ОПШТИНА ЦЕНТАР ПОВТОРНО Им ПРОГЛЕДУВА НИЗ ПРСТИ на кафеанЏиите

Наместо уривање, си добија одобренија

Сега е бесполезно да се интервенира бидејќи доаѓа 1 април, кога почнува новата летна сезона за поставување на масите,вели Милан Пижула , градежен инспектор во Центар

Наместо присилно да ги отстранат летните тераси поради предвременото поставување, надлежните од Општина Центар на кафеанџиите почнаа да им делат одобренија бидејќи летната сезона била на прагот. Пред три недели општинските инспектори на кафеанџиите на Кејот 13 Ноември и на улицата Македонија им врачија решенија за отстранување на масите и столовите, но тие не го сторија тоа, а инспекторите, како и многупати досега, не се ангажираа за присилно да ги отстранат. Градоначалничката на Центар, Виолета Аларова, вети дека оваа година нема да дозволи да се повтори проблемот со незаконското узурпирање на просторот за пешаците, кој се провлекува со години, но очигледно е дека го прави спротивното. Сега е бесполезно да се интервенира бидејќи доаѓа 1 април, кога почнува новата летна сезона за поставување на масите и столовите. Инспекторите на сопствениците на кафулињата веќе им врачуваат одобренија за поставување урбана опрема на јавните површини за претстојната сезона, врз основа на нивните поднесени барања. Веќе почнува сезоната и сега не е во ред да се тргаат масите и столовите за една недела. Доколку сопствениците на локалите не се придржуваат на условите и роковите наведени во новите одобренија, тогаш ќе интервенираме - вели Милан Пижула, градежен инспектор во Општина Центар. Додека Општина Центар замижува пред самоволието на кафеанџиите, тие веќе цел месец го користат топлото време за да ќарат што е можно повеќе пари од летните тераси, без да платат надомест за користење на јавната површина.  Советот на Градот Скопје на вчерашната седница требаше да го усвои новиот правилник за поставување урбана опрема на јавните пешачки површини, според кој се раководат општините при издавањето на дозволите. Кафеанџиите пред неколку месеци побараа од Општината да им дозволи летните тераси да ги поставуваат во текот на целата година, а не само од април до октомври, но за тоа треба да одлучи Градот. Оттаму, пак, велат дека кај нив не пристигнало такво барање. Општината Центар се' уште работи според стариот правилник и се' уште не сме го добиле новиот од Градот - вели Соња Шумковска, раководител на Секторот за урбанизам во Општина Центар и додава дека ако е потребно ќе се направат соодветни измени за да се усогласат со новите правила на градските власти. И таа потврди дека веќе почнало врачувањето на новите одобренија за поставување летни тераси. Секој од угостителите со барањето за одобрение поднесува и изработен проект на кој претходно согласност даваат и градските власти. Дури потоа, Општината Центар го издава одобрението за поставување маси и столови - објаснува Шумковска.

Анела Петрова

Завчера еден час пред полноќ, една клупа на улицата Македонија точно пред новоотвореното кафуле Рома, спроти Домот на АРМ била пресечена на пола. Пред очите на минувачите, пред гостите, некој" извадил моторна пила ја пресекол, а потоа ја откорнал од лежиштето. На нејзино место ги поставил масите и столовите.

Во трката за профит кафеанџиите не се воздржуваат да преземат се, само за да ги распостелат летните тераси до каде што им е волја. Не им треба ни дозвола за користење, ниту пак некој им ја побарал. А и ваквите вандализми не се некоја новина!?.

Инаку, ЕУ ја прогласи улицата Македонија за најевропска улица. Комисијата веројатно не ги зела предвид навиките на скопјани.

ОПШТИНА ЦЕНТАР УТРЕ ВО АКЦИЈА

Инспекторот Пижула вели дека не е запознат со најновиот случај со кафулето „Нана“, чија тераса на плоштадот прилега на куќа

