„Комунална хигиена“ ќе купи 12 возила

Возилата во вредност од околу 1 милион евра ќе бидат земени на лизинг

Јавното претпријатие „Комунална хигиена“ до крајот на годинава ќе се поднови со 12 нови возила. Проширувањето на возниот парк веќе е договорено на Управен одбор, а претпријатието за дваесетина дена ќе распише тендер за набавка на возилата. Во план е да се купат шест камиони за подигање на контејнерите, три моторни метлачки, како и по еден булдожер, компактор и цистерна за потребите на депонијата „Дрисла“. Од претпријатието процениле дека за подновување на возниот парк ќе треба да се потрошат околу еден милион евра. Според Златко Димовски, директор на „Комунална хигиена“, со новите возила значително ќе се подобрат условите за работа, при што автоматски се очекува за 60 отсто зголемување на бројот на подигнатите контејнери.

„И со постојниот возен парк, кој во изминатите две години релативно е освежен благодарение на честите репарирања на возилата, успевавме редовно да ги завршуваме обврските. Но, сега со новите возила ќе бидеме сигурни дека и при интервентни дополнителни ситуации надвор од тековните обврски, програмата за работа ќе биде изреализирана“, вели Димовски и посочува дека со проширувањето на возниот парк ЈП ќе ги исполни стандардите за услови за работа на терен.

Оттаму пресметале дека исплаќањето на возилата нема да претставува товар за буџетот со оглед на тоа дека „Комунална хигиена“ се раздолжила со сите кредити и заостанати сметки за некои искористени услуги. Надлежните пресметале дека месечната рата за исплата на новите возила ќе изнесува околу еден милион денари. „Одлуката за намалување на ДДВ од 18 на 5 отсто, пак, дополнително ни излезе во пресрет, бидејќи сега ќе има значително помалку обврски за тековно исплаќање кон УЈП“, дополни Димовски. (Дс.Т.)

Италијанци ќе прават струја од ѓубрето во Дрисла

Италијанскафирма е заинтересирана за производство на електрична енергија од сметот од депонијата Дрисла, велат во „Комунална хигиена“.Според Златко Димовски, директор на јавното градско претпријатие, како енергенс за создавање електрична енергија ќе се користи метанот што се создава при скапување на ѓубрето. Италијанците треба да изработат студија за економска оправданост и исплатливост на проектот.Проектот ќе се оствари преку јавно-приватно партнерство. Потпишан е меморандум на ниво на држави за таква соработка. Објавен е тендер во Торино, на кој е избрана фирмата која сака да ја користи Дрисла за производство на електрична енергија - вели Димовски.„Комунална хигиена“ ќе се согласи да се даде депонијата под концесија ако се задоволат еколошките стандарди за заштита на околината

- Жителите од околината на Дрисла треба да добијат бесплатна струја. На фирмата да и' се даде „зелена“ цена на електрична енергија, односно да биде поевтина и покрај високите трошоци за производство. Потребно е државата да го стимулира ова производство за да биде конкурентно на пазарот со електрична енергија - вели Димовски.До крајот на годината ќе се направат промени во работењето на Дрисла за да се задоволат најстрогите еколошки стандарди за депонија. Распишан е тендер за санација на Дрисла, со хоризонтални цевки за исцедокот на ѓубрето, но и вертикалните цевки низ кои ќе се спроведува гасот.Во Дрисла дневно се носат 450 тони комунален смет, а просторот за депонирање смет е со површина од 30 хектари.Во „Комунална хигиена“ најавуваат проект за селектирање на пластичната амбалажа од сметот. Се предвидува дека ќе се собираат по четири тони пластика дневно. Имаме 12 вработени што го селектираат отпадот. Пластичната амбалажа ќе се складира во боксови под натстрешница, а потоа ќе се балира - вели Димовски.

(А.П.)

Италијанци заинтересирани да произведуваат струја од гасот во „Дрисла“

„Комунална хигиена“ од потенцијалниот партнер ќе побара да инвестира во депонијата

„Комунална хигиена“ ќе соработува со италијанска фирма која е заинтересирана да произведува електрична енергија од гасот на депонијата „Дрисла“. Во моментов во јавното претпријатие очекуваат во Италија да биде избрана фирма која ќе изработи физибилити студија за оправданоста на инвестицијата во „Дрисла“, по што може да се очекува создавање на приватно-јавно партнерство. „Комунална“ од потенцијалниот партнер ќе побара да инвестира во депонијата во контролирање на исцедокот од сметот, во премостување на изворот на чиста вода која сега се меша со отпадот и во најважниот дел, искористување на гасот што се создава од распаѓањето на комуналниот отпад.

Како што информира директорот на „Комунална хигиена“, Златко Димовски, во „Дрисла“ може да се произведува електрична енергија која ќе ги задоволува потребите на околните населени места и која би требало да има посебна, пониска, т.н. „зелена“ цена. Заради еколошкиот ефект кој ќе се добие со искористувањето на гасот од „Дрисла“, но и со регулирањето на исцедокот, приватниот партнер треба да добие и стимулации од државата и од Градот.

„По пропаѓањето на преговорите со јапонската фирма ’Шимицу’, веднаш започнавме разговори со друга фирма од Италија, која е заинтересирана за истиот проект. Потпишан е и меморандум за соработка и очекуваме, кога ќе им заврши тендерот да дојдат и да им ги кажеме нашите услови. Мислам дека ова е доста профитабилен бизнис во други држави, а ќе има и позитивен бенефит и за ’Дрисла’ која ќе добие модерен лик“, вели директорот Димовски. (С.Н.)

Целта на воведувањето информатички технологии не е да го подобриме имиџот на претпријатието,туку граѓа ните да бидат задоволни, вели Златко Димовски, директор на претпријатието

Граѓаните од идната година ќе може преку компјутер да проверат дали им се платени сметките за подигање смет или колку квадратни метри станбена и дворна површина им се евидентирани за плаќање ѓубретарина, велат во Јавното претпријатие „Комуниална хигиена“. Корисниците на услугите на „Комунална хигиена“ ќе може по интернет да поднесат барање ако сакаат да им се премерат станбената и дворната површина. Претпријатието ќе воведе ГПС - глобален позиционирачки систем, преку кој сателитски ќе се следи движењето на камионите за подигање смет. На тој начин ќе можеме во секој момент да следиме каде и како нашите камиони го собираат сметот. Конкретно, ние ќе имаме запис во ГПС ако некој граѓанин се јави дека во неговата населба не се испразнети контејнерите. Преку ГПС ќе имаме преглед на контејнерите во сите населби и постојано ќе ја имаме на увид состојбата со собирањето на сметот- вели Димовски.Во комуналното претпријатие очекуваат дека на овој начин ќе обезбедат подигањето на сметот од сите контејнери да биде исполнето 98 отсто. Со тоа, ќе има заштеда во трошоците за претпријатието, ќе им се обезбедат постојани и квалитетни услуги за граѓаните.Ова се овозможува со проектот за комплетно автоматизирано работење на јавното претпријатие. Воведувањето на информатичката технологија се наметна по воведувањето на ИСО-стандардот за работа - вели Златко Димовски, директор на „Комунална хигиена“.Според него, само со комплетно воведување на ИСО-стандардот кој бара многу новини во начинот на работата и функционирањето на претпријатието ќе може да се оствари визијата „чисто Скопје- задоволни граѓани“.Во завршна фаза е спроведувањето на втората група за полагање испит за интерни контролори, кои ќе ги контролираат процедурите на работење во претпријатието. Испитот го спроведуваат надворешни експерти. Податоците и постапките за работа ќе бидат транспарентни и истите ќе бидат документирани за да може да се усовршуваат.

ИСО-стандардот налага да се воведе кодексот на однесување на вработените во претпријатието.Воведување на ИСО-стандардот обезбедува континуирано квалитетни услуги за граѓаните. Тој е вистинско решение што ќе не' доведе во позиција да ја преземеме одговорноста ако не сме одговориле како што треба на обврските. Целта на воведувањето на ИСО-стандардот не е да го подобриме имиџот на претпријатието, туку граѓаните да бидат задоволни - вели Димовски.

Комунална ќе набави 12 нови камиони за смет

Градските власти ќе купат 500 нови контејнери за собирање на ѓубрето од домаќинствата. Парите за набавка на контејнерите ќе бидат обезбедени од буџетот на Градот доколку советниците во Градското собрание ја одобрат набавката на седницата в среда.
"Поради тоа што во последниве години беа изградени голем број нови станбено-деловни објекти, се зголеми бројот на жителите, а постојните камиони се наоѓаат во лоша состојба, итно е потребна набавка на нови контејнери", се вели во образложението на градските власти за потребата од набавка на нови контејнери.
За набавка на 500-те контејнери, ќе бидат потребни четири милиони денари. (А.А.)

http://www.vest.com.mk/default.asp?id=157864&idg=8&idb=2491&rubrika=Skopje

Ич не ми текнува каде го праевме муабетот за контињерите!

