На необезбедениот потпокрив без заштитна опрема работат четворица работници кои врз главите на минувачите коваат, преместуваат, сечат и заваруваат тешки челични профили, шини и конструкции

Џиновски билборд дивоградба, наскоро ќе биде поставен на покривот на зградата на улицата Максим Горки (над кафулето Лондон) спроти Ристиќева палата. Во строгиот центар, на плоштадот Македонија веќе три дена се заваруваат тешки челични профили, шини и конструкции кои треба да ја држат платформата за реклама со димензии од 5,5 на 3,5 метри. На необезбедениот потпокрив без заштитна опрема работат четворица работници. Коваат, преместуваат, сечат, додека десетина метри под нив минуваат голем број граѓани бидејќи овој дел од Плоштадот е исклучително фреквентен. Се разбира, минувачите не се свесни дека секој момент од покривот на зградата може да летне парче кое може да биде кобно за нив. Среќа е што во овие два-три дена не се случил некаков инцидент.

Конструкцијата на џиновскиот билборд се гради без никаква дозвола, пред очите на надлежните служби кои од нас дознаа дека на плоштадот се извршуваат некакви градежни работи. За волја на вистината, градежните инспектори од Општина Центар веднаш излегоа на терен, а заедно со нив и екипа на Вечер. На инспекторите им олесна кога видоа дека се работи за билборд и веднаш се повлекоа.

- Ова не е во наша надлежност. Дозволи за поставување на рекламни паноа издава Град Скопје, таму треба да прашате. А јас се исплашив дека се доградува потпокривот на зградата - искоментира општинскиот главен градежен инспектор Милан Пижула. Од Градот, пак, негираат дека тие ги издаваат дозволите за поставување на билборди врз објекти, нивна надлежност било поставување на рекламни паноа само на сообраќајниците.

- Дозволите ги издава Општина Центар, тоа е законска одредба. Ме чуди што општинските инспектори не си ги знаат своите надлежности, изјави Љупчо Пандиловски од Одделението за односи со јавност на Град Скопје.

БЕЗРЕДИЕ СО УЛИЧНИТЕ РЕКЛАМНИ ПАНОА

Билбордите го загрозуваат животот на граѓаните

Градските власти велат дека хаосот го создаваат паноата поставени од фирма со која Ристо Пенов склучил договор на неодредено време, како и билбордите поставени на фасади и на покриви

Хаосот со билбордите ја загрозува безбедноста на граѓаните, а од надлежните никој ништо не презема, обвинија советниците на Град Скопје на последната седница. Според Советот, хаосот се толерира, односно никој не ја контролира безбедноста, големината на билбордите, естетскиот изглед, локациите и слично. На седницата беше посочено дека билбордите во Скопје стануваат сериозна опасност за возачите и за пешаците. Беше побарано Градот да реагира, бидејќи на многу локации висат билборди што го блокираат видното поле на возачите, како и билборди што се наоѓаат среде пешачка патека. Трети, пак, се поставени високо на некоја зграда и постојано се надвиснати врз нечија глава. Многу од нив се поставени без одобрение и без елаборат дали може да издржат посилен ветер.Советникот Коле Манев посочи на два билборда во Скопје кои навистина би можеле да загрозат нечиј живот.

- Има два билборда што се вистинска опасност за граѓаните. Едниот се наоѓа на зградата на Црвениот крст, а другиот пред Културно-информативниот центар - посочи Манев.Надлежните од Град Скопје тврдат дека за секој билборд имаат елаборат со кој точно се предвидуваат правилата и условите и во кои се води сметка за стандардите за безбедност. Велат дека проблем во градот создаваат билбордите што се поставуваат на зградите со одобрение од куќните совети, но и фирмите со кои поранешниот градоначалник Ристо Пенов склучил договори на неодредено време.

- Град Скопје има склучено договор со „Еуролинија“ и „Акцент медија“ за поставување билборди и сити-лајтови на точно одредени локации во градот. Хаос се создава со билбордите што се поставуваат на канделабрите од страна на фирмата „Продукција перспектива“, со која Пенов склучил договор, како и од билбордите што се поставуваат на фасади и на покриви од згради, односно на приватни имоти. Договорот со „Продукција перспектива“ е направен на штета на Градот. Во него не е дефинирано времетраењето на договорот, како и колку реклами имаат право да постават. Градот не добива ниту денар од рекламите - изјавија надлежните од Градот.

Да се раскине овој договор, од Град Скопје реагирале до антикорупциската комисија, но таа, според нив, досега не направила ништо. Велат дека Градот е немоќен поради одредбата од договорот според која ако Градот еднострано го раскине договорот со „Продукција перспектива“, ќе мора да плати отштета од еден милион долари. Што се однесува до билбордите што се наоѓаат на покриви и кои се опасни за минувачите, од Градот објаснуваат дека не се надлежни, односно нив треба да ги контролираат општинските инспектори.

