СЕ БАРА ИНВЕСТИТОР ЗА ИЗГРАДБА НА ЛУКСУЗЕН ХОТЕЛ КАЈ МОБ

Владата планира изградба на уште еден луксузен хотел во центарот на Скопје. Се бара бренд инвеститор за кој ќе гради на локација веднаш до зградата на Македонската опера и балет.

За хотелот кај Рамстор од Министерството за транспорт велат дека изградбата е во тек.

Луксузен хотел ќе никне кај МОБ

Министерството за транспорт ќе бара инвеститор кому ќе му даде идејно решение вредно околу 30.000 евра за изгледот на хотелот за да се вклопи во „амбиенталната целина со објектите во опкружувањето“

Владата ќе бара нов инвеститор за да изгради луксузен хотел кај Македонската опера и балет на земјиште што беше во сопственост на австриската компанија „Алпине“. Во Министерството за транспорт и врски, кое веќе објави конкурс за идејно архитектонско-урбанистичко решение за хотелот со пет ѕвезди, само информираат дека земјиштето е во сопственост на државата, без детаљно да објаснат зошто е одземено од претходниот сопственик.

- Земјиштето по поништувањето на Решението за трансформација на австриската компанија „Алпине“, станува сопственост на Република Македонија - велат во министерството.

Вчера не успеавме да стапиме во контакт со австриската компанија „Алпине“ за детаљни информации за губењето на атрактивната парцела во центарот на Скопје и дали евентуално ја обжалиле одлуката со која е поништено решението за трансформација.

„Дневник“ пред две години објави дека на истата локација компанијата „Балкан хотелс енд ресортс“ од Луксембург ќе гради хотел со пет ѕвезди. Локацијата требаше да ја купи од австриската компанија „Алпине“, која тогаш била сопственик на атрактивното земјиште во строгиот центар на Скопје.

- Преговорите завршуваат и очекуваме деновиве да го потпишеме договорот со „Алпине“ за купување на земјиштето - потврди тогаш за „Дневник“ Аријан Реџепи, еден од партнерите во „Балкан хотелс“.

Детаљниот урбанистички план за „Мал ринг“ е изменет на крајот на февруари годинава пред локалните и претседателски избори за оваа парцела да добие „комерцијална и деловна намена“. Нема официјални информации за што претходно било резервирана оваа парцела.

Од министерството за транспорт не одговараат зошто државата ќе потроши триесетина илјади евра за идејното решение односно за изгледот на хотелот кој ќе го гради приватен инвеститор. Во огласот стои само дека тој треба да се вклопи во „амбиенталната целина со објектите во опкружувањето“.

Од министерството за транспорт објаснуваат дека по изборот на идејното решение земјиштето ќе биде отуѓено.

- За ова земјиште ќе се распише објава за јавно наддавање за да се продаде. Најповолниот понудувач за изградба на хотелот ќе биде задолжен да ги следи насоките кои се дадени со избраното идејното решение - информираат од министерството.

Претставникот на компанијата од Луксембург пред две години за „Дневник“ потврди дека преговараат со хотелите „Радисон сас“, „Хајат“ и „Шератон“ за земање лиценца.

- Најдалеку се отидени преговорите со „Радисон сас“. Хотелот во Скопје ќе биде прва наша инвестиција на Балканот, а планираме уште еден во Црна Гора. Инвестицијата овде ќе чини 37 милиони евра. Ќе го ангажираме најпопуларниот архитект во хотелиерската индустрија - изјави пред две години Аријан Реџепи, еден од партнерите во „Балкан хотелс“.

„Балкан хотелс“ е инвестициски фонд од Луксембург. Се занимаваат со изградба на хотели. Според Реџепи, поседувале повеќе хотели во Франција и на Алпите, а како актуелна интересна дестинација за инвестирање го гледаа Балканот.

Александра Филиповска

Криминал лежи во луксузниот хотел

Министерството за транспорт и врски по десет години утврдило дека земјиштето кај МОБ незаконски и' било доделено на австриската компанија „Алпине“ и во февруари го вратило во државна сопственост. Сега се бара инвеститор за хотелот, а веќе е објавен оглас за идејно решение

Австриската компанија „Алпине“ десет години незаконски на тапија ја имала атрактивната парцела кај Македонската опера и балет на која сега државата ќе бара инвеститор за изградба на хотел со пет ѕвезди, тврди Министерството за транспорт и врски.

Затоа била поништена незаконската трансформација на земјиштето, кое е вратено во сопственост на државата. Сега се бара инвеститор за хотелот, откако веќе е објавен оглас за идејно решение.