Преку ГПС ќе се следи и динамиката на подигање на ѓубрето и работата на комуналците

Ѓубреџиите кои со камиони го подигаат ѓубрето, повеќе нема да можат да ескивираат. Нивната работа, веќе десетина дена се следи сателитски, преку специјално инсталирани ГПС - уреди кои покажуват на која локација се наоѓаат, каде поминале и во кој правец се движат. На промоцијата на проектот, генералниот директор на ЈП "Комунална хигиена" Златко Димовски истакна дека оваа новина е една од системските реформи во работата на претпријатието со која очекуваат значително да се подобри ефикасноста на работата на оперативците, да се заштеди до 30 отсто гориво и на крајот да се воспостави комунален ред.
- Преку глобалното позиционирање и ние, но и граѓаните ќе имаме можност во секое време на компјутер да провериме дали камионот дошол на одредена локација да го подигне сметот, кога поминал, во колку часот, дали негативните реакции се резултат на наша слабост или не. И тука веќе нема лажење или дипломатски одговори - вели Димовски.

Во моментов во системот се вклучени 25 камиони, во тек е поврзувањето на уште 20, а до крајот на годинава целиот возен парк ќе биде под ГПС надзор.

Новото софтверско решение ќе ја чини Комунална хигиена 524.000 денари или околу 8500 евра годишно за 50 камиони. Вложените средства, вели Димовски, многу брзо ќе се исплатат.
Ѓубреџиите не се израдуваа на оваа новина. Визуелното следење на нивната работа ја сметаат за психолошки притисок од страна на претпоставените.
- Ајде работи, де, ако знаеш дека некој постојано те гледа. Јас никогаш не сум го злоупотребил ни камионот, ниту сум трошел повеќе бензин, не сум забушавал. Ама кому да се пожалиш, одма ќе ти речат: ако ти чини, ако не има кој сака да работи - вели еден возач во Комуналец.

Скопјани ќе го плаќаат миењето на улиците

Градоначалникот и Советот на Градот бараат одлагање на овој дополнителен товар за граѓаните додека не зајакнат економски

Давачката за миење и метење улици нема да биде скромна, велат од Градот

Нова давачка, за миење и за метење на улиците, ќе мора да плаќаат скопјани по донесувањето на новиот Закон за јавната чистота. Досега одр жувањето на улиците беше обврска на градската власт и се плаќаше со пари од градската каса. Сметките за ѓубрарина и натаму остануваат.Градоначалникот Трифун Костовски и вработени во градската администрација не' информираа завчера дека оваа нова давачка за одржување на јавните површини ќе претставува приход кој ќе се влева го градскиот буџет.

- Таа давачка, сигурен сум, дека нема да биде скромна, бидејќи трошоците за оваа намена се многу големи - изјави Бранко Трајчевски од Градскиот правен сектор. Градоначалникот Костовски не изрази воодушевување од новопредвидениот надомест. Тој апелираше до Советот на Град Скопје да ја одложи примената.

- Исто како и во светот, и нашето општество ќе го погоди економската криза. Мислам дека новата давачка ќе биде вистински удар за домашниот буџет на граѓаните. Апелирам воведувањето да се одложи се' додека не зајакне економската моќ на граѓаните - рече Костовски.

И претседателот на Советот, Ирена Мишева, како и голем број членови на Советот, се согласија со скопскиот градоначалник дека сметките за одржување улици ќе бидат големо оптоварување за буџетите на граѓаните.

- Треба да си ставиме прст на чело и убаво да се замислиме - изјави советникот Тони Ѓуровски. Костовски и членовите на Советот на завчерашната средба донесоа заклучок да побараат од Министерството за транспорт и врски да се формира стручна екипа, која би го разгледала социјалниот аспект на Законот за јавната чистота, кој се однесува на оваа проблематика. Исто така, ќе побараат од стручната екипа да ја одреди и единицата мерка по која би се одредувала цената што би ја плаќало секое домаќинство. Советот наскоро ќе излезе со меморандум како заклучок по ова прашање.

http://dnevnik.com.mk/?ItemID=51756980C7FB33409124FD89358D6ACE

Почитувани,

Министерството за транспорт и врски ги демантира коментарите на градоначелникот на Град Скопје и дел од советниците во Советот на град Скопје дека „со Законот за јавна чистота се воведува нов надоместок кој ќе претставува дополнителен трошoк за граѓаните“, притоа Ве информираме дека целта на носењето на овој Закон воопшто не е дополнително оптоварување на буџетот на граѓаните и со него не се предвидува плаќање

на нов надоместок за јавна чистота, туку напротив, со Законот за јавна чистота се предвидува порационално искористување на средствата кои граѓаните и до сега ги плаќаа на сметките за комунални услуги. Имено, според Одлуката на Советот на Град Скопје од 1993 година е предвидено 22% од приходите кои се остваруваат со наплата на сметките за

користење на водоснабдувањето да се одвојуваат за одржување, подигнување и чистење на јавните зелени површини, а по покачувањето на цената во февруари 2008 година, во месец април годинава е потпишан Протокол помеѓу ЈП „Водовод и канализација“, ЈП „Паркови и зеленило“ и Град Скопје за регулирање на одвојување 17,5% од приходите кои се остваруваат преку наплата на сметките за користење на водоснабдувањето и канализацијата. Овој Протокол е усвоен од страна на Управниот одбор на ЈП „Водовод и канализација“ во месец мај 2008 година. Истовремено, ЈП „Комунална хигиена“ уште од 1993 година за чистењето на јавните површини и подигнувањето на смет врши посебна наплата за услугите кои ги извршува, согласно со Ценовникот усвоен од Советот на Град Скопје.

Ве информираме дека Законот за јавна чистота е донесен со цел да се регулира хаосот кој владееше во сферата на комуналните работи и јавната хигиена и во него се содржани решенија преку кои јасно се поделени надлежностите меѓу институциите и субјектите кои се задолжени за одржувањето на јавната чистота како на јавните површини, отворените површини на јавните објекти, така и меѓу субјектите кои ќе вршат контрола во поглед на спроведувањето на одредбите од Законот.

Министерството за транспорт и врски во процесот на изготвување на Законот за јавна чистота беше водено од позитивните искуства на високо развиените земји кои применуваат ваква законска регулатива, а во тој процес беа консултирани и претставници на локалната самоуправа. Процесот на имплементација на Законот за јавна чистота исто така подразбира соработка со општините и токму затоа Министерството за транспорт и врски упатува покана до градоначалникот на Град Скопје, г-дин Трифун Костовски, како и до претставниците на Советот на Град Скопје за соработка во процесот на имплементирање на Законот и остварување на единствената цел на овој Закон – подобрување на

јавната чистота во Република Македонија.

Со почит,

Министерство за транспорт и врски

Здравствените установи несоодветно постапуваат со медицинскиот отпад

Речиси половина од регистрираните ординации не ја користат услугата на „Комунална“ за горење на отпадот

Речиси половина од приватните здравствени установи не ја користат услугата на ЈП „Комунална хигиена“ за соодветно третирање на медицинскиот отпад. Според податоците на претпријатието, од 547 ординации дури 260 воопшто не побарале интервенција, што практично значи дека искористениот санитетски материјал го исфрлаат несоодветно, и тоа најчесто во обичните контејнери. Состојбата е речиси алармантна имајќи предвид дека несоодветното постапување со искористениот санитетски материјал може да предизвика разни епидемии, загадувања на животната средина.

Дека медицинскиот отпад не се третира правилно, доказ се и последните испитувања што ги направила „Комунална“ за да го утврди составот на собраниот смет. Притоа, биле регистрирани искористени шприцеви, стари лекови, завои, фластери...

„Од регистрираните приватни здравствени установи, 30 воопшто не постојат. Планираме да извршиме целосна анализа на теренот и за актуелната состојба да им укажеме на државните инспекциски органи како би ги санкционирале несовесните сопственици на ординациите“, велат од комуналното претпријатие.

Постојат ординации кои пред повеќе години имаат склучено договор со „Комунална“, но досега само неколку пати побарале санитетскиот искористен материјал да им биде подигнат и соодветно третиран. „Договорите им служат единствено само за да бидат ’чисти‘ пред инспекторите“, додаваат комуналците.