- Обично се работи за големи конструкции што имаат влијание и на статиката на зградата или куќата и затоа треба да имаат соодветна техничка документација, како и градежна дозвола. Во случај на несреќа, куќните совети ќе ја сносат одговорноста бидејки тие го издале одобрението за поставување на билбордот - потенцираат градските власти.

Јорданка Ивановска
Фото Слободан Ѓуриќ

Билбордите во Скопје се поставуваат насекаде. Пред градежни објекти, балкони, излози на дуќани, на крстосници и сообраќајници. Ако добро се погледне ќе се види дека речиси по правило, билбордите се сопственост на компанијата Акцент медиа, сопственост на австриска компанија. Узурпацијата оди до таму што билбордот на Акцент медиа кај американската амбасада е на површина колку стан од околу 70 метри квадратни, а најголема дозволена површина е под дваесет квадратни метри.

За тие билборди Градот нема одговорност, бидејќи тие се поставени нелегално, и надвор од Законот. За нивно уривање има и издадени решенија, на кои се чека, бидејќи треба да се спроведат и од Градот, но и под контрола и притисок на Министерството за транспорт и врски.
Освен со дивото поставување на мега билборди, а како наведените, така и оние пред зградата наречена Тифани, во центарот на Скопје, Акцент Медиа и по квалитетот на изработка е под стандрадите. Едноставно, поради однесувањето Акцент медиа треба да се обврзе сама да ги урне тие билборди, а во иднина да не и се дава дозвола, концесија за поставување. Ниту непосредно, нити преку фирма, која од заднина, за нејзини потреби би се основала.

Од Секторот за сообраќај на Град Скопје, кој е надлежен за издавање на дозволите за поставување на билборди, информираат дека сите дозволи за поставување на билбордите се издадени во времето кога градоначалник беше Ристо Пенов. Велат, бројот на утврдени места за билборди не е променет во последните пет години.
- За билборди се предвидени 8128 места, а цената за огласувачите е утврдена со договорите од 2001 година меѓу Град Скопје и "Акцент Медиа" и Град Скопје и "Еуролинија", во време кога градоначалник на Град Скопје е Ристо Пенов. Исто така, огласувачите на Градот му плаќаат и комунална такса во износ од 100 денари за секој метар квадратен, информираат од Секторот за сообраќај.

Тие додаваат дека голем проблем се и светлечките реклами поставени на јавното осветлување на градските улици, затоа што се поставени врз основа на договор меѓу Град Скопје и "Продукција перспектива", потпишан од претходната градска администрација. Договор за кои Градот Скопје и градоначалнникот Трифун Костовски побарале од Државната комисија за спречување на корупција да се произнесе за штетните последици кои ги произведува по Градот Скопје, но до ден денес нема одговор од антикорупциската комисија. Ако го раскинеме овој договор, Град Скопје ќе треба да и плати на фирмата милион долари!

Дрска узурпација на плоштадот со реклами на Наша ТВ

Телевизијата ниту побарала одобрение ниту, пак, може да добие, велат во Секторот за сообраќај на Скопје

Граѓаните ја плаќаат струјата што ја трошат светлечките билборди

Секој сопственик на електрично броило плаќа по 102 денара такса, од кои се плаќа уличната струја

Снежана Калабакова

Во сметките за струја, секој сопственик на електрично броило издвојува по 102 денара месечно за улично осветление и, според ЕВН, оваа сума е одредена со одлука на Владата. Од овие пари општините и Градот ја плаќаат потрошената електрична енергија за уличните бандери, а во неа влегува и делот за потрошената струја за рефлекторите што ги осветлуваат билбордите и за поставените светлечки рекламни табли. Рекламните агенции, пак, кои склучиле договор со општината или со Градот за да постават светлечки билборд или друг вид светлечка табла, плаќаат одредени паушали.

Од канцеларијата за односи со јавноста во Градот не' информираа дека за билбордите дополнително се плаќа месечна комунална такса, во која се пресметува делот и за потрошена струја. Електричната енергија за околу 800 светлечки тела се пресметува по специјализирана формула, во која се калкулира со вкупна потрошувачка од 48,84 киловати на час, по цена од 4,07 денари по киловат, согласно тарифникот на ЕВН, одобрен од Регулаторната комисија.

Сите билборди или светлечки рекламни табли се приклучуваат на електричната мрежа на уличното осветление и потрошената струја се смета за вкупна потрошена струја за улично осветление на општината. Токму затоа општините се одговорни и треба да внимаваат дали има диво поставени билборди, за кои повторно струјата ќе треба да ја плати општината од парите на граѓаните. Најголем дел од билбордите и од светлечките рекламни витрини се наоѓаат на градските улици и во централното градско подрачје.