Градежната инспекција на општина Центар утре ќе отстранува бесправно поставени маси и столови од кафулиња на јавните површини, како и друга урбана опрема. Инспекторот Милан Пижула најавува дека први ќе бидат отстранети масите и столовите од кафулето „Стрип“, спроти гимназијата „Јосип Броз Тито“, кои се поставени среде жардиниера со зеленило. Ќе бидат отстранети и стреата пред некогашен „Јукан“, како и киоск на улицата Партизански одреди, кај кројачкиот дуќан „Ангелковски“.За в четврток е закажана интервенција со полицијата за отстранување на масите и столовите на локалот „Стрит“. На сопственикот претходно му беше укажано сам да ги отстрани, оти се поставени без дозвола. Ако не бидат тргнати до четврток, ние ќе ги тргнеме присилно - вели Пижула.Тој информира дека и на сопственикот на кафулето „Тренд“, кое се наоѓа на плоштадот Македонија, му е врачено решение за отстранување на стреата. Веќе трета година едноподруго летната тераса на ова кафуле прилега на куќа, со лежечки гарнитури и завеси, покриена со дрвена конструкција и со цврст под. Сопственикот го игнорира правилникот за поставување урбана опрема, според кој, на летните тераси може да се поставуваат маси, столови, чадори и ништо друго. Пижула најави дека инспекцијата наскоро ќе го посети и овој локал.Тој не беше запознаен дека деновиве и летната тераса на кафулето „Нана“ во близина на „Тренд“ прилега на објект со цврста градба. Сопственикот на „Нана“ терасата си ја огради со дрвена конструкција и направи покрив. Вчера оградата ја разубавуваа со пластични жардиниери со цвеќе. Веднаш ќе го испитаме и случајот со терасата на „Нана“. Ние сме постојано на терен, но во минатата недела не забележавме дека ова кафуле поставува тераса. Тоа е направено најверојатно скоро и веднаш ќе провериме - вели Пижула.Од локалот „Нана“ велат дека имаат дозвола за поставување на масите и на столовите, дури и дека платиле за поголем простор отколку што користат.Ситуацијата со летните тераси е иста и во другите делови на Скопје, а проблемот е најизразен на улицата Македонија и на Кејот 13 Ноември. Таму летните тераси не само што не се унифицирани, како што е пропишано, туку се изградени од недозволени материјали и се поставени на простор поголем отколку што треба.Од Општина Центар за ваквата состојба се бранат дека интервенираат, но локалите повторно го узурпираат просторот за пешаците.Изминативе две години четири пати интервенираме и на Кејот и на улицата Македонија, но сопствениците на дуќаните повторно си ги враќаат масите и столовите - вели Пижула. Од оваа сезона на општинските инспектори ќе им се приклучат и градските инспектори, кои со новиот Правилник добија можност да ја отстрануваат бесправно поставената урбана опрема. Градската инспекција вети дека кафеанџиите повеќе нема да се толерираат и дека редовно ќе спроведуваат акции за отстранување на бесправно поставените тераси.

(А.П.)

Блокирани скали, што е многу, многу е!

Окупирана пешачка зона и блокирани скали и приоди до блиски институции. Ваквата ситуација е сосема доволна причина новоизбраните градоначалници на Скопје и на Општина Центар уште во првите работни денови да го проверат функционирањето на летните тераси. Навистина ли сите имаат соодветни дозволи да поставуваат инвентар на толкава површина, плаќаат ли комунална такса и реагира ли воопшто инспекцијата на терен? Никој не е против летната шема на кафулињата, но што е многу, многу е!

„Мачката“ фатена во кафеанска стапица

Од Министерство за култура очекуваат надлежните во Општина Центар скулптурата на улица Македонија итно да ја „ослободат“ од масите, столовите и чадорите за сонце

Скулптурата „Мачка“ на улицата Македонија, која помпезно ја отвори премиерот Никола Груевски, сега се крие од сонце и дожд - под кафеански тенди!

- За Велигден ги прошетав гостите од Србија низ центарот и кога сакав да се пофалам со „Шмизлата“, „Мачката“ и „Бикот“, „Мачката“ ја најдовме под стреа. Се засрамив и воопшто не се обидував да им објаснувам што се случува. По само два-три месеци веќе никој не се грижи и за новите споменици. Знаев дека ако досега немало чувство за старите, ќе нема ни за новите. Поставувањето на скулптурите е чудо за три дена пред избори. Жив доказ за тоа е „Мачката“ што пие кафе во кафеана - вели скопјанецот Оливер Димовски.

Градските комунални инспектори, кои имаат обврска да вршат контрола на летните тераси и поставувањето урбана опрема, иако ја забележале оваа „заштита на Мачката“, до вчера не презеле никакви законски мерки. Од Министерство за култура, кое ги финансирање изградбата и поставувањето на спомениците во центарот на Скопје, очекуваат дека надлежните во Општина Центар итно ќе ја „ослободат“ скулптурата од масите, столовите и чадорите за сонце. Вработените од кафеаната „Космик“ велат дека непотребно се обвинети од граѓаните, зашто урбаната опрема што ја заробила мачката му припаѓа на соседното кафуле, кое, според нив, немало ни дозвола за работа.

- Опремата е на продавничката што одвај има пет квадратни метри, а е сместена во Палата Македонија. Фирмата е регистрирана за продажба на тутун и весници, а има импровизиран шанк и кафемат во ходникот, од каде што се носат нарачките за муштериите. Тие бесправно со маси и столови го зазедоа просторот околу „Мачката“. Работат без дозвола, на диво, а го држат најубавото место на улицата Македонија. И ние сме кафеанџии, но никогаш не би го окупирале споменикот. Инспектори од Градот беа завчера, но иако утврдија неправилности, новите кафеанџии не ја затворија терасата, велат вработени од кафулето „Космик“.