Инаку, „Комунална“ е единствен субјект кој нуди можност за легално третирање на отпадот. Само за 385 денари претпријатието организирано го собира, а во таа цена е вклучена и безбедносната кутија што им се дава на ординациите во која може да се складира отпад до пет килограми, кој потоа се гори во инсцелераторот на „Дрисла“. (Дс.Т.)

Депонијата Дрисла под видеонадзор

Седум покриени камери се поставени во депонијата Дрисла. Со нив се набљудуваат вработените, но и камионите што влегуваат со стока со изминат рок.

- Имало случаи кога камионот влегува полн за да ја поништи стоката што ја носи, но и излегува полн, со цел да препродава, образложи Златко Димовски, директор на Јавното претпријатие „Комунална хигиена“, во чија надлежност е депонијата.Во Дрисла доаѓаат во просек 83 камиони дневно, од кои 68 се на „Комунална хигиена“, а дневно се носи вкупно 495 тони смет.

„Комунална“ напролет ќе се поднови со шест камиони

Реализацијата е неизвесна поради страв од загадување на животната средина

ШТИП - Англиската групација „Вирвољ“ е подготвена да инвестира 30 милиони евра во изградба на најсовремена регионална депонија во источниот дел на земјава. Во оваа современа фабрика отпадоците би се претворале во топлинска енергија која може да се користи за греење станови. Сепак, реализацијата е неизвесна поради страв од загадување на животната средина. Ниту една општина од Брегалничкиот регион не сака депонија на свое подрачје, па затоа и не е избрана локација.

Идејата за проектот „Регионална депонија“ кај локалните власти на Штип, пред новогодишните празници ја образложи директорот на англиската групација, Крис Прат. Тој појасни дека ја имале предвид студијата која за регионалната депонија, која своевремено ја подготвиле општините од истокот.

„Ние сме конгломерат од повеќе фирми кои го здружија капиталот и знаењето во рециклажа на отпадот. Слични инвестиции реализиравме во Англија, Франција, Шпанија. Наша цел е да ја елиминираме концентрацијата на секаков вид отпад и, секако, од тоа да правиме профит. Тука го гледаме двостраниот интерес - општините да се ослободат од отпадот, а ние да произведуваме чиста енергија од отпад“, изјави Крис Прат.

Првиот човек на „Вирвољ“ потенцира дека депонијата е, всушност, најсовремена фабрика за трансформација на сите видови отпадоци во топлинска енергија. Услов за да се гради таков капацитет е регионот да има отпадок од 150.000 тони на годишно ниво. Брегалничкиот регион го исполнува тој услов. Прат вели дека топлинската енергија ќе може да се употребува за затоплување станбени и деловни објекти.

„Подготвени сме проектот да го реализираме како јавно-приватно партнерство. Наша обврска ќе биде целосно да го финансираме проектот, а општините да обезбедат услови за собирање и транспортирање на отпадот", потенцира Прат.

Според него, депонијата ништо и никого не загадува, а просторот околу неа ќе личел на цветна градина. "Вирвољ" имала готов проект и во оваа работа сакала да инвестира 30 милиони евра.

„Станува збор за успешно менаџирање со отпадот, нешто што во светот во кој свеста еколошки се' повеќе се развива е од поголемо значење. Во таа смисла ние сме подготвени да работиме со регионот и Општина Штип како негов центар", вели Крис Прат.

Сепак, тука има еден голем проблем. Имено, општините од регионот цели пет години не можат да се договорат каде да биде депонијата. Имаше повеќе локации, последната во Општина Карбинци, но таму се побуни населението. Всушност, регионалната депонија никој не ја сака во својот атар. И тоа се' поради фактот што населението нема информации за каков вид депонија станува збор, а смета дека тоа е извор на големо загадување.

Советот на Скопје на седница в среда треба да даде зелено светло за субвенцијата

„Комунална хигиена“ ќе добие 1 милион евра субвенции од Градот Скопје. Парите ќе бидат наменети за покривање на дел од долговите на јавното претпријатие, но и за подновување на возниот пар.

Одлуката за субвенционирање на „Комунална хигиена“ ќе се најде на дневен ред на првата седница на Советот на Скопје. Пред два месеца, градските советници не се согласија да ја зголемат цената на ѓубрарината и покрај барањата од комуналците и од градоначалникот Трифун Костовски. Тоа, според одговорните во јавното претпријатие, дополнително ја отежнува и онака лошата состојба во која се наоѓа, особено поради големите долгови по основа на ДДВ.

Доколку ја добие субвенцијата од Градот, „Комунална“ ќе се ослободи од дел од долгот и ќе набави нови возила за собирање смет.

„Во случај одлуката за субвенционирање да помине на седницата на Советот в среда, средствата ќе треба да ги искористиме исклучиво наменски, за набавка на нови возила и отплата на дел од долгот по основа на ДДВ. Засега не можам да кажам за колку и за какви возила и колкав долг би отплатиле, тие калкулации ќе се прават доколку Советот даде зелено светло за предлогот“, вели директорот на „Комунална хигиена“, Златко Димовски, нагласувајќи дека ова ќе биде прв пат Градот да даде субвенции за ова јавно претпријатие.

Димовски се надева дека меѓу советниците има расположение да гласаат за предлогот, бидејќи се свесни за состојбите во кои се наоѓа јавното претпријатие, особено откако не дозволија покачување на цената на ѓубрарината. Субвенционирањето, смета Димовски, сепак, претставува една можност да и' се помогне на „Комунална хигиена“ да се извлече од тешката ситуација.

6 нови камиони за собирање на ѓубрето

Деновиве е потпишан договор со фирмата "Ресор Ниш", која најдоцна за два месеца треба да ги испорача возилата на претпријатието

Роза Петкова

Депонијата „Дрисла“ повторно ќе стане посебно јавно претпријатие кое самостојно ќе ја врши дејноста што досега ја спроведуваше како дел од „Комунална хигиена“. Ова се предвидува во предлог-одлуката која до Советот на град Скопје ја достави градоначалникот Коце Трајановски, а трансформацијата на „Дрисла“ во посебен правен субјект е еден од проектите зацртани во неговата програма за работа. Претпријатието ќе се формира со почетен капитал од 2.500 евра, издвоени од градскиот буџет, и во него ќе се префрлат целиот имот и средствата од постојната депонија. ЈП „Дрисла“ ќе биде во сопственост на Градот и во него ќе преминат дел од работниците на „Комунална хигиена“, кои и досега беа ангажирани за работи поврзани со депонирање на отпадот. Ќе се финансира од парите собрани преку цената за извршената услуга, од буџетот на Скопје и од други средства. Според градските власти, претпријатието ќе се основа со цел ѓубрето да се депонира организирано и потоа квалитетно да се обработи, а сето тоа да го прави единствен економски и технолошки систем. - На ваков начин трајно, уредно и квалитетно ќе се задоволат потребите на корисниците на услугите, ќе добиеме поголема организација и ефикасност во работата, поголема искористеност на работната сила, стручниот потенцијал и механизација и повеќе можности за настап на пазарот и за кредити “ се вели во одлуката на градоначалникот. Претпријатието ќе има свој директор, управен одбор и одбор за контрола на материјално-финансиското работење. Додека да се донесе статутот за работа и да се именуваат органите на управување, со него ќе раководи Бранко Николовски, вршител на должноста директор. Депонијата се простира на површина од 76 хектари, од кои на 55 хектари е сместен целиот депониски простор со капацитет од 26 милиони кубни метри. Во рамките на „Дрисла“ се наоѓа и инсенератор, специјалната печка за согорување медицински отпад, во која годишно се согорува речиси 400.000 килограми опасен материјал. На овој простор е предвидена изградба и на таканаречената гробница за животни. Всушност, станува збор за јама во која ќе се фрлаат мршите од еутаназираните или умрени улични кучиња. Депонијата до 2003 година функционираше како посебно претпријатие, а потоа стана дел од „Комунална хигиена“.

Канадски инвеститори го сакаат метанот од Дрисла

Странски инвеститори од Канада и од други земји се заинтересирани за вложување во депонијата Дрисла за искористување на гасот метан, информира градоначалникот Коце Трајановски. Но, претходно, рече тој, „Дрисла“ мора да се оддели од „Комунална хигиена“ и да функционира како самостојно претпријатие, како што беше и до пред шест години.

Точката за осамостојување на депонијата „Дрисла“ на последната седница на Советот беше тргната од дневен ред поради дополнителни анализи. Градоначалникот Трајановски рече дека примарна работа на комуналците е да собираат ѓубре и притоа да не размислуваат за технолошки вложувања во депонијата и во неа не гледаат вносен бизнис.