Иако парцелата незаконски е доделена, нема одговор од Министерството за транспорт дали ќе побараат некој од претходните министри во ресорот да понесе одговорност за незаконски доделеното државно земјиште.

Во компанијата „Алпине“ нема одговор што се случувало сиве овие години. Објаснувања од директорот за целиот случај најавуваат за понеделник.

Работата со парцелата е заплеткана од 1999 година, кога тогашната влада на Љубчо Георгиевски и министерот Љупчо Балковски, со непосредна спогодба земјиштето го дала на користење на австриска „Алпине“. Тогаш никој не го открил овој скандал, иако се работи за атрактивно земјиште во центарот на Скопје тешко милиони евра. Работата ја довршил Агрон Буџаку, министер на ресорот во 2003 година, кадар на ДУИ, кој истата година земјиштето и' го дал во трајна сопственост на компанијата.

Имотен лист за земјиштето добила фирмата-ќерка на „Алпине“, „Алпине Александар“ по Решение за денационализација издадено од Министерството за транспорт во 2003 година.

Работата се актуализира откако „Алпине“ сака земјиштето да му го продаде на инвестицискиот фонд регистриран во Луксембург, „Балкан хотелс анд рисортс“. Неговиот претставник Аријан Реџепи пред две години за „Дневник“ потврди дека бара понуди од повеќе хотелски брендови и најави дека на тоа место ќе се гради „Радисон САС“. Тој информира дека преговорите со „Алпине“ се при крај и треба да го добие земјиштето.

Од почетокот на 2007 до септември 2008 година никој во Министерството за транспорт не открил дека станува збор за криминална трансформација. Дури во септември лани Владата проценува дека земјиштето дадено на користење не смеело според закон да се претвори во трајна сопственост и истото тогаш повторно го враќа во државна сопственост. Од Транспорт информираа дека земјиштето е сопственост на државата и на него, според детаљниот урбанистички план, е предвидена изградба на хотел.

Пред неколку дена Министерството за транспорт објави повик за идејно решение на хотелот, иако него ќе го гради приватен инвеститор. Оттаму не одговорија зошто државата ќе потроши триесетина илјади евра за идејното решение, односно за изгледот на хотелот што ќе го гради приватен инвеститор. Во огласот стои само дека тој треба да се вклопи во „амбиенталната целина со објектите во опкружувањето“.

За експертите е спорно тоа што државата бара идејно решение за приватен инвеститор и тврдат дека ако идејата е да дојде некој од поголемите хотелски брендови, идејното решение ќе биде голема пречка.

- Големите хотелски имиња имаат свои стандарди како изгледаат нивните хотели и не би прифатиле друг тоа да им го одреди. Нема логика државата да бара идејно решение за приватен хотел - велат експертите.

Александра Филиповска

„Алпине“ го загуби хотелот, ги доби патиштата

„Алпине“ доби голем колач од парите предвидени со проектот за реконструкција и изградба на регионални патишта, за кој Владата планира да потроши 120 милиони евра. Во март годинава фирмата доби околу девет регионални правци од објавени 11, со вредност од околу 27 милиони евра. „Алпине“ беше една од заинтересираните фирми за да биде концесионер на нашите автопатиштата. Инаку, „Алпине“ имаше спор со Владата во Србија поради концесијата за изградба на автопатот Хоргош-Пожега. Поради доцнењето на градежните работи, српските власти ја раскинаа концесијата.

Скандали во темелите на хотелот

Австриската компанија „Алпине“, која 5.000 квадрати кај МОБ за изградба на хотел ги добила со непосредна спогодба во 1999 година за скандалозни 100.000 евра, сега со скандалозна министерска одлука ја изгуби атрактивната парцела

Австриската компанија „Алпине“ го обвинува министерот за транспорт, Миле Јанакиески, дека незаконски им ја одзел парцелата кај Македонската опера и балет, која тие ја добиле од државата пред десет години за изградба на хотел.

И покрај тоа што второстепената владина комисија неговото решение го прогласила за незаконско, Јанакиески втор пат донел исто решение со кое им ја одзел атрактивната локација на Австријците за која тие добиле право на сопственост во 2003 година. Воедно, Министерството за транспорт минатата недела распиша оглас за идејно решение за изградба на хотел со пет ѕвезди на ова место, а инвеститор за земјиштето и хотелот допрва ќе се бара. Неизвесно е како министерот тоа ќе го изведе, кога правото за користење на парцелата се' уште е на име на Австријците.