Импровизираното кафуле вчера беше затворено и немаше никој за да ни даде изјава. Од општина Центар велат дека Градот е надлежен за спроведување на правилникот за летни тераси, а тие биле одговорни само за урбаната опрема. Лидија Неделковска, шефица ка кабинетот на поранешната градоначалничка Виолета Аларова, вели дека за летните тераси е одговорен нивниот инспектор Пижула и дека таа нема информации што работи тој.

Милан Пижула, главен градежен инспектор во Центар, изјави дека се' уште не може да дава изјави за поставувањето на терасите.Од Градот велат дека тие имаат обврска да издаваат одобренија за вршење дејност надвор од деловен простор, кои се однесува и на летните тераси.

- Одобренијата се издаваат според проектот за летните тераси, усвоен во минатата година од Советот на Град Скопје. Стандардите за летните тераси во тој проект се исти како и во претходниот правилник. Наплатата на таксата за користење на јавната површина се врши според Законот за комунални такси. Досега во Градот не пристигнало ниту едно барање за издавање одобрение за користење летна тераса од кафулињата на кејот 13 Ноември. Во Градот пристигнаа барања за издавање одобрение за летните тераси од неколку локали од улицата Македонија. За санкционирање на летните тераси отворени без одобрение е задолжена градската комунална инспекција, која веќе врши увид на терен, велат од одделението за односи со јавноста на Град Скопје. Скулптурата „Мачка“ е дело на Томе Аџиевски, која ја нарача и постави Министерството за култура пред околу три месеци на шеталиштето Македонија, во близина на киното „Манаки“.

Поставувањето на 35 скулптури на разни локации во центарот на градот, според Министерството за култура, требаше да му дадат посебен белег на Скопје.На шеталиштето меѓу метежот од столови, маси и чадори за сонце се поставени и скулптурите „Еееј“, „Шмизла“, „Бик“, „Питач“ и „Чистачот на чевли“.

Марија Тасев
Фото Слободан Ѓуриќ

Креваа маси, останаа тераси

Огромните дивоизградени кафеански објекти на Кејот 13 Ноември и вчера останаа невидливи за инспекторите на Општина Центар. Нивната акција за чистење на омиленото шеталиште заврши со одземање на неколкуте маси и столови што излегувале од пропишаната рамка. Од општината неофицијално коментираат дека нивните инспектори се плашат од газдите на кафеаните, кои се помоќни од законот.Дел од граѓаните инсистираа да се урнат бесправно изградените тераси. Имаше и такви што ги поддржуваа кафеанџиите.

- Кејот е прекрасно место и без кафулињата би бил само една слепа улица по која ќе се собираат кучиња-скитници. До неодамна беше пуст. Наместо да урива, општината треба да најде начин како да заработи од кафеаните - дофрли студентот Никола Мијалковиќ додека траеше акцијата за собирање на урбаната опрема. Иако инспекторите на кејот конфискуваа во придружба на полицијата, беа вербално нападнати од револтираните кафеанџии, па наместо полни камиони урбана опрема, си заминаа само со еден камион.

Пред неколку дена од улицата Македонија инспекторите од Општина Центар одзедоа четири камиони урбана опрема, односно 42 маси и 58 стола, а од кејот одвај десетина маси и стола.

- Не ја разбирам оваа парада на глупоста. Дојдоа да соберат две-три маси. Иако издадоа решенија, ние инсистираме на друго решение: да ни ги легализираат летните тераси во кои инвестиравме. Акцијата беше резил. Гостите, меѓу кои имаше и странци, беа уплашени и си заминуваа - изјави еден вработен во кафулињата кој инсистираше да остане анонимен.

Горан Матевски, портпарол на Општина Центар, изјави дека поставувањето на урбаната опрема се толерира само ако таа е според одобренијата, согласно со елаборатот од минатата година.

- На оние на кои им е одземен дел од урбаната опрема, а повторно местат нова, Општина Центар комплетно ќе им ја одземе и нема да дозволи поставување на маси во текот на целата сезона. Акцијата за одземање на урбаната опрема ќе продолжи се' додека корисниците на просторот пред угостителските објекти не се дисциплинираат - се вели во соопштението од Општина Центар.

Марија Тасев

Од денеска дотурот на стока во кафулињата на Кејот ќе може да го извршуваат само оние кои имаат дозвола и тоа во периодот меѓу 2 и 10 часот наутро

Пешачките зони во центарот на македонската метропола, особено Кејот 13 Ноември, се претворија во егзибиционистички патеки на кои скутерџии и моторџии со висока брзина ги покажуваат своите возачки способности. Не помалку опасни за пешаците се и возилата за кои не важи забраната за движење. На жалбите на скопјани, а посебно на жителите од околните згради, деновиве одговорија одговорните од Град Скопје кои ги известуваат сите граѓани, особено оние што вршат дотур на стоки од Кејот дека од денеска заедно со сообраќајната полиција ќе се врши засилена контрола на влегувањето на возилата за дотур.
- Дотурот на стока ќе можат да го извршуваат само оние кои имаат дозвола и тоа во периодот меѓу 2 и 10 часот наутро. Најостро ќе бидат санкционирани сите кои ќе вршат дотур надвор од пропишаното време, или пак, истото ќе го прават без валидна дозвола издадена од Град Скопје.