- Цевките за метан сега во депонијата се затнати, а нема ни селекција на отпадот. Мора да се вложува во депонијата - изјави градоначалникот.

Дрисла е единствената санитарна депонија за комунален отпад во Македонија. Се очекува со осамостојувањето таа да работи поквалитетно, односно подобро да се организираат собирањето, обработката и депонирањето на цврстиот комунален отпад.

Со претпријатието ќе раководи Градот, а за него за почеток од градската каса се одвоени 2.500 евра во денарска противвредност. Директор на Дрисла ќе биде Бранко Николовски.

http://www.dnevnik.com.mk/?ItemID=1EB6720ECAAD244ABF3027523A49BD7A

На „Комунална“ и' се расипаа камионите

Во неколку скопски населби дури десетина дена контејнерите се преполни со ѓубре бидејќи Јавното претпријатие „Комунална хигиена“ остана само со дваесетина возила за собирање смет. Некои ѓорчепетровци залудно апелирале до претпријатието да се собере ѓубрето. Во Општината Ѓорче Петров велат дека не им е познато зошто ЈП „Комунална хигиена“, кое е задолжено за подигање на сметот на нивна територија, цела недела воопшто не поминало во населбата Ѓорче 2.

- Поради големата акција на сите наши екипи и служби, кои вообичаено работат на контрола на излетничките места, тие беа ангажирани за чистење смет по населбите. Не знаеме од кои причини претпријатието цела недела воопшто не го чистело ѓубрето. На овие температури, со толку смет лесно може да се рашират зарази. Населбата смрдеше, а ние изнесовме околу седум камиони ѓубре, вели Момо Николовски, портпарол на Општината.

Од „Комунална хигиена“ велат дека имаат сериозен проблем со камионите за собирање ѓубре зашто се стари и по триесетина години.  За дел од камионите, со замена на деловите се' уште има надеж, но тие што се во функција секако дека не се доволни за да ги задоволат потребите на градот. На терен одат вкупно 23 возила, заедно со камионетите наменети за собирање смет од зелените 120-литарски канти, велат од „Комунална хигиена“.

Градот неодамна одобри набавка на шест нови возила кои треба да се купат на лизинг. Тие треба да се набават од фирмата „Ресор“ од Ниш, која треба да ја изврши и надградбата. Зошто е застаната набавката која досега требаше да се случи, не знаеја да објаснат ниту во претпријатието, ниту во Градот.

- Во април заврши тендерот и во рок од два месеца требаше да пристигнат возилата, но не знам од кои причини се' уште не се тука. Сега знам дека се собираат документите што се потребни за возилата да се купат на лизинг, изјави Катерина Лаова, портпаролка во „Комунална хигиена“.

И граѓаните од населбата Ченто негодуваат зашто кантите и контејнерите десетина дена биле преплавени со ѓубре. Тие велат дека ова лето не е првпат „Комунална“ да го остава ѓубрето несобрано и повеќе од десет дена. Тие неколкупати со претставки реагирале до Општината Гази Баба, незадоволни од ненавремената интервенција на „Комунална хигиена“.

- Имаше реакција на жителите од улицата Коце Металец, во населбата Железарница, каде што сметот се собира во канти. Тие се жалеа за тоа дека камионите на „Комунална хигиена“ не поминуваат според утврдениот термин. Ние како општина помагаме во рамките на нашите можности. Ги исчистивме дивите депонии на улицата Јужноморавски бригади во Камник заедно со „Комунална хигиена“ и ќе асфалтираме џебови на неколку локации на оваа улица, каде што ќе бидат поставени контејнери, изјави Тони Трајковски, градоначалник на Општината Гази Баба. Тој објасни дека и нему од „Комунална хигиена“ му рекле дека немаат доволно камиони и дека тие се постојано во дефект.

- Сметам дека претпријатието требало долгорочно да планира обновување на возниот парк, така што набавката на нови возила би одела постепено, секоја година по неколку. Факт е дека ова претпријатие долг период не набавило нови возила, истакна Трајковски. Иста е состојбата и на територијата на општината Кисела Вода. Општинските власти не се задоволни од работата на „Комунална хигиена“ и од начинот на одржување на хигиената.

- Повеќе жители со претставки се обратија до Општината за тоа дека нивните контејнери и канти се преполни и бараа да се преземат мерки, бидејќи тие не се во состојба повеќе да ја трпат смрдеата од натрупаното ѓубре. Токму од тие причини Општината реши да помогне со самостојно собирање, со тоа што на јавен оглас ја избравме фирмата „Камацо“, која се вклучи во расчистување на дивите депонии во општината, изјави Марјан Спасески, портпарол во Општината Кисела Вода.

Портпаролката во „Комунална хигиена“, Лаова, вели дека со камионите што се во исправна состојба, веќе почнале да го собираат сметот по улицата Социјалистичка зора во Ѓорче Петров, а неделава ќе се чисти на улиците Виа Егнација и Црвени брегови.

http://www.dnevnik.com.mk/?ItemID=F6C3B6A0A921BA428D5E986513342DA5

Нема договор за локација на идната регионална депонија во југо-источниот дел на Македонија

„Комунална“ ќе се поднови со 6 камиони

„Дрисла“ ќе биде посебно јавно претпријатие

Депонијата „Дрисла“ ќе се оддели од „Комунална хигиена“ во посебно јавно претпријатие. За идејата на градоначалникот Коце Трајановски, на следната седница на Советот на Скопје, ќе одлучуваат и градските советници. Доколку дадат зелено светло ќе се отвори пат за нови инвестиции во депонијата, сметаат во Градот.

Во „Дрисла“ треба да влезе нова технологија со која по светски стандарди ќе се обработува сметот и ќе се произведуваат енергија и горива. Оваа идеја во Градот Скопје постои одамна, но досега не беше пронајден сериозен партнер. Сепак, со одделувањето од „Комунална“, смета Трајановски, „Дрисла“ ќе стане поатрактивна и привлечна за приватен партнер, чие барање ќе биде приоритет за градоначалникот во наредниот период.

За Градот, јавното-приватно партнерство е единствена можност во депонијата да бидат имплементирани светските технологии. Во меѓувреме, најавуваат градските власти, во „Дрисла“ ќе се реализираат неколку проекти за покривање на целата депонија, како и за одведување на отпадните води.

Истовремено, планирано е и проширување на активностите за примарна и секундарна селекција на отпадот. Моментно само во дел од Скопје се применува примарна селекција на ПЕТ пластика и хартија. Поради продолжување на животниот век на депонијата во иднина ќе се селектираат и лимени предмети, а во „Дрисла“ ќе се одложува само комунален смет. (С.Н.)

Идејата за депонија ги подели пелагониските општини

Локалните власти на Новаци и на Могила се заинтересирани за депонија на своја територија

БИТОЛА - Може ли плодната пелагониска рамница да биде локацијата каде што ќе се гради регионална депонија за девет општини. Пред ваков предизвик се локалните самоуправи од Битола, Новаци, Могила, Демир Хисар, Прилеп, Долнени, Кривогаштани, Крушево и Ресен. Сите заедно веќе неколку месеци ја разгледуваат можноста за управување на цврстиот отпад во Пелагонискиот плански регион. Студијата за регионална депонија според европски стандарди ја изработуваат странски експерти. Ако се' тече според плановите, депонијата во Пелагонија треба да се изгради за четири-пет години.

Но, идејата за регионална депонија среде Пелагонија отвори повеќе дилеми: колку ќе ја загади почвата, реките, подземните води... Еколошките здруженија со реакција дека јавноста малку е информирана за целиот проект.

Иницијативата за изградба на депонија потекна од Регионалната развојна агенција на Пелагонија „Преда“ и Министерството за животна средина со цел да се искористат парите од ИПА-фондовите за регионален развој.

„Општините ја прифатија иницијативата и потпишаа меморандум за соработка за управување со цврстиот отпад. Затоа што сите имаат проблем што сакаат да го решат во иднина“, изјави Марјана Милевска, извршна директорка на „Преда“.

Сепак, идејата за изградба на регионална депонија ги подели

пелагониските општини. Додека едни ја прифаќаат, други не го сакаат ѓубриштето од соседите во сопствениот двор.

„На дел од општините во интерес им е депонијата да се гради на нивна територија, а некои не го сакаат тоа. На следниот состанок треба да доставиме предлози. Тоа е долга процедура. Не може за кусо време да се реши, бидејќи е потребна согласност на општинските совети“, изјави битолскиот градоначалник Владимир Талески.

