Општина Центар в година ќе гради Мост на цвеќето и издвои 450.000 евра

Неизвесно е финансиско учество на Градот, иако проектот е заедничко ветување на Аларова и на Костовски

ДЕСПИНА ТРАЈКОВСКА

Општинарите од Центар од планираниот буџет за наредната година ќе издвојат 450.000 евра за изградба на Мост на цвеќето. Мостот е планиран како еден од капиталните проекти на Општината, со кој градоначалничката Виолета Аларова сака да го одбележи мандатот, но е дел и од акциониот план за работа до 2009 година. Идејата стара повеќе години е утврдена и со ДУП, кој предвидува мостот да го премостува Вардар од шеталиштето зад ГТЦ до МНТ, односно да се наоѓа помеѓу Камениот мост и мостот кај хотелот „Холидеј ин“.

Лидија Неделковска, шеф на Кабинетот на Аларова, вели дека за мостот постои идејно решение, а во ИНПУМА веќе ја привршуваат и проектната документација. „Градежните активности сигурно ќе стартуваат наредната година. Ќе побараме финансиска помош од Градот, бидејќи изградбата на мостот беше заедничко предизборно ветување на Аларова и на Костовски. Доколку Градот е немоќен финансиски да учествува во проектот, нема да се откажеме од реализацијата“, вели Неделковска, која не можеше да потврди дали планираните 450.000 евра во општинскиот буџет ќе бидат доволни за изградба на мостот, бидејќи се' уште се работи на проектот. Од Општината не ја исклучуваат можноста со проектот да конкурираат и во некој од пристапните фондови. Одлучено е мостот да биде пешачки, а ќе се вика Мост на цвеќето, бидејќи од двете страни ќе биде исполнет со цвеќиња. Од Центар сметаат дека, покрај својата функционална намена, мостот ќе има и големо влијание за заживување на кејот од другата страна на Вардар.

Од Градот вчера не го кажаа својот став околу нивно учество во проектот. Пред една година, пак, рекоа дека ќе се вклучат, но не финансиски, туку како сојузник во обезбедување на потребната документација. Тогаш посочија дека се во завршни преговори со една фирма која би помогнала во покривањето на финансиската конструкција. Инаку, идејата за изградба на пешачки мост помеѓу ГТЦ и МНТ е многу стара и досега ја најавувале неколку градоначалници. Проектот беше дел и од програмата за работа на претходниот скопски градоначалник Ристо Пенов, кога постоеше и планирана финансиска конструкција, а Градот се надеваше и на донација од француската влада. Сепак, тој остана нереализиран.

Буџетот на Центар в година ќе се потроши на владините споменици

Советниците од власта и опозицијата не се согласија околу приоритетите за трошење на буџетот

Мост на цвеќето ќе се гради по терк на Тодоровиќ, а не на Аларова

Општината распиша конкурс за идејно решение, иако претходната гарнитура остави во наследство дури четири

Деспина Трајковска


Општина Центар ќе гради нов пешачки мост и тоа меѓу мостот „Око“, кој е во изградба и оној кај „Холидеј ин“. За таа цел веќе бара ново идејно решение за таканаречениот „Мост на цвеќето“, иако претходната општинска гарнитура се фалеше дека има дури четири труда за истиот објект. Постоењето идејни решенија го потврдуваат и во проектантската куќа „ИНПУМА“, наспроти тврдењата на општинарите дека „Мостот на цвеќето“ градоначалничката Виолета Аларова го оставила единствено како долгогодишна идеја на хартија.

Благоја Тагасовски, проектант во „ИНПУМА“, ни' потврди дека постојат четири идејни решенија за мостот, но немаше сознанија дали и кое од нив било избрано за најсоодветно и воопшто, дали почнала изработката на главен проект како што најавуваше Аларова. Подетални информации од директорот на „ИНПУМА“, Борислав Јосифов не успеавме да добиеме, оти наводно, цел ден бил зафатен со состаноци. Од Општината, пак, немаат сознанија дека за објектот постојат идејни решенија. Напротив, го тврдат спротивното.

„Сегашниот конкурс за идејно решение е прв за овој мост“, категорични се општинарите. Дополнуваат дека постоело рамислување и намера да се изгради таков мост, меѓутоа, не бил реализиран ниту како проект, ниту како градба. Всушност, тоа е и очигледно на теренот. Објектот беше најавуван како капитален проект уште во првиот мандат на некогашната „мајка“ на Општина Центар, но сепак, таа никогаш не го реализираше. Во неколку наврати Аларова изјавуваше дека постојат четири алтернативни решенија, а по најсоодветното дури почнал да се изработува и главен проект во „ИНПУМА“. Наводно, Општината нашла и заинтересирани две компании кои би помогнале во покривање на финансиската конструкција покрај планираните 450.000 евра од општинскиот буџет за 2008 година.

По кое идејно решение сега ќе се гради мостот, веројатно ќе биде познато кон крајот на јануари, кога е крајниот рок за доставување на понудите за архитектонско и урбанистичко идејно решение. Огласот го распиша Општината пред десетина дена. Од заинтересираните автори се бара да понудат решенија во кои посебно ќе биде посветено внимание на пристапите до објектот, да бидат овозможени соодветни пристапи за инвалидизирани лица и лица со посебни потреби. Решението за изградба на мостот треба да поседува традиционалност, оригиналност и иновативност на објектот и да го поддржи јавниот простор на локацијата.

Инаку, од Општината не сакаат да лицитираат со висината на средствата потребни за реализација на овој проект, ниту, пак, информираат дали и колку средства се предвидени за оваа намена во тековниот и буџетот за идната година.

„Висината на средствата ќе се утврдат од најповолното идејно решение што ќе биде избрано на конкурсот и проектите кои ќе уследат во натамошната постапка. Мостот ќе биде инвестиција на Општината, но доколку ни' бидат доделени дополнителни средства (донација) од Владата, за таа цел, логично е дека ќе бидат прифатени и добродојдени од наша страна и ќе придонесат за побрза изградба на мостот“, велат општинарите.

Дури 16 автори со визии како да се изгради Мостот на цвеќето