Ленче Карпузовска, портпарол на ЕВН, вели дека на општините им се испорачува фактура за потрошената улична струја. Таа се плаќа од издвоените 102 денара за комунална такса, што ја плаќа секој сопственик на електрично броило.

Од Градот дознаваме дека постоел договор за тоа какви рефлектори можат да користат билбордите. Договорот склучен во 1998 година, со важност од 10 години, веќе е истечен и сега треба да се изготви нов. Градоначалникот Коце Трајановски во својата изборна програма најави дека во најкус можен рок ќе се ангажира да се регулира прашањето за поставување рекламни билборди и паноа.

Расклатената метална конструкција од џиновското пано е одвоена од лежиштето и на крајот лесно врзана со жичка, така што рамката која на најмало ветре се занишува, може да се откачи и да падне

Опасен билборд демне врз главите на пешаците кои секојдневно ја минуваат крстосницата кај Тутунски комбинат. Расклатената метална конструкција од џиновското пано е одвоена од лежиштето и на крајот лесно врзана со жичка, така што рамката која на најмало ветре се занишува, може да се откачи и да падне. Станува збор за една од најфреквентните крстосници во градов, каде секојдневно минуваат илјадници пешаци. Дел од нив ја забележале, дел не. Сепак сите граѓани кои стоеа под билбордот кој злокобно висеше врз нивните глави додека чекаа на пешачкиот премин, а фоторепортерот на ВЕЧЕР фотографираше, со неверување вртеа со главата.
- Боже, секој ден минувам овде, а не сум забележал дека билбордов се распаѓа. Ова навистина е премногу. Така е се кај нас. Треба нешто да се случи па да се реагира, само што после нема извини. Билбордов треба веднаш да се отстрани, а агенцијата да се казни. Да не чекаат да се струполи и да смачка некого - остро одговори еден од повозрасните минувачи.

Ова е еден пример за опасна реклама, но не е исклучок. Во градов, секое слободно место се користи за огласување со огромни конструкции и плакати опасни за граѓаните. Неодамна, од силен ветер се откачи билборд од фасадата на зграда на Никола Вапцаров во строгиот центар на Градов. Само среќа беше што овој инцидент помина без жртва Претходно, настрада пешак од конструкциите на рекламата на улицата 11 Октомври. Да не потсетуваме на трагедијата што се случи во Битола кога билборд усмрти човек.

Одговорноста за обезбедување на билбордите ја имаат компаниите што ги поставуваат. Вчера, за жал, не успеавме стапиме во контакт со одговорните од компанијата-огласувач, бидејќи менаџерите беа презафатени. Се надеваме дека по овој напис тие, но и нивните колеги од останатите маркетинг агенции ќе извршат контрола на сите билборди во градов и оние што се амортизирани, стари и дотраени ќе ги заменат со нови.

Скопјани и натаму ќе живеат во шарена метропола преполна со рекламни паноа и реклами поставени насекаде низ градот. Градските власти, и покрај тоа што најавија дека до почетокот на септември ќе донесат одлука за големината, локацијата и за начинот на поставување на билбордите, досега не го завршија проектот. Од Град Скопје велат дека навреме почнале да работат на правилникот за поставување рекламни паноа, но бидејќи станувало збор за сеопфатна анализа, било потребно подолго време од предвиденото. - Во моментот се работи на документацијата која треба да го уреди понатамошниот тек на регулирањето на овој проект. Елаборатот, пак, за поставување на рекламните паноа е целосно изработен, но се уште се разгледуваат одредени детали - објаснува Неделчо Крстевски, портпарол на Градот. Тој немаше конкретен одговор кога целата постапка ќе биде целосно готова. Од градската администрација објаснуваат дека со новата одлука, која ќе биде донесена за начинот и за условите за рекламирање, ќе се воспостават нови правила при поставувањето на паноата. Концесионерите ќе треба да исполнат повеќе услови во врска со големината, локацијата и содржината на рекламирањето. Како дополнителна мерка за решавање на проблемот, предвидено е и намалување на бројот на рекламните паноа и на светлечките реклами. Во моментов рекламни паноа може да се видат насекаде низ градот. Градежните објекти, ѕидовите на зградите, па дури и терасите, улиците и крстосниците, особено во централното градско подрачје, се покажаа како најатрактивни за овој вид огласување, а според фирмите кои го користат и најисплатливи за рекламирање поради големиот број луѓе што тука поминуваат секојдневно. Дополнителен проблем се јавува затоа што дел од поставените рекламни паноа се наоѓаат на несоодветни локации и на поголема површина од дванаесет квадратни метри, како што е дозволено според Законот за градба. Граѓаните како најголем проблем ги посочуваат рекламните паноа што се поставени на крстосниците и го блокираат видното поле на возачите, како и паноата што се наоѓаат среде пешачка патека. Рекламните паноа, пак, што се поставени високо на некоја зграда и постојано се надвиснати врз нечија глава претставуваат постојана опасност за безбедноста на минувачите. Со законските одредби е прецизирано дека за рекламните паноа со површина поголема од 12 квадратни метри е потребна посебна дозвола за поставување, за што, пак, неопходни се низа елаборати, меѓу кои и за безбедност на објектот. Последната измена во елаборатот за рекламирање на јавни површини е направена во 1998 година, и во неа единствен критериум при поделбата на локациите се сметаше пропишаната големина која не смее да надминува 12 квадратни метри. Тогаш бројот на локации за поставување паноа изнесувал 8.128 места и од тогаш до денес не се направени корекции.

