Солта и песокта што се фрлаат по коловозите за расчистување на снегот ги доуништија и така прилично оштетените скопски улици. Отворени или закрпени дупки, ленти од изгмечен и надуен асфалт на крстосниците предизвикани од гумите на тешките товарни возила, е секојдневие на сообраќајниците во градот, но во зимскиот период ова станува вистинска пречка за нормално движење на возилата и ја загрозува безбедноста на патниците. Лошата инфраструктура на улиците, која дозволува во зимскиот период да се направат дупки и на поново асфалтираните улици, очигледно, најмалку ги загрижува надлежните во Градот. Оние кои се задолжени за одржување на патиштата негираат дека состојбата е последица на употребата на неквалитетен материјал при асфалтирањето на улиците, туку, како што велат, тоа е резултат на екстремната промена на температурите во лето и во зима. Од ЈП „Улици и патишта“ тврдат дека најмногу штета предизвикува солта што во зимскиот период нивните екипи ја расфрлаат по улиците за да го стопи снегот. Според нив, ваквиот начин на отстранување на наталожениот замрзнат снег носи долготрајни штети, а само моментален ефект при расчистувањето на улиците. - Со расфрлањето на солта, таа навлегува во ситните пукнатини и дупки во асфалтот на улиците. Со тоа, таа ги растопува ледените површини, по што водата и мразот навлегуваат длабоко во пукнатините. Со намалувањето на температурата, водата замрзнува, по што се прошируваат дупките поради ширењето на мразот. Во летниот период, пак, кога температурата нагло се зголемува, поради неможноста веќе уништениот асфалт како последица на солта и мразот да ги издржи, тој се дува и се шири на сонцето “ објаснуваат од ЈП „Улици и патишта“, кое е задолжено да се грижи за проодноста на улиците во вакви услови. Од Јавното претпријатие, на кое примарна дејност му е токму одржувањето на сообраќајниците, тврдат дека во градот, па и во земјава се користи висококвалитетен асфалт. Сепак, уништените делови од улиците, особено на пофреквентните улици во градот, и натаму остануваат. Највидливи се на булеварите Партизански одреди, Гоце Делчев, Александар Македонски, но и на сите улици што водат кон излезот на Скопје.

Во Општината Карпош во тек е акцијата на асфалтирање на ударните дупки на главните и на сервисните улици на целата нејзина територија. Во изминатиот период целосно беше завршена реконструкцијата на улиците Миле Поп Јорданов, Јуриј Гагарин, Девол и Нерешка во населбата Жданец, и на улиците Радомил, Стрезово, Козарска, Милан Марковиќ и Брадфордска. - Во следниот период акцијата на реконструкција на улиците во општина Карпош ќе продолжи со пополнување на дупките на улиците Миле Поп Јорданов кај хотелот „Гранит“, како и на Стогово, Бледски договор, Вич, а ќе се работи и на и прекопите на улиците во селото Бардовци и на улицата Букурешка - објаснуваат од Општина Карпош. Изведувач на реконструкцијата на улиците е фирмата „Сирфес“ од Скопје, а вкупно за ваквиот вид инфраструктурни зафати до крајот на годинава е предвидена сума од три милиони денари.

Е.М.

На Партизанска асфалтот не е сменет 40 години

За нов асфалт градските власти велат дека треба прво да направат анализа на состојбата на булеварот

