Со турската донација ќе се обноват клуновите на Камениот мост

Донацијата на збратимениот град Истанбул, од 1,2 милиона евра наменети за реконструкција на Камениот мост ќе се употреби за обновување на клуновите, информираат во Градскиот конзерваторски центар. Мостот во последниве десетина години е близу 70 проценти реконструиран, а останува да се обноват уште Стражарницата и клуновите кои ја сечат водата на Вардар. Со турската донација ќе може да се реализира реконструкцијата на клуновите, додека за Стражарницата веќе се обезбедени пари и во тек е тендерот за избор на изведувач. Во конзерваторскиот центар велат дека ја очекуваат екипата турски архитекти на кои ќе им ги пренесат своите сугестии околу потребите на Камениот мост и веруваат дека со оваа донација конечно ќе заврши децениската реконструкција.

„Со Турција соработуваме одамна, бидејќи тие имаат политика за донирање за спомениците од османлискиот период насекаде на Балканот. Од досегашната соработка знам дека тие никогаш не преземаат ништо на своја рака, туку секогаш се консултираат со нас. Ние и за Камениот мост имаме готов проект, според кој останува уште овој зафат, со оглед на тоа дека за Стражарницата се веќе обезбедени финансии. Донацијата е доволна да се затвори и оваа реконструкција, како и осветлението. Клуновите завршуваат рамно, а треба да се пирамидални“, вели Јани Антониев, директор на Градскиот конзерваторски центар и објаснува дека е планирано надворешно осветление на Камениот мост, со што тој ќе биде забележлив од далеку. Кога ќе ја добијат донацијата, ќе биде избрана и фирма која ќе го изврши зафатот, со оглед на тоа дека за него ќе биде потребна тешка градежна механизација. (С.Н.)

Скопје ја прими донацијата од Истанбул

Советот на Скопје, вчера во присуство на амбасадорот на Турција, Танер Каракаш, ја прифати донацијата од збратимениот град Истанбул за реставрација на Камениот мост. Донацијата, во висина од 1,5 милиони евра ќе биде наменета за реконструкција на клуновите на мостот, во согласност со препораките на Градскиот конзерваторски центар. Изразувајќи благодарност за донацијата, градоначалникот Трифун Костовски истакна дека Истанбул има посебно место во соработката со Скопје. Тој нагласи дека е особено задоволен, бидејќи парите ќе бидат наменети за еден од најрепрезентативни споменици на Скопје. Амбасадорот Каракаш изјави дека да се живее во Скопје е посебно чувство. (С.Н.)

МИНИСТЕРСТВОТО ЗА КУЛТУРА ГО ЗАБОРАВИ МОСТОТ, СТРАНЦИ ДАВААТ ПОМОШ

Да не беа Турците, Камениот мост и натаму ќе чмаеше недовршен

Иако лани Министерството го зеде мостот под свое, годинава за него оттаму не издвоиле ниту денар и велат дека за него надлежен е Градот

Министерството за култура годинава не одвоило ниту денар за продолжување на реставрацијата на Камениот мост. Иако лани Министерството ги презеде обврските за реконструкцијата од Градот Скопје, оттаму сега даваат изјави дека тоа не е точно. Мостот, според нив, се' уште бил грижа на градските власти.

- Поради тоа, ние немаме обврска да одвојуваме пари за него - изјави Александар Ѓорѓиев, од канцеларијата за односи со јавноста во Министерството.

Од Градот се вчудоневидени од изјавите од Министерството.

- Официјалното примопредавање на надлежноста околу реставрацијата беше извршено лани меѓу градоначалникот Трифун Костовски и тогашниот министер Илиријан Беќири. Потоа Министерството го задолжи Конзерваторски центар - Скопје да ја продолжи реставрацијата. Мостот се води како споменик од национален интерес и нормално е за него да се грижи државен орган - изјавија од Градот.

Додека Министерството не знае дека треба да се грижи за Камениот мост, во петокот градските власти и претставниците на Конзерваторскиот центар-Скопје имаа средби со турската делегација, која донираше 1,1 милион евра за довршување на објектот. Сега се чека нивниот конечен одговор за тоа на што конкретно ќе се трошат овие пари. Доколку се потрошат само на реставрацијата, тогаш се очекува обновата конечно да заврши. Според паушалните процени, за довршувањето се потребни од 500 до 800 илјади евра. Досега за обновата градските власти потрошија 3,5 милиони евра.