Локалните власти на Новаци и Могила не кријат дека се заинтересирани за депонија на своја територија. Токму во управувањето со таков објект гледаат напредок за своите општини. Од можност за отворање нови работни места, преку подобрување на инфраструктурата и можеби социјални погодности за локалното население со средства од другите општини. Згора на се', овие две општини имаат најпогодна местоположба. Тоа го исполнува критериумот за економската исплатливост во транспорт на сметот.

„Можеби е храбар потег што се залагам за депонија на наша територија, но тука гледам други предности“, вели градоначалникот на Новаци, Лазар Котевски. Тој објаснува дека се работи за депонија според европски стандарди.

За првиот човек на Општина Могила бенефициите од лоцирањето на депонијата на нивно подрачје е исто како изградба на фабрика.

„Во таа фабрика ќе се преработува цврст отпад. Ова го кажувам за да се намали отпорот кај локалното население. Могила пред неколку години беше предложена како погодно место за депонија. Во прашање е просторот меѓу селата Вашарејца и Ивањевци. Ако ги исполниме критериумите, заинтересирани сме за депонија“, нагласува Славко Велевски, градоначалник на Могила.

Еколошките здруженија од Битола го следат секој чекор од плановите за изградба регионална депонија во Пелагонија. Ако изградбата се придржува до европските стандарди, нема да претставува проблем за животната средина, ниту, пак, за луѓето, сметаат екологистите. Сепак, го потенцираат проблемот околу дистанцирањето на јавноста од плановите за депонија.

„Одлуките се носат во одредени министерства, а не се прашуваат обичните граѓани кои ќе бидат засегнати од изградба на депонијата. Пристапот треба да биде поинаков. Тоа значи да се објаснат ефектите, придобивките или животот во близина на депонијата, се' она што ќе донесе изградбата на депонијата“, дециден е Нешат Аземовски од „Биосфера“. (А.Б.)

http://www.utrinski.com.mk/default.asp?ItemID=70F6F010FD6FA04DB0B1FD6BC4AE90FD

Депонијата „Дрисла“ се одвои од „Комунална хигиена“

Целта е да се привлече инвеститор кој ќе воведе нова технологија

„Дрисла“ се одвојува од „Комунална хигиена“ како ново јавно претпријатие, одлучи вчера Советот на Скопје. Во следните два месеца новото градско претпријатие треба да добие статут и систематизација. Целта на одвојувањето, според образложението на градоначалникот Коце Трајановски е привлекување инвеститор кој ќе воведе нова технологија и начини на третман и депонирање на отпадот.

На одвојувањето на „Комунална хигиена“ и „Дрисла“ се спротивставија опозициските партии во Советот, кои особено забележаа на штурото образложение за потребата од создавање ново јавно претпријатие. Меѓу другото, се поставија прашања за распределбата на долгот од околу 240 милиони денари за ДДВ, што моментно го должи „Комунална“, за новите вработувања кои ќе следуваат во новото јавно претпријатие, како и за висината на надоместокот кој ќе треба „Комунална“ во иднина да го плаќа за да го депонира отпадот во „Дрисла“.

„Нема сеопфатна анализа за оправданоста на одвојувањето, кое се предлага да се направи само неколку години откако се споија двете претпријатија за да се спаси ’Комунална хигиена‘“, истакна советникот Никола Велковски од СДСМ.

Неговата колешка Софија Куновска истакна дека од Советот се бара да одлучи за важно прашање врз основа на впечатоци, а Александар Наумовски спореше околу можноста новото јавно претпријатие да депонира опасен отпад за што ќе мора да има дозвола од централната власт.

„На ’Комунална хигиена‘ приоритет секогаш и' е собирањето на сметот, додека во последните години депонирањето и вистинскиот третман беа во подредена состојба. Постојат заинтересирани партнери кои сакаат да инвестираат во овој сегмент, со што депонијата ќе работи по европски и еколошки стандарди“, се бранеше градоначалникот Трајановски.

Според локалните власти „Дрисла“ постои дваесетина години и полна е две третини. Со соодветен третман на отпадот во иднина, кој ќе вклучи селекција и рециклирање, векот на депонијата ќе биде продолжен. (С.Н.)

200 илјади евра за повторно отворање на депонијата „Русино“

Зоран Јованоски	http://www.a1.com.mk/vesti/default.aspx?VestID=114968#komentari - Коментари (0)

Инвестиција од 200 илјади евра го дели Полог од еколошката катастрофа што ми се заканува. Според претставници од општина Гостивар толку средства се потребни за да се направат неопходните минимални зафати, за регионалната депонија „Русино“ повторно да се отвори.

„Ќе треба се ископаат две јами каде што треба да се депонира сметот. Тие би биле со димензии од пет илјади квадрати. Тие две јами ќе треба се поврзат со канал за отпадната вода и активирање на бетонската јама за отпадни води, да се активираат атмосферските канали за атмосферската вода, да се направи водовод со вода за пиење и техничка вода за гасење на пожар и да се направи еден резервоар за дезинфекција на возилата“, изјави Рустем Иљази - ЈКП „Комуналец“ - Гостивар.

Во депонијата се создало езеро од отпадни води. Тоа е директна опасност поради можноста од загадување на водата за пиење, а со тоа и опасност по здравјето на граѓаните, велат од општината.

„Градоначалникот на Гостивар д-р Руфи Османи има обврска кон сите граѓани кои го гласале него да се грижи за нивното здравје“, вели Шпент Капроли - Општина Гостивар.

Половина година „Русино“ е затворена. Толку време во Полог се собира отпад, а никаде не се изнесува. Најзагрозени досега се граѓаните на Тетово.

Дива депонија со над 13 илјади тони отпад е само на неколку минути од нивните домови.

http://netpress.com.mk/vestiimages/63525/kamioni%20%20JP.JPG">

Скопска “Комунална хигиена“ доби четири нови специјализирани возила за собирање смет.

Возилата имаат зафатнина од 16 кубни метри, со вграден механизам за подигање и празнење на стандардни контејнери со зафатнина од 1,1 кубик и типски канти од 120 и 240 литри.

“Новите возила значително ќе ја подобрат работата на ЈП „Комунална хигиена“. Подготвуваме и тендер за набавка на уште 12 камиони со кои се надеваме дека ова јавно претпријатие целосно ќе биде опремено. Со новите камиони ќе се намалат сегашните трошоци на јавното претпријатие кои се вложуваат во постојани поправки на возилата.  Со ова праќаме јасна порака дека наша намера е ЈП „Комунална хигиена“ успешно да функционира и оти хигиената во градот е наш приорите“, рекол  скопскиот градоначалник Коце Трајановски на промоцијата на новите камиони.

Цената на едно комунално возило без ДДВ е околу пет милиони денари, а цената на сите шест возила без ДДВ е околу 32 милиони денари. До крајот на година треба да бидат набавени  уште две возила кои се дел од истата нарачка.

Купени четири камиони за празнење на контејнерите

Идниот месец ќе пристигнат уште две возила, а Градот в година ќе купи уште 12 камиони

Контејнерите за ѓубре од денеска ќе се празнат со четири нови возила, кои ќе се користат и за подигнување на сметот од кантите од домаќинствата со зафатнина од 120 и 240 литри. Подновувањето на возниот парк на ЈП „Комунална хигиена“ вчера го промовираа директорот Златко Димовски и градоначалникот Коце Трајановски. И двајцата не го криеја задоволството од набавката на новите возила, бидејќи со нив, претпријатието автоматски го зајакнува својот капацитет за работа. Камионите се од марката „ивеко“ со мотор еуро 4 дизел, поседуваат ГПС-систем, а имаат и помошен систем преку кој исцедокот од сметот ќе се излева директно преку вентил, што не е случај со старите возила. Освен пуштените во употреба четири возила, до крајот на ноември се очекува по улиците да почнат да возат уште два идентични камиона.

Оваа набавка чини околу 520.000 евра, од кои помалку од половина ги обезбеди Градот Скопје, а остатокот ќе го отплатува претпријатието на лизинг.

„Со камионите не само што ќе се зајакне капацитетот на претпријатието, туку набавката за нас има и економична страна, бидејќи за досега користените возила имавме големи трошоци за одржување и поправка, со оглед на тоа дека нивната старост во просек е околу 20 години“, истакна градоначалникот Трајановски, кој најави дека во текот на идната година Градот планира да распише тендер за набавка на уште 12 камиони за смет за „Комунална“ конечно да има соодветен возен парк за извршување на активностите.

