Наместо доградби, нови згради во населбата Мичурин

Општина Аеродром веќе нема да дава дозволи за надградување на руинираните згради

Старите згради во Мичурин ќе може да се урнат и на нивно место да се изградат нови и поголеми, предвидува новиот ДУП за оваа населба, кој пред два дена го донесе Општина Аеродром. Со оваа одлука, општинарите ќе дозволат, заради безбедност на сопствениците на станови во овие згради изградени во четириесеттите и педесеттите години на минатиот век, да се изградат нови колективни домови според модерни стандарди. По оваа одлука, Аеродром нема да издава дозволи на инвеститори кои ќе сакаат да направат надградби и доградби на руинираните објекти како што се случи пред неколку години со некои од овие згради. Според новиот ДУП, кој е во согласност со Генералниот план на Скопје, во Мичурин е дозволена изградба на згради на пет ката со потпокрив. Станарите на старите двокатни згради можат да склучуваат договори со потенцијални инвеститори или, пак, и сами да инвестираат во новите колективни договори.

„За разлика од досегашните доградби и надградби на постојните објекти, дозволени во другите усвоени детални планови, со овој ДУП се дозволува да се преземат активности за уривање на старите згради, кои се супстандардни и опасни за живеење, и на нивно место да се изградат нови објекти“, вели раководителот на Секторот за урбанизам во Аеродром, Страшко Хаџи Коцев. Тој потенција дека во ДУП-от стриктно е кажано да нема доградби и надградби на постојните објекти, бидејќи тие се во лоша состојба. Покрај тоа, со новиот ДУП за Мичурин се предвидува и изградба на нова улица, која одамна е зацртана во Генералниот урбанистички план за Град Скопје, паралелно со транспортниот центар и со два нови влеза во Мичурин.

„Задоволни сме што конечно Општината го донесе деталниот план за нашата населба, зашто сега на местото на старите и руинирани згради ќе никнат нови убави објекти какви што му доликуваат на Мичурин во 21 век“, изјави Соња Бинова, жителка на Мичурин.

Законска рамка за изградба на катна гаража во Аеродром

Во близина на Транспортниот центар, во делот од Маџир Маало што потпаѓа под Општина Аеродром, ќе се гради катна гаража. Ова е овозможено со нацртот на Деталниот урбанистички план за локалитетот „Скопјанка“, урбанистичка единица Б, што вчера го усвоија општинските советници. Катната гаража ќе има приближно 2.000 квадратни метри во основа и бруто- површина за изградба од 14.500 квадрати. Планот дозволува објектот да има висина од шест ката и приземје, од кои 30 отсто ќе имаат комерцијална намена. Покрај катната гаража, планот, со кој е опфатен простор со површина од еден хектар, предвидува и изградба на новопроектирана улица „Борис Кидрич“.

http://www.utrinski.com.mk/?ItemID=40623BEF5F60734490B6AD8632BFE3EA

Инвеститорите ќе треба да ги обесштетат сопствениците на објектите што се на тоа место

Општината Аеродром ќе гради катна гаража висока 21 метар со основа од 2.000 квадратни метри, на вкупна површина од 14.500 квадратни метри. Гаражата може да има шест ката и приземје, а триесет отсто од нејзината површина ќе биде наменета за комерцијални цели.

Според Детаљниот урбанистички план „Скопјанка“, што го усвои Советот на последната седница, новата градба ќе никне кај Транспортниот центар, на дел од Маџир Маало во близина на Железничката станица и кај Вардар, а ќе ги опфати и куќите на источната страна на реката. На истиот простор планирано е да се изгради и нова улица Борис Кидрич, која ќе поминува крај гаражата и најверојатно ќе оди се' до Кејот.

Од општинското Одделение за односи со јавноста објаснуваат дека објектите што се наоѓаат на тоа место се приватни, па инвеститорите ќе треба да ги обесштетат нивните сопственици. Освен катна гаража, се планира и изградба на новопроектирана улица. Планот треба да биде изложен на јавна расправа и граѓаните ќе имаат можност да кажат што мислат за новиот детален план и да пополнат анкетни листови.

Советниците, поради деликатноста на планот, на граѓаните им овозможија да го разгледуваат 15, а не како досега 10 дена. Во моментов на овој простор има купишта ѓубре, стари алишта, пластични шишиња, стар мебел, а во импровизираните шатори живеат бездомници и нивните коњи. Граѓаните што често поминуваат таму се жалат дека неуредениот простор се користи и како паркинг за меѓуградски автобуси што минуваат низ автобуската станица.

- Овој дел од градот, иако е блиску до строгиот центар на градот, долго време не е прописно уреден. Не може ваков голем простор да се остави неискористен. Оние што живеат во близина се загрижени и за своите деца кои играјќи може да се повредат на расфрлените стари предмети, лесно може да се заразат зашто нема тоалет за бездомниците. Затоа просторот мора да се уреди, па макар и со катна гаража. Лично сметам дека старата идеја таму да се направат скејт-парк и парк за урбани спортови е многу подобра - вели Андреј Здравковски, жител од општина Аеродром.

Од Градот велат дека не се изненадени од тоа што во планот нема парк за урбани спортови, зашто подолго време не комуницираат со градоначалникот на Аеродром, Кирил Тодоровски.

Од 8 до 29 јануари годинава, нацртот на Детаљниот урбанистички план за локалитетот „Скопјанка“ - Урбана единица Б ќе биде ставен на јавна анкета во основното училиште „Браќа Миладиновци“, информираат од Општината Аеродром.

Граѓаните ќе може да го видат нацрт-планот и воедно да пополнат анкетни листови, секој работен ден од 12 до 19 часот. На анкетните листови кои ќе може да се добијат од надлежното лице во просториите на училиштето, граѓаните ќе можат да ги наведат своите забелешки, предлози и сугестии во однос на планот.

Од Општината предупредуваат дека пополнувањето на анкетните листови се врши лично, а граѓаните ќе треба да покажат документ за идентификација.Во текот на јавната анкета, во училиштето ќе има претставници од Општина Аеродром и други стручни лица, од кои граѓаните ќе може да добијат подетаљни информации за планот.

Стручната презентација на овој нацрт-план ќе се изврши на 12 јануари, во 17.30 часот, во истото училиште Нацртот на ДУП за локалитетот „Скопјанка“ - Урбана единица Б опфаќа простор со површина од 1,07 хектар и со него се предвидени површини за семејно домување во станбени згради и катна гаража.

На седницата, меѓу другото, се изгласа и Буџетот на Општина Аеродром за 2009 година, а едногласно се донесе одлука и за доделување парична помош на семејството Тодосиевиќ кое минатата недела настрада во пожар.

http://www.aerodrom.gov.mk/index.aspx?item=1237 - ОА - 11.3.2009

толку од http://www.build.com.mk/forum/forum_posts.asp?TID=79&PID=29831#29831 - неоком и ДУП СкУЕ-А , најверојатно само два максимум три спрата да добиле за надградба!?