Во третата фаза од обновата предвидена е и изградба на плоштадот Карпошово востание, на просторот меѓу мостот и Старата чаршија, а би чинел околу 250.000 евра. Јани Антониев, директор на Конзерваторскиот центар објасни дека доколку сега се донесе одлука за изградба на плоштадот, најпрво ќе треба да се извршат сондажни истражувања за да се види дали под земјата има археолошко наследство. Доколку се утврди дека има, тогаш мора да се пристапи кон систематски истражувања. Тие се скапи, но од Центарот се децидни дека мора да се спроведат.

Надлежните очекуваат и да утврдат колку точно бил долг мостот. Се претпоставува дека околу три и пол метри од неговата должина сега се наоѓа под земја. За истражувањата е предвидено да се направи ископ од 5.000 кубни метри земја, а ќе се урнат и околу 60 метри постојни ѕидови на кејот.

Од Градот, преку кој е остварена турската донација, велат дека на стручњаците од Турција им бил презентиран проектот за реставрација.

- Стручните лица од Истанбул, откако ќе ја направат потребната анализа, писмено ќе не' известат за тоа како понатаму ќе се реализира донацијата и конкретно за што ќе се потрошат парите - велат од Градот.

За да се доврши мостот, потребно е да се изгради и урнатата стражарница, клуновите на мостот, да се пломбираат 60 лежишта од тргнатите метални конзоли и да се изведе осветлување. За стражарницата парите ги обезбеди Министерството за култура, кое лани издвои осум милиони денари, а фирмата изведувач, според нив, веќе почнала со подготвителни работи.

Изградбата на плоштадот Карпошово востание требаше да почне во мај 2000 година, но тогашниот градоначалник Ристо Пенов не ги обезбеди потребните финансии. Проблем излегоа парите потребни за истражување на земјиштето. Тогаш Пенов рече дека изградбата би траела девет месеци и би се одвивала на етапи. Според него, ако местото се раскопа наеднаш, тогаш со години на тој простор може да остане една голема дупка. Според тогашните процени, испитувањето на овој локалитет би чинело 500.000 евра.

Конечно ќе биде отстранета таблата од Камен мост

На таблата нема ниту еден податок за историјатот на мостот

Таблата до стражарницата на Камениот мост ќе биде наскоро отстранета, информира Министерството за култура. Иако изминаа четири месеци од завршувањето на градежните работи со кои стражарницата по шест години повторно си го зазеде своето место на мостот, металната табла со информации за инвеститорот и изведувачот, каква што има на секое градилиште, се' уште не е отстранета. Да биде работата поаспурдна, на таблата е испишан и датумот до кога треба да заврши реставрацијата на мостот, а кој е веќе одамна изминат.

Таблата е голема колку речиси половина стражарница и не содржи информации за Камениот мост, што логично, би ги интересирале граѓаните или туристите, туку технички податоци кои се веќе застарени и непотребни. На таблата пишува дека инвеститор на реставраторските работи на стражарницата е Владата, која за таа намена потрошила пет милиони денари, а изведувач на работите е фирмата „Металелектрик“.

Стражарницата, која се урна во Вардар при изведувањето на градежните работи во 2002 година на Камениот мост, се врати во мај годинава. Реставраторските работи на кулата ги направија екипите од Националниот конзерваторски центар. Повеќе од осумдесет отсто од камењата од урнатата стражарница се спасени и повторно вградени во кулата, а направена е и камена ограда околу стражарницата, плочник и столпчиња.

Иако уште минатата година беше најавено дека стражарницата ќе се обнови со донација од Турција, тоа не се случи поради проблемот со надзорот над изведувањето на градежните работи, кои домашните стручњаци не сакале да им го препуштат на колегите-донатори од Турција. Донацијата од 1,2 милиони евра, според најавите, ќе биде искористена за други проекти околу реконструкцијата на мостот. (С.Н.)

Камениот мост ќе добие осветление

Проектот чини околу 300 илјади евра и ќе го финансира Министерството за култура

Камени мост ќе светне во јули

Расипаните светилки ќе бидат поправени, а нови ќе се постават по целата должина на оградата од надворешната страна, по арките на сво­до­ви­те и под нив

Камениот мост ќе се гледа и ноќе

По десетина години поминати во целосен мрак, Камениот мост конечно ќе биде осветлен. Поставувањето на осветлението на најпознатиот културно-историски споменик на Скопје се врши веќе два месеца, а треба да заврши до почетокот на јули. Директорката на Конзерваторскиот центар Скопје, Ема Петрова, вели дека мостот ќе биде осветлен со два реда светилки, кои се набавени од Италија.

