Во Карпош, дефинитивно, ќе се гради нов натпатник

Изградбата ќе ја финансира „Акцент медија“, а веќе е избран и идејниот проект

Општина Карпош, дефинитивно, ќе гради нов надземен премин на булеварот „Партизански одреди“, најави вчера градоначалникот Андреј Петров. Тој информираше дека 93 отсто од жителите на Тафталиџе 1 и Карпош 3 се изјасниле позитивно во анкетата, која имаше цел да ја испита волјата на граѓаните за идејата на Општината.

Заинтересираните можеа своето мислење да го остават и на општинската веб-страница на која резултатите посочуваат дека жителите се согласуваат со проектот. Петров вели дека Општината веќе договорила изградбата на преминот целосно да биде финансирана од „Акцент медија“, која за возврат ќе добие бесплатен рекламен простор на натпатникот.

„Финансиерите веќе ја започнаа процедурата за добивање градежна дозвола, односно, им дадовме извадок од урбанистичкиот план. Проценивме дека голема е веројатноста градежните работи да започнат пред Нова година, а крајниот рок за изградба ќе се дефинира допрва и во зависност од изведувачот“, изјави Петров и рече дека Општината наскоро ќе ја одбере и дефинитивната локација на натпатникот, кој според важечкиот урбанистички план е предвиден кај општинските бараки.

Инаку, општинарите веќе одлучиле натпатникот да се гради по идејниот проект на Доминика Бошкова и Владимир Петровски, кој во 2004 година учествувал на Биеналето на македонските архитекти. Начелно, новиот надземен премин ќе биде едноставен, но функционален. (Дс.Т.)

На Бит-пазар ќе се гради надземен пешачки премин

Преминот ќе има цилиндрична форма и ќе се изгради од лесна метална конструкција

Надземен пешачки премин ќе ги спојува Здравствениот дом „Бит пазар“ и новиот плоштад што ќе се изгради спроти аптеката „Зегин“. Надлежните од Општина Чаир го чекаат главниот проект, чие идејно решение веќе е изработено и се добиени локациските услови. Преминот ќе има цилиндрична форма и ќе се изгради од лесна метална конструкција, што ќе лежи на тврда градба која завршува со скали. Предвидени се и коси рампи за хендикепирани лица и лифтови за пренос на стоки.

„Со лифтовите од отворен тип ќе управуваат вработени лица. Под надвозникот на просторот каде што сега се наоѓа булеварската ограда ќе се изгради жардиниера со зеленило. На тој начин ќе се спречи дивото преминување на пешаците и ќе се користи преминот“, вели Изет Меџити, градоначалник на Чаир.

Во главниот проект ќе биде вклучено и осветлението на преминот, но и поплочувањето на тротоарите со павер-елементи од двете страни на булеварот „Крсте Мисирков“. Надлежните од Чаир засега не кажуваат колку ќе ги чини изградбата на надвозникот, а не го откриваат ниту инвеститорот, кој ќе менаџира со просторот што ќе се користи за поставување реклами. (Сн.К.)

Градот не дозволува општините да градат надвозници

Во завршна фаза е проектот за типизација и унификација на надвозниците

Деспина Трајковска

Проектот за изградба на нов надвозник во Карпош, на булеварот „Партизански одреди“ во близина на општинските бараки, е стопиран кај градските власти. Градот не издава сообраќајна согласност за објектот, повикувајќи се на Законот за Град Скопје, според кој изградбата и одржувањето на собирните и магистрални улици е во надлежност на Градот. Градоначалникот на Карпош, Андреј Петров, не се откажува од идејата за изградба на надвозник оти, како што вели, досега многу пати општината извела проекти што не се во нејзина надлежност, но за доброто на граѓаните се реализирале со амин од Градот.

„Не отстапувам од идејата. Ако има некаков проблем поради рекламниот простор што ќе се издаде на ‘Акцентмедија‘, која за возврат во целост ќе ја финансира изградбата, ќе понудам Градот да го склучи договорот и по десетгодишниот период тој да стопанисува со надвозникот. Во случајов, интересот е безбедноста на граѓаните, а не симболичните пари што по десет години ќе ги зема општината од издавање на просторот за реклами“, вели Петров, кој се надева на скорешна средба со надлежните градски власти и надминување на проблемот. Тој тврди дека случајот со „Влајко“ е чист, дека општината има сообраќајна согласност за него и дека бил извршен и технички прием.

Од Градот, пак, ги демантираат овие тврдења и додаваат дека, спротивно на законот, поставен е и надвозникот во Чаир. И за двата случаја не сакаат многу да коментираат, оти тоа веќе било завршена работа. Инаку, од Градот најавуваат скорешна презентација на проект со кој ќе се дефинира изгледот на надвозниците во Скопје, кои треба да се исклучиво градски проекти. Засега е познато дека генерално ќе бидат едноставни, но функционални, со простор предвиден за информативен материјал и без средишни столбови. Во зависност од ситуацијата на теренот, типизираните надвозници ќе можат да се приспособуваат на состојбите, односно, нивниот лик ќе може да се менува, но без да се изгубат генералните зацртани параметри. Проектот за типизација и унификација на надвозниците го изработуваат стручни лица од Град Скопје во соработка со колегите од Архитектонскиот и Градежниот факултет.