ПО САМО ПЕТ ГОДИНИ ОД ПОСЛЕДНАТА ОБНОВА

Се распаѓа фасадата на зградата до Црвен крст

Станарите уште пред една година се пожалија дека од тежината на билбордот почнале да им пукаат таваните и да им протекува вода

Фасадата на зградата на улицата 11 Октомври, веднаш до Црвениот крст, почна да се распаѓа. Иако цела зграда е излепена со реклами, а на покривот е сместен еден од најголемите билборди во Скопје, цели парчиња фасада почнаа да паѓаат. Минатата недела, во вторникот, кога ниту дуваше ниту врнеше, дел од фасадата падна на тротоарот и се распарчи. За среќа, во моментот немаше никој на тротоарот, па нема повредени. Обично на делот од тротоарот каде што падна фасадата стојат пешаци, чекајќи зелено светло за да го преминат булеварот. Уште на неколку места на ѕидот се забележуваат пукнатини, од кои за кратко време ќе почнат да паѓаат парчиња фасада, иако таа беше обновена пред само пет години.
"Се враќав од работа и одеднаш пред мене падна големо парче од фасадата. Само среќата ме спаси да не ми падне дирекно на глава и да ме повреди. Па ова е срамота, ставаат толкави билборди на стара зграда, која не може тоа да го издржи и, еве, почна да се распаѓа", вели скопјанец што се јави во нашата редакција да се пожали за непријатниот настан.
Дека големиот билборд ги прави штетите на фасадата се сомневаат и станарите. Дел од нив се пожалија уште пред една година. Рекоа дека кога дошле екипите на "Акцент медија" да го поставуваат билбордот, при градежните работи почнале да им пукаат таваните и да им протекува вода во становите на последниот кат.
"Ние дадовме согласност да се постават билборди, но мислевме дека тие ќе бидат со стандардна големина, а не олкави, кои можат да ни ја урнат зградата. Билбордот е поголем од максимално дозволените 12 квадрати кои ги пропишуваат градските власти. Веднаш се јавивме во Општина Центар, но помина една година, и никој не дојде да интервенира", се пожалија жителите на зградата.
Од Општина Центар објаснуваат дека тие не дале одобрение за поставување на овој огромен билборд, и затоа веднаш ќе излезеле не терен да извршат увид на самото место и да ги преземат потребните законски мерки.
Ист ваков одговор од Општина Центар добивме и лани, кога беше поставен билбордот. Тогаш на терен требаше да излезе инспекторот Милан Пижула да утврди дали билбордот е поставен согласно пропишаните норми и да го урне, ако ги нема потребните дозволи. И годинава градежен инспектор е Пижула, а билбордот ниту е урнат ниту, пак, за него е направен увид.

(А.А.)

ФОТО:Б.Грдановски

ИСТЕКУВААТ ДОГОВОРИТЕ НА ФИРМИТЕ ШТО ПОСТАВУВААТ БИЛБОРДИ

Рекламирањето под концесија

Голем проблем за градските власти е договорот со „Продукција перспектива“, кој има неограничено времетраење, а ако Градот еднострано го раскине, на фирмата мора да и' плати отштета

Градските власти, по години хаос во рекламирањето, решија да воведат ред во поставувањето на билбордите. Локациите за рекламни паноа ќе ги дадат под концесија, за што ќе ангажираат консултант. Како мотив повеќе за конечно средување на работите во оваа дејност градските власти го користат и фактот што истекува договорот со две фирми што поставуваат билборди. Проблем е третата фирма „Продукција перспектива“, со која Градот Скопје сака да го раскине договорот, но не знае како да го изведе тоа без поголеми последици за градскиот буџет.