Бу­ле­ва­рот Партизански одреди повеќе личи на калдрма отколку на главна улица. Во­за­чи­те секојдневно се борат со дупки, вдлабнатини, пропаднат асфалт, из­браз­ден асфалт близу раскрсниците или, пак, со прекопи за разни подземни инсталации. По булеварот не се вози туку возилата се трескаат по дупките и крпениците. Ас­фал­тот на булеварот е стар 40-ина години. Сите градоначалници и директори на јав­ни­те претпријатија досега само крпеа по некоја дупка и никому не му текна це­лос­но да го извади стариот и оштетен асфалт и да постави нов слој.
"Де­сет години возам такси, и слободно можам да кажам дека булеварот Партизански од­ре­ди е во најлоша состојба, спореден со другите булевари. Ги искршивме возилата од дупки и крпеници. Наместо да трошат пари за жолти ленти, поарно да ги дадеа тие пари за нов асфалт, досега барем аир ќе видевме", вели еден скопски таксист.
Од кабинетот градоначалникот на Скопје Коце Трајановски велат дека се за­поз­на­ти со лошата состојба во која се наоѓа булеварот Партизански одреди, но не зна­ат точно кога ќе го реконструираат.
"Во програмата на градоначалникот Коце Трајановски предвиден е проект за ре­конс­трук­ци­ја на сите булевари и улици кои се во надлежност на Градот Скопје. Во тој контекст, предвидено е да се направи опсежна анализа со која ќе се утврди на кои булевари и улици им е потребна реконструкција и кои се приоритетни. Над­леж­ни­те служби на Градот се запознати со моменталната состојба на булеварот Пар­ти­зан­ски одреди, следи изработка на анализата, за да може во наредниот пер­и­од да бидат предвидени финансиски средства за реконструкција на булеварот Пар­ти­зан­ски одреди", велат од Град Скопје.

Запрашани за лошата моментна ситуација на булеварот Партизанска, од Јавното претпријатие "Улици и патишта" велат дека од 15 јули за време на годишните одмори ќе се преземат активности за санирање на згужваниот асфалт на автобуските и пред семафорите, работа која значително ќе ја подобри ситуацијата на булеварите вклучувајќи ја и Партизанска

Дупка со дијапазон од околу педесетина сентиметри а пред некој ден и длабока 40, во која можеше комотно да пропадне возрасен човек, ја кити главната некогашна најголема сообраќајница, булеварот Партизански одреди, пред Хотелот Карпош во истоимената населба Карпош 2. Глетка која потсеќаше на сцена од цртаните филмови на супер јунаците Нинџа желки кога рипаат од канализацијата, можеше да се случи ако околните сезонци викендов не фрлија две лопати песок. Учесниците во сообраќајот не се изненадени од катастрофалната состојбата на булеварот Партизански одреди, но се загрижени за својата безбедност.
- Партизанска е ужас. Кај пазарчето Буњаковец возиш формула и пазиш да не излеташ од гумените ленти кои, освен за сообраќајна несреќа не служат за ништо а ваму возиш рели со автомобилот одбегнувајќи вакви кратери. Не е лесно да си возач во Скопје, а уште толку е лесно да пазиш да не пропаднеш со автомобилот во некоја од дупките низ градов, - вели револтираниот скопјанец кој го затекнавме на пешачкиот премин кај Хотел Карпош.

Надлежните од ЈП "Улици и патишта" одговорни за состојбата на булеварите во Скопје во текот на изминатиот ден не беа запознаени со дупката на Партизанска. Тие тврдат дека доколку има таква, истата ќе ја санираат веднаш.
-Не сме информирани за ваква дупка. Можно е да се работи за дефект на канализација каде водата со активен продор да направи штета и да откопа толкава дупка. Денеска ќе пратиме екипи на терен да се испита ситуацијата и веднаш да се интервенира доколку се работи за наша надлежност, доколку е нечија друга вина ќе побараме тие да си ја санираат направената штета информираа од ЈП Улици и патишта.

Запрашани за лошата моментна ситуација на булеварот Партизанска, од Јавното претпријатие "Улици и патишта" велат дека од 15 јули за време на годишните одмори ќе се преземат активности за санирање на згужваниот асфалт на автобуските и пред семафорите, работа која значително ќе ја подобри ситуацијата на булеварите вкулучувајќи ја и Партизанска.

Дупка со дијапазон од околу педесетина сентиметри...