Контролата на возилата со дозвола, при влегувањето и излегувањето, во рамки на пропишаното време ќе ја вршат вработените на паркинг пунктот на хотелот Холидеј Ин - информираат градските власти. Тие ги повикуваат сите субјекти кои немаат дозвола што поскоро да поднесат барање до Секторот за сообраќај за издавање на дозвола. Граѓаните се задоволни од најавените мерки и се надеваат дека со нив ќе се намали сообраќајот а ќе се зголеми нивната безбедност на Кејот.
- Ноќе не се спие од бучава, а дење да ти е страв да излезеш од дома. Моторџии возат на едно тркало, се вртат под рачна, се чкрипат со гумите. Посебна пориказна е кога се врши дотур во кафулињата, тогаш врие од автомобили. Општ хаос...Можеби зачестените полициски контроли ќе ги вразумат сите несовесни возачи - вели еден жител од кулите на Кејот.

Градот Скопје и досега имаше воспоставен режим на забрана за движења на моторни возила на Кејот и улицата Македонија според кој единствено возилата на Комуналец, на Брза помош, пожарникарските и полициските возилата имаат слободен влез. Секое возење на пешачка зона без дозвола се казнува со глоба во висина од 25 евра во денарска противвредност.

Див запад во Струга

Стружани негодуваат поради урбанистичкиот хаос во градот, за што некои го обвинуваат поранешниот макро Дилавер Бојку Леку, кој е сопственик на хотел во Струга, а за други, виновна е локалната власт

Летни тераси и шанкови во чаршијата и на кејот на реката Црн Дрим, но и несредените плажи деновиве ги пречекуваат малобројните туристи во Струга, пред почетокот на летната туристичка сезона. Додека посетителите се одмораат во сенките на шанковите на кејот, стружани негодуваат поради урбанистичкиот хаос што со години владее во градот на поезијата. Дел од нив за нередот го обвинуваат поранешниот макро Дилавер Бојку Леку, кој е сопственик на хотелот „Блу скај“ во центарот на Струга и на шанковите на градската плажа, а останатите го бранат и вината ја гледаат во државата и во локалната самоуправа. Додека Советот на Општина Струга во исчекување на изборот на претседател на Советот не функционира, струшките угостители и бизнисмени меѓусебните проблеми почнаа да ги расчистуваат со пиштоли.


Летните тераси жежок проблем

Екипа на „Дневник“ беше во Струга по инцидентот во понеделникот, кога полицијата го приведе Леку, откако пукал со пиштол за да го реши имотниот спор со Меџит Цома, сопственик на ТЦ „Цома“.

- Лека избрка десет трговци од кејот и стана газда, а ја узурпира и плажата. Постави секаде маси, а потоа неговиот пример го следеа и останатите угостители. Нареди околу 100 квадратни метри маси со кои навлегува во локацијата на „Цома“, како и на скалите од кејот. Масите и столовите го попречуваат пристапот на граѓаните, но и на возилата за дотур на стока. Во Центарот има 40 дуќани на кои им е попречено работењето. Затоа пред две години, заедно со сопствениците на дуќаните, поднесовме петиција и барање до градоначалникот, до МВР и до Министерството за локална самоуправа да го решат проблемот и дивопоставените маси да бидат отстранети. До сега немаме одговор - вели Цома.Според него, пред да се случи инцидентот Леку му се заканувал нему и на неговото семејството. Барал од него да го тргне градежниот материјал оставен пред Центарот, наменет за реновирање. Вели дека е среќа што никој не бил повреден, иако куршумот завршил во патиката на неговиот син.

- Знам само дека полицијата му поднела кривична пријава за предизвикување општа опасност. Сепак, страв ми е дека ќе се забошоти случајот. Намерата на Леку е да ме избрка одовде, ама јас пред десет години се вратив од Америка за да останам тука. Инвестирав чесно и нема никој да ме избрка. Ако тој се преселил од Велешта во Струга за да води бизнис, нека работи, ама нека не ги плаши сите - вели Цома.По разговорот со Цома, го побаравме и Леку, но тој не беше во градот. Не' пречека неговиот син Ербен, кој ги негираше обвинувањата.

Државата и Општината во спор

- Татко ми реагираше со право бидејќи градежниот материјал од ТЦ „Цома“ беше поставен пред влезот на хотелот. Ако сака некој да влезе во хотелот, ќе мора да скока преку него. Не држат ниту обвинувањата за масите, бидејќи ние имаме поставено маси и столови на кејот пред хотелот и на дел од скалите. За нив уредно си ја плаќаме киријата во Општината. Тие што се пред „Цома“ не се наши - вели Ербен.Тој смета дека на дел од стружани им пречи што неговиот татко работи во градот поради што прават проблем и таму кај што ги нема. Јас сум сопственик и на шанкот и на тобоганот на дел од плажата. Имам договор за купопродажба со двајца стружани, кои беа претходни сопственици на објектите на тој дел од плажата - вели Ербен. Според неговиот адвокат, Гоце Ибушевски, Ербен за плажата ги има сите документи.