Последен пат возила за потребите на претпријатието се набавени во 2002 година, кога беа купени пет камиони. (Дс.Т.)

Почна производството на компост

Почна компостирањето на сувите лисја од зелените површини во градот.

Град Скопје и Јавното претпријатие „Паркови и зеленило“ вчера го промовираа пилот-проектот за компостирање на лисјата од кои ќе се произведува ѓубриво.

Во дворот на „Паркови и зеленило“ е ископана дупка со димензии 30 на 30 метри и длабочина од 1,5 метар, во која ќе се истураат лисја кои ќе бидат исчистени од другото ѓубре што се собира од зеленилото, како гранки, хартија и пластика. Собраните лисја по природен пат ќе скапуваат и ќе се претвораат во квалитетен компост кој ќе се користи за потребите на претпријатието. Се очекува првите количини на органското ѓубриво да се добијат за една година.

- Собраните лисја од зелените површини во градот јавното претпријатие досега ги депонираше на депонијата Дрисла. Од зелените површини годишно се собираат по околу 150 тони лисна маса - рече градоначалникот на Град Скопје, Коце Трајановски.

Тој додаде дека со транспортот на лисјата на Дрисла претходно се создавале големи трошоци, а со пилот-проектот за компостирање ќе се произведува квалитетно природно ѓубриво кое ќе се користи за садниците, цвеќињата, дрворедите...

- Со тоа, годишно, „Паркови и зеленило“ ќе заштеди околу два милиона денари - рече Трајановски.

Тој најави дека проектот за компостирање понатаму ќе се надградува, а ќе се покрене и иницијатива за поттикнување на граѓаните што живеат во куќи да го компостираат зелениот отпад од нивните дворови.

Компостирањето претставува контролирано биолошко разградување на органските материи во присуство на кислород и под дејство на микроорганизми, при што се добива компост - висококвалитетно органско ѓубриво.

Досега проекти за компостирање во домаќинствата спроведоа општините Илинден, Гази Баба и Ѓорче Петров. Компостирањето е значаен вид преработка на отпад, со кој се избегнува мешање на органскиот и на неорганскиот отпад на депониите. Според „Комунална хигиена“, дури 60 отсто од отпадот на Дрисла е од органско потекло, што значи дека може да се преработи во ѓубриво, а остатокот е комунален смет.

http://dnevnik.com.mk/?ItemID=EC4ED4908FFB644FB2A9A663FA30E55E

Нови 12 камиони за собирање смет

Градот Скопје ќе купи нови 12 специјални возила за собирање комунален отпад. Одлуката ја донесе Советот на вчерашната седница.

Шест возила ќе бидат со зафатнина од 20 кубни метри, а шест со зафатнина од 8 кубици. Тие ќе му бидат доделени на јавното претпријатие „Комунална хигиена“.

Потребата од нови специјални камиони Градот ја објаснува со тоа што на претпријатието му недостигаат возила, машини и опрема, со што се доведува во прашање неговото функционирање.

- Со набавката на 12 специјални комунални возила ќе се придонесе за подобрување на условите за работа на „Комунална хигиена“ и за значително подобрување на хигиената во главниот град - сметаат градските власти.

Дванаесетте камиони ќе чинат вкупно 70 милиони денари, (околу 1,14 милион евра), за што се обезбедени пари од градскиот буџет за 2009 и за 2010 година.

За набавка на возилата ќе биде распишан јавен повик во согласност со Законот за јавните набавки.

„Паркови“ доби возило за сечење високи гранки

За депонирање на ѓубрето во депонијата „Комунална“ ќе плаќа по 680 денари за тон

Сања Наумовска


„Комунална хигиена“ во иднина ќе плаќа за депонирање на ѓубрето во „Дрисла“. Јавното претпријатие и депонијата дефинитивно се одвоија на последната седница на градскиот Совет. Сега, претстојат формирањето на раководни тела на новото јавно претпријатие и систематизацијата од која ќе зависи колку вработени ќе има и дали ќе има нови вработувања.

Двете претпријатија и претходно функционираа одвоено, но се споија во 2003 година токму поради причината „Комунална хигиена“ да ја избегне обврската да плаќа за депонирање на сметот. Сега „Комунална хигиена“ ќе се занимава исклучително со собирање и со транспорт на комунален смет, како и со примарно селектираниот отпад. За депонирање на еден тон ѓубре, од просечно дневно подигнати од 400 до 500 тони, ќе се плаќа по 680 денари.

„Дрисла“, пак, како самостојно јавно претпријатие ќе се обиде да привлече инвестиции заради модернизирање на технолошкиот процес, како и за воведување новини како што е производството на енергија од отпадот, секундарна селекција и друго. Ќе се бараат приватни фирми што ќе бидат заинтересирани да се формира приватно јавно партнерство.

Засега „Дрисла“ ќе функционира со 116 работници и со 19 возила што ќе се преземат од „Комунална хигиена“. Депонијата ќе ја добие и земјата на која се одложува отпадот, како и поголемиот дел од подвижни и од неподвижни работи што се наоѓаат таму.

„Вработените што ќе продолжат со работа во ’Дрисла’ веќе се ангажирани на депонијата, иако еден дел од нив ќе замине и од ’Комунална хигиена’. Ќе им отстапиме и 19 возила, меѓу нив камиони, автобуси, комбиња, патнички автомобили, но и градежни машини и цистерни. Сметаме дека ’Комунална’ ќе продолжи нормално да функционира и понатаму“, вели директорот на „Комунална хигиена“, Ракип Дочи.

Тој објаснува дека претпријатието во иднина ќе има зголемени давачки заради надоместокот за депониран смет, но дел од нив ќе се компензираат со тоа што „Комунална хигиена“ ќе биде ослободена од обврската да се грижи за одржувањето на депонијата, на возилата, како и за платите на работниците што ќе преминат во новото јавно претпријатие.

Иако трошоците ќе се зголемат, сепак, нема да се зголемува таксата за ѓубрарина што ја плаќаат граѓаните, вели Дочи. Но, од „Комунална“ најавуваат дека се подготвува нова методологија за пресметка, со која ќе се напушти моделот за наплатување по квадратен метар. Ќе се разгледаат странски искуства, веројатно од Виена и од други австриски градови. За раководството на „Комунална хигиена“ една од најприфатливите методологии е наплатата по волумен на исфрлен смет.

Дивите депонии ќе исчезнат по две години

Вардарскиот регион бара место за депонија

Ќе се бара локација каде да се смести регионалната депонија, која ќе го прибира отпадот од осум општини од Вардарскиот регион. За оваа цел ќе се подготвува физибилити-студија, која е финансирана од австриска ОЕК банка. Таа за оваа цел обезбеди 125.000 евра, откако претходно позитивно одговориле на апликацијата со овој проект.

- Оваа студија, која е регионална, ќе треба да ги посочи можните локации за регионална депонија, како и моделот на управување со неа и со отпадот. Проектот ќе се реализира во првата половина од годинава, во соработка со АСА, реномирана австриска компанија, која работи со управување отпад и со големо искуство во оваа област - изјави Александар Бузалков, директор на Центарот за развој на Вардарскиот плански регион, кој со општина Велес конкурира за овој проект и е прифатен од ОЕК банка.

На овој начин треба да се најде локација каде да се смести отпадот од осум општини и 120.000 жители, кои ги опфаќа овој регион.

- Бидејќи во државата се' уште нема интегрална студија, која би ги одредила потенцијалните локации во Македонија, потребно е ние како локална власт да го решиме овој проблем. Затоа е неопходно стручно мислење, кое ние го обезбедивме преку странска донација за да ја дознаеме можната оптимална локација на оваа регионална депонија за отпад - вели Горан Петров, градоначалник на Велес. (П.П.)

Арбиново против изградба на депонија

ОХРИД - Населението на селото Арбиново категорично се противи на плановите на градоначалниците од Југозападниот плански регион за изградба на регионална депонија во атарот на тоа село што се наоѓа во рамки на општината Дебарца. Жителите на Арбиново поведоа петиција преку Интернет против депонија, бидејќи сметаат дека ќе ја загрози животната средина и негативно ќе влијае врз тој еколошко чист регион.

Истовремено, жителите апелираа до градоначалниците на Дебарца и на Охрид да ги поддржат и да застанат против изградбата на регионалната депонија на таа локација.