Возачите по скопските улици мора да возат слалом со своите автомобили за да ги избегнат шахтите кои најчесто се поставени над или десетина сантиметри под височината на асфалтот, а многу ретко онака како што треба, на исто ниво со улицата. Секојдневното минување преку нив може да предизвика сериозни оштетувања на автомобилите. Проблем се и одводите за атмосферска канализација, каде што се повторува истата состојба. Некаде, пак, обично по тротоарите, шахтите зјаат, без капак, па постои опасност некој од минувачите да се повреди. За несоодветно наместените шахти низ главните и споредните сообраќајници низ градот и покрај многубројните укажувања, досега не се најде решение, а објаснувања има многу. Најчесто како причина зошто се поставени така да претставуваат опасност за минувачите и за автомобилите се посочува лошата координација меѓу фирмите што ги местат шахтите и тие што го поставуваат завршниот слој од асфалтот. Како дополнителна причина за пропаѓањето на шахтите се посочуваат јаките и динамични удари кои ги предизвикуваат тешките товарни возила, што доведува до намалување на нивната издржливост. Како последица на тоа се појавуваат вдлабнатини на улиците. Надлежните од ЈП „Улици и патишта“ објаснуваат дека врз попуштањето на капаците може да влијае и расфрлањето на солта во зима за да се растопат снегот и мразот по улиците. Како што велат од јавното претпријатие, солта навлегува и во најмалите пукнатини кои што се наоѓаат меѓу асфалтниот слој и шахтата. Подоцна со повторното мрзнење, мразот навлегува во пукнатините, па, според нив, во рок од неколку години околу шахтите автоматски се создава вдлабнатина. - Повисоките шахти од нивото на асфалтот, пак, најчесто се резултат на лошата координација меѓу претпријатијата кои ги изведувале градежните работи. Фирмите што ги поставуваат асфалтот и шахтите не внимавале на висината “ велат од ЈП „Улици и патишта“. Во врска со тоа што на повеќе места во градот недостасуваат сливнични решетки и капаци, од Град Скопје објаснуваат дека некои граѓани ги крадат и ги продаваат како старо железо не водејќи сметка дека така ги доведуваат минувачите во опасност. - Минатата година беа заменети 720 капаци на шахтите, но многу брзо потоа дел од нив повторно недостигаа. И годинава ЈП „Улици и патишта“ секојдневно врши замена на решетки и сливници, но и сега се случува уште утредента да ги нема “ тврдат од градското одделение за односи со јавност. Според нив за секоја кражба се поднесуваат пријави до МВР и има случаи кога се откриени крадците.

Скопјанец вчера околу 14 часот пропадна во дупка, која се отворила на асфалт, кога се обидел да го паркира својот автомобил на паркингот кај ресторанот Букет во центарот на градот. Целиот преден дел на "опелот астра" потона, за среќа, немаше повредени. Очевидците велат дупката на тоа место се појавила пред петнаесетина дена и тешко можела да се забележи.Улиците и паркинзите во "Метрополата" досега голтаа луѓе, а од вчера почнаа и цели автомобили.

Раскопани, пропаднати, со огромни дупки се повеќето тротоари што се протегаат долж улиците и булеварите на главниот град. Нивното санирање беше предизвик за сите претходни општински и градски татковци, но досега, и покрај многубројните најави, ретко кој од нив покажа конкретни резултати. Оштетени тротоари најмногу има во централното градско подрачје, каде што и фреквенцијата на минувачи е многу голема. Дури и во најстрогиот центар, пешачкиот простор пред Градскиот трговски центар е сосема запуштен, а слична е и состојбата со булеварот Партизански одреди, каде што и пешачката и велосипедската патека се стари, испукани и наместа со изместен асфалт. Во очајна состојба се и тротоарите во околината на Бит- пазар, но и речиси во сите други делови на градот. Единствено граѓаните во Карпош и во Аеродром може да се пофалат со подновени патеки за пешаци. - Срамно е за Скопје и за властите да бидат слепи на огромните дупки кои се наоѓаат на тротоарите. Доколку градот сака да биде вистинска метропола и да не ни се смеат туристите кои доаѓаат кај нас, состојбата треба да се реши. Во центарот на градот повеќето тротоарите не се санирани повеќе години - вели Тамара од Ѓорче Петров. Градските власти, пак, сметаат дека состојбата воопшто не е алармантна. Според нив, секоја година се одделуваат пари во буџетот кои се предвидени и се користат за оваа намена. - Тротоарите што се во градската надлежност се санираат според градска програма. Нивната реконструкција и оваа година се одвива според предвидената програма, а за наредната година е предвидено да се подготват нови буџетски средства кои ќе бидат искористени во 2010 година “ велат од Одделението за односи со јавност на Град Скопје. Од Градот најавуваат дека, покрај санкцијата на тротоарите, е предвидено и нивно приспособување за полесно користење од граѓаните со посебни потреби.

