МАРЈАН МИНОВСКИ, СОПСТВЕНИК НА ФИРМАТА МИ-ДА, ЗАСТАПНИК НА ВОЗИЛАТА ФОРД

Волво тргнува од Нова година

Импортерот МИ-ДА ќе почне со продажба на луксузните возила "волво" во земјава, а наскоро ќе бидат удрени и темелите на новиот салон за овие возила, за што ќе бидат инвестирани еден милион евра

Автомобилскиот импортер МИ-ДА од Нова година почнува со продажба на луксузните возила "волво" во Македонија. Високи претставници на шведскиот гигант пред два дена тивко си заминаа од земјава, како што и дојдоа, откако претходно ги договорија сите технички детали со сопственикот на МИ-ДА околу генералното застапништво на овие автомобили. Писмото на намери веќе е потпишано, договорен е сервисот на возилата и едукацијата на вработените за нивно сервисирање, како и набавката на специјалниот алат. Останува уште да се удрат темелите на новиот салон за продажба на овие возила во земја, кој ќе се наоѓа веднаш до оној за автомобилите од марка "форд" . За новото застапништво кое го зема МИ-ДА, за зголемената продажба на возилата "форд" и за изградбата на автоцентарот, која ќе почне наскоро, разговаравме со Марјан Миновски, сопственикот на МИ-ДА. Тој во интервјуто за ВЕЧЕР открива дека тоа ќе биде најголемиот авто-деловен центар на Балканот.

- Веќе од Нова година официјално во постоечкиот привремен салон, кој е во склоп на МИ-ДА, ќе почне продажбата на возилата "волво", но веќе од 2009 година, тоа ќе биде урнато и на тоа место ќе биде изграден новиот салон, кој ќе биде продолжение на деловниот објект на МИ-ДА. Во средината ќе има купола, а целокупниот објект во крајната фаза (авто-деловниот центар) би требало да биде на површина од над 12.000 квадратни метри, со подземје и површина. Со тие перформанси, во околинава не очекувам да се направи толку голем авто-центар. Само салонот за продажба на возилата "волво" ќе чини еден милион евра. А, за изградбата на останатиот дел од центарот сигурно ќе бидат потребни уште неколку милиони евра. Изградбата нема да трае долго бидејќи сум стопроцентен сопственик на земјиштето, што значи дека имотноправните односи се чисти. Ги имам сите услови за градба само останува да се платат комуналиите и да се почне со изградба, но, сепак, се плашам дека ќе се јави еден голем проблем, што за жал долго го чувстувам, а тоа е дека не ќе можам да го направам тимот за работа.
До сега имаме изградено третина од објектот, кој кога ќе биде завршен ќе ги опфаќа двете страни на булеварите Илинденска и Октомвриска револуција. Тоа ќе биде максимално модерен авто-центар, каде што сервисите за возилата ќе бидат два ката под земја, а на првиот кат ќе се наоѓаат изложбените салони за возилата.

Направивте ли истражување дали возила "волво", кои се во сегментот премиум, односно луксузни автомобили, се барани на пазарот. Сепак, Македонија е сиромашна земја и луѓето немаат пари да купуваат вакви скапи возила. Кој е Вашиот интерес во овој договор?
- "Волво" е силен бренд во светот. За жал, на овој простор е малку непознат, но тоа е поради фактот што не се работело умно со промоцијата на овој бренд. Тука ќе направиме исчекор во делот на што повеќе да биде присутен на скопските улици и во земјава, воопшто. Не мислиме дека тоа ќе го направиме преку ноќ или чудо за една година. Тоа е долг процес. Но, мислам дека ќе успееме бидејќи ова возило е далеку пред сите автомобили во сегментот безбедност. Ние точно знаеме дека таргетот за 2008 година ќе биде 50 продадени возила. Вакви автомобили обично возат лекари и адвокати, односно профил на луѓе со дефиниран психолошки лик, кои имаат свој стил. Само во Загреб речиси 60 отсто од комплетниот дипломатскиот кор возат "волво". Овие возила иако се поевтини од оние во неговата класа, БМВ и ауди, сепак, послаби се единствено во моќта на моторот.

Како почна вашата успешна приказна? Имавте ли поголеми падови во бизнисот, со оглед на фактот дека опстојувате повеќе од 20 години на пазарот?
- Сега влеговме во 20-та година од нашето постоење што е сериозен факт во секој бизнис. Имаме нагорна линија на развој на компанијата, која континуирано продолжува. Со текот на времето, кога ќе се создадат услови за тоа ќе се донесат и другите брендови, кои се дел од гигантот "Форд", а тоа се јагуар, ландровер... Во изминатиот период се обидовме и со застапништво на фиат, шкода, БМВ , но, сепак, се констатира дека во овој момент е најумно да се остане во рамките на овој круг. Пред извесен период имав еден економски неуспех со фабриката за огледала во Струга, која ја купив. Четири години се обидував да извезувам ретровизори во странство, но не успеав во таа работа. Изгубив доста пари и едноставно не можев да се пронајдам во амбиентот на Струга, затоа фабриката ја подарив.