„Алпине“ најавува дека за незаконската одлука на Јанакиески ќе ги запознае сите релевантни меѓународни институции во земјава, а постапката за враќање на земјиштето во нивна сопственост ќе ја тераат судски.

ЈАНАКИЕВСКИ НАД ВЛАДИНАТА КОМИСИЈА

- Владината комисија ја поништи одлуката на Министерството со образложение дека решението на министерот е незаконско. Таа укажа дека само одлука донесена во судска постапка може да претставува основа за промена на веќе запишаните сопственички права - вели правниот застапник на австриската компанија, адвокатот Томе Ивчески.

Австриската „Алпине“ го обвинува министерот за транспорт дека се поставил над судот и над владата. Според нив, тој не само што носел незаконски одлуки, туку и не им ги доставувал решенијата во оригинал и на време, па тие не можеле навремено да се жалат.

- На неговото решение од 15 септември 2008 година се жалевме на второстепена владина комисија. Но, министерот не само што не ја почитуваше одлуката на комисијата од 26 мај годинава, со која му укажа дека донел незаконско решение, туку додека траеше жалбениот рок повторно донесе исто решение. Ние добивме фотокопија од одлуката на комисијата на 25 јули годинава, а министерот уште на 1 јули повторно го донел спорното решение за одземање на земјиштето и тоа со погрешни датуми. На него пишува дека е донесено на 1 јули 2008 година. Таквото решение тој го прогласил за правосилно - вели Ивчески според кој, старо-новото решение „Алпине“ го добила од Министерството на 13 август годинава.

„АЛПИНЕ“ БЕЗ ЗЕМЈА, А СО ПРАВО НА КОРИСТЕЊЕ

Од компанијата обвинуваат дека министерот ги прекршил сите нивни законски права на жалба, па дури објавил и оглас за идејно решение за хотелот без до крај да се решат имотните права врз парцелата. За Ивчески е особено симптоматично тоа што Министерството деновиве ја префрлило сопственоста на парцелата на име на државата. Компанијата за промената дознала вчера, откако побарала имотен лист од Катастарот. При последната проверка на 20 октомври годинава, Австријците се' уште биле сопственици.

- Смешно е тоа што ние на имотниот лист се' уште имаме право на користење на земјиштето, бидејќи тоа решение никој досега не се сетил да го укине. А, и законски не може да го направи тоа. Според постојните закони, ние можеме да го приватизираме земјиштето, за него сме платиле и надомест - тврди Ивчески.

Според него, Министерството постапило вака оти знаело дека по судски пат не може да си го врати земјиштето, бидејќи законските рокови за поведување судска постапка (три години) се истечени.

Според документите на компанијата, во 1999 година фирмата-ќерка на австриска „Алпине“, „Алпине-Александар“ со непосредна спогодба ја добива атрактивната парцела од 5.226 квадрати кај МОБ за изградба на хотел. За него платила надомест по 20 евра за квадрат, или околу 100.000 евра и доставила банкарска гаранција од 11 милиони марки, половина од планираната инвестиција. Во 2003 година компанијата добила решение со кое земјиштето преминува во нивна сопственост, на што не се жалеле ниту владата ниту државниот правобранител. Чист имотен лист за сопственоста добиле од катастарот на 8 мај 2006 година, откако откупиле од други сопственици околу 400 квадрати.

- Тогаш почнуваат постапка за вадење документи за градба. Во 2007 година Министерството ни издава извод од план и кажува дека на парцелата може да се гради, меѓу другото, и хотел. Ништо не е спорно до септември 2008 година - вели Ивчески.

Александра Филиповска

За Транспорт се' е законски

Министерството за транспорт тврди дека одлуката за одземање на земјиштето е законска и дека ги почитувале препораките на второстепената владина комисија.

„Препораката на второстепената комисија е испочитувана и е побарано мислење од Државно правобранителство, а препораката и мислењето се вградени во второто решение донесено од страна на Министерството. Не е точно дека комисијата препорачала судска постапка затоа што се работи за управна, а не за судска постапка. Во судска постапка не се ништи управен акт, туку во управна постапка. Второто решение на Министерството е доставено до компанијата и за тоа имаме две доставници со потпис на фирмата, кои се доказ дека е примено. Грешката во датумот е ненамерна и е исправена со печат врз исправката на датумот. Значи решението не е донесено ретроактивно. Рокот за жалба е истечен и решението е правосилно од 31 август годинава“, одговара Министерството.