Според најавите од Министерството за животна средина и просторно планирање, предвидено е во текот на овој месец или наредниот да биде распишан меѓународен тендер за изградба на депонија за Југозападниот плански регион, со што би се решил проблемот со сметот за 13 општини. Изградбата на депонијата, што ќе функционира по принцип на јавно приватно партнерство, ќе чини околу 30 милиони евра. На состанокот на градоначалниците на општините од Југозападниот плански регион одржан на крајот на минатиот месец во Струга, покрај Арбиново, како други можни локации за депонијата беа посочени уште атарите на селата Мали Влај, Малесија, Делогожда и Мешеишта. (МИА)

Се чисти ѓубрето од Тетово

ТЕТОВО - Ѓубрето од дивата депонија кај железничката станица во Тетово веќе четврти ден, од 21 часот до 6 часот, интензивно се пренесува во „Русино“ кај Гостивар. За тоа се ангажирани транспортерите од општината, јавното комунално претпријатие „Тетово“ и неколку приватни фирми. Хасан Љума, директор на ЈКП „Тетово“, вели дека се' се одвива според планот.

„Недоразбирањата се надминати. Жителите на Долна и на Горна Бањица и на Сушица се согласија пренесувањето на отпадот да се одвива ноќе, а паралелно да се работи на депонијата ‘Русино‘. Доколку временските услови бидат поволни како сега, за десетина дена дивата депонија во Тетово ќе биде исчистена од сметот“, ветува Хасан Љума.

Договор за изнесување на ѓубрето од Тетово постигнаа градоначалниците на Тетово и на Гостивар - Сади Беџети и Руфи Османи и министерот за екологија Неџати Јакупи.

На почетокот жителите од околните села го блокираа патот. „Нема да го блокираме транспортот во наредните денови додека не се испразни депонијата во Тетово. Ние истовремено бараме да се создадат услови за нормално функционирање на регионалната депонија“, вели Насир Хасипи, претседател на Месната заедница во Долна Бањица.

За денеска во Гостивар е предвидена нова средба на министерот, двајцата градоначалници и на претставници на советите на месните заедници од трите најблиски села во Русино, заради детализирање на обврските. (Г.Е.)

Депонија во близина на Охридско Езеро

Јован Митревски, Охрид

Тетовското ѓубре се носи, а депонијата „Русино“ не се уредува

Незадоволните жители од околните села се закануваат со нови блокади

Киро Кипроски


Гостивар - Ѓубрето од тетовската дива депонија од 14 јануари секоја вечер од 18 до 6 часот наутро наредниот ден, според договорот постигнат меѓу гостиварскиот и тетовскиот градоначалник, се депонира во регионалната депонија „Русино”, што се наоѓа во непосредна близина на Гостивар. За овој период околу 10.000 тони без пречка беа донесени во „Русино“. Меѓутоа, како што реагираат жителите, градоначалникот на Општина Тетово, Сади Беџети, не ги исполнил обврските што ги презеде дека за десет дена ќе ја уреди депонијата и ќе создаде минимални услови за складирање на ѓубрето. Овие услови се уште од јуни мината година, кога жителите на околните села Долна и Горна Бањица и на гостиварските приградски населби Фазанерија и Грудајица, го блокираа патот и не дозволија да се носи ѓубрето.

„Општина Тетово не го испочитува договорот за создавање минимални услови на депонијата ’Русино‘ за да може да се користи“, ни изјави Наџи Исмаили, претставник на Општина Гостивар во заедничката комисија за следење на изградбата на депонијата, и додава: „За овој период се поставени само неколку бетонски столбови на оградата на депонијата и беа покриени со чакал неколку ударни дупки на пристапниот пат“.

„Попуштивме, се откажавме од блокадите и дозволивме да се носи тетовскиот отпад во ’Русино‘. Меѓутоа, не отстапуваме од барањата во депонијата да се создадат неопходните технички услови за санитарна депонија и отпадните води да се прочистат или, пак, да се пренасочат подалеку од нивите“, категоричен е Насир Хасипи, претседател на МЗ Долна Бањица.

Претседателот на МЗ на Горна Бањица, Хусеин Абдулхади, се надоврзува и вели дека шест години жителите на десеттина села што се наоѓаат во непосредна близина на депонијата, како и приградските населби Фазанерија и Грудајица, во кои живеат околу 10.000 жители, не по нивна вина биле принудени да дишат загаден воздух, а плодното Бањичко Поле да се загадува со отровните отпади води, поради што биле намалени и приносите.

Бањичани ја очекуваат средбата што деновиве треба да ја одржат гостиварскиот и тетовскиот градоначалник, која ќе биде посветена на (не)исполнувањето на преземените обврски. „По состанокот ќе донесеме одлука кои активности ќе ги преземеме“, категорични се Хасипи и Абдулхади.

На депонијата „Русино“, пак, иако беше пладне, работниците на тетовското комунално претпријатие не работеа и го очекуваа превозот. Поради ниските температури што се спуштаат и до минус 10 Целзиусови степени и поради калливата почва, како што ни рекоа тие, се принудени да ги прекинат работите. Во ноември минатата година, кога започна уредувањето на депонијата (поставување на ограда, копање на две јами и одводни канали), од неразбирливи причини работите беа прекинати, за да продолжат во мошне тешки услови за работа. Затоа, велат жителите, ако тетовскиот градоначалник ги согледаше реалностите со депонирањето на отпадот во депонијата „Русино“, минималните технички услови можеше со помалку средства и поквалитетно да ги извршеше, веднаш по одлуката за забрана за користење на „Русино“, што ја донесе Советот на Општина Гостивар во јуни мината година.

Локална кавга за регионалното ѓубре

Битолската општина почна со активности за изградба на регионална депонија во Пелагонискиот регион, каде што собраниот отпад од девет општини ќе се третира според европски стандарди. Општинскиот Совет го направи првиот чекор носејќи одлука за покренување постапка за доделување концесија околу управување со цврстиот отпадот. Ова предизвика бурни реакции кај советниците од опозицијата. Тие обвинија дека процедурата почнува со половична документација, која содржела недоречености и контрадикторности, а дозволува комплетниот бизнис со регионалните депонии да се приватизира.

- Концесионерот на депонијата ќе биде приватник, а се предвидува и приватизација на меѓуопштинското претпријатие, кое ќе управува со депонијата, а во почетокот ќе има мешана сопственост на државата и на локалните самоуправи. Ако целта беше ова претпријатие да го контролира приватникот, тогаш што ќе се случи ако се приватизира, кој кого тука ќе контролира. Комплетниот бизнис со отпадот во Македонија буквално ќе биде во рацете на приватни субјекти. Будно ќе ја следиме целата постапка и ќе реагираме на сите евентуални неправилности - вели Златко Ќурчиев, советник од СДСМ.

Според него, истиот делокруг на работа е предвиден и за концесионерот и за меѓуопштинското претпријатие што ќе се формира.

- Стои дека концесионерот ќе ги управува и ќе ги одржува објектите на депонијата и ќе извршува јавни услуги. Со други зборови, ќе ја управува депонијата. Додека претпријатието би требало да ја преземе одговорноста за регионално интегрирано управување со комуналниот отпад или со други зборови управување со јавната депонија. Ако ова не е дуализам и контрадикција, тогаш не знам што е - додава Ќурчиев.

Советниците изразија сомневање дека новата депонија може да му ја одземе работата на веќе постоечкото Јавно претпријатие „Комуналец“, кое сега го собира отпадот во Битолско.

- Концесионерот ќе го собира отпадот од руралните средини. Ќе одземе дел од дејноста на „Комуналец“, па тоа ќе се сведе на минорно јавно претпријатие. Дека ова не е во ред потврди и директорот на „Комуналец“, кој на состанокот на комисијата на комунална дејност не' убедуваше дека претпријатието може самото да го собира отпадот од руралните средини, а не тоа да го врши приватен концесионер кој таа услуга дебело ќе им ја наплаќа на граѓаните - изјавија советниците.

Претседателот на Советот на Општината, Лилјана Кузмановска, вели дека постапуваат според законите.

- Дискусиите на оваа тема се преуранети зашто ова е само една од фазите што ќе следуваат понатаму, дури и во 2011 година. Согласно Законот за локалната самоуправа се стапи во една нова фаза, во која имаме концесионерство, партнерство и не може да се враќаме назад во времето пред неговото донесување. Елаборатот е на Министерство за животна средина, се однесува на сите општини и ќе имаме многу подобри резултати - изјави Кузмановска.

Депонија во југозападна Македонија се проценува дека ќе чини од 10 до 20 милиони евра, а парите најверојатно ќе се обезбедат од европските фондови.