- Мојот клиент беше тужен од државата, но откако видоа дека ја имаме целокупната документација, се повлекоа. Земјиштето од 700 квадратни метри сопственост на државата е доделено со корисничко право на Ербен до 2010 година. Тој дел од струшката плажа беше ѓубриште. Многу пари се инвестирани во плажата и поради тоа аплициравме за добивање на предвидените концесии за плажите, со што би го добиле на долгорочно користење - вели Ибушевски. Одговор за состојбата побаравме и во Општината. Оттаму велат дека Советот не работи и поради тоа се во мат-позиција.

- По изборот на претседател ќе има седница на која на дневен ред ќе биде програмата со која ќе се утврдуваат локациите на привремените објекти. До тогаш ќе биде статус кво. Проблемот со дивите шанкови на плажите постои и покрај забраната за секакви градежни зафати додека не се реши судскиот спор меѓу државата и локалната власт за надлежноста на градските плажи. Иако немаме овластување да раководиме со плажите, можеме да правиме инспекција. Сите плажи од детското одморалиште „25 мај“ до хотелот „Евротел“ подлежат на инспекција. Ќе се проверуваат и плажите што имаат дозвола од транспорт и врски и ќе се отстранат сите привремени објекти поставени на нелегален и незаконски начин - вели Зоран Гулицовски, секретар во Општината.

Даниела Вељановска, Игор Шегавиќ
Фото Маја Златевска

Наместо казни, олеснителни околности за кафеанџиите

Ќе се менува правилникот, но без корекции за суштинско решавање на проблемот

Деспина Трајковска

Локалните власти најавуваат измени во постапките за користење на летните тераси и трансфер на некои од надлежностите помеѓу Градот и општините, но очигледно тоа нема да резултира со подобрување на состојбите на терен. Градоначалниците на неодамна одржаната координативна средба утврдиле недостатоци во законите кои го регулираат прашањето за летните тераси и договориле заеднички да се заложат за решавање на досегашните проблеми. Сепак, во утврдените потребни измени нема да се извршат суштински корекции за да се стави крај на хаосот со поставувањето на урбаната опрема на јавните површини. Засега, нема да се менува Правилникот кој го регулира поставувањето на инвентарот, туку единствено корекции ќе се направат во постапката низ која треба да помине секој кафеанџија.

„На Координативното тело беше утврдено дека Правилникот засега нема да се менува, но беше постигната согласност општините да ги префрлат надлежностите во оваа област на Градот, со цел да има подобра контрола и управување на целиот процес во насока на воведување ред во поставувањето на летните тераси низ градот“, велат од Градот.

Оттаму појаснуваат дека со трансферот на надлежностите, административната постапка за добивање согласност за користење летна тераса, кафеанџиите сега ќе ја завршуваат во Градот без да минува и во општинските служби. Поделбата на надоместокот за користење на јавните површини, како и досега, ќе биде помеѓу Градот и општините, додека инспекцискиот надзор и понатаму останува единствена обврска за општинските служби.

Токму тој сегмент, се чини, е клучниот за трајно решавање на проблемот. Иако од општините тврдат дека повремените акции за надгледување на состојбите на терен даваат резултати, директните извршители признаваат дека кафеанџиите ја демонстрираат недисциплината во вечерните часови и за време на викендите, кога инспекцијата не работи. Често, како што досега неколкупати изјавуваа инспекторите, кафеанџиите го распостилаат инвентарот на недозволени површини и по само неколку минути по спроведување на акцијата. Дел од градоначалниците се согласуваат дека големи парични казни и затворање на локалите, чии сопственици не ги почитуваат правилниците, се единственото решение за проблемот. Сепак, досега никој од надлежните не повел иницијатива за воведување ригорозни мерки во соодветните регулативи.

Од Градот негираат дека на Координативното тело станало збор за вклучување во целата проблематика на Пазарната инспекција, која по налог на Градот би добила задача да затвори локал, чиј сопственик и покрај неколкуте итервенции за отстранување на непрописно поставен инвентар, би продолжил со узурпирање на просторот.

Кафулиња узурпираат приватно земјиште

Додека локалите „Грин хаус“, „Филипис“ и „Попе“ без одобрение го користат приватниот двор на зграда во Дебар Маало, надлежните со молчење овозможуваат грубо кршење на нашите уставни права, обвинуваат станаритe

Без одобрение и на наше земјиште пред нашата зграда кафе-барови си поставуваат летни тераси и узурпираат приватна сопственост, обвинуваат станарите од зградата број 2 на улицата Благој Давков во Дебар Маало. За сопственоста на парцелата пред и околу зградата станарите имаат и имотни листови.