Жителите од Козара веќе подолго време се жалат дека нема кој да им ја поправи дупката на улицата. Тие велат дека на влезот на улицата, од страната на Заводот за вработување во населбата Капиштец, со месеци асфалтот е пропаднат. - Автомобилите си ги искршивме од дупката која е голема колку кратер. Улицата ни е целата решето. Кај што не ни ги поправија прекопите што досега секој си ги правеше кога сака, а потоа само ќе ги затрупаат набрзина и асфалтот пропаѓа, па сега и ова и“вели револтиран жител кој подолго време се обидувал да стапи во контакт со општинарите. Тој тврди дека повеќепати се јавиле во Општина Центар за да реагираат, ама не добиле одговор зашто, како што вели, или службеникот не е таму или никој не се јавуваОд Центар ветија дека ќе ја санираат дупката на коловозот на Козара, но не кажаа кога. Според портпаролот на Општината, Јовица Ацковски, улицата ќе се поправи заедно со останатите улици во Центар, кои се предвидени во програмата за работа.

Р.П.

Скопските булевари со асфалт стар над 30 години

За обнова на асфалтот само на „Партизанска“ во двата правца се потребни околу 1,5 милиони евра

Сања Наумовска

Асфалтот на булеварот „Партизански одреди“ е стар повеќе од 30 години, а ништо подобар не е ниту на „Јане Сандански“, „Климент Охридски“ или на „Илинденска“. Скопските улици само се крпат, но одамна немало зафат за целосна реконструкција на некоја сообраќајница.

Во подобра кондиција се единствено улиците кои се изградени во последниве години, или пак, оние во чија близина има нов инфраструктурен објект. Така, покрај клучката „Континентал“ минатата година подновување на асфалтот искористија булеварите „Александар Македонски“ и „Гоце Делчев“, како и улицата „Беласица“, а поради изградбата на детелинката „Бит пазар“ се обнови и дел од булеварот „Крсте Мисирков“. И толку.

Во Скопје има големи температурни разлики меѓу летото и зимата, што директно влијае врз асфалтот и врз неговата долговечност, коментираат експертите. Речиси за сите наши раскрсници се карактеристични „фалтите“ во асфалтот предизвикани од кочење и стартување, особено на тешки возила. Во зима, пак, употребата на солта го нагризува асфалтот, па многу лесно се создаваат ударни дупки. Температурите се скопска реалност од која нема бегање, велат стручњаците, и затоа е неопходно одвреме-навреме стариот асфалт да се замени со нов. Која улица ќе добие приоритет, е прашање на проценка, која особено зависи од важноста на сообраќајницата, поточно од нејзината дневна оптовареност со возила.

Дотогаш, на најголемиот дел од улиците и понатаму се вози по стариот, најчесто закрпен асфалт.

Најави за обновување засега нема, а причината е добро позната, на Градот му недостасуваат финансии. Со нацрт-буџетот за следната година се предвидува ставка за поголеми реконструктивни зафати на булеварските сообраќајници во надлежност на Градот. Кои булевари и во колкав обем ќе се реконструираат, ќе се знае по усвојувањето на буџетот, врз основа на кој ќе се направи програма, велат во Градот.