ОТШТЕТА ИЛИ ВЕЧЕН БИЗНИС

Според градските власти, на фирмата „Еуролинија“, која сега се вика „Лазов груп“ договорот и' истекува на 31 декември, а на „Акцент медиа“ договорот е веќе истечен. Скопскиот градоначалник Коце Трајановски вели дека најголем проблем им претставува договорот со третата фирма „Продукција перспектива“, кој има неодредено време на траење. Во случај Градот да сака да го раскине, треба да и' плати отштета на фирмата.

Договорот со „Продукција перспектива“ е склучен во 2002 година, кога градоначалник беше Ристо Пенов. Оваа фирма, според договорот, поставува унифицирани рекламни паноа што се закачени на столбовите од јавното осветление, како и билборди на фасади и на покриви од згради, односно на приватни имоти. Времетраењето на договорот не е дефинирано, ниту пак колку вкупно реклами фирмата има право да постави.

Договорот сакаше да го раскине и поранешниот градоначалник Трифун Костовски, кој изјави дека тој е исклучително штетен за Градот, оти во случај на раскинување, на фирмата треба од градската каса да и' се исплатат милион евра отштета. Тогаш Градот реагираше и до антикорупциската комисија, но ништо конкретно не се случи.

Директорот на „Продукција перспектива“, Ристо Пејовски, потврди дека во договорот постои клаузула дека Градот, доколку еднострано го раскине, треба да плати отштета. Тој не сакаше да каже колкава е отштетата, со образложение дека тоа е деловна тајна.

- Такви детали не можам и не смеам да кажам, бидејќи е деловна тајна како дел од договорот. Доколку Градот цени дека може, нека ви каже. Договорот не може тука така да се раскине поради обврските кон клиентите - вели Пејовски.

Тој вели дека се задолжени да поставуваат комерцијални патокази, но и градски, односно патокази со натпис Град Скопје или со насоки кон значајни институции и културно-историски споменици.

- Имаме поставено 800 градски патокази. Ние сите сме ги изработиле, сме ги монтирале и ги одржуваме. По евентуалниот престанок на нашето функционирање ние имаме обврска уште 15 години да ги одржуваме тие патокази, кои се во трајна сопственост на Градот - истакна Пејовски.

ПОВЕЌЕ ПАРИ ЗА ГРАДОТ

Од Градот велат дека, откако ќе истечат договорите, ќе ангажираат консултант околу доделувањето на локациите за рекламни паноа под концесија.

- Консултантот треба да ни помогне околу концесијата за билбордите, како што тоа го направивме со трамвајот и со подземните премини. Состојбата со билбордите е многу чувствителна и затоа не сакавме да импровизираме. Ќе распишеме меѓународен тендер за избор на консултант што ќе ни помогне во изработка на физибилити-студија и во утврдувањето на оправданоста на таа концесија. Како второ, консултантот ќе има задача да анимира доволен број странски компании што ќе конкурираат. Градот Скопје ќе го поделиме на неколку зони, за да не може тендерот да го добие само една компанија. На тој начин, сакаме да го демонополизираме тој сегмент од нашето работење. И нормално, Градот Скопје со тоа очекува многу повеќе пари отколку што добива сега од билбордите - вели градоначалникот Трајановски.

Сумата што сега Градот ја добива за поставување на билборди е смешна - 100 денари годишно за еден квадратен метар рекламна површина. Од 2003 година, кога се склучени договорите со „Еуролинија“ и со „Акцент медиа“, досега Градот од оваа дејност инкасирал 65 милиони денари, односно околу еден милион евра.

КОЈ ГУБИ, СЕ ЛУТИ

Засегнатите фирми не го одобруваат овој потег на градоначалникот.

Од „Лазов груп“ се скептични и сметаат дека настојувањата на Трајановски се неизводливи и дека се маркетиншки трик. Тие велат дека не се откажуваат и ќе конкурираат по истекот на договорот.

- Станува збор за маркетиншки трик. За да се реализира одлуката претходно треба да се оформи програма, а нема ниту тендерска документација. Што би консултирал консултантот? Доколку навистина Градот сака да го среди хаосот со билбордите, треба да се направи студија за која е потребен долг временски период од три години. Не може на стара подлога и стара инфраструктура повторно да се издаваат под концесија локации за билборди - изјави Горан Стојановски, директор на делот за логистика и оператива во „Лазов груп“.

Според него, на ваков начин состојбата се враќа со години наназад.

- Ние имаме 250 мегалајти и 320 ситилајти. Станува збор за европски објекти, мегалајти со платно, со осветлување однатре. Имаме проект од Градежниот факултет за безбедноста на билбордите. И ние сакаме да бидат исклучени некои билборди, оние што се лепат со хартија, оти го нагрдуваат градот и не се безбедни. А не и оние што ги почитуваат европските норми и вистинскиот квалитет, кои тоа го работат 10 години и имаат поголеми стручњаци од некојси консултант. Новиот градоначалник не е упатен во суштината на оваа работа - смета Стојановски.