Фрчат тужби за хотелот

Тужби од сите страни за атрактивната локација кај Македонската опера и балет - тужби најавува и министерството за транспорт и врски и австриската „Алпине“

Главните менаџери на австриската компанија „Алпине“ денес доаѓаат во земјава за да го расчистат спорот со Министерството за транспорт и врски за, според нив, незаконски одземената атрактивна локација за изградба на хотел кај Македонската опера и балет. Во меѓувреме фрчат тужби од сите страни. Министерството ќе го тужи за клевета правниот застапник на фирмата ќерка на „Алпине“ во земјава, а од обвинителството бара да гони службеничка во општина Центар. Таа, наводно, во 2003 година го потпишала решението за трансформација на сопственоста врз спорното земјиште со што „Алпине“ ја добила локацијата за хотелот. Со тужби не заостанува ни „Алпине“. Правниот застапник на австриската компанија, адвокатот Томе Ивчевски, најави дека ќе го тужи министерството за незаконски одземеното земјиште, но и дека со проблемот ќе ги запознае сите меѓународни институции во државата.

Тој завчера на „Дневник“ му ги презентираше документите кои, според него, докажуваат дека министерството годинава незаконски им го одзело земјиштето кое од 2006 година е на нивно име заведено во катастар. Министерството ги демантираше сите негови тврдења квалификувајќи ги како невистини. Во демантот до „Дневник“ Министерството пишува:

„Обидот за трансформација на земјиштето од право на користење во право на сопственост бил незаконски, а со тоа и донесеното решение, кое министерот во 2008 година го поништи. Причините за поништување се неможноста по ниту една важечка законска регулатива компанијата „Алпине“ да се стекне со право на сопственост за земјиште кое им било дадено на користење, нагласуваме само на користење. Со решението за враќање на земјиштето се исправа незаконска грешка која неколку години се провлекувала“.

Адвокатот на Австријците го обвини министерот Миле Јанакиески дека се поставил над судот и над владата и донел незаконско решение.

- Второстепената владина комисија ја поништи одлуката на Министерството со образложение дека решението на министерот е незаконско. Таа укажа дека само одлука донесена во судска постапка може да претставува основа за промена на веќе запишаните сопственички права - изјави завчера Ивчески.

Министерството тврди дека во решението се содржани препораките на Владината комисија, кои министерот ги почитувал.

- Како што знаете ноторен факт во правна теорија е дека решение донесено во управна постапка не може да се поништи во судска постапка, па Министерот дури и да сакал не можел со тужба да бара поништување на тој акт во судска постапка. На Томе Ивчевски како адвокат на „Алпине“ би требало да му биде познато ова - пишува во демантот од министерството.

Правни експерти тврдат дека министерството немало право да им го одземе земјиштето на Австријците без судски да докаже дека постапката за трансформација на земјиштето од 2003 со кое тоа преминува во нивна сопственост е незаконска.

Според документите, во 1999 година фирмата-ќерка на австриска „Алпине“, „Алпине-Александар“ со непосредна спогодба ја добила атрактивната парцела од 5.226 квадрати кај МОБ за изградба на хотел. За него платила надомест по 20 евра за квадрат или околу 100.000 евра и доставила банкарска гаранција од 11 милиони марки, половина од планираната инвестиција. Во 2003 година компанијата добила решение со кое земјиштето преминува во нивна сопственост, на што не се жалеле ниту Владата ниту Државниот правобранител. Чист имотен лист за сопственоста добиле од катастарот на 8 мај 2006 година, откако откупиле од други сопственици уште околу 400 квадрати земјиште. Во 2007 година министерството им издало извод од план и кажува дека на парцелата може да се гради, меѓу другото, и хотел. Истото министерство прво во септември лани, а конечно на крајот на август годинава ја поништи трансформацијата како незаконска. Само два месеца подоцна Министерството објави оглас за идејно решение за изгледот на луксузен хотел што треба да се гради на оваа локација, а која се' уште не е ни продадена.

Александра Филиповска

Хотел со пет ѕвезди не значи и брендиран

Ако државата има намера да донесе познат хотелски бренд, логично е тој сам да си направи идејно решение, со своја специфика

Билјана Ангеловска

Ќе добие ли Македонија, конечно, брендиран хотел, дали државата има вистинска намера да донесе во Скопје познато име од светскиот хотелиерски бизнис или сака само да го испита пулсот кај евентуалните заинтересирани инвеститори за изградба на хотел од највисока категорија? Зашто хотел со пет ѕвезди не значи истовремено и познат бренд.