Таму признаваат дека во борбата за подобрување на сообраќајната инфраструктура, предност пред реконструкциите најчесто добива изградбата на нови сообраќајници. Според пресметките, само еден должен километар обнова на булевар чини околу 100.000 евра. Познавачите на проблематиката пресметале дека за 7 километри во два правца на „Партизанска“, на пример, само за гребење на стариот и за поставување нов асфалт со дебелина од 5 сантиметри, ќе треба да се инвестираат околу 1,5 милиони евра. Од друга страна, пак, „Партизанска“ не е единствениот булевар на кој му треба итно подновување. Решението, експертите го гледаат во парцијалната обнова на делови од сообраќајниците, посебно оние што се најоштетени, како раскрсниците. Со тоа се намалуваат трошоците, а булеварите се одржуваат во солидна кондиција.

Градот, пак, во меѓувреме најавува само зголемен број акции за крпење дупки. „Според програмата, ’Улици и патишта’ ќе вршат редовно крпење на ударни дупки. Градот за таа намена обезбеди и 150 тони ладна асфалтна маса за зимскиот период“, информираат од Градот.

Раскопана дупка веќе две години е секојдневната слика на улицата " 50 Дивизија" во строгиот центар која прави застој во сообраќајот. Возачите веќе се навикнаа со своите автомобили да се движат цик-цак за да не си ги оштетат возилата. За овој проблем реагираа и жителите од зградите.
- Секојдневно е вака па морам да вртам одоколу за да си го заштитам својот автомобил бидејќи е понизок, а поправките се скапи. Веќе неколку пати е реагирано до надлежните за санирање на оваа дупка, но се уште ништо. Се надевам дека ќе се реши проблемот, бидејќи сме уморни веќе секој ден да кружиме одоколу за да стигнеме до дома - рече револтираниот жител на улицата "50 Дивизија".

Одговорните од Општина Центар велат дека се запознаени со проблемот на улицата и се надеваат дека во брзо време ќе се асфалтира дупката.
- Во моментов се изготвува програма во која и наведената улица и сите други улици кои го имаат истиот проблем со пукнатини се влезени во таа програма за санирање на улиците во 2010 година - велат од Општина Центар.

Солта што го топеше снегот, го стопи и асфалтот

Дупките што зјаат на коловозите како кратери претставуваат опасност за учесниците во сообраќајот

Снежана Калабакова


Солта што се фрлаше зимава за да го стопи снегот по улиците, го стопи и стариот асфалт од коловозите на градските сообраќајници. Дупките што зјаат како кратери претставуваат опасност за учесниците во сообраќајот. Од ЈП „Улици и патишта“ потврдуваат дека има оштетувања на коловозите на улиците речиси во сите делови на градот. Признаваат дека многу сообраќајници не се градени како што треба, а бидејќи со години само се крпат, без да им се направи комплетна реконструкција, многу брзо повторно се јавуваат пукнатини и се отвораат нови дупки на коловозите.

Оштетувања има на булеварот „Партизански одреди“, на улицата „8 Септември“, на „Јужен булевар“, „Кочо Рацин“, на булеварите „Александар Македонски“ и „Србија“. Евидентирани се големи оштетувања на асфалтот и „Вера Јоциќ“, на „Митрополит Теодосиј Гологанов“, на „11 Октомври“, „Македонско-косовска бригада“, додека улицата „Првомајска“ комплетно е за реконструкција. И во населбата Маџари полна со дупки е улицата „Благоја Стефковски“, исто како и „Самоилова“ на Кале, улицата „Васил Ѓоргов“ во населбата Капиштец.

Од „Улици и патишта“ сметаат дека за реконструкција на коловозите ќе бидат потребни од 80 до 90 милиони денари, а околу 50-ина милиони денари за поправка на тротоарите. Градот Скопје со програмата за крпење и реконструкција на градските улици предвиде 229 милиони денари за уредување на коловозите на 118 градски улици. Средствата ќе бидат сукцесивно употребувани, согласно со динамиката на изведените работи.

До 15 март „Улици и патишта“ ќе ги затвора дупките на коловозите со ладна асфалтна маса, а потоа, штом ќе се отворат асфалтните бази ќе се продолжи со топол асфалт.