Од „Акцент медиа“ не одговорија дали би учествувале на евентуален конкурс за локации за билборди. Оттаму само велат дека досега во договорот со Градот имале концесија за поставување на 250 билборди и не се противат на ништо што ќе значи воспоставување ред во рекламирањето во градот.

Од Градот образлагаат дека е во тек постапка за донесување програма за поставување рекламни паноа на подрачјето на Град Скопје, за да се дефинираат локациите по зони. Според претходните искажувања на градските власти на оваа тема, во градот има 900 локации за билборди.

Најголем проблем со нив е што се поставуваат без некој особен ред, многу се наметливи и им пречат на возачите, односно го одвлекуваат вниманието. Проблем е и што огромните паноа се поставуваат на пешачките патеки и буквално им висат над глава на минувачите.

Не е јасно дали со новите правила на игра во оваа област ќе биде утврден некаков ред и за куќните совети на зградите, односно за условите и начините на кои ќе може да се поставуваат рекламни паноа на фасадите, со оглед дека се работи за приватен имот, а не за јавни површини.

Анела Петрова

Рекламни платна за руинираните објекти во центарот

Советничката група на СДСМ ќе му предложи на градскиот совет да се прекријат руинираните објекти во централното градско подрачје, а згора и да заработува од тоа

Нема јунак да ги среди билбордите

Градот Скопје повторно објави јавен повик за избор на консултант за доделување под концесија локации на кои ќе се поставуваат рекламни паноа, откако на претходниот повик не се јавил ниту еден понудувач

Откако првиот не успеа, Градот Скопје повторно објави јавен повик за избор на консултант за доделување под концесија локации на кои ќе се поставуваат рекламни паноа во Скопје. Како што објаснуваат од Градот, на претходниот повик не се јавил ниту еден понудувач и затоа се принудени да ја повторат тендерската постапка.

Секторот за сообраќај во Градот може да ги утврди најдобрите позиции за поставување билборди, кои нема да пречат во безбедното одвивање на сообраќајот, како и од естетски аспект, но се' друго што е поврзано со економската одржливост на проектот за начинот на издавање, цените и комплетното стопанисување е работа за стручен консултант.

- Со изборот на консултант Градот настојува да најде сеопфатно и долгорочно решение за ова прашање, потенцираат од одделението за односи со јавноста. Оттаму додаваат дека до завршувањето на постапката за концесија, согласно новиот елаборат, билбордите ги стопанисуваат старите концесионери во согласност со правата и обврските што ги имаат преземено со договорите. Но, на концесионерите „Акцент медиа“ и на „Еуролинија“ им истекоа договорите на крајот на минатата година.

Од „Акцент медиа“, која е дел од австриската групација „Епа медиа“, објаснуваат дека во случај кога некој договор има третман на истечен, меѓусебните односи се регулираат со анекси, кои имаат важност до дефинирањето на новиот договор, кој може, но не мора да има различна содржина од претходниот документ.

- „Акцент медиа“ ќе ги почитува своите обврски се' до моментот кога евентуално новите правила на регулирање на релациите Град Скопје - „Акцент медиа“ ќе се изменат - истакна Небојша Маслинко, директор на „Акцент медиа“.

Според него, заклучно со 2009 година, „Акцент медиа“ му плаќа годишен износ од околу 12 милиони денари на градот на име концесија за користење локации за рекламни паноа, комерцијални такси и комунални такси за ангажирани 250 локации. Од „Еуролинија“ не ни одговорија како ги регулирале односите со Градот во врска со концесијата на локациите за билборди. Тие во градот имаат вкупно 250 т.н. мегалајти и 320 ситилајти.

Како што првично беше најавено од скопскиот градоначалник Коце Трајановски, избраниот консултант ќе треба да ги утврди економската и правната поставеност на договорот со идните концесионери, како и финансискиот ефект од издавањето. Консултантот треба да помогне околу концесијата за билбордите, како што тоа е направено со трамвајот и со подземните премини, во изработка на физибилити-студија и во утврдувањето на оправданоста на таа концесија. Консултантот ќе има и задача да анимира доволен број странски компании што треба да конкурираат. Притоа, градот ќе биде поделен на неколку зони за да не може тендерот да го добие само една компанија. На тој начин, според Трајановски, ќе се демонополизира тој сегмент од работењето на Градот.

- Нормално, Градот со тоа очекува многу повеќе пари отколку што сега добива од билбордите. Од друга страна, треба да се среди и состојбата во оваа област - рече Трајановски кога првично ја објави одлуката на Градот да распише меѓународен тендер за избор на консултант за доделување под концесија локации за поставување рекламни паноа во метрополата.

