда и над 12 630 овци. Од скопските општини тврдат дека досега кај нив немало ниту едно јавувања од граѓани за да се пожалат дека некој сосед чува животни и дека тоа им создава проблеми. - Нашите комунални инспектори се секојдневно на терен и досега не сме имале поплаки од граѓани, но доколку има такви ние ќе ги преземеме сите потребни мерки - вели Јовица Ацковски, портпарол на Центар. Градските власти не располагаат со податоци за количеството на отпад што се создава од одгледувањето на добиток и на живина.

Трла и штали во скопските општини

Во општина Ѓорче Петров постојат седум живинарски фарми со вкупно 13.500 кокошки, четири краварски фарми со 116 грла, една свињарска фарма со 75 места за маторици и 360 места за гоење свињи, како и три трла со овци со вкупно 1.380 овци. Во општина Бутел има две фарми за говеда, а во општина Гази Баба постојат две фарми за говеда од кои едната е Факултетско земјоделско стопанство.

Од Министерството за внатрешни работи велат дека постојат казни за сопствениците што ги изнесуваат своите миленици без маска и без ремен. Секој наш инспектор има фотоапарат со кој мора да го слика и да му земе лични податоци на сопственикот, а тоа е малку тешко кога некој има куче во близина.


Газдите на кучиња иако уште пред две години имаат законска обврска своите миленици да ги шетаат со маски и со ремени, ретко кој од нив го почитуваат тоа.
Имено, скопјани постојано се жалат дека огромни кучиња секој викенд во Градскиот парк се шетаат без заштита, а нивните газди не обрнуваат внимание на поплаките од граѓаните.
- Викендов кога шетав со своето дете, одеднаш покрај нас поминаа неколку големи кучиња. Според големината не беа безопасни. Не мрзам животни, но моето дете се преплаши. На мојата реакција да ги соберат, сопственикот само ми одмавна со раката.
Исто така, знам дека постои одлука со која домашните миленици мораат да носат маски и ремени. Не е дозволено да се движат слободно, а најмалку во парк каде што има многу деца - вели еден револтиран скопјанец.
Со зголемувањето на температурата газдите на кучиња се повеќе ги изнесуваат надвор низ зелените површини. Според нив, пак, на друго место нема каде да се раздвижат нивните миленици.
- Знам дека постои одлука за задолжително носење маски и ремени. Но го изнесувам надвор моето куче за да се прошета. Замислете и тогаш да му ставам заштита, ќе биде како во затвор. Сепак, внимавам каде што има деца да го држам за ремен - вели Роберт, сопственик на ротфајлер. Во Министерството за внатрешни работи велат дека постојат казни за сопствениците што ги изнесуваат своите миленици без маска и без ремен.
Секој наш инспектор има фотоапарат со кој мора да го слика и да му земе лични податоци на сопственикот, а тоа е малку тешко кога некој има куче во близина. Потоа процесот се одвива во суд и оттаму се изрекува казна, која е парична и изнесува до 25.000 денари - информираат од градската комунална инспекција.
- Полицијата реагира по поднесена пријава. Потребно е да ги имаме податоците за сопственикот за подоцна прекршочно да се гони и судот да одлучи за видот и за висината на казната - велат од МВР. Градската комунална инспекција, исто така, е надлежна за случаите на неадекватно обезбедени кучиња.
- Работиме според одлуката за комунален ред од Град Скопје. Сепак, процедурата е малку комплицирана затоа што немаме право да изречеме мандатни казни. Прво мораме да го евидентираме случајот каде газдата го шета своето милениче необезбедено.

Ќе има ли крави и во Скопје во 2014

Чување домашни животни во урбани средини е забрането, а нема пропишана санкција

Нема веќе градски живот за коњите

Стационарот за коњи ќе се гради кај Вардариште и се очекува да биде готов до лето

Деспина Трајковска


Коњите нема уште долго да живеат градски живот. Градските власти најавуваат дека наскоро ќе стават крај на слободното шетање на коњите по булеварите, со што предизвикуваат уште поголем хаос во сообраќајниот метеж. Планираат в година да градат стационар за коњи, а за тоа во буџетот за 2011 година имаат предвидено два милиона денари.

Стационарот би требало да се изгради кај Вардариште, во непосредна близина на стационарот за кучиња. Иако проектот се' уште не е изработен, надлежните од Градот велат дека тоа наскоро ќе биде направено за да може објектот да се изгради најдоцна до лето.

„Ова е еден од проектите што планираме да ги завршиме во првата половина од идната година. Колку проектот да изгледа смешно за некого, сметаме дека е од големо значење, бидејќи ќе решиме проблем со кој граѓаните се соочуваат со години. Коњите не само што слободно шетаат по коловозите и спијат во тревниците туку и многу често се причина за сообраќајни незгоди, особено на подрачјето на Аеродром“, велат од Градот Скопје.

Токму аеродромци најчесто се соочуваа со проблемот со коњите во изминатите години. Често се случува во најголемата фреквенција на сообраќај тие слободно да минуваат по коловозот и да го отежнуваат сообраќајот со што претставуваат опасност за безбедноста на возачите и на пешаците. Такви ситуации најчесто се случуваат пред ТЦ „Бисер“, кај „Три бисери“, но не ретко коњите се составен декор и во делови на Ново Лисиче и во Карпош.

Инаку, градските власти наскоро треба да утврдат дали коњите ќе ги ловат екипи на ЈП „Комунална хигиена“ или, пак, ќе се формира посебна служба. Заловените коњи, евентуално и други животни што слободно шетаат по улиците, ќе се носат во стационарот. Тие таму ќе престојуваат извесен временски период и во случај да се пријави нивниот сопственик, ќе бидат ослободени. Во спротивно, животните, најверојатно, ќе се носат во Зоолошката градина.

Актуелниот проблем со уличните животни го потврдува и градоначалникот на Аеродром, Ивица Коневски, кој вели дека досега неколку пати аеродромци барале начин за негово решавање. Појаснува дека идејата за изградба на стационарот потекнала токму како иницијатива на жителите на неговата општина.