- Во заедничка сопственост имаме земјиште со површина од вкупно 2.337 квадратни метри, од кои 1.132 квадрати се околу зградата, а останатите се под зградата. Над 100 лица сме заеднички сопственици. На дел од нашето земјиште, на околу 600 квадрати, кои всушност се двор околу зградата, два локала и една сендвичарница си поставија летни тераси со чадори и огради со жардинијерии, без одобрение од градските власти - велат станарите.

Станува збор за кафе-баровите „Грин хаус“ и „Филипис“ и за сендвичарницата „Попе“.

Станарите велат дека градските власти во јули им одговориле дека локалите немаат одобрение за летни тераси. Во тој реон одобрение има само кафе-барот „Кино Карпош-Бастион“, издадено на 5 август, но станарите се жалат дека и овој локал ја распослал терасата повеќе од дозволеното. Тие велат дека мора да дадат согласност на нотар за поставување тераси пред нивната зграда, а тоа досега не го сториле.

- Одземено ни е правото на сопственост, кое ни е загарантирано со Уставот. Досега никој од надлежните не ни помогна, иако сме реагирале повеќе пати. Ние не можеме да им забраниме објектите да бидат кафе-барови, но бараме надлежните да реагираат и да се почитуваат законите. Се обративме до градежниот инспекторат во Општина Центар, но досега немаме писмен одговор, само усно ни образложија дека тие не биле надлежни за отстранување на монтажни натстрешници, односно тенди, туку само за уривање натстрешници кои се фиксирани за под или за ѕид, како и за времени објекти - револтирани се станарите.

Тие пријавиле и во Пазарната инспекција, но оттаму ги одбиле со образложение дека била во тек постапка за добивање одобренија за тераси за сите локали во Скопје, а тие ќе реагирале кога постапката ќе заврши.

Од Градот велат дека освен на „Бастион“ не му издале одобрение на ниту еден друг стопански субјект во зградата на „Благој Давков“ 2.

- За опремата на локалите „Грин хаус“, „Филипи“ и „Попе“, станарите треба да се обратат до надлежните инспекции во Општина Центар, за да извршат контрола на документацијата - велат градските власти.

Од Општината Центар се правдаат дека комуналните инспектори немаат овластување да дејствуваат, бидејќи терасите на локалите не се наоѓале на јавни површини, туку на заедничка сопственост. Додаваат дека комуналните инспектори на 4 септември му издале опомена на „Бастион“ поради непридржување кон дозволата за користење јавни пешачки површини.

Управителот на кафе-барот „Филипи“, Горан Зечевиќ, вели дека просторот пред локалот е во приватна сопственост и дека му е издаден под закуп.

- Јас имам документи од Катастар и имотен лист од кој се гледа дека просторот пред локалот е приватна сопственост и дека ми е издаден под закуп. Имам елаборат од кој, исто така, се гледа дека имам оставено простор со ширина од 3,5 метри за да може да минуваат станарите. Тие се бунат за простор што е во заедничка сопственост, како што е атриумот, ходниците и местото за поминување. Ова се луѓе што не се реализирани и прават проблем онаму каде што го нема - изјави Зечевиќ.

Тој додаде дека локалот нема тенди, туку само чадори, но призна дека се' уште нема добиено одобрение за поставување маси и столови.

- Уредно поднесовме барање со потребните документи уште во јуни, но од определени причини постојано ни беа барани нови документи. Не е наша вина што постапката се одолжува - вели Зечевиќ.

Станарите се незадоволни од однесувањето на надлежните институции, бидејќи не покажале интерес да го решат овој проблем. Велат дека нема да застанат со постапката и дека ќе поднесат преставка до народниот правобранител, а ќе реагираат и до Уставниот суд. (А.П.)

Град Скопје, со асистенција на полицијата, вчера организира акција за подигање урбанистичка опрема од три кафулиња кои се наоѓаат на улицата Владимир Комаров во општината Аеродром, во близина на слаткарницата „Палма“. При редовна контрола од страна на инспекциските служби на Градот, биле забележани низа неправилности во работењето на трите кафулиња и недозволено поставување урбанистичка опрема на јавна површина. - Град Скопје од нас побара асистенција за подигање урбанистичка опрема, која незаконски била поставена на јавна површина во општина Аеродром. Полицијата веднаш излезе на терен, а одземањето на опремата траеше околу еден час и акцијата помина без какви било проблеми и“вели Лиза Бендевска, портпаролка на СВР Скопје. Од Град Скопје најавуваат дека и во иднина инспекциските служби ќе прават обиколки по кафулињата.

Е.М.