Според податоци од Градот, со потпишувањето на концесискиот договор „Акцент медиа“ и „Еуролинија“ за периодот од 2003 година до истекување на договорот уплатиле вкупно околу 65 милиони денари. За билбордите дополнително се плаќа месечна комунална такса, во која се пресметува делот и за потрошена електрична енергија, согласно тарифникот на ЕВН, одобрен од Регулаторната комисија.

Анела Петрова

Билбордманија го зафати Скопје

Сања Наумовска

Во Скопје владее вистинска билбордманија. Рекламни паноа има на сите страни, на земја, но и во воздух. Како што засега стојат работите, хаосот со уличното рекламирање уште долго нема да се реши, бидејќи ниедна фирма не се јави на повикот на Градот за избор на консултант кој требаше да изработи правилник за поставување и користење на рекламните паноа, како и да избере нови концесионери. Дали градските власти и понатаму ќе останат на идејата консултант да им најде решение за бизнисот со билборди, или, пак, самите ќе се зафатат со средување на проблемите, засега не се знае. Јасно е само дека која варијанта и да биде избрана ќе треба време да се реализира. А, во меѓувреме, скопјани на секој чекор ќе се сопнуваат на некој билборд, рекламно пано или ситилајт.

Рекламните паноа последните десетина години се поставуваат на секој слободен простор, на тротоари, на раскрсници, пешачки премини, на фасадите и на покривите на зградите. И тоа не само на станбените, туку и на објектите кои со закон се прогласени за културно наследство. Од друга страна, голем дел од билбордите ја загрозуваат и безбедноста на учесниците во сообраќајот, бидејќи со тоа што се наоѓаат на проблематични локации не оставаат доволно простор на тротоарите за поминување на пешаците. Истовремено, оние со огромни димензии го одвлекуваат вниманието на возачите. Многу билборди се поставени и во непосредна близина на објекти и згради, така што речиси целосно „ги покриваат“. Посебен проблем се билбордите кои се наоѓаат на приватно земјиште, со големини од неколку десетици квадрати, за кои надлежните градски и општински власти не можат да преземат ништо.

Според Законот, само за рекламните паноа со површина поголема од 12 квадратни метри е потребна посебна дозвола за поставување, за што, пак, неопходни се низа елаборати, меѓу кои и за безбедност на објектот. Елаборатот за рекламирање на јавни површини датира од 1998 година и во него единствен критериум при поделбата на локациите на кои може да се постави рекламата се смета пропишаната големина која не смее да надминува 12 квадрати. Бројот на локации за поставување паноа во Скопје тогаш изнесувал 8.128 места и од тогаш до денес не се направени корекции.

Посебно е прашањето за безбедноста на билбордите за чие поставување не треба никаква дозвола, ниту, пак, градежен проект за стабилност. Дали рекламните паноа имаат рок на траење, кој ги сервисира, кој ќе одговара доколку се повтори случајот кога се сруши билборд и повреди човек, се отворени прашања кои уште долго време ќе бидат без одговор.

Според градските власти, обврска на консултантот требаше да биде решавање на поголем дел од проблемите врзани со концесионирањето на билбордите во кои спаѓаат и овие прашања. Консултантот требаше да направи анализа колку билборди му требаат на Скопје, на кои места ќе може да се постават и колку ќе се наплатува за нив. Локациите треба да се поделат во зони од кои ќе зависи и цената.

Требаше да биде направен и нов модел на концесиски договор врз основа на кој ќе се прави изборот на можни концесионери и нивниот број. Новиот правилник треба да даде одговор и на прашањата дали ќе се дозволи рекламирање на фасадите и на покривите на зградите и дали за тоа ќе треба дозвола од локалните власти или, пак, како што беше случајот досега, само согласност од станарите и куќниот совет.

Пред две години завршија договорите на Градот Скопје со концесионерите „Акцент медија“, кој има 250 билборди, и „Лазов груп“, кој работи со 250 мегалајти и 320 ситилајти. Договорот не е продолжен со ниту една од овие фирми, првенствено заради регулирање на финансискиот момент, велат од Градот Скопје. Цената од 100 денари за квадратен метар, колку што добивал Градот од концесионерот, е прениска, а со бизнисот со билборди може да се озбезбеди поголем приход за градската каса.

