Темата за планираните урбанистички концепции за Скопје во 2014 не прекинува да ја бранува јавноста. Иако најголемиот дел од граѓаните ја поддржуваат идејата за изградба на нов имиџ и идентитет на метрополата со оформено централно градско јадро, сепак, оваа концепција за опозицијата е кич и основа за поделби. Најмногу полемики предизвика изградбата на Портата Македонија, која е планирана да се гради на Плоштадот Пела. Тоа е споменик, којшто според експертите претставува историска градба - симбол на триумфална победа. Всушност, вакви објекти во историјата се граделе по триумфалните победи на големите војсководци.

Симбол на триумфот, но на триумфот на независноста ќе биде и Портата Македонија.
- Нема поголем триумф од тоа по вековна борба еден народ да добие независнот и затоа Портата на независноста ќе го означува триумфот, чинот на стекнувањето независност. Македонија со векови чекаше и се бореше за независност. Затоа, таа ќе биде изградена до 8 септември 2011 година и по повод 20-годишнината од независноста ќе биде свечено пуштена во употреба. На портата во рејлеф ќе бидат обработени огромен број ликови и настани од историјата на македонската борба за независност - појаснуваат од Општина Центар.

Темелите на портата ќе се удрат на 8 Септември?

Забрзано се бараат изведувачи на градежните работи и мермерните релјефи и бронзени фигури

Деспина Трајковска

Подготовките за почеток на градба на портата „Македонија“ се во полн ек. Неофицијално, камен-темелникот на портата, која, всушност, ќе ја симболизира независноста на државава, е планиран да се постави токму на празникот 8 Септември. Од тие причини, Министерството за култура како носител на проектот забрзано бара изведувач на градежните работи, а во меѓувреме ги привршува геомеханичките испитувања на теренот. Во изминатиот период надлежните го пролонгираа, односно го скратија периодот за доставување на понудите за избор на фирма-изведувач на објектот што очигледно кажува дека активностите за теренски почеток на проектот се брзаат.

Од надлежното Министерство вчера до затворањето на весникот не ги потврдија овие информации ниту, пак, објаснија од кои причини ги менуваат термините за јавните набавки. Нема ниту официјални информации до која фаза, всушност, е проектот и што досега е сработено за почеток на неговата реализација. Всушност, речиси целиот проект, кој е дел од „Скопје 2014“ во целост не се спроведува транспарентно. Досега министерката за култура, Елизабета Канческа-Милевска, во врска со портата единствено изјави дека за неа веќе е обезбедена градежна дозвола со цел да ги негира наводите оти изградбата на објектот би била спорна дури да не се усвои новата верзија на ДУП „Мал ринг“.

Инаку, ресорното Министерство планира до крајот на август да избере фирма што ќе ги врши градежните, занаетчиските и инсталационите активности, а истовремено ќе изврши и пунктирање на релјефи во мермер и ќе излее фигури во бронза за потребите на објектот. Токму од јавната набавка може да се заклучи дека портата ќе биде изведена во комбинација од мермер и бронза, податоци, кои надлежните речиси ги кријат. Досега штуро информираа дека најверојатно основата на објектот ќе биде бетонска, а пак релјефите на портата мермерни. Се' уште нема информации каде ќе се изработува или веќе се работи, и дали ќе се склопува на самото место или, пак, во целина ќе биде транспортирана до предвидената локација за поставување. Се кријат и димензиите на портата, иако од анимацијата на владиниот проект видливо е дека таа ќе биде габаритна и ќе ја засени околината. Тајна е и колку средства има предвидено Министерството за изградба на контроверзниот објект. Автор на репликата на триумфалната капија е Валентина Стефановска, по чие идејно решение се работат и спомениците на Александар Македонски и на Филип Втори што треба да се постават на плоштадот во Автокоманда.