Се монтира лифтот на Милениумскиот крст

Денеска почнува монтажата на лифтот на Милениумскиот крст, која треба да биде завршена до 27 септември. На крстот на Водно течат и градежните работи на долната и горната плоча, а во задниот дел се копа за поставување на пречистителната станица за тоалетите. „Пречистителната станица ќе произведува 95 отсто чиста вода, а нејзиниот изумител за неа има добиено прва награда во Брисел. Досега монтирал 17 вакви пречистителни станици во Македонија, а се докажал и со нивно монтирање во Дубаи, во Казахстан, па дури и на Северниот Пол“, вели Благоја Дојчиновски, претседател на фондацијата „Миленумски крст“. (Сн.К.)

Фондацијата „Милениумски крст“ ќе набави кинески мермер за поплочување на платото на крстот на Водно. Ќе се поплочуваат 1.510 квадратни метри од платото на двете нивоа и 180 скали. За мермерот што допрва ќе се нарачува од Кина ќе бидат издвоени 31.000 евра. Според првиот човек на Фондацијата, Благоја Дојчиновски, станува збор за квалитетен и евтин мермер. Во моментов во тек се градежните зафати на поставувањето кошулица на втората плоча, по што ќе следива поставувањето на мермерот.

„Наскоро ќе биде готов и лифтот, а неговото финиширање што го најавивме за Крстовден беше закочено поради несоодветно поставените водилици кои ја движат кабината. Фирмата ’Доплер‘ од Грција треба да испрати нови и штом ќе бидат поставени, лифтот ќе биде пуштен во функција. Тоа, најверојатно, ќе се случи кон крајот на втората декада од овој месец“, објасни Дојчиновски. (Сн.К.)

Фирмата „Лајтнер“ сака жичарницата да ја земе под концесија

Претставници од австриската фирма „Лајтнер“, заинтересирана да ја гради и да ја добие под концесија жичарницата до Милениумскиот крст, начелно се согласиле со проектот што го изработува скопската проектантска куќа ИНПУМА. Тие на средбата со проектантите се интересирале за трасата по која ќе се стигнува до крстот. Немале ништо против жичарницата да тргнува во близина на „Рамстор“, па преку поранешниот хотел „Панорама“ да продолжи до крстот на Водно. Вкупната должина на трасата изнесува околу 4,5 километри и ќе се гради во две фази. Австријците побарале мали попрецизни корекции на поставеноста на носечките столбови.

Благоја Дојчиновски, претседател на Фондацијата „Милениумски крст“, треба исто така, да се сретне со претставниците на „Лајтнер“ и да му ја соопштат цената за изведување на проектот. Според него, ако претходно изведбата чинела околу 5 милиони евра, кога проектот предвидуваше жичарницата да тргнува од „Панорама“, сега веројатно ќе чини многу повеќе.

Тој додава дека во Фондацијата веќе се обратиле двајца инвеститори кои сакаат да вложат во жичарницата. Дојчиновски не ги открива нивните имиња се' додека не се дефинира дали тие ќе ја прифатат цената за реализација на проектот што треба да му се соопшти „Лајтнер“. Сепак, и двајцата се изјасниле дека во проектот ќе бидат вложени осум милиони евра. Едниот од инвеститорите е повратник од Австралија, а другиот сопственик на кафеана. (Сн.К.)

За една седмица ќе профункционира лифтот на Милениумскиот крст

За користење на лифтот ќе се наплаќаат влезници

Лифтот на Милениумскиот крст ќе биде предаден во употреба за една седмица, а скопјани ќе можат да го користат и да се искачуваат до платформата на краците. Во Фондацијата „Милениумски крст“ размислуваат за искачувањето со лифт на посетителите да им наплатуваат влезници, по цена што дополнително ќе ја договорат, а парите наменски да ги користат за доизградба на придружните елементи на крстот. До платформата со површина од четири квадратни метри ќе можат одеднаш да се искачуваат по осум посетители. Лифтот ќе биде комплетен, велат од Фондацијата благодарение на грчката фирма „Доплер“, која преку ЕМО од Охрид бесплатно ги испратила тег-плочите за кабината, таканаречените водилки коишто беа украдени на Водно заедно со друг градежен материјал. Тоа и го одолжи реализирањето на завршните работи на кабината.

Во моментов се одвиваат градежни работи околу поставување на уште една бетонска кошулка на приземјето на објектот и се подготвува теренот за поставување на подните плочи набавени од ИГМ - Вратница.

„Откако ќе завршат подготвителните работи на кошулката, целиот простор од приземјето ќе се застакли. Таму ќе биде отворен ресторанот што планираме да го дадеме под концесија. Привршуваат и техничките работи на лифтот кој ќе профункционира за една седмица, а тоа уште повеќе ќе ги привлече посетителите. За нив, засега, не планираме организиран превоз со автобуси, за да ја зачуваме еколошки чистата околина. Ќе ја чекаме изградбата на жичарницата, бидејќи сега има доволно посетители кои пешачат до крстот“, вели Благоја Дојчиновски, претседател на Фондацијата „Милениумски крст“. (Сн.К.)