Сепак, секојдневно се менуваат реклами на билбордите низ Скопје, а двете фирми се' уште работат со нив. Тие склучуваат анекс договори со Градот, кои ќе бидат во важност до изборот на нови концесионери. Колку време ќе трае оваа состојба, не се знае, но очигледно е дека им одговара и на двете страни. „Акцент медија“ и „Лазов груп“ ќе останат во бизнисот уште некоја година, а од друга страна без прекин ќе се полни и градскиот буџет. Анекс-договорите за концесионирање на билбордите се со истите услови како и претходните договори, а ниту една од договорните страни немала иницијатива за менување. Сепак, потенцираат градските власти, договорите со новите концесионери, без разлика дали ќе се бараат преку консултант или не, ќе се разликуваат од досегашните, особено во финансискиот дел, се разбира, во корист на градскиот буџет.

Градските власти најавуваат и раскинување на договорот со „Продукција перспектива“, фирма која веќе десетина години има ексклузивно право да поставува реклами и патокази на канделабрите низ градот. Нивниот договор, за разлика од оние на „Акцент медија“ и „Лазов груп“, не е временски ограничен и може да се раскине само со спогодба. „Градот Скопје преговара со ’Продукција‘ за изнаоѓање решение за проблемот“, кратко информираат градските власти, додека фирмата без никакви рокови или ограничувања, поставува реклами со обврска само да ја плаќа струјата што ја трошат.

Силниот ветар што вчера достигна и до 100 километри на час кутна џиновски билборд на булеварот " Јане Сандански" во Општина Аеродром. За среќа, не повреди никого, ниту пак предизвика материјални штети. Сепак, треба да се потенцира дека при секое невреме се случува по некој сличен инцидент. Да не го споменуваме трагичниот настан во Битола, што се случи не толку одамна кога настрада еден жител. Тоа би требало да биде аларм за сите рекламни компании кои ги поставуваат билбордите, особено да внимаваат на сигурноста при поставување на големите рекламни паноа.

http://vecer.com.mk/?ItemID=5A9F42058D8B1640ADE85C80DEF7B7CB

Коце ги шитка билбордите

• Објавено: пред 8 часа |
• Прочитано: 532 |
• http://www.plusinfo.mk/print/Koce-gi-shitka-bilbordite - Печати |

Градската власт одлучи рекламните билборди во градот, на магистралните и собирни улици, пешачки зони и зелени површини, да ги даде под концесија, и тоа на четири различни концесионери, за да се избегне монополска позиција во управувањето со рекламните површини.

Според нацрт студијата за уредување на оваа дејност, Градот ќе се  подели во четири зони, и во секоја од нив ќе може да се постави одреден и унифициран тип билборд. Четирите избрани концесионери ќе можат да стопанисуваат со билборди од сите четири зони, но, под точно утврдени стандарди и правила. Ќе треба да инвестираат во изработка на три типови билборди предвидени за зоните, но и да ги отстранат постоечките, каде што е потребно.
Во строгиот центар на градот, во „Мал ринг“, ќе бидат дозволени само „сити лајт“ билборди и дигитални ЛЦД дисплеи. Студијата предложува и паноа со димензии 4 на 3 метри, со унифициран дизајн и боја, како и билборди со средна големина. Дефинирани се и материјалите од кои ќе се изведуваат паноата,  конструкцијата и осветлувањето, како и точните локации.
Целта на проектот е да се зголемат приходите на градот и да се воведе ред во областа на рекламирањето на јавни простори. За разлика од сегашната состојба, бројот на билборди во центарот ќе се намали, а во третата зона, на реконструираните булевари, каде што постојат услови, нивниот број ќе се зголеми, особено на булеварите Србија, Теодосиј Гологанов, Илинден, Словенечка,  каде што речиси и нема билборди.
-Нацрт студијата за концесионерство е готова. Ќе се внимава компаниите кои ќе ги добијат тендерите да можат да стопанисуваат подеднакво со билборди од четирите зони во градот, но, и на тоа да не аплицираат ќерки фирми - вели градоначалникот Коце Трајановски.
Анализата на постоечката состојба покажува дека во градот има околу 500 билборди, кои од аспект на дизајнот се на многу ниско ниво. Не постојат утврдени стандарди за ваков тип на рекламирање, а локациите не се ажурирани. Нема ни пропишани норми за оваа област, освен дека билбордите треба да не ја нарушуваат сообраќајната безбедност.

Актуелните фирми кои беа на презентацијата на студијата за концесионерство се пожалија дека условите од тендерот се тешко исполнителни, бидејќи од идните концесионери се бара да извадат дел од постоечките билборди, да изработат нови, за што се потребни многу пари. Особено, што во овој период многу компании се двоумат дали воопшто да инвестираат во нешто следните неколку години. Фирмите заклучија дека проектот е бајковит, бидејќи Градот во основа на проектот бара начин да си го зголеми профитот, а фирмите треба да инвестираат во сѐ. Велат дека вложените пари нема да ги извадат ни за 24 години, а камо ли за 10.