Наместо итна гасификација на ТЕЦ Неготино, Владата планира да бара странски инвеститор што ќе ја модернизира оваа електрана за да почне да произведува евтина струја. Во очекување на клириншките 60 милиони долари за да се гасифицира Македонија, ТЕЦ Неготино наместо производител ќе остане потрошувач на електрична енергија. Директорот на ТЕЦ Неготино, Мите Јовановски, вели дека дури и електраната да се гасифицира, производството на струја и во тој случај ќе биде неисплатливо. Тој пред една година тврдеше дека лекот за ТЕЦ Неготино да проработи е итната гасификација.

„Основно погонско гориво на електраната е мазутот. Производната цена на струјата од ТЕЦ Неготино во моментот би била околу 180 евра за еден мегават-час, додека, пак, увозната цена на струјата сега се движи околу 100 евра. Ако ТЕЦ Неготино произведува струја од природен гас , таа би чинела околу 150 евра за мегават, што повторно е скапо. Ако електраната се гасифицира, искористеноста ќе се зголеми за 52%, но засега немаме конкретно решение“, објаснува за „Капитал“ Јовановски.

Тој вели дека последната информација која ја има од Владата е дека размислуваат електраната да заживее преку јавно-приватно партнерство.

„Може да се преориентираме во гасно-парен циклус, но за тоа ни требаат инвестиции. Треба да се ревитализира, гасифицира и автоматизира постоечката опрема. Иако ние можеме да работиме и со оваа опрема, сепак, се работи за стара технологија“, објаснува Јовановски.

Но, не е јасно зошто Владата со години најавува дека излезот за ТЕЦ Неготино да почне ефикасно да работи е гасификацијата, а сега ја осуетува сопствената идеја дека спасот за електраната е во јавно-приватно партнерство. Никој не кажува ниту зошто државата не инвестира во модернизација на ТЕЦ Неготино, туку бара инвеститор, кој ќе има сопственост во електраната и ќе одлучува дали струјата ќе ја извезува или ќе остане во Македонија?!

Сè уште нема детали ниту која е стратегијата за ТЕЦ Неготино конечно да влезе во погон, а да биде профитабилен наместо секоја година да „исцицува“ по околу три милиони евра само за одржување.

„Паралелно со завршување на првата фаза од гасификацијата, ќе ги преземеме сите активности потребни за пронаоѓање на стратешки партнер за ТЕЦ Неготино во трансформирање на термоцентралата од застарена и скапа технологија на мазут, во нова, модерна и еколошки прифатлива централа на природен гас. Притоа сериозно ќе ја разгледаме можноста тоа да биде комбинирана електрана, која покрај електричната енергија ќе произведува и топлина за загревање на систем од оранжерии кои ќе бидат изградени во близина на електраната. При реализација на овој проект, државата ќе задржи значајно учество во сопственоста на новата гасна централа“, пишува во Манифестот за реформи и развој на ВМРО-ДПМНЕ.

TЕЦ Неготино е енергетски капацитет стар 33 години, а од 2008 година не произведува струја. Оваа електрана и оваа година ќе биде ладна резерва, бидејќи неисплатливо е струја да се произведува од мазут. Според енергетскиот биланс, ТЕЦ Неготино и оваа година нема да произведува струја, туку ќе троши.

„Ако ТЕЦ Неготино не произведува струја и оваа година, ЕЛЕМ ќе има обврска да го снабди со струја. Изминатите неколку години сопствената потрошувачка на ТЕЦ Неготино во услови кога не работи е помеѓу 2-2,5 гигават-часови струја. Оттука, треба да се земе предвид дека ТЕЦ Неготино всушност ќе биде потрошувач, а не производител на електрична енергија“, неодамна изјави Марко Бислимовски, член на Регулаторната комисија за енергетика.

Јовановски се надева дека ТЕЦ Неготино ќе почне да работи откако ќе се изгради Клечовце-Штип-Неготино-Кавадарци кој продолжува до Битола. Јовановски објаснува дека од 2008 година оваа термоелектрана само интервентно влегува во погон. Според досегашната искористеност на капацитетите, ТЕЦ Неготино изработил околу 40.000 погонски часови, што е еднакво на седум години работење.

Експертите велат дека ако оваа електрана се гасифицира, годишно ќе произведува дополнителни 4.000 гигават-часови.

http://www.kapital.com.mk/mk/dneven_vesnik.aspx/79729/investitor_kje_go_spasuva_tec_negotino_.aspx?iId=2576

Приоритет при реализацијата на проектот за гасификација на Македонија да биде правецот Клечовце-Штип-ТЕЦ Неготино, одлучи економскиот совет на Владата на денешната седница.

Во Владата соопштија дека за оваа намена ќе се искористат парите од Клириншкиот долг, односно од средствата кои Русија и ги должи на Македонија.

- Намерата е со првиот крак што ќе се изгради од гасоводот да опфатиме околу 96 километри должина на делница која е стратешки значајна за да се донесе гас до централното подрачје на Македонија, да се донесе енергенс  кој е еколошки чист и на тој начин да се создадат услови за трансформација на ТЕЦ Неготино од мазут, како што сега работи на гас - изјави по седницата вицепремиерот и министер за финасии Зоран Ставрески.

Доколку има интерес од концесионери на локација која е веднаш до сегашната термоелектрана Неготино, во иднина ќе се понуди изградба на уште една електрана на гас.

- Веќе имаме конкретна понуда од руска компанија, која од страна на Владата на Руската федерација е определена за партнер на Македонија во реализацијата на овој проект, што значи дека веќе е завршена фазата  на технички разговори, каде ќе минува трасата и колку ќе чини. Сега Владата се определи за оваа траса како приоритетна, а во понатамошните фази ќе се реализираат и останатите траси од магистралниот гасовод кои ќе ја опфатат делницата што ќе помунува преку Хамзали,  Струмица, Валандово  до границата со Грција, како и делот од Скопје, Тетово, Гостивар во однос на кои средства ќе добиеме од Европската банка за обнова и развој до крајот на следната година - вели Ставрески.

http://www.novamakedonija.com.mk/DetalNewsInstant.asp?vestInstant=3589