„Приоритет за работа, пред се', ни се централните градски улици. За затворање на дупките на коловозите до крај на зимскава сезона имаме на располагање 200 тони ладна асфалтна маса. Од 15 март до средината на ноември дупките ќе ги крпиме со топол асфалт. Сметам дека од вкупната површина што ја одржуваме во градов од околу 2,7 милиони квадратни метри, оштетени се само 4 отсто. За санација на коловозите ќе потрошиме околу 7,5 до 8 тони топол асфалт“, вели Иван Ставрев, заменик-директор во ЈП „Улици и патишта“.

Од претпријатието информираат дека е изгребан асфалтот на автобуските постојки на „Партизански одреди“ кај Порта Влае и пред комплекс банки и во следната фаза екипите ќе асфалтираат.

ГРАЃАНИТЕ ЧАРЕ ЗА КРАТЕРИТЕ НА УЛИЦИТЕ БАРААТ НА СУД

20 тужби до Градот за штети од дупки

На рочишта ниту еден од тужителите не успеал да му докаже на Судот дека штетата е предизвикана токму од дупките кои со години зјаат низ улиците, па од градската каса не е одвоен ниту денар по таа основа

Улиците во Кисела Вода крш

Улиците во Општина Кисела Вода се партал. Скоро секоја втора е изрешетана со огромни дупки и е со искршен тротоар. Парчиња од уличен асфалт и камења се тркалаат во сите населби, од Драчево до Црниче. Во најкатастрофална состојба се улиците Иван Козарев, Сава Ковачевиќ, Вера Јоциќ, Наум Охридски, Георги Димитров, Франк Харкорт - Манинг, Огњан Прица, Киро Крстевски, Драчевска. Сите поминуваат во различен реон и сите се која од која покрш.
На пример, за да ја изодат Иван Козарев од едниот до другиот крај, граѓаните на секој чекор треба да скокаат преку отворени кратери. Во продолжение, пак, пропаѓаат во вдлабнатините на Вера Јоциќ и така натаму. По најфреквентната улица во Црниче Наум Охридски автомобилите возат како да играат ламбада. Час се во некоја дупка, час се надвор. Чиста среќа е да помине ден, а некој да не се пожали на упропастени делови на автомобил или, пак, на искинати чевли.
Овој проблем ги мачи граѓаните со години. И покрај нивните поплаки во Општината, речиси за ниту една од улиците не се најде трајно решение.
"Ќе излезат да ги пополнуваат дупките и ако работата запне некаде, престануваат. Или, пак, ќе ги пополнат чисто колку да се каже дека работат, и за неколку недели пак се искршени. Срамота е да живееме во крш, и тоа на неколку километри од центарот на градот", коментираат жителите.
Информацијата за санација на улиците Кисела Вода посочи да ја бараме на општинската веб страница.
Иако на неа се врти најава за пролетна акција за крпење на дупките во Припор, Пржино и во Црниче, никаде не пишува кога и дали ќе се поправат набројаните проблематични улици. (М.Ѓ.)

Јакимовски бара европски манири од ЕВН

Карпош не е село без кучиња и нема повеќе да дозволиме кој како стаса да ги раскопува улиците, без потоа да ги обнови квалитетно, и' порача вчера на компанијата ЕВН градоначалникот Стевчо Јакимовски. Тој покажа десетина фотографии од улици во Карпош и рече дека оние што се асфалтирани се неквалитетно изведени, што им создава дополнителна работа и трошоци.

Тој нагласи дека решение за тој проблем е во потпишување договор за банкарска гаранција, која се активира ако фирмата не исполни членови од договорот. Надлежните од ЕСМ-ЕВН, според градоначалникот, одбиваат да потпишат таков договор, па затоа тој најави екстремни мерки.

- Додека не потпишат договор за враќање на прекопите во првобитна состојба, Општина Карпош нема да им издава градежни дозволи и локациски услови. Ни продаваат балкански манири, а европските ги чуваат за Австрија. Прашувам дали вака смеат да се однесуваат во Виена, Грац, Салцбург - рече Јакимовски.