Сезоната за летните тераси завршува утре

Чистка на најлон-маалото до Нова година

Долгогодишната најлон-узурпација станува легална

Од градската управа велат дека само четири кафулиња до сега побарале дозвола за поставување зимски тераси, можност што се отвора со измените во Законот за градење и со која илјадници квадратни метри јавна површина најверојатно засекогаш ќе им бидеодземена на пешаците

Летни тераси работат и во зима

Кафеанџиите повеќе нема да можат да изнесуваат цели гарнитури и фотелји пред кафулињата затоа што се дозволени само лесноподвижни маси, столови, жардиниери, ограда, чадори, стреи или тенди. Сите овие елементи треба да бидат усогласени по боја и облик и да сочинуваат една естетска целина. Страните на тендата не смеат да се затвораат со најлон или каков било друг материјал заради изградба на зимска градина на јавна површина. Ова е дел од прописите во новите одлуки што ги донесе Советот на Град Скопје, во согласност со Законот за градење. Со градските одлуки се забранува да се поставуваат платформи или рампи пред кафулињата, освен ако служат за нивелирање на подлогата на теренот. Кога столовите и масите се на тротоар, мора да постои 1,5 метар простор за пешаци, а во централното градско подрачје, односно Малиот ринг, 2,5 метра. Ако сопственикот сака да постави опрема на површината која е во границите на заштитено подрачје или објект со посебен режим на користење, тој мора да има мислење од Државната управа за заштита на културно-историското наследство или од друга надлежна институција. Конечно, се разрешува и прашањето кој ја издава дозволата за поставување на урбанистичката опрема, а не како досега одобрението да се зема од две страни, и од Градот и од Општината. Со одлуката, сопственикот ќе вади дозвола од Градот ако локалот се наоѓа на површина под градска надлежност или од Општината ако се наоѓа на нејзино земјиште. Сепак, општинската дозвола ќе подлежи на претходна согласност од Градот. Доколку општината не сака да се ангажира за издавање дозволи, може да потпише договор со Градот и нему да му ја препушти обврската. Но, во тој случај ќе треба и парите од комуналната такса да ги дели по половина со градските власти. Одобрението за поставување опрема трае 24 часа ако се зема за еднодневни манифестации и презентации, еден месец доколку е наменето за подолготрајни настани и за изложби, сезонско од три до седум месеци, ако е за трговија на мало, и годишно, ако е за угостителство, трговија, градилиште и друга намена. За да го извадат документот, граѓаните треба да достават заверен елаборат со детални цртежи за тоа како планираат да ја постават опремата, колкава површина за пешаци и за пристап на итни возила ќе остават и да приложат доказ за платена комунална такса. Пресметката за таксата ја прави надлежниот Сектор за планирање и уредување на просторот. Ако сопственикот пред локалот изнесе опрема на поголема површина од таа во елаборатот или пак не постапува според мерките од инспекцијата, службите ќе му ја одземат дозволата и нема да му издадат нова во рок од шест месеци. Граѓаните ќе треба да го усогласат своето работење со одлуката во рок од еден месец, а ако не го направат тоа, опремата ќе им биде тргната на нивни трошок. Од Одделението за односи со јавност на Градот не одговорија со колку инспектори ќе ги спроведуваат одлуките, со оглед на тоа што во последниот извештај за работата на инспекцијата, овој сектор се жалеше за недоволна екипираност.

Прописи за се и сешто

Одлуката пропишува и како да се прават привремени паркиралишта и пешачки патеки на неизградено земјиште, како треба да се постават платформи за различни манифестации, сплавови за јавни настани на вода, информативни табли, летни дискотеки, дури и колкава површина смеат да зафатат тие што продаваат билети, весници, сувенири и цвеќе на отворено. Таа ги опфаќа и автобуските постојки, телефонските говорници, куќарките за чувари, јавните тоалети, тезгите, опремата за детски игралишта, фонтаните, чешмите, клупите, кантите и паркиралиштата за велосипеди.

Во Дебар Маало метеж на големо

Невиден сообраќаен метеж се случува во Дебар Маало откако стана популарно место за излегување. Поради новата мода летните тераси да се распослуваат до самите рабници на тротоарите, пешаците ги изгубија и последните педи слободен простор за безбедно движење. Сега сите, и млади и стари, се принудени постојано да се движат на улица, каде што фреквенцијата на возила е зголемена поради проширувањето на Илинденска и поради летната шема во Дебар Маало. Таква е ситуацијата на улиците Орце Николов, 29 Ноември, Ленинова и на другите помали улици.

- Дебар Маало е јазол, без тротоари, секое слободно парче од улиците е прекриено со кафеани или со разна стока на маалските продавничиња, играчки, велосипеди. Ризик е да си пешак во Дебар Маало. Нема каде да одиме, а најстрашно е што некои улици и воопшто немаат тротоари. Кој и како ќе го среди овој метеж, не знам - вели дебармаалецот Владо Матевски.

Откако годинава градските власти ја презедоа надлежноста да ги издаваат дозволите за летните тераси, се очекуваше да се воведе каков-таков ред. Иако контролата требаше да ја вршат и градските и општинските инспекциски служби, од Центар досега исконтролирале малку. Инспекторите се правдаат дека тие не се виновни за ништо, оти ги немале на увид елаборатите за изгледот на кафеаните, кои останале во Градот.