- Едниот ред светилки ќе биде поставен од внатрешната страна на оградата и ќе ја осветлува патеката на мостот. Другиот ред светилки ќе биде поставен од надворешниот дел на оградата и тоа линеарно, при што едни ќе бидат насочени надолу кон реката, а другите нагоре, кон оградата. Со по една светилка однатре и однадвор ќе биде осветлена и стражарницата. Освен осветлувањето, мостот ќе биде исчистен од графити со пескарење, како најевтина алтернатива - вели Петрова.Таа информираше дека со првичниот проект бил предвиден да се постави еден ред светилки, но со најновите измени мостот ќе добие поголемо осветление.

Проектот го работела скопската фирма „Блаком“, а изведувач е фирмата „Макаус“.Петрова не сакаше да каже колку ќе чини реализацијата на проектот, но одговори дека за првичната варијанта биле предвидени 16 милиони денари. Не сакам многу да говорам за парите, бидејќи произлегуваат дополнителни работи. Дојде до промена на проектот, па ќе настојувам да се заштеди што е можно повеќе - рече Петрова.

Таа се пожали дека постојните подни светилки, кои беа поставени пред неколку години при конзервацијата на објектот, веќе не можат да се искористат, бидејќи хулигани истуриле киселина врз нив. Откако била исклучена струјата, вандалите ја искорнале и инсталацијата. И првичните и сегашните светилки се порачани од Италија. Еден рефлектор чини 500 евра. Мислевме дека некои од старите ќе ги искористиме, но ништо од тоа. Веќе е доцна за дополнителна испорака од Италија, но ќе се снаоѓаме - додаде Петрова.

Камениот мост од јули ќе засвети со нови светилки

Проектот за новото осветление на мостот чини околу 300.000 евра

По неколку години темнина наредниов месец Камениот мост ќе блесне со ново осветление. До 7 јули треба да бидат завршени електричарските работи околу поставувањето на сите елементи за новата илуминација на мостот, што е дел од големите проекти на Градскиот конзерваторски центар. Оттаму велат дека веќе е реализирано пробното осветление и од јули мостот ќе блесне со нови светилки. Проектот за осветление на Камениот мост ќе чини меѓу 200.000 и 300.000 евра и ќе го финансира Министерството за култура. Изведувач на работите е фирмата „Макаус“ од Скопје.

Од Градскиот конзеравторски центар објаснуваат дека на првите четири арки од објектот во правец на плоштадот „Карпошово востание“ поставени се бехатон плочи и дозни. По линијата на оградата се поставуваат држачи за светилките, а од внатрешната страна е извршена замена на електричните кабли.

„Дел од светилките за мостот веќе се пристигнати од Италија. Кога ќе се вклучат тие ќе формираат светлечка линија на оградата. Светилките се производ на фирмите ’Симес‘ и ’Тарџети‘ и ќе бидат со различна јачина. Одреден број светилки ќе ги осветлуваат арките на мостот, а други оградата, односно светлина ќе навлегува до длабочините на реката Вардар. Некои светилки специјално се доработуваат во Италија“, вели Ема Петрова, директорка на Конзерваторскиот центар.

Паралелно со поставувањето на осветлението ќе се бришат и графитите од мостот. Оваа акција ќе се реализира по втор пат, бидејќи по првата акција мостот повторно беше ичкртан. (Сн.К.)

http://www.utrinski.com.mk/?ItemID=DBF9186E211B494891D39753BD914195

Паралелно со поставувањето на осветлението ќе се бришат и графитите од мостот. Оваа акција ќе се реализира по втор пат, бидејќи по првата акција мостот повторно беше ичкртан. (Сн.К.)

Денес на плоштадот Македонија, со почеток во 21.30 часот, Министерството за култура и Владата на Република Македонија, ќе го промовираат проектот за илуминација односно осветлување на Камениот мост, најимпозантниот симбол на мултикултурното поврзување на градот Скопје. Промоцијата ќе ја извршат премиерот Никола Груевски и министерката за култура Елизабета Канческа-Милевска.

Осветлувањето на Камениот мост не само што ќе претставува туристичка атракција, туку значително ќе придонесе за заживување на левата страна од реката Вардар

Најимпозантниот симбол на мултикултурното поврзување на градот Скопје, Камениот мост кој се наоѓа во центарот на Скопје и ги поврзува стариот и новиот дел на градот, протегајќи се во продолжение на плоштадот Македонија доби осветлување.