Незадоволен од односот на компанијата, тој им порача на надлежните од ЕВН целосно да ги санираат улиците. Доколку не бидат кооперативни и не се приспособат кон стандардите на општинарите, отворено им најави блокада на 50 локациски услови што моментално чекаат потпис.

Портпаролот на ЕВН, Ленче Карпузовска, изјави дека Јакимовски не смее да се одлучи на таков чекор, со кој ќе го попречува јавниот интерес. Таа кажа дека и понатаму ќе разговараат, но ако не најдат заеднички јазик, а Карпош не им издава дозволи, ќе мора да тужат.

Јакимовски вчера понуди и друго решение за ЕВН, но поскапо.

- Не мора да ги прифатат стандардите што ги нуди Карпош. Во иднина нека употребуваат машини за длабинско поставување кабли, кои воопшто не ја оштетуваат улицата - рече тој.

Карпузовска изјави дека Јакимовски ги принудува на нешто што е спротивно на законите на градење и јавни патишта. Таа беше децидна дека градоначалникот не бара потпишување договори за враќање во првобитна состојба на прекопите, туку на целата улица.

- Ние секогаш си ја исполнуваме законската обврска и она што ќе го сработиме го враќаме во состојба каква што сме затекнале. Не можеме да правиме цели улици, и да исполнуваме нечии предизборни ветувања - рече таа.

Според Јакимовски, договор за банкарска гаранција е потпишан со телекомот, а се очекува да потпишат и со јавните претпријатија. Карпузовска вели дека не и' се познати условите што им биле понудени на останатите фирми, но оние во нивниот договор, во секој случај, не им одговараат.

Јованка Ивановска

Козле е швајцарско сирење

Улицата со години е нерамна и изрешетана со огромни дупки, а досега на надлежните не им текнало да ја реконструираат, се жалат жителите на Козле

Многу пати се обративме до општината, а оттаму ни велат дека наскоро се ќе биде направено, но кога ќе се случи тоа, се уште не знаеме. Па, како и да е, си имаме вишок пари за фрлање кога треба да си ги поправиме автомобилите од дупките низ кои секојден поминуваме. Останува да видиме дали наскоро ќе газиме по асфалтирана улици или уште долго време мака ќе мачиме со дупките полни со вода, вели една жителка од улицата Сава Ковачевиќ"

На дупките им нема крај. Каде и да се завртиш, секаде има по некоја дупка, една помала, една поголема. Поголемиот дел улици на кои има дупки личат на мали езерца. Но со текот на времето тие стануваат се поголеми. Истата слика е на улиците "Вера Јоциќ" и "Сава Ковачевиќ" во населбата Кисела Вода. Жителите од овие две улици секој ден мака мачат како да поминат, а да не си ги оштетат автомобилите или пак да не скршат нога. Тие велат дека дупките се несигурни, бидејќи кога поминуваат со автомобилите не знаат на колкава дупка наидуваат, бидејќи се полни со вода.
- Секој ден иста песна, па на дупките им нема крај. Ако одиме пешки мораме да кружиме, а ако сме со автомобилот, мораме да внимаваме да не го оштетиме и да се случи тоа се сами си плаќаме. Кога врне, овде се е кал, па мораме да си носиме рибарски чизми за да стигнеме до дома. Многу пати се обративме до општината, а оттаму ни велат дека наскоро се ќе биде направено, но кога ќе се случи тоа, се уште не знаеме. Па, како и да е, си имаме вишок пари за фрлање кога треба да си ги поправиме автомобилите од дупките низ кои секојден поминуваме. Останува да видиме дали наскоро ќе газиме по асфалтирана улици или уште долго време мака ќе мачиме со дупките полни со вода, вели една жителка од улицата Сава Ковачевиќ".

Одговорните од Општина Кисела Вода информираат дека според Секторот за комунални работи по отворањето на асфалтните бази и започнувањето на градежната сезона ќе се пристапи кон санирање на ударните дупки на поголем дел од сервисните улици на територијата на општината, вклучувајќи ги и овие две улици.

http://vecer.com.mk/?ItemID=60CD5CCD2FC45B47B7DA1EE1B517C9B3