Која марка "форд" возила е најпродавана?
- Најблиска до нашиот џеб е "форд фиеста", но и "фокусот" во многу нешта е особено добро возило. Мислам дека во овој момент на пазарот со тие перформанси нема слично возило како "фокус". Зголемената продажба се должи на работа, работа и само работа. Она што од мене го бара фабриката, јас го пренесувам на моите луѓе во менаџерскиот тим. На нив се должи овој успех.

Гигантот "Форд" купи фабрика во Романија и беше најавено дека целото производство на моторите ќе биде наменето за европскиот пазар?
- Тоа е еден тренд што се случува во цела Европа во таа трка за профит и максимално поевтино производство. Ова е резултат на влегување на Романија во ЕУ, со што имаме правна и сигурна држава каде што инвестицијата ќе биде максимално заштитена. Таму ќе треба да се склопуваат само моторите за фабриките насекаде низ светот.

Имате ли информации колку возила се продаваат во светот и на кое место се наоѓа овој гигант според продадени автомобили?
- На прво место е "Тојота", па после доаѓа "Џенерал Моторс", кој досега беше лидер на планетава, а "Форд" е веќе трет. Но, "Форд" е единствена фабрика на планетава каде што се уште бизнисот е фамилијарен, за разлика од другите, кои веќе прераснаа во конзорциуми. "Форд" е економијата на Америка, и тие кризи за кои се пишувало по весници, нема шанси да се случат бидејќи приказната е успешна. На нашиот пазар, во моментот се продаваат 12 до 14.000 возила од сите брендови. Сите ние мафтаме со некои потадоци , но сепак, тоа се многу малку продадени возила. Тоа е резултат на економската состојба и стандардот. Но, за ова сум многу оптимист, едноставно она што се случува сега во Хрватска, и што се случуваше пред 4 години во Словенија, во секој случај ќе се повтори и во Македонија. Просекот на автомобилите кои се возат во Македонија е стар. Тука драстично влијае скромниот почеток на влез на банките, кои нудат возила на лизинг. Секаква дозвола за увоз за половни возила тврдам дека е штетна од еколошки и безбедносни аспекти. Македонија води добра политиката со тоа што не дозволува да се внесува ѓубре односно амортизирани возила од ЕУ.

Што мислите за намалување на ДДВ за возилата за да се стимулира потрошувачката?
- Мислам дека со намалување на ДДВ за возила не значи дека цените нешто драстично ќе паднат, од друга страна сметам дека самите производители ќе ги зголемат цените или ќе се трудат да ги поистоветат со оние на европскиот пазар. Тука се проблем акцизите. Верувам дека треба да постои акциза, но за оној што сака да вози луксузно возило со многу моќен мотор, треба да плати за да си го дозволи тоа. Направена е погрешна поделба или граница од колку до колку кубици треба да биде зафатнината на моторот, со која цена, со која вредност. Ми се чини дека е направена груба грешка со поделбата до 1000 кубици, до 1500, до 2000 и над 2000 кубици. Тоа нема никаква логика. Изборот на граѓаните им го смалуваме и на тој начин ние форсираме на некој начин одредени брендови. Не сакам да размислувам дека поделбата на кубикажата е намерно така направена за да едноставно се поддржуваат одредени брендови. Едноставно не сакам да верувам во тоа и затоа тврдам дека е некоја груба грешка. Зошто треба македонскиот граѓанин да биде проклет, па да вози само мали автомобили. Не зборуваме за луксуз, туку за возилата "фокус", "цитроенот C4", "астра", "меган". Тоа се семејни возила што би можело секое просечно семејство да си ги дозволи, но за жал не е така поради високата акциза.

Продажбата на возилото "форд" урива рекорди

Зголемена е продажбата на "форд" возила во Македонија во споредба со лани. Уште сега е урнат ланскиот рекорд од 800 продадени возила.На што се должи тоа?
- Во делот на "форд" возилата се случува една интересна приказна. Пред само 12 до 13 години на просторот на Македонија, "фордот" беше ретко возило. Тогаш, според статистиките учествувавме со околу 1 процент во вкупниот возен парк во земјава, а сега веќе се движиме кон 7 проценти со таргет да дојдеме до 10, за една година. Веќе имаме втор потпишан договор за генерално импортерство со Форд од Мичиген, Детроит и тоа со компанија Ми-Да Моторс што е чудо, бидејќи тој е планетарен џин. Во Америка да се потпише договор со правно лице од Македонија, и тоа уште пред 10 години е сериозен факт, но тоа досега не сум го злоупотребувал. За разлика од овој факт, повеќе од половина од автомобилските куќи во земјава се експозитури на соседните земји.

Радмила Ј. НИКОЛОВСКА