Новите надвозници ќе бидат без покрив и од лесна конструкција

Изведбата на еден типизиран надвозник би чинела околу 100.000 евра

Деспина Трајковска

Градските власти го изработија идејниот проект за унификација на надвозниците што во иднина ќе се градат на подрачјето на Скопје. Тој ќе претставува пример за изгледот на новите надвозници и во зависност од условите на теренот ќе може да трпи корекции. Генерално, надвозниците што ќе се градат ќе бидат едноставни и функционални, со два пара скали и лифтови од двете страни на преминот. Тоа ќе биде отворена конструкција, без средишни столбови и покрив. На објектот ќе има можност за поставување информативен или рекламен материјал. Според Влатко Петровски од Секторот за планирање и уредување на просторот во Град Скопје, кој заедно со тројца професори од Архитектонскиот и Градежниот факултет го работеа проектот, предвидено е надвозниците да се изведуваат од лесна челична конструкција склопена во фабрика, која само ќе се намонтира на предвидената локација.

„Во основа, проектот ги дава главните карактеристики на натпатниците кои во зависност од теренот ќе се приспособуваат. На пример, надвозниците во Карпош и во Ѓорче Петров ќе се разликуваат по должината, имајќи го предвид профилот на булеварот ‘Партизански одреди‘, односно на улицата ‘Ѓорче Петров‘“, вели Петровски, кој потенцираше дека надвозниците ќе може да ги гради исклучиво Градот Скопје, имајќи ги предвид законските норми, што не беше случај со изградбата на премините во Чаир и во Влае.

Инаку, градските власти посочуваат дека веќе се преземаат активности за изградба на пет надвозници и тоа по еден во Ѓорче Петров, Карпош, Чаир и два на подрачјето на општината Гази Баба. „Ниту за еден од нив финансиската конструкција не е затворена, но веќе се размислува за начинот на финансирање. Можно е пари целосно да обезбеди Градот, но не е исклучена можноста некои од натпатниците да ги изградат заинтересирани инвеститори на кои ќе им биде отстапен простор за рекламирање на преминот“, додава Петровски. Според процените, изведбата на еден натпатник би чинела околу 100.000 евра. Засега од Градот не сакаат да посочуваат термини за почеток на изградба на некој од планираните пет надвозници. Сепак, голема е веројатноста за нивна изведба во скоро време, имајќи предвид дека натпатниците пред дваесетина дена беа најавени како дел од градежната офанзива на Градот за оваа и за идната сезона.

Ќе се гради надвозникот на Бит-пазар

За десетина дена на Бит-пазар ќе започне изградбата на надвозникот што го планираше подолг период Општина Чаир. Стартот на градежните зафати го одложија проблеми со подземниот катастар, кои се и причина за ревидирање на проектот што го изработи фабриката за монтажни елементи „Карпош“. Надвозникот треба да се протега од аптеката на „Зегин“ на другата страна од булеварот „Крсте Мисирков“ до продавницата за грнчарски производи. Должината на надвозникот ќе биде 75 метри со висина од 4,5 метри и уште три до врвот.

Од Општина Чаир велат дека поради опасноста од оштетување на подземните инсталации биле разгледувани две варијанти според кои би можело да се изгради овој надвозник. Едната е темелите да влезат под водоводните цевки за да не дојде до нивно оштетување, а другата странично да се постават и да се поврзат со греда.

„Инвеститор на надвозникот е ’Акцент медија‘, која ќе го добие на користење од десет години за поставување реклами. Фабриката ’Карпош‘ многу брзо ќе ги постави монтажните елементи. Временските услови ќе бидат битен фактор само околу бетонирањето на темелите на надвозникот. Општина Чаир веќе има издадено дозвола за градба“, вели Омер Фејзи, раководител на Одделението за урбанизам во Чаир. (Сн.К.)

Надвозник на Бит-пазар

Испукани ѕидови, пропаднат таван и голем број вирчиња од водата што постојано капе од таванот, е состојбата во која се наоѓа подземниот премин во близина на хотелот „Континентал“. Опасноста од негово попуштање секој ден е се пореална, а за решавање на проблемот надлежните институции се уште не преземаат ништо. Овој премин се смета за еден од најкористените во Скопје. Низ него секојдневно поминуваат стотици граѓани и студенти поради тоа што во непосредна близина се наоѓаат студентскиот дом „Стив Наумов“ и неколку факултети. Во подземниот премин работат и десетина дуќани, чиишто сопственици се жалат дека поради состојбата во која се наоѓа луѓето се повеќе го одбегнуваат, па тоа влијае и врз нивната работа. - Секојдневно поминувам низ преминот и тој се повеќе и повеќе се распаѓа. Иако станува збор за прометно место каде што секогаш има луѓе, јас, сепак, последните неколку дена избегнувам да поминувам низ него затоа што се плашам да не ми падне таванот врз глава “ вели Кристина, студентка на Природно-математичкиот факултет. Таа објаснува дека поради тоа што се плаши да ризикува и да поминува оттука за да го скрати патот, принудена е да пешачи или од кај Бит-пазар или, пак, да влегува од Автокоманда за да стигне до Факултетот. Од Општина Гази Баба тврдат дека не знаат дека тој е во многу лоша состојба, иако подземниот премин се наоѓа само на десетина метри оддалеченост од општинската зграда. Од Секторот за сообраќај на Град Скопје велат дека се запознаени со тој проблем и во моментов се уште се испитуваат причините што довеле до таквата лоша состојба. - Најверојатно водата што прокапува е последица на обилните врнежи кои го зафатија градот во изминатиот период, затоа што после направените проверки се покажа дека водоводната мрежа која поминува низ преминот е сосема во ред “ велат од Град Скопје. Оттаму објаснуваат дека најпрвин екипите што се на терен и ја следат состојбата со подвозникот треба да подготват документација за состојбата во која се наоѓа преминот и истата да се поткрепи со фотографии. - Со вака изготвената документација потоа доколку е потребно ќе се подготви проект за санација на подвозникот “ додаваат од Секторот за сообраќај на Град Скопје.