Скопје, 7 март (МИА) - По 36 години постоење Заедницата на единиците на локална самоуправа (ЗЕЛС) денеска доби свој дом во скопската населба Тафталиџе, кој официјално го отворија претседателот на ЗЕЛС Андреј Петров и  комесарот за проширување на Европската унија Оли Рен.  Изградбата траеше десет месеци, а средствата во износ од 800 илјади евра ги обезбеди Европската агенција за реконструкција.  

- ЗЕЛС има важна улога во процесот на децентрализација и улога да обезбедува дијалог меѓу општините и централната Влада. Вие сте форум за дискусија на градоначалници од различни националности и партии...ЕУ е ваш партнер во процесот на децентрализација и преку различни програми активно ќе продолжи да го поддржува, истакна комесарот Рен. Како поранешен советник во општината на Град Хелсинки тој, како што рече, е свесен  колкаво е значењето  на овој настан за локалните власти и за  соработката на општините, за развојот на земјата и  за услугите кои се обезбедуваат за граѓаните.

Добриот дух на соработка меѓу општините, како што рече, резултирал со  подобрување на фискалната децентрализација  на локално ниво.  -  Сметам дека сте целосно вклучени во процесот на интеграција во Европската унија, претставниците на локалната самоуправа имаат голем придонес на овој пат кон Европската унија...Но, потребни се дополнителни чекори за реализација на процесот на децентрализација за да се почувствува напредокот, додаде Рен.

Еврокомесарот го поздрави одличниот дијалог на општините со  мисијата на Европската унија во Скопје и нивните контакти со Брисел и поради тоа очекува со новиот дом да бидат уште поефикасни во иднина.  Укажа на обезбедената техничка помош од ЕУ, совети и средства, 56 милиони евра за поддршка на сеопфатната програма за локалната самоуправа  и на воспоставените  краткорочни приоритети за локалната администрација - зајакнување на внатрешната контрола, дополнително унапредување на процесот на собирање на даноците во општините и осигурување доволен број компетентни вработени.

Потенцирајќи ја важноста на децентрализацијата и улогата на општините, вицепремиерката за евроинтеграции Габриела Коневска-Трајковска рече дека  Владата вложува  исклучително многу во урбаната експанзија на општините и во подобрувањето на нивната комунална инфраструктура, како клучни приоритети во ЕУ-агендата од аспект на пренесувањето на надлежностите од централната на локалната власт.    

- Беа распределени 17 милиони денари за изработка на урбанистички планови, а првпат досега Владата издвои 120 милиони  денари за приоритетна изработка на урбанистички планови во општините за да се привлечат странски инвестиции, рече Коневска-Трајковска. - Но, не застануваме тука. Целосно ќе ги подготвуваме општините и веруваме дека ЗЕЛС ќе биде наш партнер од доверба, додаде вицепремиерката која од оваа институција очекува активна соработка во користењето на претпристапните фондови  на ЕУ.

Претседателот на ЗЕЛС Андреј Петров посочи дека со вселувањето во сопствена зграда на ЗЕЛС му е обезбедена сигурна иднина и непречена работа на стручните служби и претставниците на општините.

- Тоа ќе ја развие и зајакне локалната демократија и локалната самоуправа. Особено е значајно што зградата ја добиваме во период кога во Република Македонија се спроведува еден од најзначајните процеси - децентрализацијата на надлежностите од централната на локалната власт, истакна Петров.

Вкупната површина на објектот е 1.100 метри квадратни, а земјиштето на кое е изграден го додели Владата на долготраен закуп без надомест. Советите на Град Скопје и на општина Карпош донесоа одлуки за ослободување од наплата на средства за комуналии. Наскоро во ЗЕЛС ќе биде отворен прес и тренинг-центар, а место во објектот ќе има и Мрежата на сите асоцијации на општините од Југоисточна Европа (НАЛАС), во која ЗЕЛС членува од 2001 година.