Министерството за култура и Владата на Република Македонија, го реализираа проектот за илуминација односно осветлување на Камениот мост, чија промоција се случи вчеравечер. На промоцијата присуствуваа министерката за култура, Елизабета Канческа -Милевска, премиерот Никола Груевски и скопскиот градоначалник Коце Трајановски.

Осветлувањето на Камениот мост е уште еден капитален проект на Министерството за култура, со чија реализација, овој препознатлив белег на Скопје и на Република Македонија блесна во полн сјај.

Мостот е осветлен со три типа на светилки, односно со повеќе од 300 светилки.
Од внатрешната страна на оградата на мостот за осветлување на газечката површина поставени се 32 светилки, а од надворешната страна на мостот, во два реда во висина на венецот кој се наоѓа помеѓу оградата и телото на мостот поставени се 238 линиски флуоресцентни светилки.
Инаку, половината од овие светилки се насочени нагоре со цел да ја осветлуваат оградата на мостот, а другата половина се насочени надолу за да го осветлуваат телото на мостот.
Поставени се и 64 светилки во арките на мостот, и поставени се три светилки со цел да се осветли стражарницата од надворешната страна и една за да се осветли стражарницата од внатрешната страна.

Светилките се во топлобела боја, која е во согласност со бојата на каменот на мостот и му дава изглед на романтичност и атрактивност.

Осветлувањето на Камениот мост не само што ќе претставува туристичка атракција, туку значително ќе придонесе за заживување на левата страна од реката Вардар и ревитализирање на Старата скопска чаршија, оживување на предел каде во моментот во тек е изградбата на Стариот театар и Музејскиот комплекс ,,Музеј на ВМРО" и ,,Музеј на жртвите од комунизмот".
Осветлувањето и илуминацијата на Камениот мост беше изведена според проектот на Влатко Тодоровски изготвен според мислењето на Конзерваторскиот центар.

http://www.vecer.com.mk/default.asp?ItemID=ED6CA49ABF26FC40B17C3F4CA61064DD

300.000 евра за романтика на Камени мост

Со проектот на Влатко Тодоровски, поставени се над 300 светилки од внатрешната и надворешната страна на мостот и под арките, комплетно е заменета електричната инсталација, а поставени се и нови дозни за заштита на светилките

Камени мост по пет години во мрак конечно светна. Завчеравечер министерката за култура Елизабета Канческа - Милевска и премиерот Никола Груевски со прошетка по мостот и официјално го промовираа неговото ново осветлување, кое инаку е пуштено пред неколку дена. Илуминацијата на Камени мост ја правеше Конзерваторскиот центар-Скопје по проект на Влатко Тодоровски, со кој на мостот се поставени над 300 светилки од три типа. Монтирањето на светилките го изврши скопската фирма "Макаус".
"Светилките се во топло бела боја, која е во согласност со бојата на каменот на мостот што ќе му дава изглед на романтичност и атрактивност", велат од Министерството за култура.
Камени мост повеќе од пет години беше во целосен мрак, откако хулигани ги искршија и демолираа светилките што ги постави Градот во 2004 година при последната реконструкција на мостот.
Ема Петрова, директор на Конзерваторскиот центар-Скопје, рече дека проектот за илуминација на мостот бил изработен уште во 2006 година, но дека досега останал нереализиран, бидејќи немало доволно пари. Таа објасни дека за реализација на проектот потрошиле 20 милиони денари, или над 300.000 евра.
"Од внатрешната страна на мостот поставени се 32 светилки, а од надворешната 238 линиски флуоресцентни светилки. На арките на мостот има 64 светилки и три на стражарницата. Обновени се постоечките, а вградивме и нови дозни за заштита на светилките кои се наоѓаат на газечката површина на мостот. Променета е целата електрична инсталација во мостот, бидејќи постојната беше комплетно уништена. Светилките, кои се штедливи, набавени се од италијанските фирми Симес и Торџети", рече Петрова.
За да не се повтори случајот од пред пет години, кога по само неколку месеци не остана ниту една светилка на мостот, Конзерваторскиот центар-Скопје и Градот се договориле да има зајакнато обезбедување на мостот.
"На градоначалникот Коце Трајановски му кажав дека ние нашата работа ја завршивме и дека сега Градот треба да го одржува осветлувањето и да го заштити од хулиганите", вели Петрова.

Бојата за светилките ја преполови светлината на плочникот