Кога пред извесно време Министерството за транспорт и врски објави

конкурс за изработка на идејно архитектонско и урбанистичко решение за хотел со пет ѕвезди во строгиот центар на Скопје, јавноста се разбранува околу локацијата планирана за тој вид градба, а веднаш почнаа и нагаѓањата каков хотел ќе се гради, па се шпекулираше со имиња како што се „Шератон“, „Радисон“, „Хилтон“. Меѓу граѓаните остана да виси дилемата кој е тој бренд што ќе го додаде Скопје како алка во својот познат синџир хотели.

Сепак, во конкурсот воопшто не се наведува дека идниот хотел ќе биде брендиран, туку само дека објектот треба да има намена хотел со пет ѕвезди. Тоа, ако се има предвид дека се бара архитектонско решение, воопшто не е проблематично, особено што, од една страна, конкурсот не е меѓународен, а од друга страна, и поради фактот дека се бара само идејно решение кое во натамошната постапка и не мора да биде обврзувачко за идниот главен проект. Имено, во конкурсот се бара „објектот да ги задоволува највисоките естетски и архитектонски критериуми преку примена на традиционалниот материјал и да има архитектонски израз што ќе биде во контекст на архитектурата, пред се', со објектот на МНР“. Парцелата наменета за изградба на хотелот е со вкупна површина од 5.306 квадратни метри, од кои за градба се наменети 2.263 квадрати. Објектот ќе може да има најмногу седум ката и потпокрив, со максимална висина од 29 метри.

Оттаму, евидентно е дека бараното идејно решение ја опфаќа архитектурата на објектот, значи формата, ликот, катноста. Но, познавачите велат дека, реално, нема некоја логика во потегот да се прави идеен проект за непознат инвеститор. Доколку, сепак, се работи за некој домицилен инвеститор кој би градел хотел со пет ѕвезди, тогаш можеби сето тоа до некаде е в ред. Меѓутоа, ако е намерата навистина да се донесе некој бренд, тогаш многу е пологично тој сам да си направи идејно решение, со своја специфика. Сепак, иако во конкурсот не се спомнува брендиран хотел, не е исклучено дека такво нешто ќе се случи, бидејќи брендот отпосле ги вградува своите специфики.

Од друга страна, македонските архитекти воопшто не се во подредена положба кога треба да се проектира хотел со пет ѕвезди. Особено што се работи за објект што треба да ги исполни пропишаните домашни стандарди, кои се речиси 90 проценти усогласени со меѓународните стандарди, а се однесуваат на техничкиот дел на самиот хотел, во кој спаѓаат опременоста на собите, постоењето инвалидски соби, ПП-заштита (систем за дојавување и за гаснење пожар) и друго. Според Правилникот за категоризација, моментално во Скопје има пет хотели со пет ѕвезди - „Холидеј ин“, „Александар палас“, „Арка“, „Стоун бриџ“ и „ТЦЦ-плаза“.

„Има примери кога еден инвеститор е сопственик и го проектира, па дури и го гради објектот, а потоа некој бренд го купува. Но, притоа, секако, треба да бидат исполнети сите стандарди и да биде применета одредена технологија, се' да биде според бараните критериуми. Може проектантот да го испроектира и да го изгради објектот, а потоа да се повика некој бренд да каже дали е заинтересиран, а потоа ќе каже дали го дава името и колку чини тоа. Значи, брендот може да го стави недвижниот имот во својот синџир“, вели архитект Златко Тодоров, чија градежна фирма „Кубус“ успешно настапува на градежниот пазар во Москва, каде што веќе извесен период проектира и гради големи објекти, како што се хотели, банки и трговски комплекси.

Тодоров потенцира дека како секоја инвестиција, така и проектирањето и изградбата на хотели од највисока категорија носи ризик, во смисла дали ќе бидат испочитувани потребните стандарди и критериуми, на пример, на еден „Хилтон“. Појаснува дека е сосем логично оној што ќе се впушти во проектирање, па и изведба на еден таков објект, претходно да има контакт со потенцијалниот бренд. А, и самиот бренд, логично, прво ќе го испита пазарот, да види дали градот (во случајов, Скопје) има капацитет за неговото име и дали е исплатливо објектот да влезе во неговиот синџир. Дури потоа може да се говори за евентуален негов влез на овој пазар. (Б.А.)

http://www.utrinski.com.mk/?ItemID=377ED29A1D95934FB202100A4ED16C05