Спектакуларниот видик на Скопје и на Водно од Милениумскиот крст наскоро ќе биде достапен за сите заинтересирани туристи. Фоторепортерот на „Дневник“ меѓу првите се возеше со новиот лифт и имаше можност да ја овековечи убавата глетка.

Во моментот зад Милениумскиот крст на Водно се градат тоалети, се врши поплочување на двете стојалишта на крстот, а свеченото пуштање на лифтот ќе се случи за празникот Илинден. Летово е во план и застаклување на просториите на приземјето и првиот кат

Долгонајавуваното пуштање на панорамскиот лифт кој деновиве беше вграден во Милениумскиот крст на Водно би требало да се случи на празникот Илинден, а вчера требаше да биде извршен и негов технички прием. Во моментот, зад крстот се градат тоалети, се врши поплочување на двете стојалишта на крстот, а летово е во план и застаклување на просториите на приземјето и првиот кат.

-Лифтот е веќе во употреба, но планираме да ангажираме лице кое ќе управува со лифтот и ќе се качува заедно со посетителите заради нивната безбедност. Тие ќе можат да прошетаат по краците од каде ќе имаат поглед на цело Скопје. Инаку, лифтот е изработен според сите безбедносни стандарди и доколку се случи да снема струја или пак да има јаки ветрови, на делот од подножјето до краците, има три резервни излези од каде граѓаните можат да излезат и преку скалите да се симнат на платото, објаснува Благоја Дојчиновски, претседател на фондацијата Милениумски крст. Тој додава дека билетот за возење со лифтот ќе се наплаќа иако цената сеуште не е утврдена, а средствата ќе се користат за одржување на објектот.

Во моментот зад крстот се градат и тоалети, два машки и два женски. Тие деновиве треба да се покријат, а ќе се постави и пречистителна станица, донација на Македонскиот иноватор Јоти Поповски. Отпадните води, според Дојчиновски ќе се пречистуваат и потоа ќе се користат за полевање на зеленилото околу крстот. Деновиве се врши и поплочување на двете стојалишта на крстот со плочки во жолто-црвена боја набавени од ИГМ Вратница.

ВЧЕРА НА ДЕНОТ НА НЕЗАВИСНОСТА

Пуштен лифтот на Милениумскиот крст

Премиерот Никола Груевски на вчерашното свечено пуштање во употреба на панорамскиот лифт кој граѓаните ќе ги носи до краците на Милениумскиот крст, најави дека во јануари или најдоцна до март ќе започне и изградба на жичарницата од Средно Водно до врвот на Водно

На Милениумскиот крст на Водно, вчера, свечено беше пуштен во употреба панорамскиот лифт кој на посетителите ќе им овозможи поглед на целиот град и околината. Премиерот Никола Грувески, пак, кој прв се качи со лифтот до краците на крстот, најави и изградба на жичарница од Средно Водно до врвот.
- Милениумскиот крст е едно од најсилните обележја во Република Македонија, туристичка и верска атракција. Ние како Влада работиме и на следниот проект поврзан со Крстот, а тоа е изградба на жичарница, иницијатива којашто започна уште пред неколку месеци.

Некаде од јануари следната година, најдоцна до март, ќе започне изградба на жичарница од средно Водно до врвот на Водно, а подоцна 2010, од Средно Водно до Рамстор. Целта е на овој начин што повеќе граѓани да можат да дојдат и да го посетат овој дел на Скопје, особено стари и изнемоштени лица кои не можат да си дозволат да пешачат, изјави вчера Груевски.

Инаку, панорамскиот лифт кој е застаклен од три страни, ќе може да пренесува најмногу осум лица, а ќе се движи по средината на крстот се до краците, односно до висина од 45 метри. Возењето со лифтот ќе се наплаќа, а цената официјално денеска треба да ја одреди Управниот одбор на Фондацијата "Милениумски крст", иако е предложено таа да биде 50 денари.
- Поставена е изолација на двете плочи, интензивно се работи и на застаклување на единаесетте дуќани во приземјето, а се прават и тоалети. Очекуваме со средствата од лифтот и со кириите, Крстот сам да се одржува, вели Дојчиновски.

Прота Коста Станоевски, секретар при МПЦ, пак вчера напомена дека црквата која првобитно се планираше во рамките на Крстот ќе биде изградена како независен дел и тоа наредната година. Тој потенцираше дека е во план и изградба на конаци.

Даниела ТРАЈКОВСКА

http://www.vecer.com.mk/?ItemID=847B044DA0B4694AB35DE7D0A87499F8 - vecer

Искачувањето со панорамскиот лифт на Милениумскиот крст посетителите ќе ги чини 100 денари. Вака одлучил Управниот одбор на Фондацијата „Милениумски крст“, откако утврдил дека со првично предложената цена од 50 денари не ќе можат да се покријат трошоците за негово одржување. Од Фондацијата велат дека ќе распишат тендер за избор на фирма која ќе го преземе одржувањето на лифтот.

Благоја Дојчиновски, претседател на Фондацијата „Милениумски крст“, вели дека од викендов наплатата на билетите за користењето на лифтот ќе оди со парагон блокчиња, за што ќе има задолжени лица. (Сн.К.)

http://utrinski.com.mk/?ItemID=25AFF20FEEFDB048A86DF0A8A07BF6EE