- Градските власти не ни ги доставија елаборатите од кафеанџиите. Досега немавме увид кој и каква дозвола има да поставува летна тераса. Не е вистина дека во Дебар Маало нема тротоари - велат инспекторите во Центар.

Од друга страна, од Градот Скопје порачуваат дека онаму каде што е очигледно дека терасата е поставена спротивно на правилата, нема потреба од елаборатот за да се напише казна. Оттаму велат дека вината е во Општина Центар, оти таа требало да си ги побара елаборатите и дека вработените таму имаат увид во нив оти претходно ги потпишуваат.

- Не е точно дека градската администрација доцни, туку општинската треба да си ги знае надлежностите. Според прописите, за поставување летна тераса задолжително мора да има место за минување на пешаците, а ако тоа некаде не е запазено, не мора инспекциските служби да го гледаат елаборатот, се подразбира дека е нелегално поставена - велат во одделението за односи со јавноста во Градот.

Тоа е се' што може да се добие како објаснување од локалните власти за хаосната ситуација. Во Општина Центар никој не сака да зборува повеќе на оваа тема, ниту објаснува според кои стандарди граѓаните седат на половина метар од автомобилите во движење и пијат кафе зачинето со миризбата од нивните издувни гасови. Освен изјавите дека се запознаени со состојбата и дека во минатата недела вршеле некои мерења, од кабинетот на градоначалникот Владимир Тодоровиќ не објаснуваат како ќе создадат услови за побезбедно движење на граѓаните.

- Секое отстапување од одбележаното, инспекцијата на Општина Центар ќе го казнува според законските прописи - велат оттаму.

http://dnevnik.com.mk/?ItemID=E9434279F69F164B80728A66B68EBC61

Летните тераси прераснаа во куќи

Од Градот убедуваа дека на терасите во зимскиот период нема да дозволат ништо освен маси и столови

Еден месец по одлуката на Градот да им дозволи на кафеанџиите да користат летни тераси и зиме, на терен е хаос. Не поради тоа што немаат одобренија, напротив, сите спорни кафулиња имаат одобренија. Хаосот е во немањето одговори од градската власт зошто за едни кафулиња важат одредбите од Правилникот за користење урбана опрема, а за други не.

- Улица Македонија и Кејот се до толку изградени, и на нив владее невиден башибозук и беззаконие, да ми е срам да кажам дека живеам во центар. Имаме ли ние воопшто градоначалници? - вели Соња К., која живее во непосредна близина на плоштадот.

Како што е познато, пред одредено време од Градот дозволија кафеанџиите да користат летни тераси и зиме, но исклучиво само маси и столови и гасна боца за греење за тие што ќе сакаат да запалат цигара надвор. Градоначалникот Коце Трајановски две години ја убедува јавноста во неговата решеност да ги казнува тие што ќе се дрзнат да отстапат од пишаните правила, но на терен со терасите се случува нешто сосема друго - претворени се во цврсти градби со покриви и оградени се со железарија и материјали за да не им дува и студи на гостите. Зголемена е комоцијата, им се делат и ќебиња на гостите за да ги покријат колената, и тоа е еден вид нова мода по скопските кафулиња.

Од Градот не дадоа договори кој на кафеанџиите им издава одобренија и им потпишува елаборати под превезот на урбана опрема, која всушност потоа прераснува во цврсти градби. Се оградуваат и од интервенции на терен ако некој го прекршил Правилникот, кој го усвои Советот на Скопје. Од Општина Центар тврдат дека општинските и градските инспектори треба да ја контролираат заедно оваа состојба, но од Градот имаат сосема друга изјава.

- Според Законот за градба, урбаната опрема, надзор, контрола или отстранување на истата се надлежност на градежните инспекции на општините. Градскиот инспекторат преку комуналните инспектори редовно врши увид на терен на локации што се под надлежност на Градот и потоа писмено со официјален допис ги известува надлежните општини -изјавија од градското одделение за односи со јавноста.

Највпечатлива слика за хаосот со летните тераси во Скопје, може да се види ако се прошета низ Дебар Маало, на плоштадот, на кеј 13 Ноември... Пример е кафулето „Тренд“. Овој објект со години е предмет на медиумска опсервација, околу дозволата за летна тераса. Градските власти не кажаа каков елаборат им е потпишан од градоначалникот Коце Трајановски, за нивната летна тераса сега да личи на куќа со покрив, да е оградена со материјал - плексиглас.

- Градската инспекција и во случајот со кафулето „Тренд“ писмено ја информира градежната инспекција на општината Центар за состојбата на терен - кратко рекоа од Градот, без да кажат за што точно ја информирале општинската инспекција.

Јовица Ацкоски, портпарол на Центар, рече дека немаат никаков допис од градската власт за вакво нешто. Тој изјави дека пред неколку дена имале акција на улица Македонија и на плоштадот и дека биле отстранети и казнети тие што отстапувале од елаборатите. Но, „Тренд“ не бил меѓу казнетите, што за него е знак дека имал соодветна документација издадена од Градот.

Јорданка Ивановска