Зграда ќе го покрие ѓубрето кај „Аркадија“

Сопствениците на парцелата велат дека пред изградбата ќе го исчистат буништето во објектот и се правдаат дека никако не можеле да го спречат неговото настанување

Најдоцна до 15 февруари на местото на напуштениот објект на ресторанот за брза храна „Аркадија“, кој се наоѓа на булеварот Климент Охридски, во строгиот центар на градот, ќе почне да се гради нов деловен објект. Со изградбата скопјани ќе куртулат од големата депонија што несовесни граѓани ја создадоа на местото на некогашниот ресторан, од каде што се шири смрдеа. Сопствениците на „Аркадија“, Перо и Соња Љутикови, кои ќе бидат сопственици и на новиот деловен објект, велат дека веќе добиле локациски услови од Општина Центар, а се надеваат дека во најскоро време ќе го добијат и одобрението за градба.

Од Општина Центар потврдуваат дека е во тек постапката за добивање дозвола за градење на деловниот објект.

- Локациските услови се веќе издадени и се работи на главниот проект. Новиот деловен објект набрзо ќе почне да се гради - вели градежниот инспектор во Општина Центар, Милан Пижула.

Тој објасни дека објектот ќе има и паркиралиште, бидејќи без предвиден паркинг-простор за возилата што ќе доаѓаат во зградата нема да биде издаде одобрението за градба. Според Пижула, висината на објектот од нивото на тротоарот до венецот е од 19 до 20 метри, а за тоа колку ката ќе има, ќе одлучат самите сопственици, во зависност од проектот.

Сопствениците Љутикови велат дека деловниот објектот е предвиден во детаљниот урбанистички план за локалитетот и во Генералниот план на Скопје и дека целата постапка за градба е легална.

Ресторанот „Аркадија“ не работи веќе шест години. За тоа време несовесни граѓани празниот простор го користеа како јавно веце и како голем градски контејнер во кој без трошка срам исфрлаа градежен шут, комунален смет, непотребни предмети, расипана храна и друго. Досега никој не е казнет за ваквата ситуација, ниту сопствениците на објектот, ниту загадувачите на околината.

Сопствениците на објектот, за состојбата се бранат со објаснувањето дека не можеле да ги спречат несовесните граѓани во нивните намери да фрлаат ѓубре каде што сакаат.

- Тоа не е наша вина. Ова е ѓубре на градските госпоѓи што живеат тука во центарот. Штом ќе го добиеме одобрението за градба, веднаш ќе го исчистиме буништето. Досега не можевме ништо да сториме бидејќи и за оградување на градежна парцела е потребно да се добие согласност и од Градот и од МВР, а за тоа е потребно време - се брани Љутикова.

И од Општина Центар се бранат со тоа што инспекцијата немала ингеренции да пишува казни за сметот, иако со неодамнешните законски измени добија можност да ги казнуваат граѓаните што фрлаат ѓубре на јавни места. Општинарите велат дека единствено можат пред градежните работи да го исчистат оставениот градежен шут. Градежниот инспектор Пижула најави дека ќе испрати инспектори на терен, за да видат дали нешто може да се стори околу отстранувањето на шутот.

И во претпријатието „Комунална хигиена“ се оградуваат од ѓубрето во „Аркадија“.

- Иако знаеме за случајот, ние не можеме да сториме ништо бидејќи не сме овластени да го чистиме сметот од приватен имот - вели портпаролката Југослава Дуковска Поленак.

(А.П.)

Деловен објект ќе никне кај поранешната сендвичарница