Жанета Здравковска

Тетовската депонија, конечно, испразнета

Просторот се мие со вода, а комуналците рачно ги собираат малите количества отпад што механизација не успеала сосема да ги исчисти

ТЕТОВО - Жителите на Тетово можат да здивнат. Дивата депонија кај Железничката станица во центарот на градот конечно е испразнета. Илјадници тони смет што се акумулира цели 10 месеци се пренесени во депонијата „Русино“ кај Гостивар. Наместо смрдеа и чад што се ширеа од огромното ѓубриште, тетовци дишат чист воздух.

Акцијата за празнење на депонијата во која беа вклучени транспортери на ЈКП „Тетово“, но и на неколку приватни компании траеше речиси три месеци. Снегот повремено ја попречуваше работата.

„Успеавме да се справиме со сметот. Навистина беше тешко и деликатно, но целото ѓубре е пренесено. Просторот го миеме со вода. Нашите работници истовремено рачно ги собираат и оние мали количини отпад што механизација не успеала сосема да ги исчисти“, изјави вчера Хасан Љума, директор на ЈКП „Тетово“. Тој додава дека големите количини ѓубре влијаеле и врз исправноста на атмосферската канализација што минувала на тој простор, а особено на шахтите што биле затрупани со ѓубре.

Во ЈКП „Тетово“ велат дека по препорака на стручни лица, а, пред се', на лекари, по миењето на просторот кај депонијата ќе се изврши дезинфекција и дератизација.

Ѓубрето што во мали камиончиња секој ден се собира од улиците на Тетово се истовара на мал дел од дивата депонија, а по 18 часот претоварено во големи транспортни средства се пренесува за „Русино“. Директорот Љума тврди дека овој дел натаму ќе биде само претоварна станица и ништо повеќе. (Г.Е.)

Парк ќе никне на дивата депонија

По расчистувањето на најголемата дива депонија во Македонија, која беше сред Тетово, просторот ќе биде дезинфициран, а потоа ќе биде раззеленет со трева и садници

Дрвца и трева ќе бидат засадени на најголемата дива депонија во Македонија, која повеќе од девет месеци беше грда слика среде Тетово и го загрозуваше здравјето на 80.000 жители. Претоварната станица кај железничката станица деновиве е сосема исчистена. По два и пол месеца работа над 20 илјади тони смет се префрлени во регионалната депонија во гостиварско Русино. Бетонското плато каде што се складираше отпадот ќе се дезинфицира со посебни раствори, а земјениот дел ќе се раззелени, најавија од локалната самоуправа. Од ЈКП „Тетово“ истакнуваат дека додека не се најде друго решение, дел од платото пред железничката станица и понатаму ќе се користи како претоварна рампа, но нема да се складира отпад.

- Бидејќи сметот кон Русино смееме да го носиме по 18 часот, мора да го префрламе од помали во поголеми камиони кај претоварната рампа. Но, таму повеќе нема да се складира смет. Покрај ова во тек е огласот за закупување земјиште надвор од градот. Општината сака да купи земја и да изгради претоварна рамка за сметот. На истата локација би се префрлиле и неколку сектори од претпријатието што сега се расфрлани низ градот и работат во различни објекти - рече директорот на ЈКП „Тетово“, Хасан Љума.

По расчистувањето на дивата депонија, која беше најголема во Македонија, градоначалникот на Тетово, Сади Беџети, вети дека грдата слика никогаш повеќе нема да се повтори.

- Сега се чисти, мие и дезинфицира просторот, кој потоа и ќе се раззеленува. Планираме земјениот дел да го засееме со трева и дрвца и никогаш повеќе да не прерасне во депонија - рече Беџети.

СМЕТОТ ПРОБЛЕМ ЗА ЦЕЛ ПОЛОГ

Според планот на Полошкиот плански регион, депонијата во Русино ќе се даде под концесија, а ќе се изгради и фабрика за рециклирање на отпадот. Проектот треба трајно да го реши проблемот со сметот што се собира во деветте полошки општини. Дотогаш општина Тетово треба да инвестира околу 200 илјади евра во Русино. Парите се наменети за одржување и за изградба на инфраструктурата во депонијата.

Гостиварскиот градоначалник, Руфи Османи, не е задоволен од динамиката на реализирањето на преземените обврски, но вели дека има разбирање. Поради временските услови, не било можно да се работи на терен.

- Има уште многу да се работи. Една од најважните работи е да се изгради патот што ќе ја поврзе депонијата со регионалниот пат - вели Османи.

Според членовите на Полошкиот плански регион, не само Тетово, туку сите општини во Полог имаат проблем со справувањето со отпадот. Дел од експертите од Институтот за животна средина на Универзитетот Југоисточна Европа велат дека најдобро решение е да се изградат фабрики за рециклирање на комуналниот смет.

- Ниту една депонија во Македонија не ги задоволува европските стандарди. Ако работите останат како што е екологијата, ќе биде голем проблем при интегрирањето на државава кон ЕУ- децидни се од Институтот за животна средина.

Градоначалниците се договорија да инвестираат околу 330 илјади евра за санација и повторно ставање во употреба на регионалната депонија Русино. Според експертите со овие пари би се изградиле две јами за отпадните води, атмосферска канализација, водовод и резервоари за дезинфекција на камионите како уште и неколку помали зафати.

Претседателот на Полошкиот плански регион и градоначалник на Желино, Фатмир Изаири, вели дека околу 200.000 евра ќе инвестира Тетово, Гостивар ќе вложи околу 90.000, а другите седум рурални општини ќе дадат по 5.000 евра.

ЧИСТА ЖЕЛЕЗНИЧКА СТАНИЦА

Првите луѓе на деветте полошки општини на последната седница донесоа одлука за интегрирано управување на отпадот.

- Работите во Русино течат според договорот. Донесовме одлука депонијата да се даде под концесија и го задолживме Министерството за животна средина да ја води процедурата. Постапката е во тек, формиравме комисија што ќе го надгледува процесот и ќе го избере најповолниот понудувач. Во телото членуваат пет претставници од општините и по еден од министерствата за животна средина и финансии - рече Изаири.

По информацијата дека претоварната станица е чиста, спортскиот центар живна, ни изјавија неколку жители на оваа населба што ги затекнавме вчера. На стотина метри од претоварната станица, каде што до неодамна имаше планина смет покрај спортскиот центар има две училишта и градинка.

- Сега слободно и без страв можам да го шетам внукот. Порано не се дишеше, сега е многу поарно. Слободно може да се излага, а и прозорец дома да се отвори. Се надевам ова нема да се повтори - рече Мирче Трпески.

Жителите од овој дел на градот бараат грдата слика од пред некој месец да биде минато бидејќи сметот и чадот од депонијата, која катаден гореше, како што велат, се отров за сите без разлика на верска, етничка или политичка определба. Вработените на автобуската и железничката станица, кои се наоѓаат веднаш покрај претоварната станица, велат дека конечно имаат нормални услови за работа.

- Порано кога гореше депонијата, не се седеше на работа. Канцелариите и чекалницата беше полна со чад и смрдеа. Патниците не доаѓаа да чекаат автобуси тука бидејќи беше неподносливо, па се научија да чекаат на излезот од градот ни изјавија вработените на автобуската.

Д-р Џавид Фејзули, специјалист по хигиена и здравствена екологија, вели дека последиците од деветмесечното труење ќе се осетат на подолг рок. Тој очекува да има зголемени заболувања на респираторниот систем кај граѓаните како директна последица од депонијата.

Повеќе од десет години Тетово има проблем со депонирање на сметот. Двапати, лани и во 2006, беше на работ од еколошка катастрофа. За насобраниот смет од пред четири години поранешниот директор на ЈКП, Миљаим Ајдини, беше казнет со парична глоба од 1.000 евра, а ЈКП со 5.000 евра за кривично дело загадување на животната средина и природата.

Тие се осудени од тетовскиот суд бидејќи во периодот од април до декември 2006 година во близина на железничката станица претовараа и складираа смет на импровизирана претоварна рампа. Подоцна таа прерасна во дива депонија. Жителите со протести се обидуваа да го спречат истоварувањето смет бидејќи отпадот секојдневно беше пален, а целиот град обвиен со чад и смрдеа.

Платото пред железничката станица се користи како претоварна рампа од 1995 година. Поради застарената механизација и финансиските проблеми со кои се соочуваше ЈКП, од 2000 до 2007 година сметот беше оставан кај импровизираната рампа.

Од локалната самоуправа ветуваат дека со издавањето на Русино под концесија и изградба на нова претоварна рампа надвор од градот, Тетово веќе нема да има проблеми со сметот.

Илчо Цветаноски

Источниот регион доби 2,5 милиони евра за регионална депонија

Парите од ИПАРД фондовите ќе го помрднат од мртва точка проектот за депонијата